JOHANA 14
14
Oret ne itei ole mi kwanda
1Amogochi mugulelwekwok koiimgei: oyani Jehovah, oyana agane. 2Mitei gorik che chang’ eng’ gotab Baba; nda kima ko u noto, ta kiamwawok; awendi achobwok koret. 3Ak ye awe achobwok koret, anyone kogeny amutok; si ole ami omite ak okwek. 4Ak ole awendi, ongen oret.
5Kolenji Tomas, Kiptaiyandani, magingen ole iwendi; kinaitoi ano anyun oret? 6Kolenji Jesu, A oret, ak iman, ak sobondo: manyonjin chi Kwanda, ama eng’ ane. 7Nda kionaa, ta kionai Baba agine: ak kaonai inendet anyun koboch nguno, ak kaogeer inendet.
8Kolenji Pilipu, Kiptaiyandani, iboruech Kwanda, si koyamech. 9Kolenji Jesu, Kigitebi tugul ak okwek betusiek che chang’, ak tom inaa, Pilipu? Inendet ne kigogeera ko kigogeer Kwanda: imwae eng’ nee anyun, ile, Iboruech Kwanda? 10Tos meyani ile ami eng’ Kwanda, ak Kwanda eng’ ane? Ng’alek che amwawok ko mamwae anege: ago Kwanda ne menya ne yaei boisionikyik. 11Iyana amu ami eng’ Kwanda, ak Kwanda eng’ ane: anan oyana agobo boisionik icheget. 12Amwawok, iman, iman, ale, Inendet ne iyana, koyaei agine boisionik che ayae; ak koyaei boisionik che eech eng’ chuto; amu awendi ole mi Kwanda. 13Ak kit age tugul ne osome eng’ kainennyu, ayae, si kegonyit Kwanda eng’ Werit. 14Ngot osom kiy age tugul eng’ kainennyu, ayae kioto.
Kiaroru kele kiyogu Tamirmiriet
15Ngot ochama, oribe ng’atutikyuk. 16Ak asom Kwanda, ak kogonok Kagaigaindet age, si kotebi kobotok koigeny, 17noto Tamirmiriet ne bo imanit: ne maimuchi ng’ony kotaach; amu mageerei inendet, ama naei inendet: ago ongen inendet: amu tebyei kobotok, ak tun tebyei eng’ oring’wong’.
18Mabagaktook ko u kibananok: anyonjinok. 19Ta ko mi kitigin, si ma kogeera ng’ony; ago ogeera: amu asobe, osoptosi ak okwek. 20Eng’ betunoto onai ole ami eng’ Baba, ak okwek eng’ ane, ak ane eng’ okwek. 21Inendet ne tinyei ng’atutikyuk, ak koribei, ko noto ne chama: ak inendet ne chama ko chamat eng’ Baba, ak achame inendet, ak ang’ang’jige inendet.
22Kolenji Judas (ma Iskariot), Kiptaiyandani, kalya si ing’ang’weige, ama ing’ang’jige ng’ony? 23Kowolji Jesu kolenji, Ngo chama chi, korib ng’olyondennyu: ak kocham Baba inendet, ak kebwanji inendet, ak kemeny koboto inendet. 24Inendet ne machama ko maribei ng’alekyuk: ak ma nenyu ng’olyot ne ogase, ago bo Kwanda ne kiiyokwa.
25Kaamwawok tuguchu, kota ami kobotok. 26Ago inetok tuguk tugul Kagaigaindet, Tamirmiriet ne Tilil, ne iyogu Kwanda eng’ kainennyu, ak kobwatwok tugul che kaamwawok.
27Abagakwok kalyet; agonok kalyennyu: magonok ko u ye konu ng’ony. Amongoiimgei mugulelwekwok, anan koiyweis. 28Kaogas ko u ye kaamwawok ale, Awendi, ak anyone ole omi. Ngot ochama, ko oboiboi, amu awendi ole mi Kwanda: amu o Kwanda eng’ ane. 29Ak kaamwawok nguno kotom koyaak, si ye kagoyaak, oyan. 30Mang’alalwok mising’, amu nyonei ne o ne bo ng’ony: ama tinyei kiy eng’ ane; 31ago si konai ng’ony kole achame Kwanda, ak ko u ye kigona Kwanda ng’atutiet, ayae ko u noto. Ong’eetye, kebe.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JOHANA 14: BUKUIT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
God's word open for all
©Bible Society of Kenya, 2020
