Mateo 19
19
Mambo a kwikana
(Mako 10:1-12)
1Ponkapo Yesu, byo apwishishe kwamba bino, wafumine mu Ngalilea, ne kuya mumande a mu Yudea bushiya bwa mukola wa Yodano. 2Ne mabumba akatampe amulondejile, ne aye wibabukile konkakwa.
3Kabiji Bafaliseo baishile kwi aye na kumweseka amba, “Lelo nanchi kizhila mwanamulume kukana mukazhanji pa mambo aji onse nyi?”
4 #
Nte 1:27; 5:2 Kumvwa aye amba, “Kechi mwatangilepo amba, aye wibalengele ku ntendekelo, wibalengele mwanamulume ne mwanamukazhi nenyi? 5#Nte 2:24Ne kwamba amba, kyo kyo akalekela muntu shanji ne inanji, ukalamachila ku mukazhanji, ne abo babiji bakekala ke mubiji umotu. 6Onkao mambo kechi baji babiji ne, ke mubiji umo. Byonkabyo akya kya lamankanya Lesa, muntu kechi ekyabanye ne.”
7 #
Mpitu 24:1-4; Mat 5:31 Ba Faliseo bamwipwizhe amba, “Mambo ka Mosesa kyoakambizhizhe amba, muntu apane nkalata ya kwikana, kabiji ne kumuleka?”
8Aye Yesu wibakumbwile amba, “Mosesa wimulekele kukana bakazhi benu mambo a kukosa kwa michima yenu. Pakuba kechi byo byo kyajinga ku ntendekelo ne. 9#Mat 5:32; 1 Ko 7:10,11Kabiji nemwambila namba, wa kumukana mukazhanji, pakubula mambo a bukende, ne kusongola mukwabo wauba bukende, ne aye wamusongola awa ye bakana, aye naye wauba bukende.”
10Baana banji babwanga ba mwambijile amba, “Umvwe mambo a mwanamulume ne mukazhanji aji byonkabyo, nanchi kusongola kechi kwawama ne.”
11Kumvwa aye wibambijile amba, “Kechi bonse bakonsha kwiatambula ano mambo ne, poso bonka bapewao. 12Mambo kobaji bantungu, basemwa naabo kufuma munda mwaba inaabo, kabiji bakwabo bantungu, bo baubisha buntungu ku bantu, kabiji kuji bakwabo bantungu, beubisha buntungu bene na mambo a bufumu bwa mwiulu. Wakonsha kwikitambula, ekitambule.”
Yesu byo ebapesheshe baana ba bacheche
(Mako 10:13-16; Luka 18:15-17)
13Kabiji baletele baana ba bacheche amba, ebabike maboko ne kwibalombelela, pakuba baana babwanga bebakainye. 14Pakuba Yesu wibambijile amba, “Balekai baana ba bacheche beye kwi amiwa, kwibakanya ne mambo bufumu bwa mwiulu bo bwabo baji bibye.”
15Kabiji wibabikile maboko ne kufuma wafumineko.
Nsongwalume munonshi
(Mako 10:17-22; Luka 18:18-23)
16Kabiji ponkapo, muntu waishile ko aji amba, “Mufunjishi, ikika kyawama kyonsa kuuba namba ntambule bumi bwa myaka?”
17Kumvwa Yesu wamwambijile amba, “Mambo ka mwangipuzha pa kyawama? Kujitu umo wawama. Kabiji umvwe mukeba kutwela mu bumi, mulame mikambizho.”
18 #
Lupu 20:13; Mpitu 5:17;
Lupu 20:14; Mpitu 5:18;
Lupu 20:15; Mpitu 5:19;
Lupu 20:16; Mpitu 5:20 Ne aye wamwipwizhe amba, “Ng'anyi mikambizho?”
Kumvwa Yesu amba, “Kwipayang'ana ne, kuuba bukende ne, kwiba ne, kwibabepela bantu ne, 19#Lupu 20:12; Mpitu 5:16; Levi 19:18unemeke bashobe ne bainobe kabiji, utemwe mukwenu byonka byowitemwa obewa mwine.”
20Nsongwalume wamwambijile amba, “Abyo byonse nebilama, kyo nabulwa ki ka?”
21Yesu wamwambijile amba, “Umvwe musaka kulumbuluka, kapoteshai byonse byo muji naabyo, ne kupana ku balanda, kabiji mukekala na nsabo mwiulu, kabiji bino mwiye mundondele.”
22Nsongwalume pa kwikyumvwa kino, wafumineko na bulanda mu muchima wanji, mambo aye wajinga na bunonshi bwavula.
23Ponkapo Yesu wibambijile baana banji babwanga amba, “Kine nemwambila namba, kyakatazha bingi banonshi kutwela mu bufumu bwa mwiulu. 24Kabiji nemwambila jibiji namba, kyapeela ngamela kupita mu jiiso ja nguya, kukila munonshi kutwela mu bufumu bwa Lesa.”
25Kabiji baana banji babwanga pa kwikyumvwa, bakuminye bingi ne kwipuzha amba, “Nanchi ng'anyi wakonsha kupuluka?”
26Yesu pa kwibatala wibambijile amba, “Ku bantu kechi kyakonsheka kubiwa ne, pakuba byonse byakonsheka kubiwa na Lesa.”
27Ponkapo Petelo wamwambijile amba, “Talai atweba twaleka byonse ne kwimulondela, nanchi atweba tukatambula ka?”
28 #
Mat 25:31;
Lu 22:30
Kumvwa Yesu wibambijile amba, “Kine nemwambila namba, anweba ba kundondela, mu ntanda ipya byo akekala Mwana Muntu pa jitanda janji ja lukumo, ne anweba mukekala pa bipona jikumi na bibiji, na kwiichibila mambo mikoka jikumi na ibiji ya bena Isalela. 29Kabiji bonse baleeka mazubo, nangwa balongo, nangwa banyenga, nangwa bashabo, nangwa bainaabo, nangwa baana, nangwa majimi, pa jizhina jami, bakatambula byavula bya mu byonkabyo, kabiji bakaswana bumi bwa myaka. 30#Mat 20:16; Lu 13:30Pakuba bavula batanshi bakekala ke bapelaako, kabiji bapelaako bakekala ke batanshi.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mateo 19: KNTP
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
