Luka 20
20
Zo mɛ ahɛ̃ nyɔ hɛ Yezo ya lo li na aye na?
(Mat. 21.23-27; Mar. 11.27-33)
1Mbanga lá kɔi, Yezo aha azi na lo tɛ Nzapa ka ya kota da Nzapa, lo pa nga Nzɔ̃ Pa hɛ̃ la. La agbia tɛ awa lungɔ Nzapa na ye, na awa hangɔ ndia, nga na akangba ti kɔdɔrɔ aga, 2ahũnda lo ya: “Di hɛ̃ e zo mɛ ahɛ̃ mɔ nyɔ ya, mɔ li na aye olo mɛ! Di nga hɛ̃ e zo mɛ ahɛ̃ mɔ nyɔ ya, mɔ li na aye mɛ mɔ ndoli?” 3Yezo agbinya hɛ̃ la ya: “Mbi nga na hũndangɔ ĩ na ndo kɔi. 4Ĩ di hɛ̃ mbi zo mɛ ato Yoanɛ ya, lo ga, lo hɛ̃ azi batisimɔ. Nzapa la ato lo, bere azi la ato lo?” 5Ala ĩ ma so ko, ala to nda bimbingɔ tɛnɛ ka popo tɛ la ya: “Se e gbinya hɛ̃ lo ya, Nzapa la ato Yoanɛ ko, lo na hũndangɔ e ya, wa ta e ye ndo lo tɛ Yoanɛ ma ya nɛ? 6Se e pa nga ya, azi la ato lo ko, adu siɔni, ko azi zu na borokangɔ e na tɛ́nɛ, hongɔ e. Ta sanga ma, zo zu ahĩnga ya, Yoanɛ adu wa pangɔ nyɔ Nzapa.” 7La ala gbinya hɛ̃ Yezo ya: “Ta e hĩnga zo mɛ ato Yoanɛ ya, lo hɛ̃ azi batisimɔ ma.” 8La Yezo apa hɛ̃ la ya: “Ta mbi nga na dingɔ hɛ̃ ĩ zo mɛ ahɛ̃ mbi nyɔ ya, mbi li na aye ni ma.”
Matɔ tɛ asiɔ awa kwa ti yaka vinɔ
(Mat. 21.33-46; Mar. 12.1-12)
9So pɛni, Yezo ato matɔ hɛ̃ azi ya: “Kɔli kɔi asɛ̃ ndo yaka, alu na vinɔ. Ko lo mu ndo yaka ni, lo hɛ̃ awa kwa ya, ala lɛkɛ ni, wa se ngoi ti kɔngɔ le vinɔ alengbi ko, ani kangbi ya ni. So pɛni, lo gwe fɔnɔ, lo ninga kai ngbĩini. 10Ngoi ti kɔngɔ le vinɔ ĩ lengbi ko, lo to wa kwa tɛ lo kɔi ka tɛ awa kwa ti yaka vinɔ ya, awa kwa ti yaka vinɔ ahɛ̃ ni tɛ ni le vinɔ ni. Wa kwa ko ĩ nɔ ĩ si kai ko, awa kwa ti yaka agbɔ̃ lo, asɔ̃ lo, ta ala hɛ̃ lo ye kɔi ma, la ala toma lo. 11Nvɛ̃ yaka ĩ hũ so ko, lo ti lo to wa kwa tɛ lo mɛ ndɛ̃. Wa kwa ko ĩ nɔ ĩ si kai ko, awa kwa ti yaka asɔ̃ lo, aguru lo, ta ala hɛ̃ lo ye kɔi ma, la ala toma lo. 12Nvɛ̃ yaka ati to wa kwa tɛ lo ti ta. Wa kwa ko ĩ nɔ ĩ si kai ko, ala sɔ̃ nga lo, adɛ lo na kã, amu lo abi lo ka pɛ yaka. 13La nvɛ̃ yaka apa ya: ‘Wa ye mɛ mbi na lingɔ nɛ? Adu so ko, mbi to nyi mbi ti kpɔ̃ bɛ mbi, wadila bere ala tɔndɔ lo.’ 14Ngoi mɛ awa kwa ti yaka ĩ hũ nyi nvɛ̃ yaka so ndoga ko, ala tɛnɛ ka popo tɛ la ya: ‘Ĩ ba zo mɛ gbanda ati nvɛ̃ yaka lo mɛ. E ho lo, wadila yaka ni angbã ndũ ye tɛ e.’ 15La ala gbɔ̃ lo, abi lo ka pɛ yaka, aho lo.”
