LUKE 10

Jesus Osio Mbet Ata ye Duop Eba Ɔdɔŋ Utom

1EKEM ke mme ŋkpɔ emi ema ekebe, Ɔbɔŋ onim owo ata ye duop eŋwen, onyuŋ ɔdɔŋ mmɔ esaŋa iba iba ebem Enye iso, eka ekeduk ke kpukpru obio ye ebiet, eke Enye ke Idem Esie oyomde ndika. 2Ndien do Enye ɔdɔhɔ mmɔ ete, Ke akpanikɔ idɔk okpon, edi mme enam-utom iwakke; ebeŋe ndien Enyene-idɔk, ete, Enye osio mme anamutom ɔdɔŋ edi ke idɔk Esie. 3Eka eke mbufo: sese, mmesio mbufo ndɔŋ nte nditɔ-erɔŋ ke ufɔt mme ekpe-ikɔt: 4Ekukama ekpat okuk, mme ekpat udia, mme ikpa-ukot: ekunyuŋ ekɔm owo ke usuŋ. 5Edi ufɔk ekededi eke mbufo edukde, ebem iso edɔhɔ ete, Yak emem odu ke ufɔk emi. 6Ndien edieke eyen emem odude do, emem mbufo eyedoro enye ke idem: edi edieke eyen emem miduhe, emem mbufo eyefiak etiene mbufo. 7Edi etie kpa ke ufɔk oro, edia enyuŋ eŋwɔŋ se enimde ke iso mbufo: koro eyen-utom odot ŋkpɔ-eyen-utom esie. Ekukpuhɔre itie-idaŋ mbufo ke erisaŋa ke ufɔk ke ufɔk. 8Ndien obio ekededi eke mbufo edukde, mbio oro enyuŋ enyimede ndidara mbufo, edia ŋkpɔ eke mmɔ enimde ke iso mbufo, 9enyuŋ enam udɔŋɔ okure mbon-udɔŋɔ emi edude do, enyuŋ esian mmɔ ete, Ubɔŋ Abasi ama asaŋa ekpere mbufo. 10Edi obio ekededi eke mbufo edukde, mbio oro minyuŋ inyimeke ndidara mbufo, ewɔrɔ ke efak esie, enyuŋ edɔhɔ ete, 11Kpa ntan obio mbufo, eke adianade nnyin ke ikpat, ke nnyin ikeŋ ifep idian mbufo: edi efiɔk emi ete, Ubɔŋ Abasi ama asaŋa ekpere. 12Mmɔdɔhɔ mbufo nte, Ŋkpɔ eyefɔn ye Sodom ke usen ikpe akan ye obio oro. 13Eyedɔdiɔk ɔnɔ fi Chorazin! eyedɔdiɔk ɔnɔ fi Bethsaida! koro edieke ekpanamde ke Tyre ye sidon utom odudu emi ekanamde ke esit mbufo, mmɔ ekpakabare esit anyan ini esine ɔfɔŋ-ikpo, enyuŋ etie ke ntɔŋ. 14Edi ŋkpɔ eyefɔn ye Tyre ye Sidon ke ikpe akan ye mbufo. 15Ndien afo Capernaum, nte eyemenere okoŋ osim ikpa-enyɔŋ? eyesuhɔre fi osim obio ekpo. 16Owo eke okopde uyo mbufo okop uyo Mi; owo eke onyuŋ esinde mbufo esin Mi; owo eke esinde mi onyuŋ esin Enye emi ɔkɔdɔŋde Mi.

17Ndien mbet ata ye duop oro efiak edi ye idaresit edidɔhɔ Enye ete, Ɔbɔŋ, kpa mme demon esuk ibuot enɔ nnyin ke enyiŋ Fo. 18Edi Enye ɔdɔhɔ mmɔ ete,Mma ŋkut Satan otode ke enyɔŋ ɔduɔ nte emireŋ-mireŋ. 19Sese, mmɔnɔ mbufo odudu ndidigi urukikɔt ye ikpeyen ke ikpat, nnyuŋ ŋkara ofuri odudu usua: ndien baba ŋkpɔ kiet idinamke mbufo idiɔk. 20Edi ekudat esit koro mme spirit esukde ibuot enɔ mbufo; edi edat esit koro ema ewet enyiŋ mbufo ke heaven.

21Ke ini oro Jesus okop idaresit ke Edisana Spirit, onyuŋ ɔdɔhɔ ete, Mmɔkɔm Fi, O Ete, Ɔbɔŋ enyɔŋ ye isɔŋ, koro Afo okodipde mbon eti ibuot ye mme asian mme ŋkpɔ emi, onyuŋ ayararede mmɔ ɔnɔ nsek-nditɔ. Edi ntre, Ete, koro enemde Fi ntem ke enyin. 22Ete Mi amayak kpukpru ŋkpɔ ɔnɔ Mi: ndien baba owo kiet ifiɔkke enye emi Eyen edide ke mibɔhɔke Ete: owo inyuŋ ifiɔkke enye emi Ete edide ke mibɔhɔke Eyen, ye owo ekededi eke Eyen amade ndiyarare Enye nnɔ. 23Ekem Enye ɔwɔŋɔre ese mbet Esie, onyuŋ ɔdɔhɔ mmɔ ke ndibe ete, Ɔfɔfɔn ɔnɔ mme enyin emi ekutde mme ŋkpɔ eke mbufo ekutde. Koro mmɔdɔhɔ mbufo nte, 24ediwak mme prophet ye ndidem ema eyom ndikut mme ŋkpɔ eke mbufo ekutde, ndien ikekwe, ndinyuŋ ŋkop mme ŋkpɔ eke mbufo ekopde, ndien ikokopke.

25Ndien sese, ɔfiɔk-ibet kiet adaha ke enyɔŋ edidomo Enye ete, Andikpep, ndinam nso man nnyene nsinsi uwem? 26Edi Jesus ete enye, Ewewet didie ke ibet? okot didie? 27Enye ɔbɔrɔ ete, Ma Jehovah Abasi fo ke ofuri esit fo, ye ke ofuri ukpɔŋ fo, ye ke ofuri odudu fo, ye ke ofuri ekikere fo; nyuŋ ma mbɔhiduŋ fo nte idem fo. 28Jesus ɔdɔhɔ enye ete, Omotim ɔbɔrɔ: nam ntre, ndien eyedu uwem. 29Edi sia owo oro oyomde ndiwut ete imɔ imenen, enye obup Jesus ete, Anie edi mbɔhiduŋ mi naŋa? 30Jesus okpobi ikɔ esie, ete, Owo kiet okoto Jerusalem ɔsuhɔre aka Jericho; ndien ɔduɔ ke otu mbon ŋwo, emi ekpɔkde enye edisine-ŋkpɔ ke idem efep, emia enye, enyuŋ edaha ekpɔŋ enye ekpere mkpa. 31Edi nte ŋkpɔ anade, oku kiet ɔsuhɔre edi ke usuŋ oro, okut owo oro, onyuŋ asaŋa ebe ke ŋkaŋ eken. 32Kpasuk ntre Levite kiet osim ɔtɔ oro, ada ese enye, onyuŋ asaŋa ebe ke ŋkaŋ eken. 33Edi eyen Samaria kiet, emi asaŋade isaŋ, edisim ɔtɔ emi owo oro odude, 34onyuŋ okut enye, atua enye mbɔm, asaŋa adiana enye, ɔtɔhɔ wine ye aran ke unan esie, onyuŋ ɔbɔp mmɔ: onyuŋ emen enye odori ke enyɔŋ enaŋ esiemɔ, ada enye edi ke ufɔk-isen, onyuŋ ekpeme enye. 35Ndien ke ndaŋ-nsiere enye osio okuk iba ɔnɔ ete ufɔk, ete enye, Kpeme owo emi; ndien mma mfiak ndi, nyesio se edibiatde akan oro nnɔ fi. 36Ke otu owo ita oro, ese ete anie edi mbɔhiduŋ owo emi ɔkɔduɔde ke otu mbon ŋwo? 37Ɔfiɔk-ibet ɔbɔrɔ ete, Edi owo emi akatuade enye mbɔm. Ekem Jesus ɔdɔhɔ ete, Ke kanam kpasuk ntre.

38Edikem nte mmɔ esaŋade isaŋ, Jesus oduk ke obio-iŋwaŋ kiet; ŋwan emi ekerede Martha onyuŋ ada Enye oduk ke ufɔk. 39Ndien Martha enyene eyen-eka aŋwan emi ekerede Mary, emi onyuŋ etiede ke isɔŋ ke ukot Ɔbɔŋ, okop ikɔ Esie. 40Edi utom eke Martha aŋwanade ndinam nnɔ isen efihe enye akaha; ndien enye edi edidɔhɔ ete, Ɔbɔŋ, nte ukereke emi eyen-eka mi ɔkpɔŋde utom ɔnɔ mi ikpɔŋ? dɔhɔ enye edi ediŋwam mi naŋa. 41Edi Ɔbɔŋ ɔbɔrɔ ete, Martha, Martha, afo ayak ediwak ŋkpɔ etimere fi ekikere, enyuŋ enɔ fi afanikɔŋ: 42ŋkpɔ kiet edi se nyomde; koro Mary ememek eti udeme, eke midibɔhɔ enye ifep.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKE 10: ENA

Highlight

ಶೇರ್

ಕಾಪಿ