YOANE 4
4
1Nalakena tea wanogoe ragi waina Nawota e atae naga Farisi maga eu dogo naga Yesu e do mari po do bapetiso tea vasapiseikiana maga eu laapa liu tea maga ki Yoane 2(ma Yesu nae e da bapetiso mau, ma tea vasapiseikiana aneana maga eu bapetiso), 3e doropusi Yudea, po moro paki Calilea pano. 4Go e one asa one naga ega surata duaduru Samaria. 5Go e umai paki natokoana ni Samaria sikai waina e pei tea sosoana ki Saikar, e pei m̃aladigi ki matele ni natano waina Yakob e dua natuna Yosef asa: 6go namata noai ki Yakob e doko tokora wanogoe. Go Yesu waina e mawosa ki nasurataana e dasake dapala nogoe pisari namata noai wanogoe. 7E alagoro pei aura kelatesa. Nagoroi ni Samaria sikai e umai naga ega vautui noai: Yesu e noa ki nia, e naga, P̃a tua au aga munu. 8Nalakena tea vasapiseikiana aneana maga eu paki natokoana pano naga euga vakotovi navinaga. 9Nalakena tea wanogoe nagoroi ni Samaria wanogoe e noa ki nia, e naga, Ekasana nigo, waina ku pei naatam̃oli sikai ni Yudea, ku datagovi au naga p̃a munu, waina a pei nagoroi sikai ni Samaria? (Nalakena naka ni Yudea go naka ni Samaria eu da dum̃ada puati ra mau.) 10Yesu e pasa dara po noa ki nia, e naga, Ku pe atae navituam̃olikiana ki Sup̃e, go sei e doko waina e noa ki‐go, P̃a tua au aga munu; nigo ku pe datagovi a, go e pe tua ko noai mauri. 11Nagoroi wanogoe e noa ki nia, e naga, Nawota ku da peani lo vautu mau, go m̃oru noai waia e paki pua: go ku peani noai mauri wanogoe esava? 12Nigo ku p̃arua liu tamagida Yakob, waina e dua gami m̃oru noai waia, po dum̃ana munu asa, go natuna maga, go katel aneana maga kite? 13Yesu e pasa dara po noa ki nia, e naga, Sara naata waina e munu noai waia seara ega wo moro madou: 14ma naata waina e munu noai seara waina kinau aga wo dua e asa, ega wo da madou mau pa pa ega tu mau du; ma noai waina kinau aga wo dua e asa ega wo pei namata noai sikai nap̃alauna, waina ega wo do putaputa paki namauriana waina e du mau du. 15Nagoroi wanogoe e noa ki nia, e naga, Nawota p̃a tua au noai wanogoe, naga aga ta madou mau, go naga aga ta surata umai paki nea naga aga vautu. 16Yesu e noa ki nia, e naga, P̃a vano, p̃a soso naanoai anigo, go p̃a umai. 17Nagoroi wanogoe e pasadara po noa ki nia, e naga, A da peani te naanoai mau. Yesu e noa ki nia, e naga, Ku noa p̃ia, ku naga, A da peani te naanoai mau: 18nalakena ku peani sua naanoai lima; go tea waina ku peani a ragi waia e da pei naanoai anigo mau: ku noa lomau tea wanogoe. 19Nagoroi wanogoe e noa ki nia, e naga, Nawota, a punusi naga nigo ku pei profeta sikai. 20Tamagami maga eu lotu tava waia; go nimu ku noa, naga tokora waina e one naatam̃oli one naga euga lotu asa e doko Yerusalem. 21Yesu e noa ki nia, e naga, Koroi, p̃a saralomau navasaana aginau, aura ega wo umai, waina kuga wo da lotu ki Tamana asa tava waia sikina mau, kite Yerusalem sikina mau. 22Nimu ku lotu ki tea waina ku da atae a mau: kinami au lotu ki tea waina au atae a: nalakena namautipauriana e pei tea ni naka ni Yudea. 23Ma aura ega wo umai, go e pei ragi waia, waina tea lotu lomau maga euga wo lotu ki Tamana asa pae naatana go nalomauana: nalakena Tamana e laaga naga tea maga waina eu lotu ki nia euga tapala nogoe. 24Sup̃e e pei Naatana: go tea maga waina eu lotu ki nia e one ara one naga euga lotu pae naatana go nalomauana. 25Nagoroi wanogoe e noa ki nia, e naga, A atae naga Messiah ega wo umai (waina e pei tea sosoana ki Kristo): ragi waina nae ega umai, ega wo noa ki sai gida naleo maga mamau puti. 26Yesu e noa ki nia, e naga, Kinau waina a pasa ki‐go a pei nae.
