Luka 22

Wango wʼeomeio ea Yesu

(Mt 26.1-5; Mk 14.1-2; Yoa 11.45-53)

1Elambo ea mampa esamba nyango, etangema Efendelo, eotutama, 2ko nkanga ya joso la bakoci bʼenkanda basaki elenge eʼiyʼoomʼende, ekiʼyʼoangaka banto.

Yudasa aolangela Nkolo

(Mt 26.14-16; Mk 14.10-11)

3Nkako Satana aolotswʼele Yudasa otangema Keliota, oki ndʼoanji wa ba-jom lʼafe; 4ko aocwʼosoola la nkanga ya joso la capitaines ndʼelenge eʼende olekya Yesu elʼiyo. 5Ko iyo baolokʼesaza, ko baolimeza wae bokaya nyongo. 6Ko aotungʼombale lʼiyo, ko aolasʼefosa wae olekyʼende elʼiyo ndʼekeke efa etukuluku eko.

Ezelo ea elambo eʼEfendelo

(Mt 26.17-25; Mk 14.12-21; Yoa 13.21-30)

7Nkako mbile ea mampa esamba nyango eokita, wete mbile eomʼiyo bonʼowa mpate eʼEfendelo. 8Ko Yesu aotoma Petelo la Yoane, aolakela, Lokenda, loteleza elambo eʼEfendelo, wae tolʼeko. 9Ko iyo baolouola, Olanga wae tezʼeko nko? 10Ende aolasangela, Bala, aʼinyʼokita nda bonanga, bontʼomo ifo-kumana lʼinyo otomba bolangi wʼasi. Lokimʼende ndʼilombe indotswʼende; 11ko lifosangela bomongʼilombe, Bolaki akuola we, Ntena eʼemi lʼakimiʼakami ola elambo eʼEfendelo ele nko? 12Ko ende ifeneyʼinyo ntena eʼonene eʼaliko, etandema lʼelemo bendeji; lezʼelambo eko. 13Iyo baokenda, ko baotana o ngo-kiʼnde asangelaka. Ko baoleza elambo eʼEfendelo.

Elambo ea Nkolo

(Mt 26.26-30; Mk 14.22-26; 1 Kol 11.23-25)

14Aki ekeke okitaka, aokitase nda mesa, ende la bikima. 15Ko aolakela, Ndangaki o la mposa mongo wae nde Efendelo ene lʼinyo atafʼerrii enʼelo! 16Elʼemi nsangelʼinyo, mpautʼolʼeko lenkina elaka nko eko eokoka nda likulaka ja Nzakomba. 17Ko aokolʼekala, ko akiʼndʼosimaka Nzakomba boya, aokela, Lokolʼekalʼene ko lokafʼeko elʼinyo, 18elʼemi nsangelʼinyo, limʼaeyoko mpaomela lima limuka ja vina elaka nko likulaka ja Nzakomba jokita. 19Ko aokola mampa, aosima Nzakomba boya, aotenʼeko, ko aolakayʼiyo, aokela, Ene wete jonge likami, likaema ndʼeloko ekinyo. Lokela joi line nda jofwa likami. 20Ko nkʼelengʼeko, ndʼafeka bʼelelo, aokolʼekala, aokela, Ekalʼene ele elembelo eʼokolo eʼaeyoko ndʼalongo bakami bandutezama ndʼeloko ekinyo. 21Lolo bala, likata jʼontʼonjangelʼemi lile lʼemi nda mesa. 22Bonʼowʼonto acwa ngoki joi liko angemaka wango, lolo elo elʼontʼoko ondoangelʼende! 23Ko baangaki juwana wae bontʼokiyo ocwʼokela joi line na.

Yesu afela jasi j a mpifo lofeli

24Ko baolikyana ekoji eʼinkunya, wete bontʼokiyo osimama ngʼowa joso na. 25Yesu aolakela, Rois yʼafaya batu-kʼiyo lotuko, ko bampifo bakiyo baotangema Bakeli bʼolotsi. 26Inyo lofa ngoko, lolo kela okinyo oleki ayale ngʼokune, ko bokonji ayale ngolʼosaji. 27Oleki na, ende okitase nda mesa, nkina osʼolekezʼende toma? Afʼende okitase nda mesa? Lolo emi mongo nde lʼinyo ngʼosali.

28Lolo inyo lole bantʼaso baciniana-ki lʼemi nda mmeko ikami. 29Ko ngoki Fafa ekami onkaakʼemi likulaka, nkʼelengʼeko njokayʼinyo liko, 30wae lole ko lomele lima mesa ekami nda likulaka likami, ko lokitase nda ngwende, wae lotene bakambo bʼeloi bia Yisalaele jom lʼefe.

Boondo wa Yesu ndʼeloko ea Simona

(Mt 26.31-35; Mk 14.27-31; Yoa 13.36-38)

31Simona, Simona, bala Satana aoluola wae alofufolʼinyo ngʼofufolʼonto loso, 32lolo mbondaki ndʼeloko eke, wae imeezo eke efaokutswa, ko ae wʼokengwana lenkina, kongʼokemya balongo bake. 33Ende aokela, Nkolo, ndela-ma okenda la we la ndʼilombe ya njanga, la ndʼiwa. 34Lolo Yesu aolamba, Nkosangela we Petelo, nsoso efaoeka mbilʼene atafa wʼangana wete onjea biangana besato.

Intontombi la ntombi lʼifaka yʼetumba

35Ko aolauola, Akiʼmʼotomakʼinyo nko intontombi, nko ntombi, nko bikoto, lokutswaki yombʼimo nde? Iyo baolamba, O nye. 36Aolakela, Lolo aeyoko, endʼole lʼintontombi, ke-lʼatombʼiko, ko ende ole la ntombi ngoko. Ko endʼofa lʼifaka yʼetumba, ambʼotekya bonkotoʼokae, ko asombʼiko. 37Ele nsangelʼinyo, siki ekotelo ene iele elʼemi, wete, Ende aotangema omo owʼakeli bʼobe; ele baoyi bakoci ndʼeloko ekami bielʼolo. 38Iyo baolosangela, Nkolo, bala tofaka tofe tʼetumba toke tone. Ende aolamba, Jokoka.

Boondo wa Yesu nda Ngetesemane

(Mt 26.36-46; Mk 14.32-42)

39Aolola ko aokenda ndʼelengʼekiʼnde nda ngongo ea Bilaya; ko bakimi baolokimʼeko. 40Ko akiʼndʼokite ndʼitenela loswele, aolasangelʼiyo, Loondaka wae lofaomekama lomeko. 41Ko aotangwa lʼiyo ngole wusa wʼekenje; aokusʼaongo, ko aondaki, 42Fafa, ngʼolimeza ngoko, imolʼekalʼene limʼelʼemi; lolonde afa wango bokami, lolo bokawe boyokelame. 43Ko ekima aolenyʼelʼende lima loola, aolokemya. 44Ko aondaki la mposa eleki la ncina eʼolito wa elo mongo ndʼotema, ko etokela ekae eoyalema ngole batanga bʼanene bʼalongo mongo, bayokwa ndʼamoci. 45Akiʼndʼemalaka lima boondo, aoyʼele bakimi, ko aolatana wae beci lʼaisilo la lokeseli. 46Ko aolakela, Inyo letama ilo lae? Lemalaka, loondaka nyango lofo-tswa nda lomeko.

