LUKE 11

Jesus Ekpep Ŋkpɔ Abaŋa Akam

(Mt 6.9-15; 7.7-11)

1EDIKEM, nte Enye ɔbɔŋde akam ke ebiet kiet, ke ini Enye odopde, kiet ke otu mbet Esie ɔdɔhɔ Enye ete, Ɔboŋ, kpep nnyin ndibɔŋ akam, kpa nte John onyuŋ ekpepde mbet esie. 2Edi Enye ɔdɔhɔ mmɔ ete, Ke ini mbufo ebɔŋde akam, edɔhɔ ete,

Ete, yak ikpono enyiŋ Fo.

Yak Ubɔŋ Fo edi.

3 Nɔ nnyin udia eke ekemde nnyin ke usen ke usen.

Nyuŋ dahado ke mme idiɔk-ŋkpɔ nnyin,

4 Koro nnyin ke idem nnyin idahadedo inɔ kpukpru owo emi ekamade nnyin isɔn.

Kunyuŋ uda nnyin usin ke idomo.

5Ndien Enye ɔdɔhɔ mmɔ ete, Anie ke otu mbufo edinyene ufan, edinyuŋ adaha etiene enye ke ufɔt okoneyo, onyuŋ ɔdɔhɔ enye ete, 6Ufan, buɔt mi uyo ita; koro ufan mi kiet, emi asaŋade isaŋ, ama edi ke ufɔk mi, ndien nnyeneke se nnimde enye ke iso: 7ndien enye emi odude ke esit ufɔk edibɔrɔ ete, Kunɔ mi afanikɔŋ: mmesesin usuŋ; ami ye nditɔ mi imoduk; ŋkemeke ndidaha nnɔ fi. 8Ndɔhɔ mbufo nte, okposuk edi nte enye mididahake inɔ enye ke ntak ufan, edi koro owo eyirede, enye ke ntak ufan, enye eyedaha ke enyɔŋ ɔnɔ enye adaŋa nte enye oyomde. 9Ntre ke ndɔhɔ mbufo nte, Ebeŋe, ndien eyenɔ mbufo; eyom, ndien mbufo eyekut; etuak, ndien eyesio usuŋ enɔ mbufo. 10Koro kpukpru owo eke ebeŋede ebɔde; owo eke oyomde okutde; edinyuŋ esiode usuŋ enɔ owo eke atuakde. 11Ewe ete odu ke otu mbufo eke edinɔde eyen itiat, ke ini eyen ebeŋede enye uyo; mme edinɔde eyen urukikɔt ke ibuot iyak ke ini eyen ebeŋede enye iyak; 12mme edinɔde eyen ikpeyen, ke ini eyen ebeŋede enye nsen-unen? 13Mmɔdo edieke mbufo emi ediɔkde efiɔkde ndinɔ nditɔ mbufo nti enɔ, adaŋa didie akan oro ke Ete mbufo ke heaven ediyak Edisana Spirit ɔnɔ mmɔ eke ebeŋede Enye?

14Ndien Enye ebin demon emi edide imum ɔduɔk. Edikem ke ini demon ɔwɔrɔde, imum etiŋ ikɔ ndien idem akpa mme otu owo. 15Edi ndusuk mmɔ edɔhɔ ete, Enye ada Belzebub, ɔbɔŋ mme demon, ebin mme demon ɔduɔk. 16Owo efen enyuŋ edomo Enye, eyom ete Enye owut mme imɔ idiɔŋɔ emi otode ke enyɔŋ. 17Edi ke Enye ɔdiɔŋɔde ekikere mmɔ, ɔdɔhɔ mmɔ ete, Kpukpru obio edidem eke abaharede ada aŋwana ye idem esie oduk ke ŋwure, ufɔk kiet kiet ke obio oro onyuŋ ɔduɔ. 18Edieke Satan ŋko abaharede ada aŋwana ye idem esie, obio esie edikeme didie ndisɔŋɔ nda? koro mbufo edɔhɔde ete, nda Beelzebub mbin mme demon nduɔk. 19Edi edieke Ami ndade Beelzebub mbin mme demon nduɔk, nditɔ mbufo eda anie ebin mmɔ eduɔk? Mmɔdo mmɔ edidi mme ebierikpe enɔ mbufo. 20Edi edieke ndade nnuen-ubɔk Abasi mbin mme demon nduɔk, Ubɔŋ Abasi ama osim mbufo. 21Ke adaŋemi ɔkpɔsɔŋ owo ɔbɔbɔde ofuri mbɔbɔ-ekɔŋ ekpeme ufɔk esiemɔ, ŋkpɔ esie edu ke ifure; 22edi ke ini owo emi okopde idem akan enye edide eŋwan ye enye onyuŋ akande enye, owo oro ɔbɔ enye kpukpru ŋkpɔ-ekɔŋ esie eke enye ɔkɔbuɔtde idem ke esit, onyuŋ edeme mbume esie. 23Owo eke midaha ye Ami aŋwaŋwana ye Ami; owo eke minyuŋ ibokke ye Ami asasuan.