27E noa sua tea wanogoe go tea vasapiseikiana aneana maga eu rumai; go eu maga nalakena nae go nagoroi sikai ero dum̃ada pasa ki da; ma te naata sikai e da noa, Ku laaga nasava? Kite, Ekasana koro dum̃amu pasa ki mu? 28Nalakena tea wanogoe nagoroi wanogoe e doropusi napura ni noai aneana e doko, go e paki natokoana pano; po noa ki naatam̃oli maga, e naga, Kuga umai, 29punusi naatam̃oli sikai, waina e noa ki nau naleo maga mamau puti waina a mari a: nae e pei Kristo kite? 30Eu dave natokoana pano po do umai punusi a. 31Ragi ni namalopa kakana tea vasapiseikiana aneana maga eu pavarani a, eu naga, Rabbi, p̃a kanikani. 32Ma e noa ki da, e naga, Kinau a peani navinaga naga aga kani a waina nimu ku da atae a mau. 33Nalakena tea wanogoe tea vasapiseikiana maga eu dum̃ada noa ki da, eu naga, Te naata e maneana dapetape umai naga ega kanikani kite? 34Yesu e noa ki da, e naga, Navinaga aginau e pei naga aga mari namasauana ki tea waina e dip̃aki lua au umai, go naga aga mari sua nawosiana aneana. 35Nimu ku da noa naga, Atelagi pati eu ko doko, go nalolovaeana ega wo umai kite? Kuga leo, a noa ki mu, naga Kuga sike namatamu, po leo punusi vanua maga, naga eu dare sua ragi waia raki nalolovaeana. 36Tea waina e lolovae e dape namoriana, po piladaua ki nawana paki namauriana waina e du mau du; naga tea waina e sapuraki go tea waina e lolovae eroga rua laelaea. 37Nalakena nalo ni tea wanogoe navasaana e pei lomau waina e naga, Sikai e sapuraki, go tea p̃ota e lolovae. 38Kinau a dip̃aki lua mu naga kuga lolovae ki tea waina nimu ku da p̃osiwosi ki nia mau: tea p̃ota maga eu p̃osiwosi, go nimu ku po umai sili paki nawosiana adeada.
39Go naka ni Samaria tea laapa kakada ni natokoana wanogoe eu saralomau asa nalakena navasaana ki nogoroi wanogoe, waina e noa sokisoki, naga E noa ki nau naleo maga mamau puti waina a mari a. 40Nalakena tea wanogoe ragi waina naka ni Samaria eu rumai punusi a, eu pavarani a naga ega toko sikoti ra doko: go e doko tokora wanogoe doko naaleatia dua. 41Go tea p̃ota laapa eu saralomau nalakena navasaana aneana; 42go eu noa ki nagoroi wanogoe, eu naga, Au da moro saralomau nalakena navasaana anigo mau: nalakena au po dum̃agami dogo e, po atae naga lomau nae e pei Tea Maumau pauri ni maramana.
43Go edaku ki naaleatia dua wanogoe e dave m̃elu dua ki tokora wanogoe paki Calilea pano. 44Nalakena Yesu e dum̃ana noa sokisoki, naga profeta sikai e da peani te nadodomadaganiana navanua aneana mau. 45Go ragi waina e umai paki Calilea, naka ni Calilea eu piragi a, eu punusi naleo maga mamau puti waina e mari a Yerusalem ragi ni nasaisaiana: nalakena nara ma eu paki nasaisaiana pano.
46Nalakena tea wanogoe e moro umai paki Kana ni Calilea, tokora waina e mari noai e pei waine asa. Go naatam̃oli warua sikai ki nawota e doko, waina natuna naanoai e sasana one Kapernaum. 47Ragi waina e dogo naga Yesu e po pae Yudea umai paki Calilea, e pano punusi a, po pavarani a naga ega siwo umai, po mari pauri natuna naanoai: nalakena e pei m̃aladigi naga ega mate. 48Nalakena tea wanogoe Yesu e noa ki nia, e naga, Ku pe ta punusi navaivaiana maga go tea ni namagaana maga ku pe wo da saralomau mau. 49Naatam̃oli warua ki nawota wanogoe e noa ki nia, e naga, Nawota, p̃a siwo umai ragi waina piakiki aginau e ko da mate mau. 50Yesu e noa ki nia, e naga, P̃a vano; natum̃a naanoai e mauri. Naatam̃oli wanogoe e saralomau navasaana waina Yesu e noa ki nia asa, go e pano. 51Go ragi waina nae e do siwo pano, tea suasua aneana maga eu sua e, po noa, naga natuna naanoai e mauri. 52Go e pusuusu paki da ki aura waina e pae asa dogokitep̃ia. Go eu noa ki nia, eu naga, Nanova aura kelarua namasakiana e marua ki nia. 53Go tamana e atae naga e pei aura waina Yesu e noa ki nia, e naga, Natum̃a naanoai e mauri: go nae e saralomau, go nasum̃a aneana mamau. 54Tea wanogoe e moro pei navaivaiana kerua waina Yesu e mari a, ragi waina e pae sua Yudea umai paki Calilea.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
YOANE 4: NTB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific
