MARK 15

Eda Jesus Eka Ke Iso Pilate

(Mt 27.1-2,11-14; Lk 23.1-5; Jn 18.28-38)

1EKEM eyo ekesesiere, ikpɔ oku ye mbiowo ye mme scribe ye ofuri esop esobo ibuot, ebɔp Jesus, eda Enye edaha ekeyak enɔ Pilate. 2Ndien Pilate obup Enye ete, Nte Afo edi Edidem mme Jew? 3Jesus ɔbɔrɔ ete, Ndi Enye. 4Edi ikpɔ oku edori Enye ediwak ikɔ. Pilate ɔtɔŋɔ ntak obup Enye ete, Nte Afo ubɔrɔke baba ikɔ kiet? se adaŋa ediwak ŋkpɔ ke mmɔ edori Fi. 5Edi Jesus ibɔrɔke aba baba ŋkpɔ kiet; emi esin idem akpa Pilate eti-eti.

6Edi ke kpukpru usɔrɔ andikara akam esisana owo-ŋkpɔkɔbi kiet, eke mmɔ ebeŋede, ayak ɔnɔ mbio-obio. 7Ndien owo kiet emi ekerede Barabbas ke ana ke ebuka ye mmɔ emi ekesinde ndutime ke obio, kpa mbon emi ekowotde owo ke ndutime oro. 8Ekem otu owo edɔk etiene Pilate, etɔŋɔ ndibeŋe enye ete anam nte akam anamde ye mme imɔ. 9Edi Pilate ɔbɔrɔ mmɔ ete, Nte mbufo eyom ete nsana Edidem mme Jew nyak nnɔ mbufo? 10Koro enye ɔfiɔk ete ikpɔ oku ekayak Jesus esin imɔ ke ubɔk ke ntak ufup. 11Edi ikpɔ oku edemere otu owo ndibeŋe ete enye akpakam ayak Barabbas ɔnɔ mme imɔ. 12Edi Pilate ɔtɔŋɔ ntak ɔbɔrɔ mmɔ ete, Eyom ami nnam ndien didie ye Enye emi mbufo ekotde Edidem mme Jew? 13Mmɔ etɔŋɔ ntak efiori ete, Wot Enye ke cross. 14Edi Pilate ɔdɔhɔ mmɔ ete, Ntak-e? nso idiɔk ŋkpɔ ke Enye akanam? 15Edi mmɔ edɔdiɔŋ efiori ete, Wot Enye ke cross. Ekem ke eriyom ndinem otu owo esit, Pilate asana Barabbas ayak ɔnɔ mmɔ, ndien ke enye ama akamia Jesus, ayak Enye esin mmɔ ke ubɔk ete, Eda eka ekowot ke cross.

16Ekem mbon-ekɔŋ eda Enye eduk ke esit okure, emi edide akwa ufɔk andikara; enyuŋ ekot ofuri ŋka mmɔ ebon. 17Ndien mmɔ esine Enye ididuot ekura, enyuŋ edɔk anyanya ŋkukim eyara Enye ke ibout; 18mmɔ enyuŋ etɔŋɔ ndikɔm Enye, ete, Etia, Edidem mme Jew. 19Mmɔ enyuŋ eda eto emia Enye ke ibuot, ekɔk Enye etap, enyuŋ etɔŋɔ edɔŋ etuak ibuot enɔ Enye. 20Ndien ke ini mmɔ ema ekasak Enye ema, mmɔ efɔrɔre Enye ididuot ekura ke idem, enyuŋ esine Enye edisine-ŋkpɔ Esiemɔ, enyuŋ eda Enye ewɔrɔ eka ndiwot ke cross.

21Ndien mmɔ enyik owo kiet emi ebede, Simon owo Cyrene, ete Alexander ye Rufus, emi otode ke iŋwaŋ ete asaŋa ye mme imɔ obiom cross Esie. 22Mmɔ enyuŋ eda Enye edi ke ebiet Golgotha, emi ɔwɔrɔde Ebiet mkpɔkpɔrɔ. 23Mmɔ enyuŋ enɔ Enye wine emi esinde myrrh ke esit: edi Enye ibɔhɔ 24Ndien mmɔ ekɔŋ Enye ke cross, enyuŋ edeme edisine-ŋkpɔ Esie, esin afia ebaŋa mmɔ, ndifiɔk se mmɔ kiet kiet ekpadade. 25Ekedi ɔyɔhɔ hour usukkiet ke usenubɔk, ndien ekɔŋ Enye ke cross. 26Ndien mmɔ ewet ŋwed eridori-ikɔ edian ke enyɔŋ, ete, EDIDEM MME JEW. 27Mmɔ enyuŋ ekɔŋ mbon ŋwo iba ke cross ye Enye, 28kiet ke ubɔk nasia Esie, enye eken ke ufien. 29Mmɔ eke esaŋade ebe esuene Enye, enyeŋe ibuot ete, Ha! Afo emi owuride temple, onyuŋ ɔbɔpde enye ke usen ita, 30nyaŋa idem fo, nyuŋ suhɔre ke cross. Kpasuk ntre ŋko ikpɔ oku ye mme scribe esak 31Enye nsahi ke otu idem mmɔ, ete, Enye akanyaŋa owo efen; ikemeke ndinyaŋa Idem Esie. 32Yak Christ, Edidem Israel, ɔsuhɔre ke cross naŋa, man nnyin ikut inyuŋ inim ke akpanikɔ. Mmɔ emi ekɔkɔŋde ye Enye ke cross enyuŋ etɔk Enye.

33Ndien ke ini osimde ufɔt uwemeyo, ekim ofuk ofuri isɔŋ tutu osim ɔyɔhɔ hour ita ke uwemeyo. 34Ndien ke ɔyɔhɔ hour ita ke uwemeyo, Jesus ofiori ke ɔkpɔsɔŋ uyo, ete, Eloi, Eloi, lama sabachthani? emi ɔwɔrɔde, ete, Abasi Mi, Abasi Mi, nsinam Afo ɔkpɔŋde Mi? 35Ndien ke ini ndusuk mmɔ emi edade ekpere ekopde, mmɔ edɔhɔ ete, Sese, Enye ke okot Elijah. 36Ndien owo kiet efehe ekedebi ndɔbɔ ke vinegar owuk ke eto, ɔnɔ Enye ɔŋwɔŋ, onyuŋ ɔdɔhɔ ete, Yak etie; nnyin ise mme Elijah ke edi edikɔŋɔre Enye. 37Ndien Jesus osio ɔkpɔsɔŋ mkpo, onyuŋ ayak ukpɔŋ Esie. 38Ndien ukara temple asiaha mbak iba, ɔtɔŋɔde ke enyɔŋ, tutu osim isɔŋ. 39Ekem ke ini centurion, emi adade ekpere ekem iso ye Enye, okutde nte Enye ayakde ukpɔŋ Esie ntem, enye ete, Ke akpanikɔ owo emi ekedi Eyen Abasi. 40Iban ŋko edu do, eda nsan-nsan ese; Mary Magdalene odu ke otu mmɔ, ye Mary eka James ekpri ye Joses, ye salome, 41emi ekasaŋade ye Enye ese ebaŋa Enye, ke adaŋemi Enye okodude ke Galilee, ye ediwak iban eŋwen, emi ekasaŋade ye Enye edɔk edi ke Jerusalem.

42Ekem ke ini osimde mbubreyo, sia edide ini mbeŋe-idem, oro edi, usen emi ebemde sabbath iso, 43Joseph, owo Arimathaea, owo akwa esop emi enyenede ukpono, emi ke idem esie etiede ebet Ubɔŋ Abasi, edi; enye onyuŋ oduk etiene Pilate uko-uko ekebeŋe okpo Jesus. 44Ndien Pilate eyik mme Enye akpakpa ama; onyuŋ okot centurion, obup mme Enye ama akpa ebigi esisit. 45Ekem ke ini enye okopde uyo centurion, enye ayak okpo ɔnɔ Joseph. 46Enye oro onyuŋ edep ɔfɔn linen ɔkɔŋɔre okpo ada ɔfɔŋ linen oro ɔbɔp Enye ke idem, onyuŋ onim Enye ke udi emi eketuŋde ke itiat: onyuŋ akpat itiat eberi ke inua udi. 47Ndien Mary Magdalene ye Mary eka Joses ekut ɔtɔ nte enimde Enye.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

MARK 15: ENA

Highlight

ಹಂಚಿಕೊಳ್ಳಿ

ಕಾಪಿ