24 Ke ini edidehe spirit ɔwɔrɔde owo ke idem, enye asaŋa oyo ke edisat ebiet, oyom nduɔk-odudu; ndien ke adaŋemi enye mikwe, enye ɔdɔhɔ ete, Nyefiak nnyɔŋ ufɔk mi emi ŋkotode ke esit ŋwɔrɔ. 25Ke ini enye edide, enye okut ete, ema ekpɔri enyuŋ ebana ufɔk oro. 26Ekem enye aka akada spirit itiaba efen, emi ediɔkde ekan enye; mmɔ enyuŋ eduk ekeduŋ do: ndien ukperedem itie owo oro ɔdiɔk akan mbemiso.

27Ekem nte Enye etiŋde mme ikɔ oro, ŋwan kiet ke otu mbio-obio emenere uyo, ɔdɔhɔ Enye ete, Ɔfɔfɔn ɔnɔ idibi eke akamamde Fi, ye eba eke Afo akawapde. 28Edi Enye ete, Akam ɔfɔn akan ye mmɔ emi ekopde ikɔ Abasi, enyuŋ ekpemede ndinam.

29Edi ke adaŋemi otu owo ekebonode ewak, Enye ɔtɔŋɔ ndidɔhɔ ete, Emana emi edi idiɔk emana eke eyomde idiɔŋɔ; ndien idinɔŋɔ enye idiɔŋɔ, ke mibɔhɔke idiɔŋɔ Jonah. 30Koro kpa nte Jonah ekedide idiɔŋɔ ɔnɔ mbon Nineveh, kpa ntre ke Eyen Owo edidi idiɔŋɔ ɔnɔ emana emi. 31Ɔbɔŋ-aŋwan usuk eyedaha ada ke ikpe ye mbon emana emi, onyuŋ obiom mmɔ: koro enye okotode ke mme utit ererimbot edi ndikop ɔniɔŋ Solomon, ndien sese, Enye emi okponde akan Solomon odu mi. 32Mbon Nineveh eyedaha eda ke ikpe ye emana emi, enyuŋ ebiom enye; koro mmɔ ekakabarede esit ke erikwɔrɔ Jonah; ndien sese, Enye emi okponde akan Jonah odu mi.

Utuenikaŋ Ikpɔhidem

(Mt 6.22-23)

33 Baba owo kiet idomoke utuen-ikaŋ, inim ke ubet-unim-ŋkpɔ mme ke idak abaŋ, edi ɔdiɔk ke uwuk-utuenikaŋ, man mmɔ emi edukde ekut uŋwana. 34Utuenikaŋ ikpɔhidem fo edi enyin fo; ke ini enyin fo eneŋerede ese, ofuri ikpɔhidem fo ayayama; edi ke ini enyin fo ɔdiɔkde ofuri ikpɔhidem fo okokim. 35Kpeme ndien mbak uŋwana eke odude fi ke idem edidi ekim. 36Edi edieke ofuri idem fo ɔyɔhɔde ye uŋwana baba ŋkim-ŋkim ubak kiet minyuŋ iduhe ke esit, enye eyeyama ofuri-ofuri, kpa nte emi utuen-ikaŋ ayamade ɔnɔ fi uŋwana.