Yudasa aolekya Yesu ele ba-mpifo

(Mt 26.47-56; Mk 14.43-50; Yoa 18.3-11)

47Nkʼatefelʼende, bala etukuluku eoya, ko ende otangema Yudasa, omoko owa ba-jom lʼafe, aoya nda joso likiyo. Ko aotutama ele Yesu wae osambele la baiser. 48Ko Yesu aolokela, Yudasa, la olekya Bonʼowʼonto la baiser nde? 49Akiʼyʼakotutsi lʼende enaka joi licwʼokelama, baolouola, Nkolo, la tokote lʼifaka yʼetumba nde? 50Ko omoko okiyo aokota bokwala owa nkanga ea joso mongo, ko aotena litoi likae jʼelome. 51Lolo Yesu aolatefeela, Locika ngoko. Ko aofomwa litoi likae, ko aoloikya. 52Ko Yesu aotefeela nkanga ya joso, la capitaines ba Tempelo ko la bingambi, wae iyʼayaki elʼende, Kamba lolola la tofaka tʼetumba la nganza nga loyʼokanda bofunji owa loma? 53Akiʼmi lʼinyo nda Tempelo wengiʼaefa ntalosembya bakata wae lonkole. Lolo ene ele ekeke ekinyo, ko la mpamba ea wilima.

Ekandelo ea Yesu ko lʼanganelo ea Petelo

(Mt 26.57-58, 69-75; Mk 14.53-54, 66-72; Yoa 18.12-18, 25-27)

54Nkako baolokanda, ko baolotomba, baolotsweya ndʼilombe ya nkanga ea joso mongo. Petelo aolakima ndʼesi. 55Baambolaki tsa ndʼetei ea loanza, ko baokitase bolongo, baoloka tsa; ko Petelo aokitase lʼiyo. 56Akitasʼende eko nda fole ea tsa, bosali omo owʼomoto aoloena, ko aoloteemeza, nkako aokela, Bontʼone aki lʼende. 57Lolo ende aolangana, aokela, Bomoto, mpoea ende. 58Ko nkʼejingi, bontoʼomo addenda, ko aokela, We ole omo okiyo. Lolo Petelo aoloamba, We bonto, afʼemʼokaka. 59Ko ndʼafeka ba heure emoko, bontʼomo aokemya bomwa la bolo mongo, Nsosolo, bontʼone aki lʼende, elʼende Bo-Ngalilaya. 60Lolo Petelo aosanga, We bonto, mpokotole joi litefela we nye. Nkakoyoko atefelʼende, nsoso eo-eka. 61Nkolo aokengwana ko aolenda Petelo. Ko Petelo aolofwa joi liki Nkolo, ngokiʼndʼotefeelʼende, Mbilʼene, atafa nsoso ea jende oeka, wifonjangana biangana besato. 62Ko aolola, ko aocwʼolela lʼotema botenya la lokeseli mongo.

Baolengola Yesu ko baolokunda

(Mt 26.67-68; Mk 14.65)

63Banto bandesanyaki Yesu baololengola, ko baolokunda, 64baokukʼaisoʼakae, ko baolouola, Ototeele lotelo, bontʼokosakolaki na? 65Ko baolosaola isaola lʼaoyiʼamo bauke bakiʼyʼotefeelakʼende.

Yesu nda joso ja nteke ea nkanga ya joso

(Mt 26.59-66; Mk 14.55-64; Yoa 18.19-24)

66Aki jefʼokya, bingambi biʼanto la nkanga ya joso la bakoci bʼenkanda baotakana, ko baolokitsa nda nteke ekiyo, baolokela, 67Nga we ole Masiya, otosangele. Lolo aolakela, Ayaka nsangelʼinyo, lofaimeza. 68Ko ayaka njuolʼinyo wuo, lofaonjamba. 69Lolonde limʼaeyoko Bonʼowʼonto ifokitase nda lo jʼelome ja mpamba ea Nzakomba. 70Iyʼauma baolouola, La we ole Bonʼowa Nzakomba nde? Ende aolaamba, Inyo losanga wete emi nde nkʼende. 71Nkako iyo baosanga, Iso toata lenkina wela wʼaaki ba joi lae? Iso mongo tosilʼoka lima bomwa bokae mongo.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 22: LOL87

Highlight

ಶೇರ್

ಕಾಪಿ