KORINTUS 1 15
15
Soaḷ ki Kristus biniag bui nongkon kinopatoian
1Utat mita, tanaa mako akuoi in bui moponorop kon i monimu in Habar Mopia inta nongkon i Allah inta ain pinotaauku koḻipod bo sinarimadon monimu, sahingga in nopirisayadon totok kon i Kristus in moiko. 2Aka moiko bo tantú kumadai kon onu inta ain pinotaauku kon i monimu, yo Habar Mopia tatua in mokosaḷamatbí kon i monimu; koḻikudbí aka moiko mopirisaya táe diá momangaḻe kon onu inta pinirisaya monimu tua.
3 #
Yes. 53:5-12
Onu inta ain pinotaauku kon i utatku mita, yo tuabí doman in sinarimaku. Inta totok in moponting, ná inta pinais kon bonu in Buk Motusi, akuoi ain nopotaau kon i monimu kon ki Kristus ain minatoi popisí in dosa mita naton; 4#Mzm. 16:8-10; Mat. 12:40; Rsl. 2:24-32 Sia ain iḷobong, táe onda intua biniag bui kon singgai intoḷunea. Natua doman in pinais kon bonu in Buk Motusi. 5#Mat. 28:16-17; Mrk. 16:14; Luk. 24:34, 36; Yoh. 20:19 Bo pinogumanku domandon kon i monimu kon ki Kristus inta biniag bui tatua nokipogontong kon i Petrus, onda intua nokipogontong doman kon rasul mopuḷú bodoyowá. 6Noiduduimai kon tua, Sia in minayá doman nokipogontong kon intau mita inta nopirisaya kon i-Nia, degá ḻimamai nogatut in kobayong monia. Bo nobayongpabí in kon sigad monia tua in nobiagpa nodapot in masai naa. Tongá oyúon domandon in minatoi kon sigad monia tua. 7Sia in nokipogontong doman kon i Yakobus bo kon bayongan rasul-Nea.
8 #
Rsl. 9:3-6
Pangabisan totok Sia in nokipogontong doman kon inakó, naonda bo adí inta noilahir deemanpa wakutunea!#15:8: inta noilahir deemanpa wakutunea: ande inta kinolahirannea diá patus. 9#Rsl. 8:3 Sin akuoibí naa in rasul inta totok in mohina kon sigad in bayongan rasul, sin akuoi in nomogutú kon bayongan jamaat i Allah. 10Tongá sinotabipabí i Allah, dá oyúonpa komangoi in tanaa. Bo totabi i Allah kon inakó in diábí inta diá in mangaḻenea. Sin akuoibí in moraji-morajing kon sigad in rasul mita ibanea. Táe sabanarnea in deemanbí tongá uḷatku tontaní; táe nongkon i Allahbí inta ain nonotabi kon inakó bo siabí doman inta ain nogaid noyotakinku. 11Dá tuamai nongkon i inekabí in pinotarimaan monimu kon Habar Mopia tatua, nongkon inakó ande nongkon rasul mita ibanea, diábí mobaḻí soaḷ. Totok in moponting kon tua in pinotaaudon nami in Habar Mopia tatua kon i monimu bo nopirisayadon in moiko.
Soaḷ intau biagon bui nongkon kinopatoian
12Aka kami ain nopotaau kon i monimu kon ki Kristus ain biniag nongkon sigad in intau minatoi, yo nongonu sin oyúonpabí doman in kon sigad monimu in moguman kon diábí in kobiagan bui kon sigad in intau minatoi? 13Aka totuu kon diábí in kobiagan intau inta ain minatoi, yo ki Kristus in diábí biniag bui. 14Bo aka kuma ki Kristus diábí biniag bui nongkon kinopatoian-Nea, dá diábí in baraguna in onu inta ain pinotaau nami bo diábí doman in baraguna in pirisaya monimu. 15Bo aka natua, yo mangaḻenea kon tua in uboḷbí inta ain pinoguman nami kon i monimu soaḷ ki Allah, sin Siabí in kai nami in nomiag kon i Kristus, bokaka Sia in diábí nomiag bui kon i Kristus. 16Sin aka totuu kon intau minatoi diá biagon bui, dá ki Kristus in diábí biniag bui. 17Bo aka ki Kristus in diá biniag bui, dá pirisaya monimu in tongábí naonda bo togoindop bo moiko in umuranpabí nobiag kon bonu in kaadaan binaradosa bo beresi diá koharapan. 18Tua in mangaḻenea kon intau mita in Keresten inta ain minatoi diá doman koharapan. 19Aka harapan naton kon i Kristus tongá komangoi kita in nobiagpa kon dunia naa,#15:19: Aka harapan naton kon i Kristus bo tongá komangoi in kita nobiagpa kon dunia naa: ande Aka inta oyúon kon i naton kon bonu in kobiagan naa tongábí kamang naton kon i Kristus. dá kitabí naa in intau mita inta totok in mosoe kon sigad in bayongan intau inta kon dunia naa!
20Táe totu-totuubí kon ki Kristus aindon biniag bui nongkon sigad in intau mita minatoi. Bo Siata inta nopobaḻí dodoyonan in pirisaya naton kon intau mita inta ain minatoi in biagonbí bui. 21Sin naonda in popatoi inta sinumuot kon dunia naa popisí in dinia in intau tobatú, natua doman in kobiagan bui in intau mita inta ain minatoi oyúon sin dinia in intau tobatú. 22Sin ná doman bayongan in intau minatoi sin notobatúdon takin i Adam, dá natua doman in bayongan intau biagon bui sin ain notobatú takin i Kristus. 23Táe pomuḷoi in intau in biagon poduduibí in gilirannea: muna-munamai totok in ki Kristus, bo naonda in Sia mamangoi bui bain tua bo moiduduimaidon in intau mita inta ain nobaḻí kapunyaan i Kristus. 24Onda intua mokiamatdon. Kon wakutu intua potungkudon i Kristus in bayongan inta nomarenta, bayongan kawasa, bo bayongan in ropot; bodongka Sia in moposarakan in kawasa-Nea saḷaku Datu, kon i Allah, ki Amá naton. 25#Mzm. 110:1 Ki Kristus in mustibí umuran momarenta modapot in bayongan saturu i Kristus potungkudon i Allah kon tayowon i Kristus. 26Saturu pangabisan inta potungkudon i Allah in popatoi. 27#Mzm. 8:7 Sin kon bonu in Buk Motusi in pinais nanaa, “Bayongan in yagi-yagi inaidandon i Allah noitungkud kon tayowon-Nea.” Dá notarangbí kon imakusud in singog “bayongan in yagi-yagi” tua in diábí noitakin in ki Allah, sin Siabí in nomaḻí kon bayongan yagi-yagi tua in tumungkud kon tayowon i Kristus. 28Táe naonda in bayongan yagi-yagi pinotungkudon kon ḻimonag in kawasa i Kristus, dá Sia tontaní inta ki Adí i Allah in tumungkudbí kon i Allah inta ain nopotungkud kon bayongan in yagi-yagi kon i-Nia. Bo ki Allahdon tontaní in momarenta kon tua komintan.
29Aka intau minatoi bo diá biagon bui, yo nongonu sin oyúonbí intau binaptis kon i monia inta ain minatoi? Aka totuu kon intau minatoi beresibí diá biagon bui, onubí in makusud in pinomiaan monia kon soaḷ tatua? 30Bo onu doman in mangaḻe kami moibog tumayow kon inta mokobodito pomuḷoi mako? 31Utat mita! Pomuḷoi in singgai akuoi in monahang kon roriga sin mopia in ginaku kon kobobiag monimu sin moiko ain nopirisaya kon i Kristus Yesus, Tuhan naton. Totuubí onu in pinogumanku tanaa. 32#Yes. 22:13 Aka tongá pongin raian in intau, yo onubí in kauntungan kon inakó in moberjuang totok naonda bo monayow kon mahaḷuk mita inta mongoromú kon kotá in Epesus tanaa? Aka totuu kon intau minatoi diá biagon bui, yo maníka dumudui in kita kon ná kain singog in intau nanaa: “Koḻigai mongaan bo monginum poḷat mobarasanang in kita sin ikoḷom in tatap matoibí doman.”
33Donaaibí koakaḷan! Yoyobayatan inta diá mopia in mokogoguyaat kon tabiat inta mopia. 34Mokoposadardon in tanaa, bo donaaidon mogaid kon inta diá mopia. Sabanarnea in bá mustibí mooyá in moiko sin kon sigad monimu oyúonpa in diá nonotaau kon i Allah.
Awak intau naonda in biagon bui nongkon kinopatoian
35Degá oyúon in moḻibó nanaa, “Naonda degá aka intau matoi biagondon bui? Awak degá naonda in ogoi kon i monia?” 36Ei intau bodok! Aka iko bo mopomuḷa in batoḷ kon bonu in butá, yo batoḷ tatua in diábí mobiag aka diá matoi muna. 37Bo batoḷ inta pinomuḷamu tua kon bonu in butá – batoḷ in gandum ande batoḷ ibanea – in tongábí batoḷ in bibit tatua, deemanbí komintan inta pinomuḷa in mobiag kon singgai moiduduimai. 38Ki Allahbí tontaní in mobogoi in pangkoi kon batoḷ tatua podudui in onu in kinoibog-Nea. Pomuḷoi in batoḷ, ki Allahbí doman in mobogoi podudui batangannea tonta-tontaní.