37Ke ini Enye osuk etiŋde ikɔ oro, Pharisee kiet okot Enye ete edidia ŋkpɔ ye imɔ: ndien Enye oduk ɔsuhɔre etetie ke itie-udia. 38Edi ke ini Pharisee okutde, idem akpa enye koro Jesus mibemke iso iyet idem, ndien edidia ŋkpɔ. 39Edi Ɔbɔŋ ɔdɔhɔ enye ete, Ke emi ke mbufo mme Pharisee enanam edem cup ye usan asana; edi esit mbufo ɔyɔhɔ ye ŋwo ye udu. 40Mbufo mme anana-ibuot, nte idige Enye emi akanamde edem mmɔ anam esit mmɔ ŋko? 41Ekam eda mme ŋkpɔ eke edude ke esit mmɔ enɔ mme ubuene, ndien sese, kpukpru ŋkpɔ esana enɔ mbufo.

42 Edi eyedɔdiɔk ɔnɔ mbufo mme Pharisee, koro mbufo esiode ubak ikɔŋ ye etidot ye kpukpru oruk ikɔŋ udia kiet ke itie duop enɔ Abasi, enyuŋ ekaŋade edinen ikpe ye ima Abasi: mbufo ekpanam ŋkpɔ emi, ikponyuŋ itreke ndinam mmɔ eken. 43Eyedɔdiɔk ɔnɔ mbufo mme Pharisee! koro mbufo emade ikpɔ itie ke synagogue, ye ekɔm ke aŋwa-urua. 44Eyedɔdiɔk ɔnɔ mbufo! koro mbufo ebietde udi eke edibede, eke owo emi esaŋade ke enyɔŋ mmɔ midiɔŋɔke.

45Edi owo kiet ke otu mme ɔfiɔk-ibet ɔbɔrɔ Enye ete, Andikpep, ke eridɔhɔ ŋkpɔ emi ntem, emesuene nnyin ŋko. 46Edi Enye ete, Eyedɔdiɔk ɔnɔ mbufo, mme ɔfiɔk-ibet ŋko! koro mbufo ebɔpde edidobi mbiomo ebiom owo ke idem, edi mbufo ke idemmbufo idaha nuen-ubɔk kiet ituk mbiomo oro. 47Eyedɔdiɔk ɔnɔ mbufo! koro mbufo ebotde mme udi mme prophet, ndien mme ete mbufo ekewot mmɔ. 48Ntre ke mbufo edi ntiense edian utom mme ete mbufo, enyuŋ eda ye se mmɔ ekanamde: koro mmɔ ekowot mmɔ, ndien mbufo ebot udi mmɔ. 49Mmɔdo Eti Ibuot Abasi ama ɔdɔhɔ ete, Nyedɔŋ mme prophet ye mme apostle etiene mmɔ; 50ndien mmɔ eyewot enyuŋ ekɔbɔ ndusuk mmɔ; man ekpe-kpak iyip kpukpru mme prophet eke ekeduɔkde toto ke eritɔŋɔ ererimbot, ke ubɔk emana emi; 51ɔtɔŋɔde ke iyip Abel tutu osim iyip Zechariah, emi ekowotde ke ufɔt itie-uwa ye esit-esit Ufɔk Abasi: ke akpanikɔ ke ndɔhɔ mbufo, eyekpak iyip mmɔ ke ubɔk emana emi. 52Eyedɔdiɔk ɔnɔ mbufo mme ɔfiɔk-ibet! koro mbufo ememen ukpɔhɔre ifiɔk efep: mbufo ikodukke ke idem mbufo, mbufo enyuŋ ebiɔŋɔ mmɔ eke eyomde ndiduk.

53Ndien ke ini Enye otode do ɔwɔrɔ mme scribe ye mme Pharisee etɔŋɔ ndiyire Enye, ndinyuŋ mfaha Enye ke mbume mbaŋa ediwak ŋkpɔ; 54mmɔ etie ekpeme, ete imum Enye uyo ke inua.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKE 11: ENA

Highlight

ಶೇರ್

ಕಾಪಿ