La Yezo apa hɛ̃ la ya: “Ĩ ba ye mɛ nvɛ̃ yaka na lingɔ lo mɛ. 16Lo na nɔngɔ, kpɔngɔ awa kwa ti yaka vinɔ, ko lo na mungɔ yaka ni, hɛ̃ngɔ azi mɛ ndɛ̃.” Ngoi mɛ azi ĩ ma so ko, ala pa hɛ̃ lo ya: “Ale ta oko asi ma!” 17La Yezo aba lɛ la, apa hɛ̃ la ya: “Asu ka ya Buku tɛ Nzapa ya:
‘Tɛ́nɛ mɛ ndo awa wangɔ da akɛ̃, abi tise,
La ati tɛnɛ ti nda ngɔrɔ da.’
18Zo ko la ati na ndo tɛ́nɛ ni ko, tɛrɛ lo akara. Wa se tɛ́nɛ ni ati ndo zo ko, aoro ya lo lupu lupu.”
Lapo mɛ andofuta hɛ kota gbia ti Roma
(Mat. 22.15-22; Mar. 12.13-17)
19Awa hangɔ ndia, na agbia tɛ awa lungɔ Nzapa na ye agi kɔdɛ ya, ani gbɔ̃ Yezo bo na ngoi ni ko. Ta sanga ma, ala hĩnga ya, lo to matɔ ni ko hɛ̃ ani. Ta ala gbɔ̃ lo ma, na lo mɛ ya, ala kpɛ mbɛtɔ tɛ azi. 20La ala to nda dokangɔ Yezo, ala to awa ginɔ ka tɛ lo. Awa ginɔ ni ko ndoli ye nga ma abɛta azi ya, ani hũnda Yezo na poroso, wa ani gbɔ̃ nda lo na ya tɛnɛ mɛ lo ndotɛnɛ. Ala ye lingɔ so ya, ani lua lege ti kangɔ lo hɛ̃ Pilato mɛ gbia ti sese, wa lo fa ngbanga tɛ lo. 21Awa ginɔ ahũnda lo ya: “Wa hangɔ lo tɛ Nzapa, e hĩnga ya, tɛnɛ mɛ mɔ ndotɛnɛ, nga na ye mɛ mɔ ndoha adu bɛtani. Ta mɔ ndokpɛ lɛ zo ma. Kanda mɔ ndoha azi na bɛta lo mɛ aba sé du mɛ Nzapa ndoye. 22Wa pa hɛ̃ e: ndia tɛ e ahɛ̃ lege ya, afuta lapo hɛ̃ kota gbia ti Roma, bere ta afuta ma?” 23Ko Yezo ahĩnga poroso tɛ la, la lo pa hɛ̃ la ya: 24“Ĩ fa mbi na faranga kɔi.” Ala ĩ fa na lo ko, lo hũnda la ya: “Lɛ zo na ili zo mɛ na lɛ faranga olo mɛ ko, adu tɛ na?” Ala gbinya hɛ̃ lo ya: “Adu lɛ kota gbia ti Roma nga na ili lo la.” 25La Yezo apa hɛ̃ la ya: “Wa ĩ futa lapo tɛ kota gbia ti Roma hɛ̃ lo, ko ĩ futa nga ye tɛ Nzapa hɛ̃ Nzapa.” 26Ta ala lua lo na siɔ tɛnɛ na ya tɛnɛ mɛ lo tɛnɛ na gbɛlɛ azi ma. Kanda tɛnɛ mɛ lo gbinya hɛ̃ la ko, ala bema na lo ni sĩ, ko ala dunga ngĩini.
Asaduseo ahũnda Yezo na lo ti songo tɛ azi na pɛ kwa
(Mat. 22.23-33; Mar. 12.18-27)
27Asaduseo adu azi mɛ ndonɛ ya, se zo akpi we ko, ta lo so ma. Mbanga lá kɔi ko, ambanga aga ka tɛ Yezo, ahũnda lo ya: 28“Wa hangɔ lo tɛ Nzapa, Mɔizɛ asu ndia hɛ̃ e ya: ‘Se kɔli adu na wali, ko se ta ala dú nyi ma, ko kɔli akpi ko, ale nyita lo ti kɔli amu we muã ko, adu na lo, adú lo na ayangambi hɛ̃ nyita lo wa kwáni.’ ” 29Ala pa nga hɛ̃ Yezo ya: “Wa ma hĩ! Aya kɔli mbara mbara asi na ya ta la kɔi, to la kɔi. Kɔzo nyi adu na wali, ta ala dú nyi ma, ko kɔzo nyi akpi. 30Nyingambi ti sɛ amu we muã ni, adu na ni, ta ala dú nga nyi ma, ko nyingambi ti sɛ akpi. 31Nyingambi ti ta nga bo so. Ko aya kɔli ko zu mbara mbara adu ndo na wali ni ko, ta ala dú nyi ma, ko ala zu akpili bo nga so. 32So pɛ kwá tɛ la zu ko, wali nvɛni akpi nga. 33Wa na lá ko gbanda awa kwáni aso ko, kɔ wali nvɛni so popo tɛ aya kɔli ko mbara mbara gbanda na? Omɛ ala zu adu ndo na wali ko mɛ!”
34La Yezo agbinya hɛ̃ la ya: “Ge lɛ sese la akɔli na awe ndodungbi. 35Kanda akɔli na awe ko la Nzapa amu la ka lɛ lo ya, ala du azi mɛ alengbi ti songɔ na pɛ kwá, ala du nga azi mɛ alengbi ti dungɔ azi ti sese mɛ na gangɔ gesi ko, ta ala na dungbingɔ ma. 36Ta ala lengbi ti kpilingɔ fani mɛ ndɛ̃ ma, ala ti kwɛ kɔi nga ma aangelo. Ala aya Nzapa, ta sanga ma, ala so na pɛ kwá. 37Mɔizɛ afa ndo yango ya, awa kwáni aso gbanda. Na ya mbɛti mɛ ndopa lo ti sã ti kĩ ko, Mɔizɛ aili ndo Gbia Nzapa ya, lo Nzapa mɛ Abrahama, na Izaki, nga na Yakobo ndovɔrɔ. 38Nzapa adu Nzapa mɛ azi mɛ lɛ la ngɛ̃ ndovɔrɔ lo, kanda ta lo Nzapa tɛ awa kwáni ma. Oko afa ya, Abrahama, na Izaki, nga na Yakobo ndodu lɛ la ngɛ̃. Ta sanga ma, azi zu ndodu lɛ la ngɛ̃ na lo tɛ lo.” 39-40Ko ta ambanga awa hangɔ ndia ati tara ndo hũndangɔ Yezo na ndo ma, la ala pa hɛ̃ lo ya: “Wa hangɔ lo tɛ Nzapa, mɔ tɛnɛ nzɔ̃ni.”
Mɛsia adu Gbia tɛ Davidi
(Mat. 22.41-46; Mar. 12.35-37)
41Yezo ahũnda la ya: “Kɔdɛ mɛ azi ndopa ya, Mɛsia lo tara Davidi sia? 42Ta sanga ma, Davidi nvɛni apa ndo ka ya buku ti Bia ya:
‘Gbia Nzapa apa hɛ̃ Gbia tɛ mbi ya:
Du na ndo kɔti ti mbi,
43Nga ka gbanda mbi nwɔ awa kɛ̃ngɔ mɔ,
Mbi kpa la gbe gɛrɛ mɔ.’
44Davidi aili ndo Mɛsia ya lo Gbia, ko kɔdɛ mɛ Mɛsia alengbi nga ti dungɔ tara Davidi sia?”
Yezo atisa azi ya ta ala mu se li ye tɛ awa hangɔ ndia ma
(Mat. 23.1-36; Mar. 12.38-40)
45Ngoi mɛ azi butu butu so ndoma tɛnɛ mɛ Yezo ndotɛnɛ ko, Yezo apa hɛ̃ ava lo ya: 46“Ĩ bata li ĩ nzɔ̃ni na lo tɛ awa hangɔ ndia. Bɛ la ndode na fɔnɔngɔ na yɔngɔrɔ bɔngɔ na tɛre la, so fangɔ ya ani akota azi. Ala ndoye nga ya, azi abala ani nzɔ̃ni ka lɛ kɔdɔrɔ. Ngoi mɛ ala li ya da sambela ko, ala ndosara tɛ la bo akiti mɛ na gbɛlɛ azi zu, wa ala dunga da. Na ngoi ti kota yenga ko, ala ndosara akiti mɛ nzɔ̃ni buai, wa ala dunga da. 47Ala ndohanda awe muã, alɔ atanga ye tɛ la zu na ti la. Ala ndosambela yɔngɔrɔ sambela so fangɔ ya, ani anzɔ̃ azi. Nzapa ahɛ̃ la gbanda etumbu aɔ tɛ azi mɛ ndɛ̃ zu!”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 20: NGB87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
