JOHANA 15
15
Ketit ne bo sabibuk, ak temenik
1A ketit ne bo iman ne bo sabibuk, ak semberindet Baba. 2Tilei temet age tugul ne mi eng’ ane ne maiyiei logoek, ak kotilili temet age tugul ne yiei logoek si koi logoek alak. 3O tililen nguno amu ng’alek che kaamwawok. 4Omenya, ak amenyok. Ko u ye maimuchi temet koi logoek inegei, ngot ko mamenyei ketit; ko momuchi ak okwek, ngot ko momenya.
5A ketitab sabibuk, ko o temenik: inendet ne menya, ak amenye inendet, ko noto ne yiei logoek che chang’: amu momuchi oyai kiy okwege ngo mami ane kobotok. 6Ngo mamenya chi, kewirtoi inendet ko u temetab ketit, si koyaam; ak koyum bik, ak kowirji ma, ak kolalyo. 7Ngot omenya, ak komenyok ng’alekyuk, osom anyun kiy age tugul ne omache, si keyaiywok. 8Kigonyiti Baba eng’ nito, ye oiyie logoek che chang’; si oegu alamalyennyu. 9Ko u ye kichama Kwanda, ko u noto kiachamak agane: otebi eng’ chamnyennyu. 10Ngot oribe ng’atutikyuk, otebye anyun eng’ chamnyennyu; ko u ye kiarib ng’atutik che bo Baba, ak atebye eng’ chamnyennyi. 11Kaamwawok tuguchu, si kotebi eng’ okwek boiboiyennyu, si kobiit kosulda boiboiyeng’wong’. 12Ng’atutiennyu ni, ale ochamnye, ko u ye kiachamak. 13Matinyei chi chamnyet ne siirei ni, ale kogoito chi sobondanyi agobo choronokyik. 14O choronokyuk, ngot oyai tuguk che ang’atok. 15Ma aguurenok otwogik; amu manaei otwogindet kit ne yaei kiptaiyandennyi: ago kaaguurenok choronok; amu kaang’ang’wok tuguk tugul che kiagase Baba. 16Kima olewena, ago kialewenok, ak kiandeak, ale obe ak oii logoek, si kobiit kotebi logoekwok: si kobiit kogonok Kwanda kit age tugul ne osome eng’ kainennyu. 17Ang’atwok tuguchu, ale ochamnye.
Ng’ony, ak Tamirmiriet ne bo Imanit
18Ngo wechok ng’ony, onai ole kigowecha kotom kowechok. 19Nda o bo ng’ony, ta chamei ng’ony chechik: ago amu mobo ng’ony, ago kialewenok eng’ ng’ony, kowechok ng’ony anyun amu noto. 20Obwat ng’olyot ne kiamwawok, Masiirei otwogindet kiptaiyandennyi. Ngot ko kiusa ane, kousok ak okwek; ngot ko kinam ng’olyondennyu, konami neng’wong’ agine. 21Ago yaiywok tuguchu tugul agobo kainennyu, amu ma nai inendet ne kiiyokwa. 22Nda kima anyo ang’alalji ichek, ta matinyei tengek: ago nguno ko matinyei kit ne itiagegei agobo tengektanywa. 23Inendet ne wecha ko kawech Baba agine. 24Nda kima ayai eng’ kwenunywa boisionik che kima yai chito age, ta kima kotinyei tengek: ago nguno ko kagogeerech ak kagowechech ane ak Baba. 25Ago, si kosulda ng’olyot ne kigisir eng’ Ng’atutikwak, kele, Kigowecha buch.
26Ago ye kagoit Kagaigaindet, ne tun ayokwok kobunu Kwanda, Tamirmiriet ne bo imanit, ne bunu Kwanda, konyo kobaorianja: 27ak obaoriani ak okwek, amu kiomi kobota koboch taunet.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JOHANA 15: BUKUIT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
God's word open for all
©Bible Society of Kenya, 2020
