MATIUS 14
14
Ow, Yohanes Bwi Babwim Ipic acatiwfes
(Mrk. 6:14-29; Luk. 9:7-9)
1Bare. E jofay ara, Herodes e Yesus atakam jen ajiefen. E Herodes e Galilea capinmi raja ipic kanim arawen. 2Aramat ipic atakam e akerja bwemtam ow aotawefen. “E Yesus, bare Yohanes Bwi Babwim Ipic ara. E Yohanes emeojaworsitef. Inimas ar e junum bweas awut aemama.” Inim aeefen. 3,4Ametnak ara, Herodes, e arewec juwas Filipus arem aotewetefen. E arem juwas Herodias arawen. Yohanesam atakam e Herodes aotawa aeefen. “Or e cowoc aotewetmem, bare Allah Jirmec aopowmem.” Inim aea aeefen. Herodesam, inimas aporef ara, ar ow e Yohanes ban bakimomam, ban manam bajikapomam, penjara cem aman bajiwtewapomam, inim jirmec ajirimefen. 5E Herodes, e Yohanes bacatiw, akat aemefen. E nat, ar e ow arke omar aeefen. E ow arke abi binip ara. “E Yohanes, Allah atakam botaw ipicut araman.” Inim bi binip aceceremfesen.
6E Herodes ajispetiwef hari ulang tahun, ow pokbwi aanfesen. E Herodias aporesam e pokbwi jaki ow bipu di adiefen. Herodes masirin, eras akat cowok aporefen. 7Aram e cowoc atayi aeefen. “Pok janim animcan. Dor e pok o batetam.” Inim aeefen. 8Arosowoc masirin, atakam e apores aotawefen. E apores masirin, e arosowoc atakam jipu, e Herodes aotawefen. “E Yohanes Bwi Babwim Ipic akus, piring aman arasan tetamcan.” Inim aeefen. 9Bare, e raja e cowoc janim aanimefas jen ajiefen. Ar masirin, jak pwicak awut aemapefen. E nat, ar e atayi aeefas aporefen. Aram e pokbwi jaki ow aporefen. Inimas ar ow eras e cowoc batetam jirmec ajirimefen. 10Aram ow Yohanes kus e penjara cem aman basakamtew jirmec ajirimefen. 11Ow masirin, e kus piring aman e pokbwi cem atowomiwfesen. Atowomiwfes masirin, e cowoc atetamfesen. E cowocam e kus e arosowoc aotetamefen. 12E Yohanes ajamkawifes ow masirin, e bini amertewfesen. Aram e bini awerem aman ajiwtatiwfesen. Ar masirin, Yesus ameromfes, wunam eras atakam aotawtamfes.
Yesus, amos pok, ower ow lima ribu ajiwar atatamef
(Mrk. 6:30-44; Luk. 9:10-17; Yoh. 6:1-4)
13Yesus inim atakam jen ajief, ar erasan aewjisosef. Ar ci anajuwef, wunam cem opok asan arop ajisosef. E ow arkeam inimas atakam jen ajifes. Aram e akota aporsipor aewjisosa aefes. Aram camow e Yesus fa asep asoromfes. 14Bare, Yesus asowkuef. Asowkuef masirin, ar e ow arkenakut aporef. Aram e ow sawes akat aoworporef. Wunam, ar e ow aman, dam ow ajaworomtawef.
15Bare, jo atief. Jo atief masirin, Yesus mamkawi ow aramat ipic aenawomfes. “Arasan cem opok asan ara. Joam emcatior. A ow arke baysos jirmec bajirimey. Ar a samatin samatin, amos pok bajittameran bajisosces.” Inim aefes. 16Yesus masirin, “A ow baysos arapok. Car amos pok a ow carma tatamey.” Inim aeef. 17E ow masirin, “Da nat, arasan amos bokor lima ajiwarnakapam, enam jamnuknakapam, awomcom ara.” Inim aefes. 18Aramat ipic masirin, “Bare a pok do towotnawtamcan.” Inim aeef. 19Aramat ipic masirin, e ow e fumin ton baneypwikaptotor jirmec ajirimef. Aram e amos bokor lima ajiwaram, e enam jamnukam, atewef. Aram manmok onam op apemtometemef. Aram terima kasih atakam Allah aotawef. Wunam, e amos akokomef. Amos akokomef masirin, ar e amos e amamkawi ow atatamef. E mamkawi ow masirin, e amos, e ow arke aseyetamfes. 20Bare, e ow takas e pok aanfes. Aram jak anapitaptotorfes. Owam e daeremtiwfes pok, ese dua belas ajiwar aowapomfes. 21E amos aanfes ower ow, bare lima ribu ajiwarnew ara. Ar e cepesam, jiwiam, bajicucumir opok.
Yesus bwi ton ajaref
(Mrk. 6:45-52; Yoh. 6:15-21)
22Inimas aemfes masirin, Yesus jirmec e amamkawi ow, asarimjirimefen. Caram poman bap ca takam jirtayey. Dor asep bajinaw. Inim aeefen. Aramat ipic masirin, e ow arke aporsipor cem baysos jirmec ajirimef. 23Ar e ow arke cem baysos jirmec ajirimef masirin, janim Allah arop manim, sikon op aaptometef. E jo asapimnemef ara, aramat ipic arop aemapefen. 24E mamkawi ow nat, e jicupum aemsefes. Foam e ci cimen aotpemef. Inimas waam e ci ajawumef. 25Iram fak masirin, Yesus e owpu ajinawomseef. Ar e bwi ton ajaref. 26E amamkawi ow, aramat ipic bwi ton bajar aporfes. Ar masirin, omar aefes. “Ja dat ara!” Inim aefes. 27Yesusam atakam e ow asarimotawef. “Jak faka! Do Yesus ara. Omar arapok.” Inim aeef. 28Petrus masirin, “Tuhan. Or aranew, bare, dor e bwi ton orpu bajar, jirmec bajirimcan.” Inim aeef. 29Yesus masirin, “Dey!” Inim aeef. Bare. Petrus e ci aewsowneyef. Ar masirin, Yesuspu e bwi ton ajaref. 30E nat, ar e fo awut aporef ara, omar aeef. Aram bwi cowocjupumepaw, wunam atakam awut afakaytawef. “Tuhan. Do bajortewcan.” Inim aeef. 31Yesus masirin, e ban asarimjoromwenemef. Aram aramat ipic ban ajimopef. “Or dor basicim kanimnakap aemem. Or ucim oram emem?” Inim aeef. 32E ipic jamnuk masirin, ci asawufes. Ci asawufes masirin, e fo atayuef. 33E ci aman aemsefes owam e Yesus asicimfes. “Or Allah atiw araman.” Inim aefes.
Yesus, Genesaret capinmi ow arke ajaworomtawef
(Mrk. 6:53-56)
34Bare, aram poman aapirfesen. Poman aapirfes masirin, Genesaret capinmi ajirtayfes. 35E erasan ower ow, Yesus amsom ara. E owam, e capinmi takas dam ow bayte, jirmec ajirimfes. Ow masirin, e dam ow takas Yesuspu atowocenfes. 36Aram e dam ow e Yesus baju bip ban bakurum cowok, janim aramat ipic aanimfes. Bare, e baju bip ban akurumfes ow takasam, ajaworsita aefes.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MATIUS 14: LAICNS
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
LAI 1985
