LUKA 6
6
1Go e pakilina sabbath sikai, naga e surata duaduru vanua maga ni korn; go tea vasapiseikiana aneana maga eu lei m̃okai maga ni korn, po ganikani, eu loari ra ki nam̃elearuda. 2Ma Farisi maga seara kakada eu naga, Ekasana ku mari tea waina e da pae nawotaeana mau naga kuga mari a naaleatia ni sabbath? 3Go Yesu e pasa dara ra po naga, Ku ko da peve tea waia, tea waina David e mari a, ragi waina e pitolo, nara ma tea maga waina eu sikoti a doko; 4dapala waina e paki roara ni nasum̃a ki Sup̃e, po dape bred tokorae maga po gani a, po dua tea maga waina eu sikoti a asa; waina e da pae nawotaeana mau naga tea laapa euga kani a, ma e pei tea waina tea viri maga euga sikida gani a? 5Go e noa ki da, e naga, Naatam̃oli Natuna e pei nawota ni sabbath.
6Go e pakilina sabbath p̃ota sikai, naga e paki ekopu ni nasum̃a ni nasaisaiana po pasapiseiki: go naatam̃oli sikai e doko asa, go nam̃elearuna ni matua e lologara. 7Go tea midiri maga go Farisi maga eu leo paratiki nia, e pe wo mari pauri sabbath; naga euga vap̃ai naga euga vasa dip̃a e asa. 8Ma nae e atae namidodoana adeada maga; go e noa ki naatam̃oli waina nam̃elearuna e lologara, e naga, P̃a tuleana, go p̃a lawodu paki m̃aleoputo. 9Go e duleana po lawodu. Go Yesu e noa ki da, e naga, A pusuusu paki mu, E pae nawotaeana naga tuga mari euga wia sabbath, kite naga tuga mari euga sa? Naga tuga mauti pauri namauriana sikai, kite naga tuga mari punue a? 10Go e leo pilialia puti ra, po noa ki nia, e naga, P̃a sai ki nam̃elearum̃a. Go e mari a: go nam̃elearuna e pei tea mariana e moro p̃ia. 11Ma nara eu pura ki naveilalasigisigileoana, po dum̃ada pusum̃aki paki da tea waina euga mari a paki Yesu.
12Go e pakilina naaleatia maga wanogoe sikai, naga e paki tava pano naga ega tapasavasa; go e do dapasavasa ki Sup̃e nap̃ogiana mamau. 13Go ragi waina e pei aleati e soso tea vasapiseikiana aneana maga: go e matadoa m̃elu dua ki da rualima sikai tamate dua, waina e salagisada ki apostolo maga; 14Simon waina e salagisana ki Petero, go taina Anderea, go Yakobo go Yoane, go Filipo go Bartolomaio, 15go Mataio go Toma, go Yakobo natu ni Alefaio, go Simon waina e pei tea sosoana ki Selote, 16go Yuda natu ni Yakobo, go Yuda Iskariote, waina e pei tea vitua ki nia; 17go e siwo umai nae ma nara eu mamau, po lawodu malo matemate sikai, go taua warua sikai ni tea vasapiseikiana aneana maga, go tea laapa ni narei waina eu pae Yudea mamau go Yerusalem, go elau ni Tair go Sidon, waina eu rumai naga euga rogo e, go naga euga vei tea maripauriana m̃elu dua ki nasasanaana adeada maga; 18go tea maga waina naatana loa maga eu mari ra eu pei tea maripauriana. 19Go taua mamau ni naatam̃oli maga eu laaga naga euga kisidogo e: nalakena nakasuaana e dave m̃elu asa, po mari pauri puti ra.
20Yesu e sike namatana maga punusi tea vasapiseikiana aneana maga, po naga, Ku maro pa, tea tika maga: nalakena namarakiana ki Sup̃e e pei tea animu. 21Ku maro pa, waina ku pitolo ragi waia: nalakena kuga wo puka. Ku maro pa waina ku dagi ragi waia: nalakena kuga wo muru. 22Ku maro pa, ragi waina naatam̃oli maga euga wo pilosi mu, go ragi waina euga wo mari masale ki mu m̃elu dua ki da pano, po pasa pinoa ki mu, po nadi ki nagisamu dave dakiusi tea sa, nalakena naatam̃oli Natuna. 23Kuga laelaea naaleatia wanogoe, po sokamidi: nalakena kuga leo, namoriana animu e p̃arua nakoroatelagi: nalakena tamada maga eu mari dapala nogoe paki profeta maga. 24Ma ai ki mu tea sogolapa maga! Nalakena ku dape sua navakavakale‐mu‐ana. 25Ai ki mu, waina ku puka ragi waia! Nalakena kuga wo pitolo. Ai ki mu, waina ku muru ragi waia! Nalakena kuga wo susue po dagi. 26Ai ki mu ragi waina naatam̃oli maga mamau puti euga wo pasa pia ki mu! Nalakena tamada maga eu mari dapala nogoe paki profeta sorosoro maga.
27Ma a noa ki mu waina ku dogo, a naga, Kuga dodomi tea kokona ki mu maga, kuga mari m̃ataki tea maga waina eu pilosi mu, 28kuga vasa p̃ia ki tea maga waina eu pasa sa ki mu, kuga magi tea maga waina eu mari dao mu dapasavasa. 29Tea waina e p̃okati ko napupum̃a sikai p̃a roa paki nia kerua; go tea waina e dapelua sugoro kovagoro anigo p̃a ta mauti a sugoro anigo mau. 30P̃a tua sara naata waina eu datagovi ko; go tea waina e dape lua naloriki anigo maga, p̃a ta datagovi liliua ki da mau. 31Go dapala waina ku masauna naga naatam̃oli maga euga mari paki mu, nimu ma kuga mari paki da ega takiusi a. 32Go ku pe dodomi tea maga waina eu dodomi mu, ku pe veani navasadodom̃atakiana nasava? Nalakena tea mari naleo sa maga ma eu dodomi tea maga waina eu dodomi ra. 33Go ku pe mari m̃ataki tea maga waina eu mari m̃ataki mu, ku pe veani navasadodom̃atakiana nasava? Nalakena tea mari naleo sa maga ma eu mari dapala nogoe. 34Go ku pe vitua ki tea seakiana paki tea maga waina ku leogoro naga kuga tape kiada, ku pe veani navasadodom̃atakiana nasava? Tea mari naleo sa maga ma eu pitua ki tea seakiana paki tea mari naleo sa maga, naga euga tape liliua ki tea vatakana. 35Ma kuga dodomi tea kokona ki mu maga, po mari m̃ata ki da, po pitua ki tea seakiana, po da leogoro te navatuna liliu mau; go namoriana animu ega wo p̃arua, go kuga wo pei Tea Vakilagi Mau natuna maga: nalakena nae e pei tea vakale paki tea maga waina eu da dodom̃ataki mau go tea sa maga. 36Kuga vei tea maritadodomi, ega takiusi waina Tamamu e pei tea maritadodomi. 37Go kuga ta pasap̃otae mau, go kuga wo da pei tea vasap̃otaeana mau: go kuga ta dip̃akotovi mau, go kuga wo da pei tea tip̃akotoviana mau: kuga veresi, go kuga wo pei tea veresiana: kuga vitua, go ega wo pei tea vituakiana paki mu; tea rowogiana wia, 38tea tosokiana pakitano, tea nuanuakiana, tea vura peravera, euga wo pitua ki nia paki narum̃amu. Nalakena totowo waina ku dowogi asa ega wo moro manimu pei tea rowogiana asa.
39Go e noa ki da naluluakia sikai, e naga, Tea kesa eu mari atae maraki tea kesa pae napua kite? Eroga wo da dua dowo paki m̃orutano sikai kite? 40Tea vasapiseikiana e da dap̃au tea vasapiseiki mau: ma sara naata ragi waina euga wo pei tea vasapiseikiana sua euga wo dakiusi tea vasapisei ki da. 41Go ekasana ku leo punusi nam̃otam̃ota waina e doko namata ni taim̃a, ma ku da midoaki natokai mau waina e doko namatam̃a doko? 42Kite ku mari atae noa ki taim̃a dapale sava, Taigu, p̃a suasua naga aga tape lua nam̃otam̃ota waina e doko namatam̃a, ragi waina ku da punusi natokai mau waina e doko namatam̃a doko? Nakalep̃o, p̃a vea dape lua natokai waina e doko namatam̃a, go ragi wanogoe p̃a wo leo sai p̃ia naga p̃a tape lua nam̃otam̃ota waina e doko namata ni taim̃a doko. 43Nalakena nakau wia sikai e da doko mau waina e dau ki nawana sa; go nakau sa sikai e da doko mau waina e dau ki nawana wia. 44Nalakena sara nakau sikasikai eu pei tea ataeana ki nawada. Nalakena eu da lei napuliva maga m̃elu nakau vivitip̃a maga mau, go eu da lei nawa ni vaine maga m̃elu namatagauta sikai mau. 45Naatam̃oli wia e dapa lua tea wia m̃elu store wia ni nap̃op̃ona; go naatam̃oli sa e dape lua tea sa m̃elu store sa: nalakena nawokana e pasa m̃elu tea waina nap̃op̃ona e pura ki nia.
46Go ekasana ku soso au ki Nawota, Nawota, po da mari tea maga waina a noa ra mau? 47Sara naata waina eu rumai punusi au, po dogo navasaana aginau maga, po mari ra, aga wo piseiki mu naata waina eu dakiusi a: 48eu dakiusi naatam̃oli sikai waina e do davagi nasum̃a sikai, waina e kili paki pua, po doropusi laketano sikai vatu laketoko: go ragi waina natave sikai e pakilina, noai sara e nadi dip̃a nasum̃a wanogoe, po mari sa mari a e parivari: nalakena e pei tea tavagim̃atakiana. 49Ma tea waina e dogo, po da mari mau, e dakiusi naatam̃oli sikai waina e davagi nasum̃a sikai natano laketano e dika; waina noai sara e nadi dip̃a e, go e dowo m̃araverave; go nasapurakiana ni nasum̃a wanogoe e p̃arua.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKA 6: NTB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific
