YOANE 3
3
1Ma naatam̃oli sikai ni Farisi maga e doko, nagisana Nikodemo, tea maraki sikai ki naka ni Yudea: 2nae e umai punusi Yesu p̃ogi, po noa ki nia, e naga, Rabbi, au atae naga ku pei tea vasapiseiki sikai waina ku m̃elu Sup̃e umai: nalakena te naata sikai, Sup̃e e pe ta sikoti a doko mau, e pe ta mari atae mari navaivaiana maga mau waina nigo ku do mari ra.
3Yesu e pasa dara po noa ki nia, e naga, Lomau, lomau, a noa ki‐go, Te naata sikai e pe ta pakilina pau mau, e pe ta mari atae punusi namarakiana ki Sup̃e mau.
4Nikodemo e noa ki nia, e naga, Naatam̃oli sikai e mari atae pakilina ragi waina e pei tea matua dapale sava? E mari atae sili paki nap̃ele ni p̃ilana sala kerua, po pakilina kite?
5Yesu e pasa dara, e naga, Lomau, lomau, a noa ki‐go, Te naata sikai e pe ta pakilina m̃elu noai go Naatana mau, e pe ta mari atae sili paki namarakiana ki Sup̃e mau. 6Tea waina e pakilina m̃elu nap̃okasi e pei nap̃okasi; go tea waina e pakilina m̃elu Naatana e pei naatana. 7P̃a ta maga mau nalakena a noa ki‐go, naga E one mu one naga kuga vakilina pau. 8Nalagi e sau tokora waina e masauna, go ku dogo nadaleona, ma tokora waina e pae asa umai, go tokora waina e paki asa pano ku da atae a mau: Sara naata waina e pakilina m̃elu Naatana e dapala nogoe. 9Nikodemo e pasa dara po noa ki nia, e naga, Tea maga wanogoe eu mari atae pei tea mariana dapale sava? 10Yesu e pasa dara po noa ki nia, e naga, Nigo ku pei tea vasapiseiki ki Israel, go ku da midoaki atae tea maga wanogoe kite? 11Lomau, lomau, a noa ki‐go, naga Kinami au do pasa tea waina au atae a, po do noasokisoki tea waina au punusi a; go nimu ku da dape nanoasokisokiana aginami mau. 12A pe noa ki sua mu tea maga ni maramana, go ku da saralomau mau, a pe noa ki mu tea maga ni nakoroatelagi, kuga wo saralomau dapale save? 13Go te naata sikai e da sake paki nakoroatelagi mau, ma tea waina e pae nakoroatelagi siwo umai e sikina sake paki asa, naatam̃oli Natuna waina e doko nakoroatelagi. 14Go dapala waina Moses e sike m̃aata pakilagi masop̃alo, dapala nogoe e one naatam̃oli Natuna one naga ega vei tea sikeana pakilagi: 15naga sara naata waina eu saralomau asa euga veani namauriana waina e du mau du.
16Nalakena Sup̃e e dodomi maramana dapala waina e pitua ki Natuna sikedau, naga sara naata waina e saralomau asa ega ta mate puoli mau, ma ega veani namauriana waina e du mau du. 17Nalakena Sup̃e e da dip̃aki lua Natuna umai paki maramana naga ega vasa p̃otae maramana mau, ma e dip̃aki lua e umai naga maramana ega vei tea mautipauriana pae asa. 18Tea waina e saralomau asa e da pei tea vasap̃otaeana mau: tea waina e da saralomau mau e po pei tea vasap̃otaeana sua, nalakena e da saralomau nagisa ni Sup̃e Natuna sikedau mau. 19Go tea waia e pei navasap̃otaeana, naga namarama e po umai paki maramana, go naatam̃oli maga eu dodomi p̃arua ki namaligo, po dodomi kiki ki namarama; nalakena nawosiana adeada maga e sa. 20Nalakena sara naata waina e do mari naleo sa e pilosi namarama, go e da umai paki namarama mau, naga nawosiana aneana maga ega ta pei tea maramap̃aiana mau. 21Ma tea waina e do mari nalomauana e umai paki namarama, naga nawosiana aneana maga ega vei tea mariana ega toko lina, naga eu pei tea wosiwosikiana doko Sup̃e.
22Edaku ki tea maga wanogoe Yesu go tea vasapiseikiana aneana maga eu rumai paki navanua ni Yudea, go e doko tokora wanogoe sikoti ra doko, po do bapetiso. 23Go Yoane ma e do bapetiso Ainon, m̃aladigi ki Salim, nalakena noai laapa eu doko tokora wanogoe: go eu rumai po pei tea bapetisoana. 24Nalakena Yoane e ko da pei tea nadikiana paki ekopu ni nasum̃a ni navavaigoroana mau. 25Nalakena tea wanogoe navusuusuana sikai e pakilina m̃elu tea vasapiseikiana maga ki Yoane paki tea ni Yudea sikai nalo ni namaridautauana. 26Go eu rumai punusi Yoane, po noa ki nia, eu naga, Rabbi, tea waina e sikoti ko doko taleva kerua ni Yordan, waina ku maneana noasokisoki, p̃a leo nae e do bapetiso, go tea maga mamau puti eu rumai punusi a. 27Yoane e pasa dara po naga, Naatam̃oli sikai, te navatuna e pe ta pei tea vituakiana paki nia m̃elu nakoroatelagi mau, e da mari atae dape a mau. 28Nimu ku dum̃amu maginau noa sokisoki naga a noa, naga Kinau a da pei Kristo mau, ma naga A pei tea tip̃akiluaana pea ki nia umai. 29Tea waina e peani nagoroi laki e pei tea vitawiri: ma tea vitawiri tana ri, waina e lawodu po dogo e, e laelaea p̃arua nalakena nadaleo ni tea vitawiri: nalakena tea wanogoe nalaelaeaana aginau waia e pei tea vakavuroana. 30E one asa one naga nae ega risu po p̃arua, ma e one au one naga aga risu po kiki.
31Tea waina e pae elagi umai e dap̃au tea maga mamau puti: tea waina e pei tea ni maramana e pei tea ni maramana, po do pasa tea ni maramana: tea waina e pae nakoroatelagi umai e dap̃au tea maga mamau puti. 32Tea waina e punusi a po dogo e, tea wanogoe e do noa sokisoki a; go te naata sikai e da dape nanoasokisokiana aneana mau. 33Tea waina e dape sua nanoasokisokiana aneana, e pulusoki naga Sup̃e e pei lomau. 34Nalakena tea waina Sup̃e e dip̃aki lua e umai e do pasa navasaana maga ki Sup̃e: nalakena Sup̃e e da pitua ki Naatana pae totowo paki nia mau. 35Tamana e dodomi Natuna, go e pitua ki naleo maga mamau puti paki nam̃elearuna. 36Tea waina e saralomau Natuna e peani namauriana waina e du mau du; ma tea waina e da saralomau Natuna mau ega wo da punusi namauriana mau, ma namaetoana ki Sup̃e e doko asa doko.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
YOANE 3: NTB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible Society of the South Pacific
