Luka 19
19
Yezo na Zakeo
1Ngoi mɛ Yezo ĩ si ka ya kɔdɔrɔ ti Yeriko wɛ ko, lo fangbi ti ya kɔdɔrɔ ni. 2Kɔli kɔi so ndo ko, ili lo la Zakeo, lo gbia tɛ awa sɔrɔngɔ lapo, lo nga wa nwa. 3Lo ndogi ndo kɔdɛ ya, ni hũ Yezo so popo tɛ azi butu butu, ko ni hĩnga lo. Lo ndo nduru zo, ko lo ha ndo hũngɔ Yezo gba, na lo tɛ azi butu butu mɛ ndo so ndo ko. 4Lo ĩ hũ so ko, lo kpɛ lo gwe ka uzu, lo ma na ya kɛkɛ mɛ ili ni la sikɔmɔrɛ, ya na ngoi ko la Yezo aga so ɔngɔ ti ndo ko ko, ni hũ lo. 5Yezo aga asi so ndo mɛ Zakeo da, aya lɛ lo ndozu, apa hɛ̃ Zakeo ya: “Zakeo, zu hiɔ, ta sanga ma, na lá olo ko, ale mbi la ka ya da tɛ mɔ.” 6Zakeo azu hiɔ, ayamba Yezo na dengɔ bɛ, amu lo, agwe na ni ka ndo tɛ lo. 7Azi ĩ hũ so ko, ala ndunguma ya: “Kɔli olo anɔ so langɔ ka tɛ wa lingɔ siɔ ye oo!” 8Gbia Yezo na Zakeo ĩ si ka tɛ Zakeo ko, Zakeo alo ndozu, apa hɛ̃ Yezo ya: “Wa hangɔ lo tɛ Nzapa, ma mbi, mbi na kangbingɔ ya aye tɛ mbi na ndo bɛ ni, ko mbi hɛ̃ ambanga hɛ̃ awa yɛlɛ. Se adu ya, mbi handa ndo zo, mbi mu faranga tɛ lo na ti lo ko, mbi na diringɔ na faranga ni ko hɛ̃ lo fani siɔ.” 9Yezo apa hɛ̃ lo ya: “Na lá olo ko, mɔ na azi ti nda se wa tɛ mɔ ĩ so, na lo mɛ ya, mɔ nga tara Abrahama. 10Ta sanga ma, mbi Nyi Zo mbi ga so gingɔ azi mɛ ayu lege, mbi ga nga so songɔ azi mɛ agere.”
Matɔ tɛ awa kwa mɛ alua nwa
(Mat. 25.14-30)
11Ngoi mɛ ndo azi so ndoma tɛnɛ mɛ Yezo ndotɛnɛ ko, Yezo alo matɔ mɛ ndɛ̃ hɛ̃ la. Ko nga ma la lo da ndo ndũ na Yeruzalɛmɛ ko, azi ndoda ndo bɛ la ya, Nzapa na gangɔ so lɛngɔ gbia bo na ngoi ni ko. 12Matɔ ni lo mɛ: “Mbanga zo kɔi mɛ na ale tɛ gbia aye ndo gwengɔ ka kɔdɔrɔ mɛ yɔngɔrɔni ya, akpã ni gbia, wa so pɛni ko, ni diri ka tɛ ni. 13Uzu ti lo ɔngɔ ko, lo ili awa kwa tɛ lo sui kɔi, lo hɛ̃ zo kɔi kɔi nwa kɔi. Lo pa hɛ̃ la ya: ‘Ĩ dɛ buze na nwa olo mɛ, nga ka mbi diri mbi ga.’ 14Bɛ azi ti kɔdɔrɔ tɛ lo akɛ̃ ndo lo kasa kasa. Lo ĩ ɔ ko, ala to awa nɔngɔ kwa pɛko lo ya, ala nɔ apa hɛ̃ kota gbia mɛ kai ya, ta ani ye ya, kɔli ko adu gbia tɛ ani ma.
