MATIUS 15
15
Yahudi ow arafasutmar tayimirtitamfes
(Mrk. 7:1-13)
1Bare. E Parisi owam, e Allah Jirmec mamememtam owam, Yerusalem aewjisosfes, wunam Yesus aenawomfes. 2Aram atakam aramat ipic aotawfes. “E omamkawi ow, e darafas ow e tayimirtitamforowas, jipu bwem opok. Amos pok aanmes, ar ban bwi batakamcicikem opok aemames. Ar ucim inimaram?” Inim aefes. 3Yesus masirin, “Car e carafas ow e tayimirtitamfanas jipu aemokom, wunam Allah Jirmec aopowmokom. E ucim inimaram? 4E Allah jirmec ajirimef. ‘Oricipicam, orosowocam, mamsicimawarey.’ Wunam, ‘Ow, cemew atakam, e aricipicnew, e arosowocnew, aotawces, e cemew atakam ow bacatiwey.’ Allah inim aeefen. 5E atakam amememtamamokomas nat, ‘Ow, atakam e aricipicnew, arosowocnew, aotawcow, Dor or atetamcimin uang, bare Allah emcatetamof,’ inim aecow, 6e ipic, pok e arownucur ow batetam opok baemcow. Inim aemokom. Inimas car e carafas ow e tayimirtitamfanas jipu aemokom, wunam Allah atakam ajiwosomamokom. 7Car pir bwe ow ara! Ametnak ara, Yesaya e aemcokomas atakamnak aotawef:
8‘Allah atakam ara: A ow ewen picin cowok dor asicimamenes. E nat, e ajak aman ar dor mamkawi opokut.
9Aram desen asicimamenes. E atakam amememtamamesas, bare asmat jirmec cowok ara. Er dojirmec opok. Allah inim aema.’
Yesaya ini aeef.” E Yesus inim aeef.
Dosa bwemas
(Mrk. 7:14-23)
10Bare. Yesus e ow arke ajateef. Wunam atakam e ow aotawef: “A atawmin jen foa. Bare, a atakam jen bajikurumey. 11Memem pok, ow bweyof afiwcow, e pok e ow dosa bwemas opok. E nat, e bweyof afiscowas, e ow dosa bwemas ara.” Inim aeef. 12E mamkawi ow masirin, e aramat ipic aenawomfes. “E Parisi ow, e atawerem atakam jen ajieres ara, ar jak amop apwimaperes.” Inim aefes. 13Yesus masirin, “E onam op doricipic, e ar batewapom opok pok akan takas, bimi emcom asusumtawcema. 14Bare, e ow inim baemapces. Ar manmok kapi ow inim cimin ara. Ar wun manmok kapi ow banfe ajimomatmes inim cimin ara. Bare, manmok kapi icip, wun manmok kapi ipic banfe ajimomatcow, e ipic jamnuk takas, jof akac aneyfifiapcemes araman.” Inim aeef. 15E Petrus masirin, “E baposomtew atakam aotawmem, ucim inimaram? Atakam otawcarowey.” Inim aeef. 16Yesusam, “Wow ajiwar, caram e atakam jen bajikurum opoknew? 17Bare, memen pok bweyof afiwcow, jak com aman afiwcema, wunam aofiscema. Caram inimas camsom opoknew? 18E nat, e bweyof afiscowas, e ow abi binip jipuas ara. Eras e ow dosa bwemas ara. 19Ow abi binip jipuas nat, pwicakas ara. Inimas e ow, wun ow acatiwcemes. Aram cen cemen osom aemcemes. Wun jursumecasam aemcemes. Aram pok osom aecemes. Suw atakamam atawcemes. Cemew atakamam atawcemes. 20Eras, ow dosa bwemas ara. E nat, ow ban bwi batakamcicikim opok aemces, wunam pok aances, bare eras e ow dosa bwemas opok.” Yesus inim aeef.
Cowoc cowok Yesus basicimnak aemef
(Mrk. 7:24-30)
21Bare. Yesus erasan aewjisosef. Wunam ar e kota Tirusam, e kota Sidonam, e ajawosmar capinmi ajisosef. 22Kanaan capinmi cowocam, erasan aememef. Aram Yesus aenawomef. Wunam, “Tuan! Daud urpisa! Saw akat oworporcan. Dat e dopores e jak aman aemapma. Inimas dopores asan pwicak aemapma.” Inim aeef. 23Aramat ipic nat, atep bajit opok. E amamkawi ow masirin, aramat ipicpu aenawomfes. “E cowoc baysos, jirmec bajirimey. Ar da soromamarow, wunam atakam afafakaymar ara.” Inim aefes. 24E Yesus masirin, “Allah dor e Israel owpu cowok atewosomfan. E ow, apakapiosmes domba inim cimin ara.” Inim aeef. 25Bare, e cowoc aenawef. Wunam ar e aramat ipic bipu bi fop aneyjiapef. “Tuan! Asan akat dor omcan!” Inim aeef. 26Yesus masirin, “Do tiperes amos, juwur bajiwitam, bare pwicak ara.” Inim aeef. 27E cowoc nat “Tuan. E atawmem atakam, bare atakamnak ara. E nat, juwur aramat ow aramos e cenes juneycow, e juwuram e amos bimis aancemes.” Inim aeef. 28Yesusam atakam e cowoc aotawef. “Or do basicimnak aemamenem! Bare dor e jak aserememamemas jipu aemamin.” Inim aeef. Aramat ipic masirin, e cowoc apores asarimjaworomtewef.
Yesus dam ow arke ajaworomtawef
29Bare. Yesus erasan aewjisosef. Ar masirin, e Galilea jopir ajaref. Aram sikon op aaptometef, wunam apwikapef. 30Ow arkenakutam aramat ipicpu aenawomfes. Ar japow owam, kamtar sipi owam, manmok kapi owam, okor owam, wun ow arkeam, Yesus bipu atawapomfes. Aramat ipic masirin, e ow ajaworomtawef. 31Bare, e okor ow atakam atawa aefes. E kamtar sipi owam kamtar akat aemema aefes. E japow owam bwey ajara aefes. E manmok kapi owam manmok atiwa aefes. Erasan aememfes ow arkeam inimas aporfes. Ar masirin, Allah asicimfes. Bare, Allah e Israel ow arAllah ara.
Yesus amos pok ower ow empat ribu ajiwar atatamef
(Mrk. 8:1-10)
32Wunam, Yesus e amamkawi ow ajateef. “Dor awapes ow arke sawes akat aoworpormin. Aram bar mamincop dar akac aemapmom. Aram amos opok aemapmes. E wun ow damasan opok aenawfes. Inimas dor e ow amos memen opok baysomosom pwicak ara. Ar bowsec mankes bweamesasin.” Inim aeef. 33E mamkawi ow masirin, atakam aramat ipic aotawfes. “Dar cem opok asan aememamom. Dar a ow arke jak bapitap amos, ocenak asan atawcom?” Inim aefes. 34E Yesus masirin, “E awomcokom amos bokor ucim ajiwararam?” Inim aeef. E ow masirin, “Dar amos bokor tujuh ajiwaram, enam kanim mamincopam, awomcom ara.” Inim aefes. 35Bare, aramat ipic e ow arke cenes baneypwikap jirmec ajirimef. 36Aramat ipic masirin, e amos bokor tujuh ajiwaram, e enamam, atewef. Wunam, ar terima kasih atakam Allah aotawef. Ar masirin, e pok akokomef. Akokomef masirin, ar e pok amamkawi ow atetamef. E amamkawi ow masirin, e pok, e ow arke aseyetamfes. 37E owam e pok aanfes. Aram jak anapitaptotorfes. E Yesus mamkawi ow masirin, e datiwfes amos pok, ese tujuh ajiwar asimapomfes. 38E pok aanfes ower ow, empat ribu ajiwar ara. Wunam cepesam, jiwiam, ara. 39Bare, Yesus e ow baysos, jirmec ajirimef. Ar masirin, ci anajuwef, wunam Magadan capinmi ajiref.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MATIUS 15: LAICNS
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
LAI 1985