39Awak in bayongan mahaḷuk inta nobiag in diábí komintan notongkai. Awak intau in diábí notongkai awak in mahaḷuk; bo noyoposibí doman awak in ḷagapan, bo awak in toyak.
40Oyúon awak in soroga, bo oyúon doman awak in dunia, táe kogaga in awak doyowa tua in noyoposibí. 41Ná doman tua, kogaga mata in singgai noposibí doman kogaga in buḷan. Tundi mita noyoposibí doman in kogaganea mita. Kogaga in tundi tobatú noyoposibí doman kogaga in tundi ibanea mako.
42Natuata doman kaadaan in intau minatoi inta biagondon bui. Awak inta iḷobong tua in awakbí inta moyoya-yoyang, táe awak inta biagon bui in awakbí inta diá moyoya-yoyang. 43Awak inta iḷobong tua in awakbí inta diá mopia bo moyangkó; táe naonda in biagondon bui, sia in ogoiandon in awak inta mogaga bo moropot. 44Awak inta iḷobong tua in awakbí inta nongkon dunia; táe naonda in biagondon bui, tua in awak bidon inta inogoi in Roho i Allah. Aka oyúon in awak inta nongkon dunia, dá oyúonbí doman in awak nongkon i Allah. 45#Kḻn. 2:7 Kon bonu in Buk Motusi oyúon in pinais nanaa, “Intau inta muna-munamai in ki Adam, sia in nobaḻí mahaḷuk inta nobiag,” táe ki Adam inta tumi in Rohobí inta nobogoi in kobiagan. 46Inta muna mamangoi in ilo-ilowpabí, deemanbí inta diá mato-matoi. Bain noiduduimai kon tua bo namangoi in inta diá mato-matoi. 47Ki Adam inta muna pinomia nongkon ḷobud in butá, táe ki Adam inta induanea in nongkon sorogabí. 48Intau mita kon dunia naa in naonda bo ki Adam inta muna, inta pinomia nongkon ḷobud in butá, táe intau mita in soroga naonda bo Sia inta namangoi nongkon soroga. 49Kita tanaa mako in naonda bo ki Adam inta pinomia nongkon butá, dá bain noiduduimai bo kita in mobaḻí#15:49: dá bain noiduduimai bo kita in mobaḻí: tongonumai in naska dungkuḷmai: dá koḻigai in kita mobaḻí. ná Sia inta namangoi nongkon soroga tua.
50Nanaa in makusudku utat mita: awak inta pinomia nongkon dugú bo tapú in diábí motaau tumuot kon Dunia Mobagu i Allah; bo awak inta mato-matoipa naa in diábí mobaḻí mononoi.
51 #
Tes.1. 4:15-17
Tarukira in rahasia tanaa: Kita in diábí matoi komintan, táe kita in daitonbí baḷuian. 52Soaḷ mita tatua in daḻi-daḻíbí mobaḻí, tongábí tokokiap monag kon wakutu in torompet irupondon kon pangabisan totok. Sin kon dodai in kodongogandon singog in torompet tatua, yo intau mita minatoi in tokobiagondon bui bo popopakéandon in awak inta mononoi, bo kita komintan in toko baḷuian. 53Awak naton inta mato-matoi naa in baḷuiandon in awak inta diá mato-matoi, bo awak inta nongkon dunia in musti baḷuian in awak inta nongkon soroga. 54#Yes. 25:8 Aka awak inta mato-matoi naa binaḷuiandon in awak inta diá mato-matoi, bo awak inta nongkon dunia naa baḷuiandon in awak inta nongkon soroga, dá kon wakutu in tatuatadon bo mobaḻí in onu inta pinais kon bonu in Buk Motusi nanaa, “Popatoi ain sinaḷow, kauntungan in nouḻídon!”
55 #
Hos. 13:14
“Ei popatoi, kon onda in kinountunganmu?
Ei popatoi, kon onda in bisamu?”
56Bisa in popatoi tuata in dosa, bo dosa nopobayá in oaidannea mongin hukum in agama. 57Táe sukur mako kon i Allah: Sia in nobogoi kon i naton in kauntungan pinongin i Yesus Kristus ki Tuhan naton!
58Tuamai uḻe utatku mita inta kinotabiku, mokoporopot bo kotorindog. Umuran totu-totuu pogundoi kon i Tuhan, sin kinotaauanbí monimu kon bayongan inta inaidan monimu kon i Tuhan, komintanbí baraguna.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
KORINTUS 1 15: INOMOG
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.