Marku 13
13
Jesu ngako a txi zivisa kukhundumuswa ka Dithepele
(Matewu 24:1-2; Luka 21:5-6)
1Ku ti ngako a txi huma Dithepeleni, mmweyo wa vagondiswa vakwe a ti khene kwakwe: “M'gondisi, hinga wona kuxamalisa ka marigwi awa ni maakelo a tinyumba ta kona!” 2Jesu a txi khene kwakwe: “Wa ti wona tinyumba tiya ta hombe kani? Kha ku na mbi sala dirigwi txitimwi ka dirigwi, adi di no mbi khundumuswa.”
Kukhata ka kuxaniseka
(Matewu 24:3-14; Luka 21:7-19)
3Ku ti ngako a di khate mmangoni ka Miolivha, na a di rendekelani ni Dithepele, Pedro ni Jakobe ni Johani ni Andreya, va to mu wotisa, va di vokha, va txi kha vona: 4“Hi gele timhaka tiya, ti na maheka mbimo muni kani, txi na va txikombiso muni txi no komba ti taku txi hokile txikhati txa kutatiseka ka totshe tiya kani?”
5Jesu a to khata ku va gela a txi khene: “Ti woneleni ti to mi si thuki mi wongwa ngu m'thu. 6Nguko votala va nata ngu ditina dangu, va txi kha vona: ‘Ani ngani ene.’ Kambe va na timeta va votala. 7Ngako mi txi pfa tiyimbi ni nduma ya tiyimbi, mi nga thaveni, nguko ati ti fanete kuhumelela. Aniko hi nga ona magwito. 8Nguko ditiko di na wukela ditiko, mfumo wu na wukela mfumo, kutsekatseka ka mafu ku na vaho ka tiphuho to tala, ni tipaya ti na vaho. Eto ngu khata ka kuxaniseka.”
9 # Wona ni ka: Mat. 10:17-20; Luk. 12:11-12. “Kambe anu ti woneleni, nguko va na mi ningela mabanzani ko lamulwa, ni masinagogani, mi na kwapelwa, mi emiswa masoni ka tinduna ni ka vafumeli ngu mhaka yangu, kasiku mi va tifakazi tangu masoni kwawe. 10Kambe ti fanete ti to Evhangeli yi txhumayelwa kuthanga ka otshe matiko. 11Ngako va txi mi ndinda va txi mi yisa kulamulwani mi nga thukeni mi vilela ngu ti mi no ya ti womba, aniko wombani ati mi no ningwa ka yoneyo mbimo, nguko hi nga anu mi no womba-womba, aniko i Moya wo Sawuleka.”
12“Mwanawe m'thu a na ningela mwanawe kudawani, tate wa m'thu a na ningela mwanana wakwe; vanana va na wukela vaveleki vawe ngu mtamo ve va dayisisa. 13Mi na vengelwa ngu votshe ngu mhaka ya ditina dangu, aniko awu a timiselako kala magwito, ngene a no hulukiswa.”
Kuxaniseka ka hombe
(Matewu 24:15-28; Luka 21:20-24)
14“Ngako mi txi wona manyala a kuthisa ma di zumbile ahawa ku si faneliko (awu a gondako a na pfisise), ka yoneyo mbimo, ava va ku Judheya va na tutumele mimangoni. 15#Wona ni ka: Luk. 17:31. Awu a ku txitimwi ka nyumba a nga txhike, a nga wulele kuya teka txilo nyumbani kwakwe. 16Awu a ku thembweni a nga tshumele eya teka nguwo yakwe. 17Ku nava ni dikhombo ka va va ku ni sirumbu, ni va va mamisako ka oneyo masiku. 18Khongelani ti to ti si humeleli ngu wuxika. 19Nguko ka oneyo masiku ku nava ni sixaniso sa hombe ngutu, saku kukhukhela makhatoni ka ditiko di Txizimu txi ngadi vanga kala konkuwa, kha si khali ku va ho, kambe kha si na mbi nga vaho. 20Idiku Mkoma kha komisa masikuyo, nga ku si huluki m'thu; aniko ngu mhaka ya va a nga va sawula, a komisile masikuyo.”
21“Keyo mbimo, ngako m'thu a txi khene kwanu: ‘Wonani Mesiya ndiyo’, mwendo ku: ‘Ndiyole haleya’, mi nga kholweni. 22Nguko ku na humelela Vamesiya va makuhu ni vaprofeti va makuhu; va na maha sidiwukiso ni sixamaliso kasi kupengisa ni va va nga sawulwa, ti txi koteka. 23I di anu, ti woneleni. Ani ni songolete ku mi gela totshe.”
Kuwuya ka Mwanana wa M'thu
(Matewu 24:29-31; Luka 21:25-28)
24“Ka masikuyo, msana ka kuxaniseka kuleya, ditambo di na maha txidema, mtxima wu na mbi woninga. 25Tinyeleti ti na wa ngu nzumani, mitamo yi yi ku nzumani yi na tsekatsekiswa. 26Konaho mi na wona Mwanana wa M'thu na a txi ta a di marefuni, a di ni mtamo wa hombe ni wudhumo. 27Ene a na rumela tingelozi takwe, ti txi tshanganisa votshe vale va nga sawulwa, va otshe madhawa a mune, kukhukhela magemeta-mitshi ka mafu kala magemeta-mitshi ka nzuma.”
Gondo ya mxanvu
(Matewu 24:32-35; Luka 21:29-33)
28“Gondani ngu txifaniso txa mkuwu. Ngako madhavi a wona ma di thambile, se ku txi thunga mazokoro, ma tiziva ti to malanga ma hafuhi. 29Ngu toneto, ngako mi txi wona ti txi maheka tiya, ti ziveni ti to ene a hafuhi, a ha txikeni. 30Kha ditshuri na mi gela: Liveleko liya kha li na mbi pinda, na totshe tiya ti sa maheka. 31Nzuma ni mafu si na pinda, kambe mapswi angu kha ma na mbi pinda.”
Kha nga ho wu a zivako ditshiku ni txikhati
(Matewu 24:36-44)
32 # Wona ni ka: Mat. 24:36. “Se ngu mhaka ya ditshiku da kona ni txikhati txa kona, awalo asi zivako, hambi tingelozi ta nzumani, hambi ene Mwanana; hahanze ka Tate. 33Ti woneleni, rinzelani, khongelani, nguko kha mi tizivi taku i nava mbimo muni. 34Nguko ti fana ni m'thu wu a nga maha dipfhumba. Mbimo yi a nga khukha ha m'tini, a ningile mtamo ka sithumi sakwe, mmwani ni mmwani a txi mninga mthumo wakwe, se e leleta ni muwoneleti wa ha txikeni ti to e wonisisa. 35Ngu toneto, ti woneleni, nguko kha mi yi zivi mbimo yi a no wuya ngu yona nyamne wa m'ti, mwendo ni minova, mwendo ni hagari ka wusiku, mwendo mbimo yi wu embako mkuku, mwendo ni mixo. 36Kasiku, ngako a txi wuya a sa zivisa, asi ta mi mana mi di otete. 37Ati ni wombako kwanu, ni ti womba ka votshe; ni khani: Wonelelani!”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Marku 13: BEC2016
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
