Mateo 20
20
Kishimpi kya bamingilo baingijilenga mu bujimi
1Mambo bufumu bwa mwiulu bwapashang'ana na muntu mwina nzubo wakelejile lukelo na kumona bamingilo ba kwingila mu bujimi bwanji bwa ming'anzang'anza. 2Kabiji byo aumvwang'ene naabo bamwingilo, mu juba jimo ndenali imo, wibatumine mu bujimi bwanji. 3Kabiji pepi na awala wabusatu#20:3 Awala wabusatu: ke kimye kya 9 koloko walupukile jibiji, wamwene bakwabo baimanatu babula bya kuuba pa kisankanyi, 4ne aye wibambijile amba, ne anweba yainga mu bujimi bwa ming'anzang'anza, nsakwimufweta kyonka kyafwainwa kwimupa. Ke baye ne kuya. 5Kabiji ne pa kushinkimana juba, ne pa kulemba juba walupukile, waubile byonka byo ajikuuba. 6Kabiji ne mabanga, juba pa kutwala pa bichi walupukile, wibataine bakwabo baimanatu babula bya kuuba, wibambijile amba, mambo ka o mwaimenatu juba jonse? 7Kumvwa abo amba, mambo kafwako muntu witupa mwingilo ne. Kumvwa aye amba, nanchi ne anweba yainga mu bujimi bwa ming'anzang'anza.
8 #
Levi 19:13; Mpitu 24:15 “Kabiji byo bwaijile, mwina bujimi wamwambijile kapitao wanji amba wibete bamwingilo, utendekele bapelaako kwibafweta, bino wiye upe ne batanshi. 9Kabiji pa kwiya ba pa kimye kya juba pa kutwala pa bichi, bonse batambwile ndenali imo, imo. 10Kabiji pa kwiya batanshi, baketekejile amba, tusakutambula ne ikwabo, kabiji ne abo nabo batambwiletu pamo ndenali imo, imo. 11Kabiji pa kwiitambula, bamunenene mwina nzubo, 12amba bano bapelaako baji kwingila awala umo, kabiji wibesakanyatu pamo ne atweba baji kwingila juba jonse, sa tufwa na mute!
13“Ponkapo wamukumbwile umo amba, mukwetu kechi nakuubila kibi ne. Nanchi kechi twaji kumvwang'ana nobe pa ndenali imo nenyi? 14Shikula yobe uyenga, kyo kyaswa muchima wami kumupa wapelaako pamo ne obewa. 15Kizhila nyi kuuba byo nasaka kuuba na bintu byami, inyi wangubila kichima amiwa pakuba kyawama? 16#Mat 19:30; Mako 10:31; Lu 13:30Byonkabyo bapelaako bakekala ke batanshi, ne batanshi ke bapelaako.”
Yesu wa ambile jabusatu na mambo a lufu lwanji
(Mako 10:32-34; Luka 18:31-34)
17Kabiji Yesu byo ayilenga ku Yelusalema, wasendele baana banji babwanga, ne kwibambila mu jishinda amba, 18“Talai tubena kuya ku Yelusalema, kabiji Mwana Muntu bakamusolola ku bang'anga bakatampe ne ku banembeshi, ne abo bakamufwisha nao a lufu, 19ne kumupana ku Bangentila, kabiji ne abo nabo bakamuuba mwenga, ne kumututaula, ne kumupopa pa musalabu, kabiji mu juba ja busatu ukasangulwa.”
Byalombele ba Yakoba ne Yoano
(Mako 10:35-45)
20Ponkapo inanja baana bakwa Zebede, waishile na baana banji babalume na kumupopwela, ne kumulomba kintu.
21Ne aye Yesu wamwipwizhe amba, “Usaka ka?”
Kumvwa aye amba, “Ambai amba, bano baana bami babalume babiji bakekale mu bufumu bwenu, umo ku kuboko kwenu kwa kilujo, ne mukwabo ku kipiko kyenu.”
22Pakuba Yesu wamwambijile amba, “Kechi mwayuka kyo musaka ne. Mwakonsha kutoma katomeno kontoma amiwa nyi?”
Ne abo bamwambijile amba, “Twakonsha.”
23Kumvwa aye amba, “Kine mukatoma aka katomeno kontoma amiwa, pakuba kwikala ku kilujo kyami nangwa ku kipiko kyami, kechi kyo kyami kya kupana ne, kyokya bonkaba bo banengezhezhakyo jimo kwi Bataata.”
24Kabiji baana babwanga bakwabo jikumi pa kwikyumvwa, bebazhingijile aba banabankazhi babiji.
25 #
Lu 22:25,26 Kabiji Yesu wibechile ko aji ne kwibambila amba, “Mwayuka amba, bamfumu ba Bagentila bebobila bantu babo bunkambo, kabiji bakulumpe babo nabo bebobila luusa. 26#Mat 23:11; Mako 9:35; Lu 22:26Pakuba kechi kiji byonkabyo mwi anweba ne. Bino aye wasaka kwikala mukulumpe wenu, ekale ke wamwingilo wenu; 27ne aye wasaka kwikala mutanshi pa bonse, ekale ke muzha wenu, 28byonka byo aishile Mwana Muntu, kechi waishile amba, bamwingijile ne, poso amba ebengijile, ne kupana mweo wanji ke kya kukuula bavula.”
Kubukwa kwa bampofu babiji
(Mako 10:46-52; Luka 18:35-43)
29Kabiji pa kufuma mu Yeliko, jibumba jikatampe ja mulondejilenga. 30Kabiji ponkapo, bampofu babiji baikajile ku jishinda, pakumvwa amba, Yesu ubena kupita, babijikile amba, “Nkambo betubile lusa! Anweba Mwana Davida!”
31Kabiji jibumba jibakainye amba bazhindamepo. Bino abo kepo bakolomokeshe na kubijika amba, “Nkambo betubile lusa! Anweba Mwana Davida!”
32Ponkapo Yesu waimene, wibechile amba, “Ikika kyo musaka nemubile?”
33Kumvwa abo amba, “Nkambo, twasaka meso etu alabe.”
34Kabiji Yesu, wibobijile lusa, wibakwachile pa meso abo, kabiji ponkapotu ke balabe, ne kumulondela ke bamulondele.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mateo 20: KNTP
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
