KORINTUS 1 14
14
Soaḷpa doman totabi in Roho i Allah
1Poigumonku mako moiko in umuran motabi kon intau ibanea bo tantú doman moramuji sinbá motarima kon totabi mita inta ogoi in Roho i Allah, muna-munamai in totabi mopotaau in tomayá mita i Allah kon intau. 2Intau inta mosingog mopomaké in bahasa inta mokoherang, deemanbí in sia moyosingog in intau; táe moyosingogbí i Allah. Sin diábí komangaḻean in intau onu in siningognea tatua, lantaran Rohobí i Allah in nosingog bo noguman kon soaḷ mita inta tongá doman ki Allah in nonotaau. 3Táe aka intau inta mopoyaput in habar nongkon i Allah, yo tua in mopoyaputbí in habar kon intau; sin moginrigon kon pirisaya monia, mobogoi in ropot bo mohibur kon i monia. 4Intau inta momaké in bahasa inta mokoherang, tongábí moginrigon kon pirisayanea tontaní, táe intau inta mopoyaput in habar nongkon i Allah in motuḷungbí kon jamaat sinbá mobiag.
5Mopiabí doman in ginaku aka moiko in motaau moposingog in bahasa inta mokoherang. Táe mopia-piabí kon motaau mopoyaput in habar nongkon i Allah. Sin intaubí inta motaau mopoyaput in habar nongkon i Allah in moponti-ponting nongkon intau inta nonotaau kon bahasa inta mokoherang; koḻikudbí in aka kotaauannea in mangaḻe in bahasa tatua, sahingga in komangaḻean doman in jamaat intua bo modugang morigon in pirisaya monia. 6Utatku mita, aka akuoi in mamangoi kon i monimu bo momaké in bahasa norupa-rupamai inta mokoherang kon intau, umpaka yo baraguna kon i monimu intua? Topiḻikmai yo diábí in mangaḻenea! Noyoposibí in aka akuoi mamangoi mopoyaput in koyow nongkon i Allah, ande moginsilang kon soaḷ mita nongkon i Allah, ande mopomangaḻe kon i monimu.
7Sin ná bí onda bo alat mita in musik inta diá moḻiai táe motaaubí posingogon. Naonda bo bansí ande gambus, aka tongá kinoiru-irupnea, bo kinokuti-kutinea yo kotaauanbí naonda in dondong inta pinodondongnea tatua? 8Andeka torompet inta diá kodongogan motarang in singognea, yo ki inebí in mobasadia moparang? 9Natuabí doman in moiko inta mosingog takin bahasa inta mokoherang. Aka moiko bo mosingog takin bahasa inta diá komangaḻean, yo diábí doman komangaḻean intau in makusud in singogmu tatua. Dá singogmu mita tua in tongábí asaḷ bo dinongog. 10Kon dunia naa noantó totok in bahasa, táe diábí in tobatúmai bahasa tatua in diá in mangaḻenea. 11Táe aka diá komangaḻeanku in bahasa inta siningog in intau ibanea, yo intau tatua inanggapkubí diá nogogintaauan; natua doman in anggapannea kon inakó. 12Natua doman in moiko, kinotaauankubí kon moiko in moibogbí doman moramuji motayak kon totabi mita nongkon Roho i Allah. Tongá mopia totok aka moiko moramuji doman mopobaraguna in totabi mita tatua sin pobangon kon jamaat sinbá mobiag.
13Tuamai, ki ine in mosingog kon bahasa inta mokoherang, yo musti doman in sia moramuji mopoigum kon i Allah sinbá motaau doman mopomangaḻe kon onu inta siningog tatua. 14Sin aka akuoi mosambayang bo momaké in bahasa inta mokoherang, dá tongábí rohoku in mosambayang, táe raianku in diábí. 15Dá onubí in musti aidanku? Tanaa in aidanku: Aka rohoku mosambayang yo akuoi in dumudui doman mosambayang kon bonu in raianku. Akuoi in modondong takin rohoku táe akuoi in moibog doman modondong takin raianku. 16Sin aka tongá rohonea in mosukur kon i Allah, bo oyúon in intau in diá nonotaau in bahasa pinakému tua, yo intau tatua in diábí moguman, “Amin” kon dodai in nokodongog kon sukurmu tatua, sin diá kinotaauannea in siningogmu tatua. 17Sin umpakabí mopia totok in sambayang pinosukurmu kon i Tuhan, táe kon intau ibanea diá in mangaḻe in sambayangmu tatua.
18Akuoi in mosukur kon i Allah sin akuoi tontaní in nonotaaubí in bahasa inta mokoherang noiḻiu kon i monimu komintan. 19Táe aka wakutu in jamaat moyosipun mosumba kon i Tuhan, mosana-sanangbí in ginaku in mopoyaput in ḻima notontagá inta komangaḻean in intau dika in moantó in singog inta kon bonu in bahasa mokoherang táe diá komangaḻean in intau. Tuabí in totok kinoibogku sinbá motaau in akuoi motundú kon intau.
20Utatku mita! Dika ná pororai in mongoadí. Aka kon soaḷ mita inta mongoromú, dá musti ná pororai in mongoadí in moiko. Táe aka kon soaḷ pororai, yo poraibí ná intau inta nogurangdon. 21#Yes. 28:11-12 Sin kon bonu in Buk Motusi in pinais nanaa,
“Ki Tuhan in nosingog, ‘Pinongin intau mita ibanea
inta bahasanea tolaeng,
Akuoi in mosingog kon umat tanaa.
Bo pongin bibig in intau mita inta mokokiangoi, Akuoi in mosingog kon umat-Ku;
tongá mosia in doí mokidongog kon singog-Ku.’ ”
22Manangka intua totabi inta mosingog kon bonu in bahasa inta mokoherang tua in tandabí kon intau inta diá mopirisaya, deemanbí kon intau inta mopirisaya. Yo totabi mopotaau in tomayá i Allah kon intau in tandabí kon intau inta mopirisaya, deemanbí kon intau inta diá mopirisaya. 23Tuamai aka kon bonu in poyosipunan kon jamaat, bo komintan jamaat mosingog takin bahasa inta norupa-rupamai bo inta mokoherang, bo oyúon in mokokiangoi, ande intau mita inta deeman Keresten, yo anggapon monia moiko in intaubí mita inta diá mongoratak! 24Táe aka moiko komintan bo mopoyaput in habar nongkon i Allah bo noiangoi in intau mita inta diá mopirisaya kon i Yesus ande oyúon in mokokiangoi ibanea, yo onu inta pinoyaputmu tua, komintanbí moponiata in oaidnea inta diá mopia bo moposadar kon inia. 25Onu inta noibuni kon bonu in ginanea komintanbí poontong, sahingga in mokopoompá kon dodia in sia bo moibog mosumba kon i Allah. Sia in mobaḻí mopirisaya totok kon ki Allah in umuranbí kotaki-takin monimu.
Atorang kon bonu in jamaat
26Dá uḻe utat mita, onu in mangaḻe intua komintan? Aka moiko moyosipun sin mosumba kon i Tuhan, oyúon in modondong, oyúon in motundú, oyúon mopoyaput in habar nongkon i Allah, oyúon in mosingog kon bonu in bahasa inta mokoherang bo oyúon doman in moginsilang kon onu inta pinoguman in intau tatua. Táe tua komintan in mustibí aidan sin motundú kon ponompia kon i monia komintan. 27Aka oyúon in mosingog kon bonu in bahasa inta mokoherang, yo tongádon doyowa ande toḷu in mopoyo-poyoḷuan. Bo musti oyúon in moginsilang kon onu inta siningog monia tua. 28Aka diá in motaau moginsilang kon mangaḻenea, yo intau mita inta motaau mosingog kon bahasa inta mokoherang tua musti kibio-biómai kon bonu in pinoyodungkuḷan tatua. Pomayádon mako in mosia in mosingog kon bonu in gina takin i Allah. 29Aka oyúon in habar nongkon i Allah in poyaput intau doyowa toḷu, yo musti poyaput, yo intau ibanea in musti mokidongog bo raion kopiaan onu in pinoguman monia tua. 30Táe aka koyogot in mosingog bo oyúon in noiḷabotmai kon intau inta mopoyaput in habar i Allah kon tampat pinoyodungkuḷan tatua, yo intau inta koyogot mosingog tatua, musti mogogai. 31Sin aka natua, yo moiko komintan, motaau moyo-moyoḷuan in mosingog sahingga in habar nongkon i Allah motaau poyaput; bo komintan motaau motarima kon totundú tatua bo modugang in pirisaya. 32Totabi nongkon roho inta mopoyaput in habar nongkon i Allah tua in motaaubí atoron in intau inta nopoyaput in habar tatua. 33Sin doíbí in ki Allah kon kobobiag intau motombauk. Koibog-Nea in kobobiagbí inta motompia.
Ná inta nobaḻídon kon bayongan jamaat i Allah, 34aka kon poyoyodungkuḷan natua, bobay in diábí motaau in mosingog. Mosia in musti kibio-biómai. Mosia in diábí motaau mobaḻí itoi; ná inta kon bonu in hukum i Musa. 35Aka moibog in mosia monotaau kon yagi-yagi, yo motaaubí in moḻibó kon i buḷoinea táe bain kon baḷoi. Sin totokbí in mokooyá in tobatú bobay mosingog kon tayowon intau moantó.
36Ande degá nongkon imonimubí in pirman i Allah? Andeka tongábí moiko in pinopotaauan in pirman mita tatua? 37Aka rasaanmai monimu bo oyúonbí in totabi mopoyaput in habar nongkon i Allah, andeka inogoianbí i Allah in totabi kon soaḷ mita ibanea, yo intau tatua in mustibí mosadar kon onu inta pinaisku tanaa, komintanbí parenta nongkon i Tuhan. 38Táe aka oyúon in doí motarima kon onu inta pinogumanku mita naa, yo donaaibí mako in sia tua.
39Tuamai uḻe utatku mita, poramuji mopoyaput in habar nongkon i Allah, bo dika molarang kon intau inta mosingog kon bonu in bahasa inta mokoherang. 40Tua komintan in musti aidan kopiaan bo kotompiaan.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
KORINTUS 1 14: INOMOG
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.