TIMOTHI NSENDƐ 6
6
1Ha ŋanɛ gbi ha kek woklay ŋa kwe ŋsɛmthache ma ŋaɛ anya limani, chelɛ ilel Hɔbatokɛ ni toŋgiɛ kɔ chen simjɛm. 2Ŋanɛ ŋa bi ŋsɛmthacheɛ ŋa laanɛ ŋa chen ha fɛki ŋa ha yɛ ŋa bɛ kump bul layɛ; kɛ la cheɛ ŋa ha ha mpanth ŋyegbe haliwɔ ŋanɛ ŋa sɔthɔ ka mpanth ma ŋaɛ ŋa anya laanɛ ni anya nchɔmalen.
Toŋgi mbol ni bali tiŋtiŋ
Toŋgi ni gbɔnda ja li ha ki. 3Yɛ nɔ gbi toŋgiɛ gbo ja tilaŋ ni la kɔkani ni ŋhɔk ma tiŋtiŋ ma Bɛɛ hiɛ Jisɔs Krayst ni toŋgiɛ kɔ kɔkan naythin Hɔbatokɛ.
4Wɔ thɛŋgthiwɔl ni ŋsɔlɔk, sini be len; chɔŋ thoŋga len ni jali ŋhɔ ki ŋhɔk, ma chi chith, ibiɛ lomthibul, simijɛm, ŋtɛnkɛn, 5ni chɛŋg chɛŋg ka ŋsuŋktha anyin thiyeŋ ŋa biyɛni itɛnin dɛ ni yemani si rɔŋdɛ, ŋa tɛnini lɛ jali Hɔbatokɛ la ha sɔthɔ bɛrɛ.
6Bɛrɛ bom kɔ lɔ ki jali Hɔbatokɛay ka hinigbɔl; 7kɛ hi chiɛni yen hɔlɔoay, ni hi chen bɔ kwe yen hiŋk hɔlɔoay; 8kɛ yɛ hi bi gbo ŋje ni tɔya, ka lanɛ ki hi bi ha bi hinigbɔl. 9Kɛ ŋanɛ ŋa ŋgbelŋgbel ha che baliyɛ ŋa pɔŋni nsɔyan kunɛ, ni chokoth kunɛ, ŋa pɔŋni ki jali ibiɛ nten gbe ni ŋa thenɛki ŋgbelŋgbel ha sɔthɔ bali la pɔŋ anyin ha simi ni simjɛm. 10Kɛ ŋchɔmalen ma fe ma thiŋg ha ja wɛi gbi; hiŋk kokiti ŋgbelŋgbel lo lɔ anya pum ŋa koŋ hok hiŋk laanɛay ni ŋa simgbɔl ŋjɛm ka imɔl.
La ya ha ha ŋa ndelmamiɛ
11Kɛ ha hɔm, nɔki Hɔbatokɛ, ŋkosini lanɛ ki gbi, bɛ nten ma mɔɛ tiŋtiŋday, ŋche Hɔbatokɛay, laanɛ, ŋchɔmalen, yɛthini kath, mbɔsay. 12Ŋchɔ chɔthi yegbeɛ laanɛay; yɛthini ki ihɔlɔŋ chɔŋgbaɛ lɔ pɔ ka vel mɔɛ yɛ laŋni yegbe ŋsei agbe cheɛ. 13Hɔbatokɛ che wɔ wɔŋ ihɔlɔŋ ko yen-o-yen gbi, ni ki Krayst Jisɔs thambasei Pɔŋtɔs Paylet chee lɔ ha laŋni yegbeɛ, 14ya nɔ gbɔnda ŋa thɔŋgul sabaɛ ha ibiɛ thi path ni nthɛkɛ haŋ ni Bɛɛ Jisɔs Krayst hun; 15ni lanɛ ki la bi ha toŋgini yɛ mɛŋk ayɛndɛ ka ruba ni nɔ fɔsa ikɛn, sɛmthache ŋsɛmthacheay ni Bɛɛ a bɛɛayɛ, 16wɔn kɛn gbo wɔ chen bi ha wuɛ ni wɔ ko checheɛ kɔ nɔ chen bɔ fɛtɛ, kɔ nɔ gbi kamu keniɛ o bi ŋa keɛ. Li mani che ko wɔ ko ni fɔsa chɔŋgbaɛ. Vɛlache.
17Ha anya balia hɔlɔoay, gbɔnda ŋa ha ma che gbɔl thukul, ni ma bɛ kithgbɔl ko bali thanthɛn kɛ ko Hɔbatokɛ wɔ hi ka bali ni yen o yen gbi ha the pɛthɛ. 18Ŋa ha ha ikɛlɛŋ, ŋa pɛɛka ka mpanth yegbe, ŋka ka gbɔl mɔɛ gbi ni ha poɔni ni athɔma mɔɛ, 19ha ŋa ŋyini ha ndelmaŋa ŋkibaŋ yegbe ha gbɛŋ thichee, chelɛ ŋa bɔ yɛthini ihɔlɔŋ ŋɔ ihɔlɔŋ fuliɛ.
20O Timothi, mpa la pɔ ko mɔ bɛ fiɛ. Ŋkosini theliaŋdɛ kɔ chendɛ theliaŋ Hɔbatokɛ ni thoŋga mbolɛ kɔ pɔ vel bi nten dɛ, 21kɛ ha jalɛ ki apum ŋa koŋ bin ni gballɛ kɔ naythin laanɛay.
Wɔŋɔ Hɔbatokɛ kɔ che nɔ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
TIMOTHI NSENDƐ 6: SNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Sherbro New Testament Portions © Bible Society in Sierra Leone, 2020.