LUKA 5
5
1Go e pakilina, ragi waina taua ni naatam̃oli maga eu sogosogoni a po dogo navasaana ki Sup̃e, naga nae e lawodu pisari namarourou ni Cennesaret; 2go e punusi rarua dua ero du pisari namarourou: ma tea araika maga eu m̃elu dua ki sua ra, go eu do sarue kup̃ena adeada maga. 3Go e pagi rarua wanogoe sikai kakada, waina e pei tea ki Simon, po pavarani a naga ega sai ki nia ega risu kiki m̃elu dua ki euta pano. Go e dasake po pasa piseiki taua ni naatam̃oli maga pae rarua. 4Go ragi waina e makoto ki navasaana, e noa ki Simon, e naga, P̃a sai ki nia paki nam̃orua, go kuga tiroa ki kup̃ena animu maga raki navuagoroana sikai. 5Go Simon e pasa dara po naga, Nawota, au p̃osiwosi nap̃ogiana mamau, po da dape te navatuna mau: ma nalakena navasaana anigo aga wo diroa ki kup̃ena maga. 6Go ragi waina eu mari sua tea wanogoe, eu puagoro navata warua sikai ni naika maga; go kup̃ena maga eu pae asa naga euga mawora; 7go eu alovi tada ri maga waina eu doko rarua kerua, naga euga umai po silae ra. Go eu rumai, po pakavuro sokata ki rarua, dapala waina ero pae asa naga eroga m̃oru. 8Ma Simon Petero, ragi waina e punusi a, e dowo pakitano pisari nap̃atua ni Yesu, po naga, P̃a m̃elu dua ki nau pano; nalakena a pei naatam̃oli mari naleo sa, Nawota O. 9Nalakena e maga p̃arua, nara ma tea maga mamau puti waina eu sikoti a doko, nalakena tea vuagoroana ni naika maga waina eu puati ra; 10go e dapala nogoe nalo ni Yakobo go Yoane, Sebedaio natuna maga, waina ero pei tea saisaipeani sikoti Simon. Go Yesu e noa ki Simon, e naga, P̃a ta mataku mau; pae ragi waia pa pa p̃a wo puati pule mauri naatam̃oli maga. 11Go ragi waina eu mari sua rarua adeada maga paki euta, eu doropusi naleo maga mamau puti eu doko, po dausi a.
12Go e pakilina, ragi waina e doko natokoana maga sikai kakada, go kuga leo, naatam̃oli sikai waina e pura ki naveileperoana: go ragi waina e punusi Yesu, e dowo dap̃olosiwo, po pavarani a, e naga, Nawota, ku pe suasua, ku pe mari atae mari au a pe tautau. 13Go e sai ki nam̃elearuna, po kisidogo e, po naga, A suasua; p̃a vei tea mariana p̃a tautau. Go naveileperoana e marua ki nia pano m̃araverave. 14Go nae e pasasoki a naga ega ta noa ki te naata asa mau: ma p̃a vano, po dum̃am̃a pisei ki‐go paki tea viri, po pitua nalakena namaridautaukigoana, ega takiusi waina Moses e pitip̃aki asa, naga ega vei nanoasokisokiana sikai paki da. 15Ma narogorogoana nalo kakana e sokapule p̃arua liu: go taua warua maga ni naatam̃oli maga eu saisai naga euga rogo, go naga euga vei tea maripauriana m̃elu dua ki nasasanaana adeada maga. 16Ma nae e pano panako pano doko maso maladi maga, po do dapasavasa.
17Go e pakilina naaleatia maga wanogoe sikai, naga e do pasapiseiki; go Farisi maga go tea vasapiseiki maga ni nawotaeana eu dasake doko, waina eu pae sara natokoana kiki ni Calilea go ni Yudea go Yerusalem umai: go nakasuaana ki Yehovah e doko naga ega mari pauri. 18Go kuga leo, naatam̃oli seara eu dape naatam̃oli sikai umai waina e sarumate e one nawewele one: go eu laaga naga euga tape a paki ekopu, po doropusi a naraena. 19Go ragi waina eu da pap̃ai dapala waina euga tape a paki ekopu mau nalakena taua ni naatam̃oli maga, eu sake paki elagi ni nasum̃a, po doro e pakitano duaduru taile maga, nae go nawewelena, paki m̃aleoputo narae ni Yesu. 20Go e punusi nasaralomauana adeada, po naga, Kanao, namarinaleosaana anigo maga eu manigo pei tea midoakikorokoroana. 21Go tea midiri maga go Farisi maga eu pae asa midoaki usiusi, po naga, Naata waia e pei sei waina e pasa navasasakiana maga? Sei e mari atae midoakikorokoro namarinaleosaana maga, ma Sup̃e sikina? 22Ma Yesu e atae namidoakiusiusiana adeada maga, po pasa dara po noa ki da, e naga, Ku midoakiusiusi nasava nap̃op̃omu? 23Seve tea e manainai p̃ia, a pe naga, Namarinaleosaana anigo maga eu manigo pei tea midoakikorokoroana; kite a pe naga, P̃a tuleana po surata? 24Ma naga kuga atae naga naatam̃oli Natuna e peani naveinawotaana maramana naga ega midoakikorokoro namarinaleosaana maga (e noa ki tea waina e sarumate, e naga), A noa ki‐go, P̃a tuleana, po dape dakati nawe welem̃a, po paki nasum̃a anigo pano. 25Go e duleana naraeda m̃araverave, po dape dakati tea waina e one asa, po paki nasum̃a aneana pano, po do samasamani Sup̃e. 26Go nasaram̃akotoana e puati tea maga mamau puti, go eu samasamani Sup̃e; go eu pura ki namatakuana, po naga, Au punusi tea ni namagaana maga masoso.
27Go edaku ki tea maga wanogoe e dave pano, po punusi tea tape nasautoga sikai, nagisana Levi, e dasake pisari tokora ni nasautoga, go e noa ki nia, e naga, P̃a rausi au. 28Go e doropusi naleo maga mamau puti eu doko, po duleana po dausi a. 29Go Levi e maneana mari nakaniana warua sikai ekopu ni nasum̃a aneana; go taua warua ni tea tape nasautoga maga go ni tea p̃ota maga eu doko waina eu kere one ganikani sikoti ra. 30Go Farisi maga go tea midiri adeada maga eu dauruuru dip̃a tea vasapiseikiana aneana maga, eu naga, Ekasana ku ganikani po munu sikoti tea tape nasautoga maga go tea mari naleo sa maga? 31Go Yesu e pasa dara po noa ki da, e naga, Tea maga waina eu kasua eu da dapala waina e p̃ia naga euga masau naatam̃oli ni medisine mau; ma tea maga waina eu sasana eu dapala nogoe. 32A da umai naga aga soso tea leana maga mau, ma a umai naga aga soso tea mari naleo sa maga paki namidoakidoaana. 33Go eu noa ki nia, eu naga, Tea vasapiseikiana maga ki Yoane eu paka laapa pali, po mari navavaraniana maga; go tea vasapiseikiana maga ki Farisi maga eu mamau mari dapala nogoe; ma tea anigo maga eu do ganikani po munu. 34Go Yesu e noa ki da, e naga, Ku mari atae mari tea vitawiri tana ri maga euga vali ragi waina tea vitawiri ma nara eu mamau doko kite? 35Ma naaleatia maga euga wo umai; go ragi waina tea vitawiri ega wo pei tea tapeluaana kiada, ragi wanogoe euga wo pali naaleatia maga wanogoe. 36Go e noa ki da naluluakia sikai, e naga, Te naata sikai e da p̃oralua matele sikai ni sugoro vau po usuvaki sugoro tuai asa mau; e pe mari a e pe wo marip̃orae tea vau, go matele ni tea vau e pe wo da pataka ni tea tuai mau. 37Go te naata sikai e da daki waine vau paki noai ni nawili tuai mau; eu pe taki nia paki ara waine vau e pe wo mari nawili maga eu pe masai, go nae e pe wo doroa, go nawili maga eu pe wo sa. 38Ma waine vau e pei tea waina ega vei tea takiana paki nawili vau maga. 39Go te naata sikai waina e munu sua waine tuai e da masau waine vau mau: nalakena e naga, Tea tuai e p̃ia.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKA 5: NTB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific
