MATIUS 20
20
Kebun kerja bwemtam ow baposomtew atakam
1“E Onam Op Pemerintah, bare cem aramat ipic cowok awcawor ara. Aramat ipic, tamnakap, e aranggur kebun kerja bwemtam ow janim manim ajisefen. 2Aram, e kerja bwemtam owam, gaji atakam aamsakamfesen. E gaji ara, kerja bar cowok, ajipica ajipica, uang dinar cowok batetam arawen. Aramat ipic masirin, e ow, e aranggur kebun atewosomefen. 3Bare, tam ara, jam sembilan ajiwar aranew, aramat ipic aojisefen. Ar wun ow, e pasar asan desen memem aporefen. 4‘Caram e anggur kebun jisosey. Dor masirin, gaji akat car atetamcimin.’ Inim aeefen. 5Bare, e ow e kebun ajisosfesen. E aramat ipic masirin, jam dua belas ajiwar aranew, aojisefen. Aram inimas cowok aoemefen. Wunam jam tiga ajiwar aranew, inimas cowok aoemefen. 6Aram jam lima ajiwar aranew, aojisefen. Ar wun ow desen memem aporefen. ‘Car a jo jirow, arasan ucimas desen akajiremamokom?’ Inim aeefen. 7E ow masirin, ‘Ow kerja a bwemtam, janim da manim opokut.’ Inim aefesen. Aramat ipic araw, ‘Bare, caram e anggur kebuna.’ Inim aeefen.
8Barewen. Porow ara, e anggur kebun aramat ipic, atakam, e amandor ipic aotawefen. ‘E kerja ow bayteey. E agaji baseyetamtotor. E asep afiweres ow, e agaji bap batakamtetam. Wunam e bap afiweres ow, e agaji asep batetam.’ Inim aeefen. 9Bare, aramat ipic, uang dinar cowok, e jam lima ajiwar aranew afiwfes ow atetamtotorefen. 10E bap afiwfes ow aenawfes ara, aram bi binip aceceremfesen. ‘Aramat ipic, uang, dar aokajimtamcemarow openow.’ Inim bi binip aceceremfesen. E nat, aramat ipic, e owam, uang dinar cowoknakap atetamtotorefen. 11E kerja ow e uang atewetfes, ar icim e cem aramat ipic afesfesen. 12‘E asep afiweres ow, kerja jam cowoknakap aemeres. Dar masirin, kerja tam ewememamom, porow joti omomosmom. Jo pokam jis inim aemsamamarow. O nat, e owam, daram, gaji awcawor atatamamarowem.’ Inim aefes. 13Aramat ipic masirin, atep e wun ipic cowok ajitefen. ‘Dor fasias or bwem opok. Bare, orcin, e ogaji uang dinar cowok, atakam aamsakamorom araman. 14E oras batewey. Wunam baysosey. Dor a asep afiwor ipicam, oram, gaji awcawor batetam akat aemamin. 15Dor e dopok, e akat aporminas jipu bwem, karow open? Or, dok pok sey ban kumit ipic apormenem, inimas icim afesmem aranew?’ Inim aeefen. 16Inimas ara, e ow kanim aememames ow, ow awut aememcemes. E ow awut aememames owam, ow kanim aememcemes.” Yesus inim aeef.
Yesus e damir aafcowas atakam aootawef
(Mrk. 10:32-34; Luk. 18:1-34)
17Bare. Yesus Yerusalem bin ajiemef. E bowsec ara, ar e amamkawi ow dua belas ajiwar, arop atakam aotawef. 18“Jakaperey. Dar Yerusalem ajisosmom. Erasan ara, jipic cowok e Asmat Anakat Ajaworemef Ipic, e Allah atakam mamtaw tugas ow awut aotasimemtamcema. Aram aramat ipic e Allah Jirmec mamememtam ow aotasimemtamcema. E ow masirin, aramat ipic bacatiw atakam aamsakamcemes. 19Aram aramat ipic e Yahudi opok samat ow aotasimemtamcemes. Ar, e ow, aramat ipic uc bamocam, omop bafam, salib op bacatopomam, inim aotasimemtamcemes. Bar mamincop ara masirin, Allah e aramat ipic aojaworomsumutumcema.” Inim aeef.
Yakobusin Yohanes arosowoc e janim aanimefas
(Mrk. 10:35-45)
20Bare. Sebedeus aremam, atiperesam, Yesus aenawomfes. Aramat cowoc e Yesus bipu jine onok aneyotapef, wunam janim aramat ipic aanimef. 21Yesus masirin, jonow e cowok atowef. “Or ucimasam?” Inim aeef. Aramat cowoc masirin, “Or e ow takas jirmec ajirimkurumcem jofay, e dotiw jamnuk, wun e oban bo jamam bemapam, wun e otamo jamam bemapam, inim baemaptotorces.” Inim aeef. 22Yesus masirin, “E janim aanimamokomas camsom opok. Bare, asep jofay dor ajurusemcimin. Caram e ajurusemceyas inim cimin mamjurusem akat open?” Inim aeef. “Bare, akat.” Inim aefes. 23Aramat ipic araw, “Car e ajurusemceyas inim cimin ajurusemcomokom araman. E nat, dor e doban bo jamam bemap owam, e dotamo jamam bemap owam, inim bweremtew, bare doras opok. E doricipic e asan akenemapomef. Aram e asan aemapces ow aereremtawef.” Inim aeef.
24E wun mamkawi ow sepuluh ajiwar, e ipic jamnuk janim aanimfesas, atakam jen ajifes. Aram jak amop aememfes, wunam takam e ipic jamnuk aotawfes. 25Yesus nat, e ow ajateef, wunam atakam aotawef. “E Allah mamkawi amsom opok samatin samatin kepala ow, jirmec awutut e mami ow ajirimcemes. E ow awutam atakam faknakut e mami ow aotawcemes. Car inimas camsom ara. 26E caramaman nat, inimas opok. E caramaman wun ow, awut ow memem akat aporces, ar e cakerja bwemtam ow baememces. 27Wunam, e caramaman wun ow, bap ow memem akat aporces, ar mami kerja car baemtamcan. 28Inimasam ara, e Asmat Anakat Ajaworemef Ipic, ow kerja a bwemtam bwenaw opok. E nat, ar kerja kawey ow bwemtam aenawef. Aram ow bajortew damir baftam aenawef.” Inim aeef.
Yesus manmok kapi ipic jamnuk manmok ateremtamef
(Mrk. 10:46-52; Luk. 18:35-43)
29Bare, Yesus Yeriko aewjisosef ara, ow arke e afa asoromfes. 30Manmok kapi ipic jamnukam e bokotpuak aemapfes. Aram Yesus erasan bokorfe, atakam jen ajifes. E atakam jen ajifes masirin, atakam afakaytawfes. “Tuhan! Daud urpis! Saw akat oworporcarowey!” Inim aefes. 31E ow ow arke masirin, jiman e ipic jamnuk aaffes. “Caram jokona.” Inim aefes. E ipic jamnuk nat, atakam awutut aofakaytawfes. “Tuhan! Daud urpis! Saw akat oworporcarowey!” Inim aoefes. 32Yesus masirin, atukemef. Aram e ipic jamnuk ajateef. Wunam, “Dor car ucim pok emtamcen?” Inim aeef. 33E ipic jamnuk masirin, “Tuhan. A damanmok bateremtamcarowey.” Inim aefes. 34Bare, Yesus e ipic jamnuk saw akat aoworporef. Aram ban e amanmok atewapomef. E ipic jamnuk masirin, e manmok asarimtereyef. Aram aramat ipic ajamkawifes.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MATIUS 20: LAICNS
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
LAI 1985
