Joni 9

Jesu mbwaakaponya muntu wakazyalwa moofu

1Naakali kuyabweenda Jesu wakabona mwaalumi moofu kuzwa kukuzyalwa kwakwe. 2Basikwiiya bakwe bakamubuzya kuti, “O Mwiiyi, ino nguni wakacita cinyonyoono cakacitizya kuti muntu ooyu azyalwe kali moofu? Sena ncinyonyoono cakwe mwini naa ncabazyali bakwe?” 3Jesu wakaingula kuti, “Tazili nzinyonyoono zyamuntu ooyu, niziba zyabazyali bakwe pe, pele cakacitika oobu kuti Leza abonye milimo yakwe kwiinda mulinguwe. 4Nilicili sikati tuleelede kubeleka milimo yayooyo wakandituma, nkaambo masiku alaza muntu natakonzyi kubeleka pe. 5Necili munyika, ndimumuni uumunikila nyika!”

6Naakamana kwaamba boobo, wakaswida mate ansi, akukanda bulongo angawo, wakananika moofu ooyo kumeso. 7Wakamwaambila kuti, “Koya ukasambe mukaziba ka Siloamu.” (Eeci caamba kuti, “Kutumwa.”) Mpoonya wakainka waakusamba. Naakaboola wakali kubona.

8Lino bakulimbabo alimwi abaabo bakali kumubona kakumbila bakati, “Sena ooyu teensi yuulya wakali kukkala anze akukumbila?” 9Bamwi bakazumina kuti, “Ngonguwe,” pele bamwi bakakaka bakati, “Bakozyanya buyo.” Walo mwini wakabaambila kuti, “Iiyi, ndime.” 10Mpoonya bakamubuzya kuti, “Ino wabona buti?” 11Wakabaingula kuti, “Muntu wiitwa kuti Jesu nguwakanda bulongo akundinanika kumeso. Wandaambila kuti, ‘Koya kukaziba ka Siloamu ukasambe.’ Eelyo ndainka akusamba. Mpoonya aawo ndakonzya kubona.” 12Bakamubuzya kuti, “Ino nguli?” Wakati, “Nsizi nkwabede.”

13Bakamuleta ku Bafalisi muntu ooyo wakali moofu. 14Lino mwakali mu Buzuba bwa Kulyookezya butegwa Sabata aawo Jesu naakakanda bulongo akumucitya kuti abone. 15Bafalisi bakamubuzya alimwi kuti, “Ino wakubonya buti?” Wakabaambila kuti, “Walamba bulongo kumeso aangu, eelyo ndaakusamba, aboobo ndakonzya kubona.”

16Bamwi Bafalisi bakaamba kuti, “Muntu ooyu tazwi kuli Leza pe, nkaambo tabambi Buzuba bwa Sabata.” Pele bamwi babo bakati, “Ino inga muntu sizinyonyoono wakonzya buti kucita maleele aali boobu?” Nkabela bakaandaana muli cabo. 17Kumamanino bakamubuzya alimwi mwaalumi ooyo wakali moofu kuti, “Ino yebo uyeeya buti zyamuntu ooyu obuya mbwaakubonya?” Walo wakati, “Musinsimi.”

18Bafalisi tiibakasyoma kuti muntu ooyo wakali moofu alimwi kuti wakaponyezegwa buya, limwi bakaita bazyali bakwe. 19Bababuzya kuti, “Sena ooyu ngomwanaanu ooyo ngomwaamba kuti wakazyalwa moofu? Ino kayi wakonzya buti kubona?” 20Bazyali bakwe bakaingula kuti. “Tulizi kuti ooyu mmwaneesu, akuti wakazyalwa moofu, 21pele tatuzi mbwaakonzya kubona, nikuba kuziba yooyo wamuponya. Amumubuzye mwini, ulamwaambila, nkaambo mmuntu mupati.” 22Bazyali bakwe bakaamba boobu nkaambo kakuyoowa bapati ba Bajuda, nkaambo bapati aabo bakali zuminene kale kuti kufumbwa uuti mwaambe kuti Munanike wa Leza atandwe mucikombelo. 23Nkankakaako bazyali bamuntu ooyo ncibakati, “Amumubuzye mwini, nkaambo mmupati.”

24Alimwi, lwabili bakamwiita muntu ooyo wakazyedwe moofu, bakati kulinguwe, “Kosyomezya muli Leza kuti waamba masimpe, nkaambo tulizi kuti muntu ooyo wakuponya ngusizinyonyoono.” 25Wakaingula kuti, “Naa muntu ooyo ngusizinyonyoono, nsizi pe, pele cintu comwe ncezi, ndalimoofu, lino ndabona.” 26Bakati kulinguwe, “Ino wakucita buti? Wakuponya buti?” 27Wakabaingula kuti, “Ndamwaambila kale, pele taakwe nimwaswiilila. Ino muciyandila nzi kumvwa alimwi? Sena anywebo muyanda kuba basikwiiya bakwe?”

28Eelyo bakamutukila akwaamba kuti, “Yebo nduwe sikwiiya wakwe, swebo tuli basikwiiya ba Mozesi. 29Tulizi kuti Leza wakali kwaamba kuli Mozesi, pele ooyo muntu tatuzi ankwazwida pe.” 30Mwaalumi ooyo wakabaingula kuti, “Eeci cilagambya kapati! Tamumuzi ankwazwida, pele mebo wandibonya. 31Tulizi kuti Leza tamvwi basizinyonyoono, umvwa buyo yooyo muntu uumukomba akucita nzyayanda. 32Kuzwida kumalengelo aanyika takunamvwidwe muntu naba omwe wakaponya muntu wakazyalwa moofu. 33Kuti muntu ooyo naatali kuzwa kwa Leza, naatakonzya pe.” 34Balo bakati kulinguwe, “Sena inga yebo watwiisya, ookazyalilwa mucinyonyoono?” Mpoonya bakamutonkaikila anze.

35Jesu naakamvwa kuti bamutandila anze, wakamujana akuti kulinguwe, “Sena ulasyoma mu Mwanaa Muntu?” 36Wakaingula kuti, “Ino Mwanaa Muntu nguni, mmusyome?” 37Jesu wakati kulinguwe, “Ulimubwene, ngonguwe ooyo waambaula ayebo.” 38Wakati, “Ndasyoma, O Mwami.” Mpoonya wakakomba Jesu. 39Mpawo Jesu wakaamba kuti, “Ndakazida kubeteka ansi aano, kutegwa aabo bataboni babone, alimwi aabo babona boofwaale.” 40Bamwi ba Bafalisi bakali aafwiifwi anguwe bakaamvwa makani aaya, mpoonya bakati kuli Jesu, “Sena aswebo tuliboofu?” 41Jesu wakati kulimbabo, “Kuti nimwali boofu nimutakwe mulandu pe, pele ono mbomulyaamba kuti, ‘Tulalanga,’ mulandu wanu ulikukkede kuli ndinywe.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Joni 9: Tonga96

Highlight

ಶೇರ್

ಕಾಪಿ