MATIUS 19
19
Ow, acepes bajiwapom
(Mrk. 10:1-12)
1Yesus inim atakam atawkurumef, ar e Galilea capinmi aewjisosef. Ar e Yordan jo ajiref, wunam e Yudea capinmi ajaremef. 2Ow arkenakutam aramat ipic fa asoromfes. Aramat ipicam erasan e dam ow ajaworomtawef.
3Parisi ow masirin, aramat ipic aenawomfes. Ar e aramat ipic salah atakam botaw epen bwemporen. “Jipic e arem mami ajiwapomcow, ar pwicakas bwem open? E Allah Jirmec inimas acuw bat open?” Inim aefes. 4Aramat ipic masirin, “Ametnak ara, e Ji Bweremapom Ipic, ow jipicam cowocam akenemapomef. Car inimas baca opoknew? 5E Ji Bweremapom Ipicam atakam, ‘Inimas ara, jipic e aricipicam arosowocam bakan ajioscema, wunam aremcin akac aemapcemes. Bare, armipicam aremam, dam cowkon aemapcemes.’ Inim aeef. 6Inimas ara, ar ow jamnuk boemap opok aemcemes. Ar ow cowok inim cimin aemapcemes. Bare, Allah e ow cowkon akajimapomcema. Inimas asmat ow, e ow mampakapimapom arapok.” Yesus inim aeef. 7E ow masirin, “Musa, jipic, bajiwapom surat e arem batetam, wunam e cowoc bajiwapom, inim jirmec ajirimef nat, ucimaram?” Inim aefes. 8E Yesusam, “Musa car jen fak ow aporefen. Inimas ar car e cacepes bajiwapom atetamefen. Ametnak ara nat, inimas opok. 9Ca nat, jakaperey. Jipic arem, kawey cemen ban opok aemcow, e nat, armipic e arem ajiwapomcow, wunam wun cowoc aotewetcow, bare e ipic jursumec ipic aememcema.” Inim aeef.
10E Yesus mamkawi ow masirin, atakam aramat ipic aotawfes. “Armipicam aremam inimas aranew, bare ow petew bajiw opok aemces, asan akat aememcemes.” Inim aefes. 11Aramat ipic masirin, “Wun ow e atawmokom atakam ji bweme asan opok. E Allah e atakam ji bwe jak atetamamar ow, eras aemames. 12Bare, wun ow cepes bwemtewet asan opok. E wun ow, jak aman aewomisfes, ar inim cowok ara. Ow masirin, e wun ow, jiwi bwemfimat asan opokas aemapomfes. Wun ow masirin, e Onam Op Pemerintah kerja bwem akat apormes. Inimas ar cepes batewet opok, atakam arma asakamtiwfes. Bare, a atakam ji bwe akat ow, a atakam ji baeces.” Inim aeef.
Yesus, asan akat, jiwi aomef
(Mrk. 10:13-16; Luk. 18:15-17)
13Bare. Ow, jiwi aramat ipicpu atowocenfes. Ar aramat ipic, ban, e jiwi dam ton batatiwam, janim Allah a manimtamam, akat aemfes. E Yesus mamkawi ow nat inimas acuw aatfes. 14E yesus nat, “A jiwi a dodampu inim baenawces. Acuw bat arapok. A jiwi inim awcawor ow e Onam Op Pemerintah Asan aemapcemes.” Inim aeef. 15Bare, aramat ipic ban e jiwi dam ton atatiwef. Ar masirin, erasan aewjisosef.
Ay ipic pok awut aomomef
(Mrk. 10:17-31; Luk. 18:18-30)
16Bare. Jipic cowok aramat ipicpu aenawomef. E ipic masirin, “Guru. Dor jiwnenak batamemawar akat ara. Dor inimas ucim akat pok emcey?” Inim aeef. 17E Yesus, “Or akatas bwem jonow atowpormenem nat, ucimaram? Ow cowokut akat ara. Or jiwnenak batamemawar akat aporcem, e Allah Jirmec takas ji mameey.” Inim aeef. 18E ipic masirin, “E ucim jirmecam?” Inim aeef. Yesus masirin, “Daw catiwcem. Cen osom ecem. Osom ecem. Suw atakam atawcem. 19E oricipicam orosowocam mamsicimawarey. Wunam, damos e ojowow mamjiomey— or damos orma ajiomamem awcawora.” Inim aeef. 20E ay ipic masirin, “Dor eras takas ji aeawiru. Dor masirin, e wunas ucimas emcey?” 21E Yesus masirin, “Or ow tarowatnak memem akat aporcem, oram baysosey. E opok takas uang mamuwumtatey. E uang masirin, e pok opok ow sey mamseyamtamey. Or masirin, e onam op capinmi pok anakatnak atowomatcemem. Eras aemcem, mamofasienawey. Wunam mamkawiawarcan.” Inim aeef. 22E ay ipic nat, pok awutut aomomef. Inimas ar inim atakam jen ajief, ar jak pwicak aememef, wunam ajisosef. Ar pok awutut aomomef aporef ara.
23Yesusam atakam e amamkawi ow aotawef. “Atakamnak ara, pok awut epcom ow, e Onam Op Pemerintah Asan bafiw, bare susah awutnakut ara. 24Dor wun atakamam car aotawmin. Unta, jarum jof bafiw, bare susah kanim pwiciri ara. Pok awut epcom ow nat, e Allah Pemerintah Asan bafiw, bare susah awutnakut ara.” Inim aeef. 25E mamkawi ow inim atakam jen ajifes, aram junum awutnakut aefes. E ow masirin, “Ucim inimaram? E ajoremces ow, ucim owaram?” Inim aefes. 26Yesusam e ow manmok atiwef. “Asmat ow inimas bwemem asan opok. Allah nat, eras takas bwem, aras araman.” Inim aeef.
27E Petrus masirin, atakam e aramat ipic aotawef. “Daram e daras takas bakan ajifom, wunam or ajamkawifenom. Inimas dar ucimas towopcom?” Inim aeef. 28E Yesusam atep ajitef. Atakamnak ara, Allah ay capinmi akenemapomcow, e Asmat Anakat Ajaworemef Ipic e raja kursi akatnakut ton apwikapcema. E dor ajamkawimenokom owam, raja kursi dua belas ajiwar ton apwikapcomokom. Caram e Israel samat dua belas ajiwar jirmec ajirimcomokom. 29Wun ow, e acemnew, e arewcewesnew, e atarsepesnew, e arisorownew, e atiperesnew, e akebunnew, bakan ajifes. Ar eras takas kerja do bwemtam bakan ajifes. E ow nat, eras awutnakut aotowopcemes. Aram jiwnenak aatamemawarcemes. 30Bare, awut ow arke, kanim ow aoememcemes. Kanim ow arkeam, awut ow aoememcemes.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MATIUS 19: LAICNS
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
LAI 1985
