Luka 21
21
Nganji ea etuka ea boola
(Mk 12.41-44)
1Aosunolʼaiso ko aolena baaci bayuse nganji ikiyo ndʼefongelo eʼosolo. 2Ko aolena etuka ea boola, ayilʼeko francs ife. 3Ko aokela, Nsosolo nsangelʼinyo, etuka ene eʼoola aolila nganji elekola nganji ikiyʼauma; 4ele bakʼauma baolekya nganji lima bofula bokiyo, lolo ende aolekya lima ekutswelo ekae bosolo bokae bouma nye, wete eikelo ekae mongo.
Yesu atefela ndʼewela ea efitanelo ea Tempelo
(Mt 24.1-2; Mk 13.1-2)
5Bantʼamo bayotefela ndʼewela ea Tempelo, elenge ekombyamʼeko la bikenje bia lituka ko la nganji ya jilangi. Ko ende aokela, 6Nda joi jʼelemʼene bendenʼinyo, bembile bifoya befa ekenje ocikala ane njafema ndʼekenjʼemo, nko njusama ndʼase.
Bielo la benyoko
(Mt 24.3-14; Mk 13.3-13)
7Ko baolouola, Bolaki, baoyiʼane bifiela ekeke na? Ko lotaza wae baoyiʼane baocwʼiela lole na? 8Ko aokela, Loa-laka nyango lofungusana; ele bantʼauke bifoya nda lina likami, bifokela, Emi nde nkʼende, ko la, Ekeke eotutama. Talokimanake lʼiyo.
9Lolo andokʼinyo benkindo bia bitumba ko la bitongo bia loswelo, talotataanake lʼooma; ele baoyiʼane bielʼolo nda joso, lolo nsuko efʼino. 10Ese ifouna lʼese emo, ko likulaka la likulaka; 11bifukyelo biʼokili bifiela, ko bieto bia nzala ko la bia nkangi bifokwela totenela tomo, ko belemo biʼooma mongo ko la ntaza yʼonene lima loola bifenya. 12Lolo nda joso ja baoyiʼane bauma, bifokandʼinyo lʼakatʼakiyo, ko bifonyokolʼi-nyo, nkako bifolekyʼinyo ele nteke ya bilimo la nda tolombe ta njanga; ko bifotombʼinyo nda joso ja rois la gou-verneurs ndʼeloko ea lina likami. 13Baoyiʼako bifoatelʼinyo efosa ea nsasanga ea nsango. 14Ko losiza joi ndʼetemʼekinyo wae lofaokakaza nda joso beloko beʼinyʼolokola, 15elʼemi njifokayʼinyo etefeelo la wanya, bofa basukiʼakinyo okuseya lokaola nkina oikya bikoli. 16Lolo baise lʼanyango ko lʼatomolo lʼakune, ko la bioto lʼalongo, bifolekyʼinyo, ko bifooma bamʼakinyo. 17Ko lifinama jino lʼantʼauma la ncina ea lina likami. 18Lolo nko la libwo jʼotsa bokinyo lifitane nye. 19Lifoikya belimʼekinyo lʼikelo ekinyo eʼotema.
Yesu atefela ndʼewela ea efitanelo ea Yelusalema
(Mt 24.15-21; Mk 13.14-19)
20Lolo aʼinyʼena Yelusalema elingama la beloi bia soldats, lifea wete efitanelo eʼonangʼoko eotutama. 21Ndʼekekʼeko kelʼiyʼale nda Yudea balota nda ngongo, ko iyʼale ndʼetei eʼonanga bimanʼeko, ko lʼiyʼale ndʼokili wʼasala, bafaotswa ndʼonanga, 22ele bembilʼene bele bia nsombola ea nkele, wae baoyi bakotama bauma bakokyame. 23Elo elʼiyʼale lʼaemi lʼele bialekele ndʼembile beko! ele elo mongo ifenya ndʼokili bone, ko la nkele ele bantʼane. 24Ko bifokwa lʼompempe wʼifaka yʼetumba, ko bifatombʼiyo njanga yʼetumba nda bise biuma, ko Bafaya bifomatela Yelusalema elaka nko bikeke biʼafaya bikokʼolo.
Eyelo ea Bonʼowʼonto
(Mt 24.29-31; Mk 13.24-27)
25Ko ntaza ifenya nda jefa la nda nsonge la nda tooci, ko lʼelo ea bise ndʼokili, etataana banto lʼooma lʼefelemela ea lieke jʼokwa la mpombe ya liko. 26Banto bifokatswa lʼofoju mongo, ekakaanʼiyo baoyi bandiela ndʼokili; ele belemo bia loola bia mpamba bifofukyama. 27Nkako bifena Bonʼowʼonto aoya nda litute la mpamba la jilangi lileki. 28Lolo aanga baoyiʼane jiela losunwaka, ko losangyʼetsʼekinyo, ele esikwelo ekinyo eotutama.
Esonganya ea botamba wa liteli
(Mt 24.32-35; Mk 13.28-31)
29Ko aolasangelʼesonganya. Lolenda botamba wa liteli lʼetamba beuma; 30amelʼeko ntongi inyo mongo lena ko lea wae eleko eʼangala eotutama. 31Nkʼelengʼeko, andenʼinyo wae baoyiʼane baokelama, lifea wete likulaka ja Nzakomba jotutama. 32Nsosolo nsangelʼinyo eotswelo ene efaosila atafa baoyiʼane bauma okelama. 33Loola lʼokili bifimana, lolo baoyiʼakami bafaimana nye.
Lofonga j esanya
34Lolo lesanyakʼinyo mongo, nyango betemʼekinyo befikamelama la bisengo biʼobe la bolangwa la bekakaano bia loiko lone, ko mbilʼeko efielʼinyo sasimo ngʼefeswelo ea ilonga. 35Ele mbilʼeko ifielʼantʼauma bayofetsa ndʼokili bouma. 36Lolo lesanyaka bikeke biuma, ko lokongʼoonda wete lokememala la bolo kela loate mpamba ekoka wae lolote baoyiʼane bauma bacwʼoiela, mpanga lemale nda joso ja Bonʼowʼonto.
37Ko bembile beuma ayolake nda Tempelo, lolo aolola lʼotso ko aocwʼetama nda ngongo ea Bilaya. 38Ko la nkesa mongo bantʼauma baoyʼelʼende nda Tempelo, wae bokozʼende.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 21: LOL87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
