JOHN 7

Jesus ye Nditɔ-Eka Esie

1KE ŋkpɔ emi ema ekebe, Jesus asaŋa ke Galilee; koro Enye minyimeke ndisaŋa ke Judaea, koro mme Jew eyomde Enye ndiwot. 2Edi usɔrɔ mme Jew ekpere, kpa usɔrɔ mme ataya. 3Ntre ke nditɔ eka Esie edɔhɔ Enye ete, Daha ke ɔtɔ emi, ka ke Judaea, man mbet Fo nde ekut mme utom eke Afo anamde. 4Koro baba owo kiet itiehe ke ndibe inam ŋkpɔ, ke ini enye oyomde ndidu ke iso owo aŋwa-aŋwa. Edieke anamde mme ŋkpɔ emi, yarare Idem wut ererimbot. 5Koro kpa nditɔ-eka Esie ibuɔtke idem ye Enye. 6Ntre ke Jesus ete mmɔ, Ini Mi ikemke kaŋa; eke mbufo ekekem kpukpru ini. 7Ererimbot ikemeke ndisua mbufo; edi asua Mi, koro Ami nditiŋde ikɔ-ntiense ndian enye nte, se enye anamde ɔdiɔk. 8Mbufo edɔk eka usɔrɔ: Ami ndɔkke kaŋa ŋka usɔrɔ emi; koro misimke kaŋa uyɔhɔ ini Mi. 9Ndien ke Enye ama ɔkɔdɔhɔ ntem ye mmɔ, Enye osuk etie kaŋa ke Galilee.

10Edi ke ini nditɔ-eka Esie ema ekɔdɔk eka usɔrɔ, ekem Jesus nde ɔdɔk aka; edi ikaha aŋwa-aŋwa, edi nte owo edidibe aka ŋkpɔ. 11Ntem ke mme Jew eyom Enye ke usɔrɔ, enyuŋ ete, Enye odu mmɔŋ? 12Ndien akwa nsuk-uyo odu ke otu mme otu owo abaŋa Enye: ndusuk mmɔ ete, Enye edi eti owo; mmɔ eken ete, Idige: edi Enye ada mbio-obio awaha ɔkpɔŋ usuŋ. 13Edi baba owo kiet itiŋke ŋkpɔ ibaŋa Enye aŋwa-aŋwa ɔnɔ ndik mme Jew.

14Ekem ke ini osimde ufɔt usɔrɔ, Jesus ɔdɔk aka temple ekekpep mme owo ŋkpɔ. 15Ntem ke mme Jew eyik ete, Owo emi asaŋa didie ɔfiɔk ŋwed, ke ini akanam Enye mikpepke kpep? 16Jesus ɔbɔrɔ mmɔ ete, ukpep-ŋkpɔ eke nnɔde idige Okim, edi edi eke Andidɔŋ Mi. 17Edieke owo onyimede ndinam se Enye amade, owo oro eyefiɔk abaŋa se ŋkpepde, mme oto Abasi, mme Ami ntiŋ ikɔ oto Idem Mi. 18Owo eke etiŋde oto idem esie oyom ubɔŋ ɔnɔ idem esie; edi owo eke oyomde ubɔŋ andidɔŋ enye, owo oro edi akpanikɔ, ukwaŋido inyuŋ iduhe enye ke esit. 19Nte Moses ikɔnɔŋɔ mbufo ibet? ndien baba owo kiet ke otu mbufo inimke ibet. 20Nsinam mbufo eyomde Mi ndiwot? Otu oro ebɔrɔ ete, Idat anam Fi; anie ke oyom Fi ndiwot? 21Jesus ɔbɔrɔ mmɔ ete, Ŋkanam utom kiet emi esinde idem akpa kpukpru mbufo. 22Kabaŋa oruk utom emi ke Moses ɔkɔnɔ mbufo mbobi (edi mbobi itoho Moses, edi oto mme ete), ete, mbufo ekpenim owo mbobi ke sabbath. 23Edieke owo anade mbobi ke sabbath mbak edibiat ibet Moses; nte mbufo eyat esit ye Ami, koro ŋkanamde owo okop uyɔhɔ nsɔŋidem ke sabbath? 24Ekukpe ikpe nte etiede owo ke enyin, edi ekpe edinen ikpe.

25Mmɔdo ndusuk ke otu mbio Jerusalem edɔhɔ ete, Nte idige owo emi ke eyom enye ndiwot? 26Edi sese, Enye ɔdɔhɔ ikɔ aŋwa-aŋwa, mmɔ inyuŋ itiŋke baba ikɔ kiet inɔ Enye. Me ɔwɔrɔ ete ikpɔ owo eneŋere efiɔk ete owo emi edi Christ? 27Edi nnyin imɔfiɔk ebiet emi owo emi otode: edi ke ini Christ edidie, baba owo kiet ifiɔkke ebiet emi Enye otode. 28Ntre ke Jesus ofiori ke temple nte ekpepde owo ŋkpɔ, onyuŋ ɔdɔhɔ ete, Mbufo efiɔk Mi, enyuŋ efiɔk ebiet emi ntode; ndien ŋkedige ke odudu Idem Mi, edi Enye emi ɔkɔdɔŋde Mi edi ata Abasi, emi mbufo mifiɔkke. 29Ami mmɔfiɔk Enye; koro ntode Enye, onyuŋ edi Enye ɔkɔdɔŋ Mi. 30Ntem ke mmɔ eyom ndimum Enye: ndien baba owo kiet itukke Enye ubɔk, koro ini mikemke Enye kaŋa. 31Edi ediwak owo emi edude ke otu oro ebuɔt idem ye Enye: mmɔ enyuŋ edɔhɔ ete, Ke adaŋemi Christ edidide, nte Enye eyenam idiɔŋɔ eke ewakde ekan se owo emi akanamde? 32Mme Pharisee ekop nte otu owo esukde uyo ebaŋa Enye ntem; ikpɔ oku ye mme Pharisee enyuŋ edɔŋ mme isuŋutom ete emum Enye. 33Mmɔdo Jesus ete, Ke ekpri ibio ini kaŋa ndu ye mbufo, ndien ndinyɔŋ ntiene Enye emi ɔkɔdɔŋde Mi. 34Mbufo eyeyom Mi, edi idikwe Mi; ɔtɔ nte Ami nnyuŋ ndude, mbufo ikemeke ndika do. 35Ntre ke mme Jew eneme ke otu idem mmɔ ete, Owo emi edika mmɔŋ eke nnyin midikwe Enye? Mme Enye editiene mmɔ emi esuanade eduŋ ke otu mme Greek ekekpep mme Greek ŋkpɔ? 36Nso idi ikɔ eke Enye etiŋde ntre ete, mbufo eyeyom Mi, edi idikwe Mi; ŋko, Ɔto nte Ami ndude, mbufo ikemeke ndika do?

37Edi ke akpatre usen, usɔrɔ, Jesus adaha ofiori ete, Edieke owo ekededi okopde nsat-itɔŋ, yak enye etiene Mi ediŋwɔŋ. 38Owo eke ɔbuɔtde idem ye Ami, nte Ŋwed Abasi ɔdɔhɔde, akpa odu-uwem mmɔŋ eyeto enye ke idem ɔwɔrɔ. 39Enye ɔdɔhɔ emi abaŋa Spirit emi mmɔ emi ebuɔtde idem ye Enye edibɔde; koro ikɔnɔŋɔ Spirit kaŋa sia Jesus midukke kaŋa ke ubɔŋ. 40Ke adaŋemi ndusuk mmɔ emi edude ke otu owo oro ekopde mme ikɔ emi, mmɔ ete, Owo emi edi prophet oro ke akpanikɔ. 41Mmɔ efen ete, Emi edi Christ. Edi ndusuk ete, Baba, nte Christ edito ke Galilee? 42Nte Ŋwed Abasi idɔhɔke ite Christ oto ke oruk David, onyuŋ oto ke Bethlehem obio-iŋwaŋ emi David okodude do? 43Ntre ke ubahare otibe ke ufɔt otu owo kabaŋa Enye. 44Ndusuk mmɔ eyom ndimum Enye; edi baba owo kiet itukke Enye ubɔk.

45Ntem ke mme isuŋutom etiene ikpɔ oku ye mme Pharisee; mmɔ oro enyuŋ ebup mmɔ ete, Nsinam mbufo midaha Enye idi? 46Mme isuŋutom ebɔrɔ ete, Akananam owo itiŋke ikɔ nte owo emi. 47Ntre ke mme Pharisee ebɔrɔ mmɔ ete, Nte mbufo ŋko emawaha ekpɔŋ usuŋ? 48Nte baba owo kiet ke otu mbiowo mme ke otu mme Pharisee ɔkɔbuɔt idem ye Enye? 49Ama edi otu owo eke mifiɔkke ibet, mmɔ edi mbukpo owo. 50Nicodemus, owo kiet ke otu mmɔ, emi ekebemde iso edi edise Jesus, ɔdɔhɔ mmɔ ete, Nte ibet nnyin ebiere ikpe owo, ke ini mikopke kaŋa uyo esie, minyuŋ ifiɔkke se enye anamde? 51Mmɔ ebɔrɔ enye ete, Nte Afo ŋko oto ke Galilee? 52Duŋɔre kokut ete, baba prophet kiet itoho ke Galilee iwɔrɔ. 53Kpukpru mmɔ ewɔrɔ enyɔŋɔ ufɔk mmɔ kiet kiet.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

JOHN 7: ENA

Highlight

ಶೇರ್

ಕಾಪಿ