LALAKOGI 5
5
Ananaeas tona Savira
1Nge a tangaloi gatagale vage, a henana i Ananias i gahorana a henana i Savira. Nge u sogagi na mavusui nora tano vage, 2mo lai na duvi manegi gi nona sibona siu mo bete na duvigi lawera gaihora, nge i gahorana u iloe vage. 3I Bita mo veve lawea vena. “Ananaeas. ?Huri havagineu gom siregi Satan mo vai esiesigi na nom domiana mwerehi huri gu keli na Vui Gogona gom hakobibi na duvi manei tano hi?” 4?Gitomue a tano hi a nomu, siu gom sogaginie, lo tagugi hi a gaivoligi u voragi nomu? ?Huri havai gom domiginie mwerehi lolo lolomu huri gom vai na gineu hi? Huri gohe kali na tangaloi tea, nge gom kali God. 5Siserigi Ananaeas mo rongo na leo hi mo soi hivo lo tano mo mate. A tangaloi doluegi ram rongoe ram rurururu ram matagu liu. 6A mwalakelo ram vonai lolo valena, ram luqesie, ram walie vano, ram tuleginie.
7Lategi aho gaitolu morovo, i gahorana mo soro vonai lolo vale, nge he ilo na havagineu tea u vei. 8I Bita mo veve lawe na vavine hi vena. “?Gon veve sere laweau, huri ve ingeie hi a tovoi gai voli doluegi iniko ko i tamai netumu neru leie lo nomiru tano?”
Mo daragi vena, “Io, nge hi a tovogi doluegi.”
9Nge i Bita mo veve lawea vena, “?Huri havai iniko ko i tamai netumu nerum vai leo ve nero vai lehi na vui nona Huqe? A tangaloi rau tulegi tamai netumu ngerehi lo matai vale, ko rain weligo tavarea vage.” 10Siserigi nge mo soi hivo lo tano lolo karui Bita mo mate, a mwalakelo ram vonai ram leo u mate beno, ram walie tavarea, ram tuleginie lo mwararai tamai netune. 11A warelue doluegi noi Jisas koi ingere lavasigi vage ram rongoe mwerehi ram matagu u liu.
Gigilegi ko a awogiana
12A gai hora rau vei na gigilegi ko a gineu awogi u sao lawera sinobu. Ra ladohogo doluegi ram sone bulutegi lo burigi lo malumelui ara noi Solomon. 13A sinobu doluegi ram lado mava ginire, nge a tangaloi ingere hi rahe lado hogo tea, ram matagu huri ve ran bulu meire. 14Ko a tangaloi ram bulu mo sao lo burigi hi. A mwera ko a vavine u sao ram lado hogo gina Huqe. 15Nge ngaha a duvi tabanagi nora gaihora hi rau veie, a tangaloi ram wali ira segesege sulo turegi lawua ram taure lo qea ram eno lo qanara huri ve i Bita vin dige utu aiehi a nunune vin soi lure rai mwaso. 16A buri sinobu ram vonai den qatui venue u sao dali bulu na vanue Jerusalem, ram lai ira segesege ko ira hine hi a vuiesi lure vage, ko ingere rau mwaso doluegi.
Ram vai asiesiginire gaihora
17A rugurugu lawua, meire nona buluana ingere hi rau bulu lo burigi nora Sadusi, mo garasire u liu ginire gaihora; ko ram vaiveire, 18ram maraga, ram wiribibire gaihora, ram taure lolo valei vauveu. 19Siu lolo bongi hi a Engsel nona Huqe mo vonai, mo roa na matai valei vauveu, mo tomueginire ram mwalue taligu. Mo veve lawera vena, 20“Gimiu nen vano nen lolo valei God, nen veve sere na leo huri na leoi mwaso hi lawera sinobu.” 21Ko ira gaihora ram tabe na leo, lune mo leleo duruduru ram soro lolo vale Gogona ko ram tavuigi ram huhui.
A rugurugu lawua meire nona buluana ram ware bubugi ira tamaragai a duvi Israel, huri na laqana talo nora kansel lawua. Ko ram hora na leo mo vano lo valei vauveu huri ve ran laire gaihora vonai lobera. 22Lune a bolisman ram dadari rahe haqera gaihora ngerehi tea lolo valei vauveu, ram tudori ram vano taligu lobera tangaloi kansel lawua, ram veve sere lawera, 23“Lune gau dadari lo valei vauveu hi a matai ara u gorogoro siaga, a tangaloi leogoro matai ara ingere aiehi, ram toga ram leogoro na matai vale. Nge lune gam roa na matai vale, gahe haqe na tangaloi tea lolona.” 24Lune a tomtomuegi lawua goro na vale Gogona, ko a muei rugurugu ram rongoe, ram awogi garagara ve a havagineu hi u vei lawera gaihora.
