JOHN 6

Jesus Ɔnɔ Tosin Owo Ition Udia

(Mt 14.13-21; Mk 6.30-44; Lk 9.10-17)

1KE ŋkpɔ emi ema ekebe, Jesus adaha aka ke edem inyaŋ Galilee oko, emi edide inyaŋ Tiberias. 2Edi akamba otu owo etiene Enye, koro mmɔ ekutde mme idiɔŋɔ eke Enye anamde ke idem mmɔ eke edɔŋɔde. 3Edi Jesus ɔdɔk ke akamba obot eketie do ye mbet Esie. 4Ekpere Passover, usɔrɔ mme Jew. 5Ke adaŋemi Jesus emenrede enyin okut nte ata ediwak owo etienede Enye, Enye obup Philip ete, Ididep uyo mmɔŋ, man memmɔ emi edia ŋkpɔ? 6Jesus etiŋ emi ndidomo enye nse, koro Enye ke Idem Esie ɔfiɔk se edinamde. 7Philip ɔbɔrɔ Enye ete, Uyo eke akpade okuk ikie iba ikemke kpukpru mmɔ ndidia nsit-nsit. 8Owo kiet ke otu mbet Esie, kpa Andrew eyen-eka Simon Peter, ete Enye, 9Akparawa kiet mmɔmi, emi enyenede uyo-a-barley ition ye iyak iba; edi oro ekem nso ke otu uwak owo eke etiede ntem? 10Jesus ɔnɔ uyo ete, Enam mme owo etetie. Mbiet awak ke ɔtɔ oro. Ntre ke mme owo oro etetie, ibat mmɔ ekpere thousand owo ition. 11Ntre ke Jesus emen uyo; ndien ke Enye ama ɔkɔnɔ ekɔm, Enye edeme uyo ɔnɔ mmɔ oro etiede tie, onyuŋ anam kpa ntre ye iyak ŋko, adaŋa nte mmɔ eyomde. 12Edi ke ini mmɔ ema ekadia eyuhɔ, Enye ɔdɔhɔ mbet Esie ete, Etaŋ mbubek uyo eke esuhɔde, mbak ŋkpɔ baba kiet editak. 13Ntre ke mmɔ etaŋ, edɔŋ akpan duopeba ɔyɔhɔ ye mbubek uyo eke etode ke uyo-a-barley ition oro, eke esuhɔde enɔ mmɔ emi ekediade udia. 14Ke ini mbon oro ekutde idiɔŋɔ oro Enye anamde, mmɔ ete, Ke akpanikɔ emi edi prophet emi edidukde edi ke ererimbot.

15Ntem ke ini Jesus ɔfiɔkde ete mmɔ eyom ndidi ndimum Imɔ nnim ke edidem, Enye ɔtɔŋɔ ntak afiak ɔdɔk ke akamba obot ke Idem Esie ikpɔŋ.

16Edi ke ini eyo oyomde ndikut, mbet Esie esuhɔre eka ke akwa inyaŋ; 17mmɔ enyuŋ ediere ke ubom, ewat ebe inyaŋ eka Capernaum. Ke emi ebiet okim, Jesus inyuŋ isimke mmɔ kaŋa. 18Ndien inyaŋ adaha ɔnɔ ɔkpɔsɔŋ ofim eke ofimede. 19Ntem ke mmɔ ema ekewat esim mile ita me inaŋ, mmɔ ekut Jesus nte asaŋade ke inyaŋ, ekpere ubom, ndien ndik anam mmɔ. 20Edi Enye ɔdɔhɔ mmɔ ete, Edi Ami; ekufehe ndik. 21Ntre ke mmɔ enyime ndida Enye nduk ke ubom; ndien idaha oro ubom ebehe ke isɔŋ emi mmɔ ekade.

