MARK 16
16
Jesus Eset Ke Ŋkpa
(Mt 28.1-8; Lk 24.1-12; Jn 20.1-10)
1EKEM ke ini sabbath ebede, Mary Magdalene, ye Mary eka Joses, ye Salome edep ufuɔŋkpɔ, man mmɔ edi ediyet Enye idem. 2Ndien ke ntuhube usenubɔk ke akpa usen urua, mmɔ edi ke udi ke ini utin asiahade. 3Ndien mmɔ eneme ye kiet eken ete, Anie edikpat itiat ke inua udi osio ɔnɔ nnyin? 4Edi ke ini mmɔ emenerede enyin, mmɔ ekut ete ekekpat itiat esio: koro enye okpon eti-eti. 5Ke ini mmɔ edukde ke esit udi, mmɔ ekut akparawa kiet etiede ke ŋkaŋ nnasia, esine afia ɔfɔŋidem; ndien idem akpa mmɔ. 6Edi enye ɔdɔhɔ mmɔ ete, Ekuyak idem akpa mbufo: mbufo eyom Jesus eyen Nazareth, emi ekewotde ke cross: Enye emeset Enye iduhe mi ese ebiet emi ekenimde Enye. 7Edi eka ekedɔhɔ mbet Esie ye Peter, ete Enye ebem mbufo iso aka ke Galilee: mbufo edikut Enye do, nte Enye ɔkɔdɔhɔde mbufo. 8Ndien mmɔ ewɔŋɔ efeŋe ekpɔŋ udi, koro nnyek-idem ye mkpa-idem omumde mmɔ: mmɔ inyuŋ itiŋke baba ikɔ kiet inɔ owo, koro ndik anamde mmɔ.
9Ke ini Jesus abakde eset ke akpa usen urua, ebem iso ayarare idem owut Mary Magdalene, emi Enye okosiode enye demon itiaba ke idem. 10Enye oro aka okobuk ɔnɔ mmɔ emi ekodude ye Enye, nte mmɔ efuhɔde enyuŋ etuaŋade. 11Ndien ke ini mmɔ ekopde ete, Enye odu ke uwem, Mary ama onyuŋ okut Enye, mmɔ inimke ke akpanikɔ.
12Ke ŋkpɔ emi ama ekebe, Enye ayarare Idem ke ido efen owut owo mmɔ iba, nte mmɔ esaŋade ke usuŋ eka iŋwaŋ. 13Ndien mmɔ oro edaha ekobuk enɔ mmɔ eken, mmɔ inyuŋ inimke mmɔ ke akpanikɔ.
14Ke ukperedem Enye ayarare Idem Esie ɔnɔ mbet Esie duop-ekiet ke idem mmɔ nte mmɔ etiede ke itie-udia; Enye onyuŋ asua unana mbuɔtidem ye nsɔŋesit mmɔ ɔnɔ mmɔ, koro mmɔ minimke mmɔ oro ekokutde Enye ke Enye ama ekeset ke akpanikɔ. 15Enye onyuŋ ɔdɔhɔ mmɔ ete, Eka ke ofuri ererimbot ekekwɔrɔ gospel enɔ kpukpru owo. 16Owo eke onimde ke akpanikɔ onyuŋ anade baptism, eyenyaŋa enye; edi enye eke etrede ndinim ke akpanikɔ, ikpe eyebiom enye. 17Ndien mme idiɔŋɔ emi eyetiene mmɔ emi enimde ke akpanikɔ: ke enyiŋ Mi ke mmɔ eyebin mme demon; eyesem mbufa usem; 18eyemen urukikot ke ubɔk; onyuŋ edieke mmɔ eŋwɔŋde ŋkpɔ ekededi eke abiatde uwem, ididiɔkke ye mmɔ; mmɔ eyedori mbon-udɔŋɔ ubɔk, ndien mmɔ oro eyekop nsɔŋidem.
Jesus Ɔdɔk Ke Enyɔŋ
(Lk 24.50-53; Acts 1.9-11)
19Ntre ndien ke Ɔbɔŋ Jesus ama eketiŋ ntem ɔnɔ mmɔ, emen Enye edɔk ke heaven, Enye onyuŋ ɔsuhɔre etie ke ubɔk nnasia Abasi. 20Ndien mmɔ ewɔŋɔ ekekwɔrɔ ikɔ ke kpukpru ebiet, Ɔbɔŋ onyuŋ anam utom ye mmɔ, onyuŋ ada mme idiɔŋɔ eke esaŋade ye erikwɔrɔ ɔsɔŋɔ ikɔ mmɔ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MARK 16: ENA
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