25Siu a tangaloi mo vonai lolo vale mo veve lawera vena “Nen rongo, a tangaloi ingere hi neu teure lolo valei vauveu siseri ngaha ingere lolo vale Gogona ram huhuire sinobu.” 26A tomtomuegi hi ram vano mena nona tangaloi, ram laire gai hora taligu. Rahe vai garasire tea a vevenagi hi ram matagu ginire sinobu huri vaiteu ram bugurire.
27Ingere hi ram laire gaihora ram vonai ram soro lolo vale ram vaire ram labe lo nagora kansel. A muei rugurugu mo huire 28mo, veve vena, “?Wuraha hi? Gamai gau gato goro gimiu beno, ve gimiu nei mese huhui lo henai tangaloi ngaha taligu. ?Nge igimiu nem vai na havagi neu ngaha? Igimiu neu vei na vanue Jerusalem u horo beno gina nomiu leo huhui, vage nem veve hurive a tangaloi hi u mate a bugumei.”
29I Bita mo duvi gorora lo henana meire hora lavasigi mo vena, “Gamai gain tabe God, hage liu den tangaloi. 30Igimiu neu wehi Jisas beno, gimiu neu durue lo gai saroutu, nge a God noi retubude, u veie mo mwaso taligu dena mateana. 31I God hi u ragasie hage beno mo toga lo matuana, mo voragi Ratahigi lawua, ko vagamwasoi gide. God mo vaie mwere hi huri ve vin dori lei na domide duvi Israel, ko vin lei vohogi lei na bugude. 32Gamai gam laqagi lue na gineu ngerehi. Hatie gamai sibomai, nge a Vui Gogona u bului gamai, nge hi a hogogi noi God lawera tangaloi hi rau rongo hurie.”
33Lo tarogi a meba na kansel ram rongo na leo hi mo hogosire uliu, siu ram tarani ve rain vevegi nire hora huri ve rain ue vagamatera. 34Nge gatagale denire ingeie a Varise, a henana i Gamaliel, nge a huhui lawua, ingere rau lado mavaginie. Mo maraga mo labe lolo livugara kansel. Mo veve lawera ve ran laire hora ran mwalue meire varea. 35Siu ingeie mo laqa lawera kansel mo vena, “Gimiu a duvi Israel, nei leo goro, huri na gineu ngehi nem tarani ve nein veie lawe na tangaloi ingere hi. 36Lo taro hivo vuine beno a tangaloi gatagale i Tudas mo veve ve ingeie a tangaloi lawua gatagale. A tangaloi lategi vudolue vagavesi rau bulu meie. Nge a tangaloi rau ue vagamatea beno, rau livusi na nona tangaloi ram vano gagatalegi, a nona burigi hi u rovo. 37Lo tagugi hi, Judas ingeie ta Kalili mo maraga lo taroi valu velui tangaloi, ingeie vage u revei na sinobu sao rau hurie. Nge ingere rau uevagamatea beno vage ko ram livusi na nona tangaloi ram vano gagatalegi. 38Nge ngaha ineu nam veve lawe gimiu huri na tangaloi ngerehi. Gimiu nem sireginire, tare vea tabana ngaha a domiana nona tangaloi hogosie, vin mwasaru vurogi. 39Nge tare a gineu nge hi u vanai dei God igimiu nein he tugoro laie tea. Bataha igimiu nein leo haqe ve nem qalo mei God.”
A tangaloi talo kansel ram huri na leona.
40Ingere ram warera hora ve ran soro lolo vale siu ran vivihire, siu ram gato siaga gorora hora ve rain mese laqagi na henai Jisas taligu, ko ram sireginire, ko ram vano.
41Ko ira hora ram mwalue dena kansel, ram rong garea u liu huri God mo lehire ve ingere rau tatarise ve rain maemae lo nagora sinobu huri na henai Jisas. 42Siu vataha bongi lolo valei God, ko lolo valera sinobu, ram huhuire sinobu, ko ran veve serelue na roro, garea hi huri Jisas, ve ingeie i Ratahigi Vurei.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LALAKOGI 5: HNT
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
Bible Society of the South Pacific, 2013