22Ke ndaŋ-nsiere, otu owo emi edade ke edem inyaŋ oko ekut ete ubom efen ikoduhe do ke mibɔhɔke kiet, Jesus ikonyuŋ idireke ke ubom oro ye mbet Esie, edi mbet Esie ekadaha ikpɔŋ. 23(Edi mme ubom eto ke Tiberias edikpere ebiet oro mmɔ ekadiade uyo, ke Ɔbɔŋ ama ɔkɔnɔ ekɔm.) 24Ntre ke ini otu owo ekutde ete Jesus iduhe do, mbet Esie inyuŋ iduhe, mmɔ ke idem mmɔ ediere ke ubom, edi Capernaum ediyom Jesus. 25Ndien ke ini mmɔ ekutde Enye ke edem inyaŋ eken, mmɔ ebup Enye ete, Rabbi, Afo ekedi mi ini ewe? 26Jesus ɔbɔrɔ mmɔ ete, Ke akpanikɔ ke ndɔhɔ mbufo, mbufo iyomke Mi koro mbufo ekekutde mme idiɔŋɔ, edi eyom Mi koro mbufo ekadiade uyo eyuhɔ. 27Ekuŋwana udia eke edibiarade, edi eŋwana udia eke ebigide ɔsuŋɔ nsinsi uwem, emi Eyen Owo edinɔde mbufo: koro edi Enye ke Ete, kpa Abasi, ekefik Enye idiɔŋɔ ke idem. 28Mmɔ ete Enye ndien, Nnyin idisaŋa didie inam utom Abasi? 29Jesus ɔbɔrɔ mmɔ ete, Emi edi utom Abasi, ete, mbufo ebuɔt idem ye Enye emi Enye ɔkɔdɔŋde. 30Ntem ke mmɔ edɔhɔ ete, Afo anam nso nte idiɔŋɔ naŋa, man nnyin ikut, inyuŋ inim Fi ke akpanikɔ? 31Nso oruk utom ke anam? Mme ete nnyin ekadia manna ke desert; nte ewetde ete, Enye osio udia ke heaven ɔnɔ mmɔ edia. 32Mmɔdo Jesus ɔbɔrɔ mmɔ ete, Ke akpanikɔ ke ndɔhɔ mbufo, Idige Moses ɔkɔnɔ mbufo uyo emi otode ke heaven, edi Ete Mi ɔnɔ mbufo ata uyo emi otode ke heaven. 33Koro uyo Abasi edi Enye emi otode ke heaven ɔsuhɔre edinɔ ererimbot uwem. 34Ntem ke mmɔ ete Enye, Ɔbɔŋ, nɔ nnyin uyo emi kpukpru ini. 35Jesus ɔdɔhɔ mmɔ ete, Ami ndi uyo uwem: owo eke etienede Mi idikpaha biɔŋ, owo eke onyuŋ ɔbuɔtde idem ye Ami idikopke nsat-itɔŋ tutu amama. 36Edi mma ndɔhɔ mbufo nte, Mbufo emokut Mi, ndien inimke ke akpanikɔ. 37Kpukpru mmɔ eke Ete ɔnɔde Mi eyetiene Mi; ndien owo eke etienede Mi ndibinke enye nduɔk. 38Koro nto ke heaven nsuhɔre ndi, idige man nnam uduak Idem Mi, edi man nnam uduak Andidɔŋ Mi. 39Ndien emi edi uduak Andidɔŋ Mi, ete, Ke otu kpukpru mmɔ eke Enye ɔkɔnɔde Mi, ŋkuyak ndomo kiet ɔbɔhɔ osop, edi nnam ofuri eset ke akpatre usen. 40Koro emi edi uduak Ete Mi, ete, kpukpru owo eke ekutde Eyen, enyuŋ ebuɔtde idem ye Enye, enyene nsinsi uwem; Ami nyenyuŋ nnam enye eset ke Akpatre usen.

41Mmɔdo mme Jew esuk Enye uyo, koro Enye ɔdɔhɔde ete, Ami ndi uyo eke otode ke heaven ɔsuhɔre; enyuŋ ebup ete, 42Nte emi idige Jesus, eyen Joseph, emi nnyin idiɔŋɔde ete ye eka Esie? Enye anam didie ɔdɔhɔ ndien ete, 43Ŋkoto ke heaven nsuhɔre? Jesus ɔbɔrɔ mmɔ ete, Ekukuni ke otu idem mbufo. 44Baba owo kiet ikemeke nditiene Mi, ibɔhɔke Ete emi ɔkɔdɔŋde Mi, odudi enye edi: ndien nyenam enye eset ke akpatre usen. 45Ema ewet ke mme prophet ete, Abasi eyekpep mmɔ kpukpru ŋkpɔ; kpukpru owo eke ekopde uyo Ete enyuŋ ebɔde ukpep-ŋkpɔ etiene Mi. 46Emi ɔwɔrɔ ete owo baba kiet ikwe Ete, ebe Enye emi otode ke ɔtɔ Abasi: Enye okokut Ete. 47Ke akpanikɔ ke ndɔhɔ mbufo, Owo eke onimde ke akpanikɔ enyene nsinsi uwem. 48Ami ndi uyo uwem. 49Mme ete mbufo ema edia manna ke desert, enyuŋ ekpaŋa. 50Emi edi uyo eke otode ke heaven ɔsuhɔre, man owo adia, okukpa. 51Ami ndi odu uwem uyo emi okotode ke heaven ɔsuhɔre: edieke owo ekededi adiade uyo emi, enye eyedu uwem ke nsinsi: ndien uyo emi ndinɔde edi obukidem Mi, man ererimbot odu uwem.

52Ntem ke mme Jew eneni ye kiet eken ete, Owo emi ekeme didie ndinɔ nnyin obukidem Esie idia? 53Jesus ɔbɔrɔ mmɔ ete, Ke akpanikɔ ke ndɔhɔ mbufo, Edieke mbufo midiaha obukidem Eyen owo, minyuŋ iŋwɔŋke iyip Esie, mbufo inyeneke uwem ke esit mbufo. 54Owo eke adiade obukidem Mi, onyuŋ ɔŋwɔŋde iyip Mi enyene nsinsi uwem; Ami nyenyuŋ nnam enye eset ke akpatre usen. 55Koro obukidem Mi edi ata udia, iyip mi onyuŋ edi ata ediŋwɔŋ-ŋkpɔ. 56Owo eke adiade obukidem Mi, onyuŋ ɔŋwɔŋde iyip Mi, osuk oduŋ Mi ke idem, Ami nnyuŋ nduŋ enye ke idem. 57Nte Ete emi odude uwem okosiode Mi ɔdɔŋ, Ami nnyuŋ ndude uwem oto Ete; ntre ke owo eke adiade Mi eyenyuŋ odu uwem oto Mi. 58Emi edi uyo eke otode ke heaven ɔsuhɔre: itiehe nte se mme ete mbufo ekadiade enyuŋ ekpaŋa: owo eke adiade uyo emi eyedu uwem ke nsinsi. 59Jesus etiŋ ikɔ emi ke synagogue, nte Enye ekpepde owo ŋkpɔ ke Capernaum.

60Ke adaŋemi ediwak mbet Esie ekopde emi, mmɔ edɔhɔ ete, Ikɔ emi ɔsɔŋ ebe: anie ekeme ndikop utɔ ŋkpɔ oro? 61Edi Jesus ɔfiɔk ke esit Esie ete mbet Imɔ ke esuk uyo ebaŋa ikɔ oro, onyuŋ ɔdɔhɔ mmɔ ete, Nte ikɔ emi esin mbufo eduɔ? 62Ekpetie ndien didie edieke mbufo ekpokutde nte Eyen Owo ɔdɔkde aka ke ɔtɔ nte Enye ekebemde iso odu? 63Edi spirit anam owo odu uwem: obukidem inɔŋɔ owo baba udori kiet: mme ikɔ oro ŋketiŋde nnɔ mbufo edi spirit enyuŋ edi uwem. 64Edi ndusuk owo edu ke otu mbufo emi minimke ke akpanikɔ. Koro toto ke eritɔŋɔ Jesus ɔdiɔŋɔ mmɔ eke minimke ke akpanikɔ, ye owo emi edidade Enye ɔnɔ. 65Enye onyuŋ ɔdɔhɔ ete, Emi esin Mi ndɔhɔ mbufo nte, Baba owo kiet ikemeke nditiene Mi, ibɔhɔke Ete ɔnɔ enye ukeme.

66Ke ntak emi ediwak mbet Esie efiak edem, inyuŋ isaŋake aba ye Enye. 67Mmɔdo Jesus obup mbet Esie duopeba ete, Nte ke ɔdɔŋ mbufo ŋko ndidianare nnyɔŋ? 68Simon Peter ɔbɔrɔ Enye ete, Ɔbɔŋ, nnyin iditiene anie? Afo enyene ikɔ uwem nsinsi. 69Nnyin imonyuŋ inim ke akpanikɔ inyuŋ ifiɔk ite, Afo edi Edisana Eyen Abasi. 70Jesus ɔbɔrɔ mmɔ ete, Nte ŋkemekke mbufo owo duopeba? ndien owo kiet ke otu mbufo edi demon. 71Enye etiŋ emi abaŋa Judas, eyen Simon Iscariot; koro enye edi owo kiet ke otu mbet duopeba oro, onyuŋ edi enye edida Jesus ɔnɔ.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

JOHN 6: ENA

Highlight

ಶೇರ್

ಕಾಪಿ