TIMOTHI MƆƐKƐ TIŊDƐ 1
1
1Pɔl, lemnɔ Krayst Jisɔsɛ ka fɔsa Hɔbatokɛ ni kaŋgbe ihɔlɔŋdɛ Krayst Jisɔsayɛ, 2ko Timothi, komɔ mi ŋchɔmalen dɛ wɔŋɔ, kelenyendapani, ni mbɔs hiŋg Hɔbatokɛ Baaɛ ni Krayst Jisɔs Bɛɛ hiyɛ.
Chɔŋsɛkɛ ni thɛthɛ
3Ya chɔŋɔ Hɔbatokɛ sɛkɛ wɔ ya haa mpanthɛ ka bolɛ charaŋ, kendɛ mba ŋami ŋa haɛ, yɛ ya kɔche ha tɛniɛmɔni sɛlimdayɛ. 4Yɛ ya tɛniɛni imam mɔɛ, ya ŋgbelŋgbel ichɔl ni ipal ha ke mɔ, chelɛ ya bɔ pɛ ka iŋɔɛ. 5Ya tɛniɛni laanɛ mɔ tiŋtiŋdɛ, laanɛ kɔ ka che nsendɛ thetha mɔ Lɔisay ni yamɔ Yunisay, ni yɛlayoɛ ya laanɛ kɔ hɔmay. 6Labiyɛ ya mɔni hokbolɛ ha mɔn tɛki wɔŋɔ Hɔbatokɛ hɔmay ka hini pia thimdɛ hɔm bol; 7haliwɔ Hɔbatokɛ ka kahi ni min ŋkwath kɛ ka hi min fɔsa ni nchɔŋmalen ni lɛlinikɛn atok.
8Ma lap ha hɔ jali kɛlɛŋ ha Bɛɛ hiɛ, ni ha yaŋ nɔwɔ kekay. Kɛ poɔni ngbathil mamdɛ ha Womdi Yegbeyɛ fɔsa Hɔbatokay. 9Wɔ loliɛ hiɛ ni vel hi vel charaŋay, che ka mpanth ma hi kɛlɛŋdɛ kɛ ka ikɛlɛŋ la wɔn yemaɛ ni wɔŋɔ Hɔbatokɛ kɔ wɔŋdɛ Krayst Jisɔsay mbɛnay, 10ni yɛlayoɛ koŋ toŋgini hiŋg Nɔloliɛ hiɛ Krayst Jisɔs. Wɔ koŋka wullɛ ni chi ihɔlɔŋ ni ihɔlɔŋ chɔŋgba ko checheɛ ka Womdi Yegbeyɛ. 11Ha Womdi Yegbeo ki la pɔ hami nɔ thɛkɛsiɛ ni awoma ni nɔ toŋgiɛ ayin, 12ni labi ya thenɛki kendɛki. Kɛ ya chela lapka, haliwɔ ya si nɔɛ wɔ ya koŋ laanɛ, ni yabi laanɛ kɛ wɔ bɔ pa yendɛ ŋɔ pɔ kami ha thɔnda haŋ huɛ yɛvɛ. 13Lemil naythin ŋhɔk tiŋtiŋdɛ kɔ koŋ the hiŋg yaŋdɛ, laanɛay ni nchɔŋmalendɛ ma Krayst Jisɔsayɛ; 14mpa tiŋtiŋdɛ kɔ Min Charaŋdɛ wɔ hi thiyeŋdɛ kamɔ ha thɔŋgulɛ.
15Siyɛ lɛ ŋanɛ gbi Esiako ha thimni kɔk hiŋg yaŋ, ni han thiyeŋ haɛ Figilɔs ni Hamoginɔs. 16Ha ni Bɛɛ ke ram Onisifɔrɔsɛ yendapani, haliwɔ wɔm thɛthɛ kɛtkɛt; ka cheni lap ka nyɔlkɔ mamdɛ, 17kɛ yɛ wɔ mɔɛ Romkoɛ wɔ ye che ŋgbelŋgbel ha lɛliɛ mi ni ke mi. 18Ha Bɛɛ ha ni sɔthɔ yendapani hiŋg Bɛɛ hɔɛ yɛ vɛ ni si fuli mpanthɛ ma wɔ ha Ɛfisɔskoɛ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
TIMOTHI MƆƐKƐ TIŊDƐ 1: SNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Sherbro New Testament Portions © Bible Society in Sierra Leone, 2020.