LUKA 18
18
1Go e noa ki da naluluakia sikai nalo ni waina e one ara one naga euga to dapasavasa sara ragi, go naga nap̃op̃oda ega ta doro asa mau; e naga, 2Tea vasap̃otae sikai e doko natokoana sikai, waina e da matauki Sup̃e mau, po da dodomadagani naatam̃oli mau: 3go nagoroi malepu sikai e doko natokoana wanogoe; go e do umai punusi a, po naga, P̃a kokonagoro au m̃elu dua ki tea kokona ki nau. 4Go e da suasua mau ragi sikai: ma ragi edaku e dum̃ana noa nap̃alauna, e naga, A da matauki Sup̃e mau, go a da dodomadagani naatam̃oli mau; 5koni nalakena nagoroi malepu waia e mari navitinuana paki nau, aga wo kokonagoro e, e pe to umai pitip̃atip̃a po mari au a pe rogo kite sa. 6Go Nawota e naga, Kuga rogo tea waina tea vasap̃otae tagele e noe e. 7Go Sup̃e ega wo da kokonagoro tea matadoaana aneana maga, waina eu do pioso paki nia aleati go p̃ogi, go e pei maritasoki nalo kakada kite? 8A noa ki mu, naga ega wo kokonagoro ra m̃araverave. Ma ragi waina naatam̃oli Natuna ega wo umai, ega wo pap̃ai nasaralomauana maramana kite?
9Go e moro noa naluluakia waia paki naatam̃oli seara waina eu dum̃ada pavatu ara naga eu leana, po midoaki p̃alo ki tea p̃ota maga: 10Naatam̃oli dua ero sake paki nasum̃a tapu naga eroga tapasavasa; sikai e pei Farisi, go kerua e pei tea tape nasautoga. 11Farisi e lawodu po dapasavasa nap̃alauna dapala waia, Sup̃e, a pasa dodom̃ata ki‐go, nalakena a da dakiusi naatam̃oli p̃ota maga mau, tea tapepavakoto maga, tea tagele maga, tea maripele maga, kite dapala tea tape nasautoga waia. 12A paka rua pali sara wiik; a do pitua ki kekerualima ni naleo maga mamau puti waina a dalua ra. 13Ma tea tape nasautoga e lawodu uvea, po da piviari mau naga ega sike namatana paki nakoroatelagi, ma e dum̃ana dapagi narum̃ana, po naga, Sup̃e, p̃a dodomi au tea mari naleo sa. 14A noa ki mu, naga Nae e siwo paki nasum̃a aneana e pei tea marileanakiana, ma tea vea waina e da pei tea mari leanakiana mau: nalakena sara naata waina eu dum̃ada dape ra pakilagi euga wo pei tea toroana pakitano; ma tea waina e dum̃ana doro e pakitano ega wo pei tea tapeana pakilagi.
15Go eu dape pipia adeada maga umai punusi a, naga ega kisidogo ra: ma ragi waina tea vasapiseikiana maga eu punusi a, eu pasa kasua ki da. 16Ma Yesu e soso ra umai punusi a, po naga, Kuga suasua ki piakirikiri kiki maga naga euga umai punusi au, go kuga ta dip̃agoro ra mau: nalakena namarakiana ki Sup̃e e pei tea ni tea tapalada. 17Lomau a noa ki mu, naga Naata waina e pe wo da dape namarakiana ki Sup̃e dapala piakiki kiki mau, e pe wo da sili paki asa mau.
18Go tea maraki sikai e pusuusu paki nia, e naga, Tea Vasapiseiki Wia, aga mari nasava naga aga veani namauriana waina e du mau du? 19Go Yesu e noa ki nia, e naga, Ekasana ku soso au ki tea wia? Te naata e da p̃ia mau, ma sikai e p̃ia, Sup̃e; 20Ku atae natip̃akiana go natip̃agoroana maga, P̃a ta maripele mau, P̃a ta mari punue mau, P̃a ta panako mau, P̃a ta noasokisoki sorosoro mau, P̃a dodomadagani tamam̃a go p̃ilam̃a. 21Go e naga, Tea maga mamau puti wanogoe a do pavaigoro ra pae ragi ni naveipiakikiana aginau pa pa. 22Go ragi waina Yesu e dogo e, e noa ki nia, e naga, Tea sikai ku ko dika asa: p̃a sori naleo maga mamau puti waina ku peani ra, po duri dua tea tika maga, go p̃a wo peani naloriki tauakiana nakoroatelagi: go p̃a umai, p̃a rausi au. 23Ma ragi waina e dogo tea wanogoe e pei tea mariana, e susue p̃arua; nalakena e pei sogolapa warua. 24Go Yesu e punusi a po naga, E kasua p̃arua pa ki tea maga waina eu peani nasogolapaana naga euga sili paki namarakiana ki Sup̃e! 25Nalakena e kasua kiki ki kamel sikai naga ega sili darave malo masai ni tea tuturi sikai, ma e kasua p̃arua ki tea sogolapa sikai naga ega sili paki namarakiana ki Sup̃e. 26Go tea maga waina eu dogo e eu naga, Go sei e mari atae pei tea mautipauriana? 27Ma e naga, Naleo maga waina naatam̃oli maga eu mari sa mari ra Sup̃e e mari atae mari ra. 28Go Petero e naga, P̃a leo, kinami au doropusi tea aginami maga eu madoko, po dausi ko. 29Go e noa ki da, e naga, Lomau a noa ki mu, naga Te naata e da doko mau waina e doropusi nasum̃a aneana, kite anagoroi, kite taina maga, kite tamana go p̃ilana, kite natuna maga eu madoko, nalakena namarakiana ki Sup̃e, 30waina ega wo da dape tagona laapa liu ra ragi waia, go namauriana waina e du mau du maramana waina ega wo umai.
31Go e piragi lua tea rualima sikai tamate dua, po noa ki da, e naga, Kuga leo, tu sake paki Yerusalem pano, go naleo maga mamau puti waina eu pei tea midiriana pae profeta maga euga wo pei tea marisuaana paki naatam̃oli Natuna. 32Nalakena ega wo pei tea vituakiana paki tea ni nalauna p̃ota maga, go ega wo pei tea marisaudoakiana, po pei tea marisakiana, po pei tea taniuana: 33go euga wo parati a po mari punue a: go ega wo moro duleana naaleatia ketolu. 34Go eu da midoaki atae tea sikai ni tea maga wanogoe mau; go navasaana wanogoe e pei tea surukiana kiada, go eu da atae tea maga waina eu pei tea noaana mau.
35Go e pakilina, ragi waina e paki m̃aladigi ki Yeriko, naatam̃oli kesa sikai e do natano pisari napua waina e do datago: 36go ragi waina e dogo taua sikai ni naatam̃oli maga eu surata liu sa pano, e pusuusu ki nia, Tea waia e pei nasava? 37Go eu noakisai a, naga Yesu ni Nasareth e do liu pano. 38Go e pioso, po naga, Yesu, natu ni David, p̃a dodomi au. 39Go tea maga waina eu pea eu pasa kasua ki nia, naga ega vunuta: ma nae e moro pioso p̃arua liu, Natu ni David, p̃a dodomi au. 40Go Yesu e du dorogo, po dip̃aki nia naga ega vei tea viragiana umai punusi a: go ragi waina e umai paki m̃aladigi e pusuusu paki nia, e naga, Ku masauna naga aga manigo mari nasava? 41Go e naga, Nawota, naga aga moro leosai. 42Go Yesu e noa ki nia, e naga, P̃a moro leosai: nasaralomauana anigo e po mari pauri ko. 43Go e moro leosai m̃araverave, po dausi a, po do samasamani Sup̃e: go narei mamau, ragi waina eu punusi a eu dua Sup̃e navasasamasamaniana.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKA 18: NTB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific
