Marku 12

Txidinganiso txa vadimi

(Matewu 21:33-46; Luka 20:9-19)

1Se a to khata kuwombawomba kwawe ngu sidinganiso, a txi khene: “M'thu a to phaya mivhinya e mi ranganyeta ngu libhiyo, a txi kelela nzeka yo kamela ka yona mihando, e aka txitezi. Msana keto, a to yi ningela ka vadimi, se ene e teka dipfhumba. 2Ngu mbimo ya kona, a to ruma txithumi ka vadimi ti to txi ya amukela mitxelo ya mivhinya. 3Kambe vona va to mñola, ve mu peka, se ve mu tshumeta asi na txilo. 4A to engeta e ruma tximwani txithumi kwawe. Aniko nene va to mu balisela msungo, va txi mu wisa tingana. 5A to engeta e va rumela mmwani; aniko eyo va to so m'daya. Se e ruma vamwani votala, ku txi pekwa vamwani, vamwani ve dawa. 6Kambe ngu kuva a di ngadi ni mwanana wammweyo, awu a randekako, nene a mu rumile kwawe, ngu kugwitisa, a txi khene: ‘Va na thava mwanana wangu.’ 7Aniko vadimi va to langana, va txi kha vona: ‘M'dyi wa thomba ndiyo! Ngonani hi ta m'daya, thomba yi na maha yathu.’ 8Se ve mñola, ve m'daya, ve mu tshotsha hahanze ka thembwe ya mivhinya. 9Nyamne wa thembwe a na maha txani kani? A nata a ta fuvisa vadimi, se thembwe ya mivhinya a na yi ningela ka vamwani. 10Kha mi nzi kugonda mibhalo yi yi ku: ‘Dirigwi diya vaaki va ngadi nyenya, ngu dona di nga mahwa da hombe do tsanisa. 11Eto ti mahilwe ngu Mkoma, ina i mhaka yi yi xamalisako masoni kwathu kani?’ ” 12Va ti lava ku mñola, aniko ve thava dibutho ngukuva va di ti pfite ti to a womba-womba ngu vona ka txidinganiso txiya. Se ve mu leka, ve tsula.

Txiwotiso ngu mhaka ya mkhupo wa Khezari

(Matewu 22:15-22; Luka 20:20-26)

13Se va to rumela Vafarisi vokari ni va ka Herodha, ka Jesu kasi ku mu bzweta ngu mapswi. 14Vona va to ta kwakwe va txi kha vona: “M'gondisi, ha tiziva ti taku u womba ti ti nga tsana ni ti taku khu thavi m'thu, nguko khu sawuli tikhohe ta vathu; aniko u gondisa nzila ya Txizimu ngu ditshuri. Ina hi na ni fanelo yo humisa mkhupo ka Khezari mwendo hi nga tona kani? Ha khupa mwendo kha hi khupi kani?” 15Sekoko ene, ngu kuziva kukanganyisa kwawe, a ti khene kwawe: “Mi ni dukela txani kani? Ni neheleni didhenari ni di wona.” 16Vona va to di neha. Se ene a txi khene kwawe: “Txifaniso txiya ni m'bhalo wuwa, nza mani kani?” Va txi kwakwe: “Nza Khezari.” 17Se Jesu e va xamula a txi khene: “Tshumetelani Khezari, asi i ku sa Khezari, ni Txizimu asi i ku sa Txizimu.” Se va to xamala ngutu.

Kuwuka ka vafi

(Matewu 22:23-33; Luka 20:27-40)

18 # Wona ni ka: Mith. 23:8. Sekoko Vasadhusi va va wombako tito, kuwalo kuwuka ka vafi, va to ta kwakwe va ta mu wotisa va txi kha vona: 19“M'gondisi, Mosi a hi bhalete a txi khene: M'thu ngako a txi fa, e siya msikati a si nga ni mwanana, mwanawe a na mu sambele thaka e wusela liveleko mwanawe. 20Va ti ti ho vavamna va mtxhanu ni vambidi, va txikoma ni txinanda. Wo khata a tekile msikati, se a txi fa, a sa nga siya mwanana. 21Wa wumbidi a mu tekile, a txi fa nene a si nga ni mwanana. Ti mahisile toneto ni ka wa wuraru. 22Votshe va mtxhanu ni vambidi kha va siya mwanana. Msana ka votshe, a to fa nene wu wamsikati. 23Ngu ditshiku da kuwuka ka vafi, ngako va di wukile, wamsikati wuwa a na va wa mani kani? Nguko a tekilwe ngu votshe va mtxhanu ni vambidi.”

24Jesu a to va xamula a txi khene “Ina kha mi timeli ngu kuwa mi si ziviko mibhalo ni mtamo wa Txizimu kani? 25Nguko ngako va txi na wuka ngu ka vafi, kha va na mbi ngadi ve teka, hambi i di kutekwa; se vathu va na va nga tingelozi nzumani. 26Ngako i di vafi ni kuwuka kwawe ina kha ma gonda dibhukuni ka Mosi, ngu tiya Txizimu txi nga womba nayo txipoponi txi txi kha txona: ‘Ngani Txizimu txa Abrahamu, Txizimu txa Isaake, Txizimu txa Jakobe?’ 27Txona hi nga Txizimu txa vafi, kambe i Txizimu txa va va hanyako. Idito, mi timete ngutu.”

Txirumo txa hombe txa Mlayo

(Matewu 22:34-40; Luka 10:25-28)

28 # Wona ni ka: Luk. 10:25-28. Mmwani wa vabhali, awu a nga va pfa va txi kanetisana, ku ti ngako a txi wona ti to a va xamute ta tinene, a to mtshuketela e ta mu wotisa, a txi khene:

“Ngu wuhi mlayo wo khata ka yotshelele kani?” 29Jesu a to mxamula a txi khene: “Wo khata ngu wuwa: ‘Israyeli, engisa: Mkoma, Txizimu txathu, ngene ekha i ku Mkoma. 30U na randa Mkoma Txizimu txako ngu yotshe mbilu yako, ngu wotshe muhefemulo wako, ngu otshe mapimo ako ni wotshe mtamo wako.’ 31Wa wumbidi ngu wuwa: ‘U na randa muakelani wako, nga ti u ti randisako tona awe upune.’ Kha wu nga ho wumwani mlayo wo pinda yiya.” 32Se m'bhali a to khene kwakwe: “U womba tona, M'gondisi! Kha ditshuri, eto, u ti womba ngu kona, tito: ‘Txizimu ngu txona txokha i ku Mkoma, hahanze ka txona, kha nga ho mmwani’; 33ni ti kambe to: ‘Kuranda Txizimu ngu yotshe mbilu, ngu otshe mapimo, ngu wotshe mtamo, ni kuranda muakelani nga ti m'thu a ti randisako tona’, ti ni lisima kupinda totshe timhamba to hiswa ni totshe tixaka ta timhamba.”

34Jesu a di woni ti to ene a xamute ngu wuzivi, a mgete a txi khene:

“Khu nga kule ni Mfumo wa Txizimu!”

Se ni mmweyo a ti si tsani kambe ku mu wotisa txilo.

Txiwotiso madingano ni Mesiya

(Matewu 22:41-46; Luka 20:41-44)

35Jesu, ngako a txi gondisa, Dithepeleni, a to womba-womba a txi khene:

“Vabhali va wombisa kutxani ti to Mesiya i Mwana Dhavhidha kani? 36#Wona ni ka: Mas. 110:1. Kasi Dhavhidha ene a wombile ngu Moya wo Sawuleka, a txi khene:

‘Mkoma a ti khene ka Mkoma wangu:

Khalahatsha txineneni kwangu kala ni maha valala vako txikhigetelo txa mikondo yako.’

37Se akuwa Dhavhidha a m'dhanako ku i Mkoma, a nga va mwanakwe ngu ha ko txani kani?”

Jesu ni vagondisi va Mlayo

(Matewu 23:1-36; Luka 20:45-47)

Se dibutho di da hombe di ti mu engisa ngu kutsaka. 38Jesu a ti ti womba, na a txi gondisa, a txi khene:

“Ti woneleni ka vabhali. Vona va dhunda kutsimbila va di ambate syambalo so lapha, va dhunda ni kuloswa mu mitendelani. 39Va dhunda makhalo o thanga mu mibusoni. 40Va xakela silo sa tinoni, va txi ti dyelela ngu kulaphisa mikombelo. Va na mana txitsayiso txo karata.”

Mningelo wa noni ya txisiwana

(Luka 21:1-4)

41Msana keto, Jesu a to khalahatsha hafuhi ni hawa va vekako kona male ya miningelo, a txi wonetela ati vathu va ningelisako tona. Vavangi va nyatithombe va txi thela male yayingi. 42Se a txi ta mmweyo wa noni, i nga ti txisiwana, a ta ningela simaleana simbidi, sa sidotho. 43Jesu a to dhana vagondiswa vakwe a txi khene:

“Kha ditshuri na mi gela ni khani: Awu wa noni, wa txisiwana, a vekile mu ka msengo male yayingi ngutu kupinda votshe. 44Votshe vamwani va vekile male, na yi txi khukhela kutalelwani kwawe; kasi ene, kupwatani kwakwe, a ningete sotshe simaleana si a nga ti naso, asi a nga ti fanela kuhanya ngu sona.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Marku 12: BEC2016

Highlight

ಶೇರ್

ಕಾಪಿ