Luka 20

Riborio igoro y’okobua kwa Yeso

(Mat 21:23-27; Mar 11:27-33)

1Rituko erimo ekero Yeso arenge kworokereria abanto Hekalu ime, na korandia enchiri, abakuani abanene na aborokia b’amariiko amo nabagaaka bakamoorokera, 2bakamoteebia, “Toteebie nase okobua ki ogokora aya? Ning’o okoete okobua oko?”

3Akabateebia, “Nainche nkobaboria nde inwe ring’ana erimo, monteebie: 4Ebatiso ya Yohana, niigoro yarwete, gose nase Mwanyabaanto?”

5Bagateebania barabwo ase barabwo, bakobora, “Toise goteeba: Niigoro yarwete, nigo aratoborie: Naki motamwegenete rende? 6Korende toise goteeba: Nase Mwanyabaanto yarwete, abanto bonsi nabatoake amagena; ekiagera banchire ng’a Yohana nomobani orenge.” 7Bakairaneria, “Titomanyeti aase yarwete.”

8Yeso akabateebia, “Nonya ninche tinkobateebia inwe nase okobua ki ngokorera aya.”

Omoreng’anio bw’omogondo bw’emesabibu

(Mat 21:33-46; Mar 12:1-12)

9 # Isaya 5:1 Agachaaka goteebia abanto omoreng’anio oyo: “Omonto akarema omogondo, agasimeka emesabibu imeo, akaywatananera abaremi, akagenda orogendo ase engaki entambe. 10Ekero kie rigesa agatoma omosomba ase abaremi baria, erinde bamoe ensemo yaye y’amatunda y’emesabibu. Abaremi bakamoaka, bakamoseria atari na gento. 11Naende agatoma omosomba onde; bakamoaka oyio boigo, bakamokora bobe, bakamoseria atari na gento. 12Agatoma naende oyo o gatato, bakamoaka chingoma, bakamotuguta isiko. 13Oria omonyene omogondo bw’emesabibu akabora: Inki ndakore? Nintome omwana one, omwanchwa one, aande ere inabamosike. 14Korende abaremi baria bagachia komoorora, bagateebania barabwo ase barabwo: Oyo nere omonyamwando, tomoite gaki, omwando onyare koba oyoito. 15Bakamotuguta isiko korwa ase omogondo bw’emesabibu, bakamoita. Naki rende oria omonyene omogondo bw’emesabibu arabakore? 16Nachiche asirie abaremi baria, na omogondo oria bw’emesabibu nayoe abande.” Bagachia koigwa aya, bakaboora, “Taba bo.” 17#Zab 118:22Akabarigereria, akabora, Engencho yaye ninki, ring’ana eri ririikeire:

Rigena abaagachi bangete

riabeire rigena rinene ri’ekoona?

18Kera omonto oragwe igoro ase rigena erio nabunanekane, na ere oyo riragwere narimosenyente.

19Aborokia b’amariiko na abakuani abanene bakarigia komobwata ensa eyio eyio, ekiagera bamanyete ng’a omoreng’anio oria nabwo akobayeena, korende bakairoka abanto.

Riborio igoro y’okoa Kaisari ebango

(Mat 22:15-22; Mar 12:13-17)

20Erio bakamoboera Yeso, bagatoma chirooti, na barabwo bagekora buna nabanyene oboronge, erinde bamobwate ase ogokwana kwaye, bamobeke ase okobua kwa gabana na obogambi bwaye. 21Bakamobooria, “Omworokia, twamanyire ng’a nigo ogokwana na kworokereria ayare boronge, gose tori koyiera monto, korende ase ekeene nigo okworokereria enchera ya Nyasae. 22Inee! Mboronge koa Kaisari ebango, gose taibo?”

23Korende akamanya obong’ainereria bwabo, akabateebia, 24“Inyorokie ebesa! Ekieni eke na amariiko aya nebiang’o?”

Bakaboora, “Nebia Kaisari.”

25Akabateebia, “Nabo, ebia Kaisari moe Kaisari, na ebia Nyasae moe Nyasae.”

26Tibanyaara komobwata ase ring’ana riaye ase obosio bw’abaanto; bagakumia ase okoiraneria kwaye, bagakira.

Riborio igoro y’okobokigwa

(Mat 22:23-33; Mar 12:18-27)

27 # Ogok 23:8 Erio abande ase Abasadukai bakamochiera, baria bakoboora ng’a okobokigwa tikori, 28#Okoir 25:5bakamobooria, “Omworokia, Musa natoriikerete ng’a momura omwabo omonto karakwe, na ere nare nomokuungu, korende tari nabana, nagwenerete momura omwabo atware omokungu oria, atenenerie momura omwabo egesaku. 29Bono mbarenge abamura ba ise omo batano na babere. Oyo bw’eritang’ani akanyuoma omokungu, agakwa, tatiga abana; 30na oyio o kabere akamotwara, na ere agakwa, tatiga bana; 31nonya noyo o gatato akamotwara. Naboigo bonsi batano na babere bagakwa, tibatiga abana. 32Magega y’ayio omokungu oria nere agakwa. 33Inee! Ase okobokigwa mokang’o arabe? Ekiagera bonsi batano na babere mbamotwarete.”

34Yeso akabateebia, “Abana b’ense eye nigo bakonyuoma na konyuomwa; 35korende barabwo abaabarirwe bagwenerete konyora ense eria, na kobokigwa korwa ase abakuure, tibakonyuoma, gose tibakonyuomwa. 36Naende tibagokwa, ekiagera nigo barabe koreng’ana buna abamalaika, na abana ba Nyasae bare, ekiagera nabana b’okobokigwa. 37#Okong’ 3:6Nonya Musa naorokereretie ng’a abakuure nkobokigwa bare. Ayio nabo ateebete agwo ase ring’ana ri’egetutu, ekero agwatora Omonene ng’a nere Nyasae o Aburaamu, na Nyasae o Isaka, na Nyasae o Yakobo. 38Nabo ere tari Nyasae bw’abakuure, korende Nyasae bw’abare moyo, ekiagera bonsi nigo bare moyo asare.”

39Abande ase aborokia b’amariiko bakairaneria, “Omworokia, gwakwanire buya.” 40Naki monto onde taaba okomoboria ring’ana magega ase aya.

Riborio igoro ya Kristo

(Mat 22:41-46; Mar 12:35-37)

41Akabateebia, Naki abanto bagoteeba ng’a Kristo nomwana o Daudi? 42#Zab 110:1Naki Daudi nigo agoteeba ase Egetabu gia Zaburi,

Omonene agateebia Omonene one,

Ikaransa ensemo y’okoboko kwane gw’okorio,

43goika mbeeke ababisa bao babe inse y’amagoro ao.

44Daudi nigo akomoroka Omonene, naki rende aba omwana oye?

Ogokuurerwa igoro yaborokia b’amariiko

(Mat 23:1-36; Mar 12:38-40; Luk 11:37-54)

45Ekero abanto bonsi bamotegererete agateebia aborokigwa baye, 46“Mwerende korwa ase aborokia b’amariiko, abanchete gotaara beboyetie chianga chintambe, na gokwanigwa ase chichiiro, na goikaransa aase e ritang’ani ase chisinagogi, na aase e ritang’ani ase emeyega, 47abakourereria chinyomba chiababoraka, na ase obong’ainereria basaba ogosaba ogotambe. Abwo nabanyore ekiina kere ekenene kobua.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 20: EKGE

Highlight

ಶೇರ್

ಕಾಪಿ