15“Ĩ kpã lo gbia wɛ ko, lo diri ka ya kɔdɔrɔ tɛ lo. La lo to kwa hɛ̃ awa kwa mɛ ndo lo hɛ̃ la nwa, ya ala ga afa ni na nwa mɛ ala lua na ndo omɛ ndo ni hɛ̃ la. 16Wa kwa ti uzu asi gbɛlɛ lo, apa hɛ̃ lo ya: ‘Gbia, mbi lua nwa mɛ ndɛ̃ sui kɔi na ndo omɛ ndo mɔ hɛ̃ mbi.’ 17La gbia apa hɛ̃ lo ya: ‘Mɔ li nzɔ̃ni, mɔ nzɔ̃ wa kwa, oko la mɔ li aye mɛ yakere na seni ko, mbi kpã mɔ gbia ti ndo kɔdɔrɔ sui kɔi.’ 18Wa kwa ti se aga, apa hɛ̃ lo ya: ‘Gbia, mbi lua nwa kɔ̃ na ndo omɛ ndo mɔ hɛ̃ mbi.’ 19Gbia apa hɛ̃ lo ya: ‘Tɛ mɔ ko, mbi kpã mɔ gbia ti ndo kɔdɔrɔ kɔ̃.’ 20Wa kwa ti ta aga, apa ya: ‘Gbia, ba nwa tɛ mɔ lo mɛ, mbi bata ndo ni ka ya bɔngɔ, mbi hɔndɛ ni. 21Mbi kpɛ ndo mbɛtɔ tɛ mɔ, ta sanga ma, mɔ wa zaga, mɔ ndomu ye mɛ ta mɔ la mɔ kpã ma, mɔ ndokɔ nga tɛ mɛ ta mɔ la mɔ lu ma.’ 22Gbia apa hɛ̃ lo ya: ‘Mɔ siɔ wa kwa, mbi na fangɔ ngbanga tɛ mɔ na ndo tɛnɛ ti nyɔ mɔ nvɛni. Mɔ hĩnga ndo kwɛ ya, mbi wa zaga, ta mbi ndomu ye mɛ ta mbi la mbi kpã ma, mbi ndokɔ nga tɛ mɛ ta mbi la mbi lu ma. 23Wa nda mɛ ta mɔ kpã nwa tɛ mbi ka ya da mɛ andobata na faranga, ya na ngoi mɛ mbi diri ko, mbi lua nwa mɛ ndɛ̃ ndo ni ma nɛ?’
24“So pɛni, gbia apa hɛ̃ azi mɛ so ndo ko ya: ‘Ĩ mu nwa ko ti lo, ĩ hɛ̃ wa kwa mɛ na ni sui kɔi.’ [ 25Ala pa hɛ̃ lo ya: ‘Gbia, lo na nwa sui kɔi, alengbi wɛ!’] 26Gbia agbinya hɛ̃ la ya: ‘Mbi pa hɛ̃ ĩ ya, zo ko la na ye ko, na hɛ̃ngɔ lo ye mɛ ndɛ̃ ma wo ma, kanda zo ko la na nyi ye ko, na mungɔ nyi ye ni ko ti lo. 27Adu tɛ awa kɛ̃ngɔ mbi ko akɛ̃ ya, ta mbi du gbia tɛ ani ma ko, ĩ ga na la ge gbɛlɛ mbi, ĩ kpɔ la.’ ”
Yezo asi ka kɔdɔrɔ ti Yeruzalɛmɛ
(Mat. 21.1-11; Mar. 11.1-11; Yoa. 12.12-19)
28Yezo ĩ tɛnɛ so we ko, lo ɔ uzu tɛ la so gwengɔ ka Yeruzalɛmɛ. 29Ngoi mɛ lo ĩ doli na kɔdɔrɔ ti Bɛtɛfaze na ti Betania mɛ na tɔ̃ hɔtɔ mɛ ili ni la Olivie ko, lo to ava lo sɛ na kwa ka gbɛlɛ lo ya: 30“Ĩ nɔ ka kɔdɔrɔ ko la ka gbɛlɛ ĩ. Ngoi mɛ ĩ si kai ko, ĩ na hũngɔ nyi punda mɛ agbe lo na gu kɛkɛ, ta zo kɔi ade ako ndo lo ma. Ĩ zara lo ĩ ga na ni. 31Wa se zo ahũnda ĩ ya: ‘Ĩ ndozara lo ya nɛ?’ ko, ĩ gbinya hɛ̃ lo ya: ‘Gbia tɛ e aye kongɔ ndo ni.’ ” 32Ava Yezo ko sɛ ĩ nɔ, ĩ si kai ko, ala tã ye zu nga ma se mɛ fɛrɛ Yezo apa na ni hɛ̃ la. 33Ngoi mɛ ala so ndozara nyi punda ko, anvɛ̃ ni ahũnda la ya: “Ĩ ndozara nyi punda ni ya nɛ?” 34Ava Yezo agbinya hɛ̃ la ya: “Gbia tɛ e aye kongɔ ndo ni.” 35La ava Yezo amu nyi punda ni, anɔ na ni hɛ̃ Yezo. Ala u akota bɔngɔ tɛ la na ndo nyi punda ni, ala za Yezo, la lo ko ndo punda. 36Ngoi mɛ Yezo so ndogwe ko, azi ahãna akota bɔngɔ tɛ la tɛrɛ la, agbala na ndo lege ya, lo ɔ ti ndo ni. 37Lo mu ndo lege mɛ alo ka ndo hɔtɔ ti Olivie azu. Ko ngoi mɛ lo ĩ doli na Yeruzalɛmɛ ko, bɛ ava lo mɛ ndo butu butu ade ma wo ma, ko ala gonda Nzapa na kɔngɔ, na lo ti aye ti kpɛnɛ zu mɛ ndo Yezo ali. 38Ala pa ya: “Gbia Nzapa asunu bɛ gbia ko la tɛrɛ gangɔ na ili lo Nzapa ma ke! Nzapa mɛ ka yayu ali bɛ ya, bɛ azi adu pii, wa ala gonda lo ma ke!”
39Ambanga Afarizeo mɛ ndo so popo tɛ azi ko butu butu apa hɛ̃ Yezo ya: “Wa hangɔ lo tɛ Nzapa, hɛ̃ nyɔ hɛ̃ ava mɔ, ko ala zia dɛrɛngɔ kɔngɔ.” 40La Yezo agbinya hɛ̃ la ya: “Mbi pa hɛ̃ ĩ ya, se ala zia dɛrɛngɔ kɔngɔ ko, atɛ̃nɛ adɛrɛ kɔngɔ!”
Yezo ato to so awa Yeruzalɛmɛ
41Ngoi mɛ Yezo ĩ doli ti singɔ Yeruzalɛmɛ, lo ĩ bi le lo da ko, lo to so awa kɔdɔrɔ ni. 42Lo pa ya: “Ae awa Yeruzalɛmɛ, na lá olo ko, ĩ hĩnga bɛ ye mɛ alengbi ti lingɔ ya, bɛ ĩ adu pii ma ke! Kanda na olo ko, Nzapa ahɔndɛ ĩ na ye ni ko, ko ta ĩ lengbi ti hũngɔ ni ma. 43Ta sanga ma, mbanga lá kɔi gbanda ko, awa kɛ̃ngɔ ĩ aka gbanda kɔdɔrɔ tɛ ĩ kɛrɛrɛ, alonga mbage na mbage, abi to tɛrɛ ĩ. 44Ala kpɔ gbanda ĩ zu, agbɛ̃ nga kɔdɔrɔ tɛ ĩ, ko ta ala zia gbanda bɛ ténɛ kɔi na ndo fɔ̃ lo ma, na lo mɛ ya, ta ĩ hĩnga ngoi mɛ ndo Nzapa aga so zangɔ ĩ ma!”
Yezo ali ka ya kota da Nzapa
(Mat. 21.12-17; Mar. 11.15-19; Yoa. 2.13-22)
45Yezo ĩ li ka ya kota da Nzapa, lo ĩ hũ awa kangɔ ye ko, lo to nda tomangɔ la, 46lo pa hɛ̃ la ya: “Buku tɛ Nzapa apa ya: ‘Da tɛ mbi Nzapa adu da mɛ azi na sambelangɔ mbi da.’ Kanda tɛ ĩ ko, ĩ gbinya ni ati nga ma do tɛ́nɛ mɛ awa nzĩ ndobere da!”
47Yezo ndoha ndo azi na lo tɛ Nzapa lá kwɛ kwɛ ka ya kota da Nzapa. Agbia tɛ awa lungɔ Nzapa na ye, na awa hangɔ ndia, nga na akota azi ti kɔdɔrɔ ndogingisa ndo hongɔ lo. 48Ko ala ha ndo hongɔ lo gba, ta sanga ma, azi zu ndozi ndo ma la, ndoma ndo lo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 19: NGB87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
