LALAKOGI 4
4
1Bita koi Jon lune ingere rom laqa mosigei lawera sinobu, ira rugurugu ko a tomtomuegi nora bolis talo valei God, ko meire Sadusi ram vonai kakarani lobera. 2Ram lologagasi garagara gina gaihora gairue hi, huri ingere rom huhuire tangaloi huri vei Jisas u maraga dena mateana, giniehi, mo haharagi hurive a tangaloi rain mate siu rain maso taligu. 3Ram wiribibire, ram taure lolo valei vauveu, roin toga vin dadari lo rani tuegi huri a taro u vano beno. 4Nge a sinobu sao rau rongo na nora leo huhui ram lado hogo. A tovoi mwera hogosie hi rau lado hogo, u kakarani teri vagalime.
Bita koi Jon rom labe lo nagoi Kansel lawua
5Lo rani tuegi, ira tangaloi lalawua a duvi Israel meire tamaragai ko ira huhui talo Leo hora noi Mosis, ram vomai bubugi Jerusalem. 6Ram bulu mei Anas hi ingeie a muei rugurugu ko i Kaeavas, Jon, Aleksanda, ko a tangaloi lavasigi vage ingere a duvi muei rugurugu ve ron vai na nora Kansel. 7Ram lai na gai hora gairue hi ram taure rom labe lolo livugara, ko ram huire vena, “?Neru vei na gineu ngaha wuraha? ?Nerom lalakogi lo huire na noi hine, sige neru lalakogi lo henai hine?” 8A Vui Gogona mo hivo lui Bita, ko mo duvi lawera mo veve vena, “Gimiu ira tomtomuegi ko ira tamaragai den duvi Israel. 9Gimiu nem hui gamaru vena, neru vei wuraha huri na lalakogi garea ngehi guru veie lawe na tangaloi lukuluku hi u esi mo mwaso. 10U garea ve gimiu ira lawuagoro doluegi nen ilo, ko a sinobu doluegi a duvi Israel rain ilo vurugegi vage. A tangaloi hi mo lehe a karune u garea beno, lo huireana talo henai Jisas Kraes ta Nasaret. Ngehi gitomue neu totoe lo gai saroutu, ko neu vei vagamatea, nge i God u vagamwasoie taligu dena mateana. 11I Jisas nge hi a Reve reve Gogona hurie vena, ‘A beru ngehi igimiu ira tangaloi hako vale neu tuli vohoginie beno, nge bagataha mo voragi beru hunei vale.’ 12Nge hatie tangaloi wagineu vage ve vin vagamwasoi gide. Huri lolo ure ngaha i God he bete na hea te wagineu vage ve dai maso lune.”
13Ingere talo kansel lawua ram garigi garagara, huri Bita koi Jon rohe matagu tea, huri rau ilo vage huri ve ingere a tangaloi vurogi rohe iloilo tea lawuagi. Nge ingere ram leo hogosire ve gitomuegi ru bubugi mei Jisas. 14Ko ingere hate nora leo vohogi ve ran veve, huri ram lehi na tangaloi hi a karune u esi nge u garea taligu mo labe meire. 15Ko ingere ram veve lawera ve ran mwalue dena valei laqana hi. Ko a kansel lawua hogosie ram toga lolo vale ram laqalaqa ginire gahera. 16?Ram huire taligu vena, dain vei wuraha na garue? Ingere doluegi ta Jerusalem rau ilo beno huri na nora tabanagi lawua hi ru veie. Nge igide dai he vunigi laie tea. 17Nge u garea ve igide da tugoro na roro hi na mese mwalue taligu lawera tangaloi. Dai veve siaga lawera huri ingere rain mese huhui lo henai Jisas taligu.
Kansel lawuahi mo sireginire rom mwalue
18Ko ingere ram warera sulolo vale taligu. Ko ram veve lawe Bita tona Jon vena. “Neri mese veve sere na henai Jisas, neri mese laqagi lawe na tangaloi ko neri mese huhuire taligu.” 19Ingeie Bita tona Jon rom duvire vena. “?Igimiu nein leo wahe sibomiu ve ngehilogo u vovohoi lo nagoi God, ve gori ronghuri gimiu sige gori ronghuri na leoi God? 20Huri i gamaru gori he siregi tea, nge gori veve sere na havagineu guru leo gina matamaru ko guru rongo gina qeromaru.” 21Ngaraha lo kansel lawua ram gato gorora taligu ko ram sireginire dena valei kot, nge hatie nora huireana ve rain teure lo tanoi vevegi, huri a tangaloi ram hau rorogi na henai God huri na gineu ngerehi rau vei. 22A tangaloi hi ru vei na vaigivui lune, a karune mo garea, a higaona u liu den ngavulu gaivesi.
Ira tangaloi ladohogo ram tataro huri ve rain mese matagu
23Lune ram siregi Bita tona Jon rom mwalue, rom vano tuturedu lobei retuara. Ko rom veve serelue na havagineu doluegi lawera hi ira muei rugurugu ko ira tamaragai rau veve. 24Lune ingere ram rongo na leo ngerehi, ingere ram tataro lawe God ram veve vena, “Huqe, iniko gu teu na dodo a tano a tahi ko a gineu lolo ure doluegi. 25Lo huireana noi Vui Gogona a nomu i tubumiu Devet ingeie a nom tangaloi tabanagi, nge u veve serelue na leomu, u veve vena.
?Huri havai ira haroharo
ram lolo gagasi garagara?
?Huri havai ram tau na leo
ve ran vai na gineu esi, nge rahe vai lei tea?
26Ira ratahigi lalawua talolo ure
i ram vai rarai ve ran vai na vuro,
ko ira lawua goro ram sonebubugi,
ko ve ran vai na bulubuluesi goro
na Huqe God,
mena nona Ratahigi Vurei.
27A hogo i Herod ko i Bontius Baelat rum toga bubugi lolo qatui venue lawua meire haroharo koa sinobu a duvi Israel ram vai vei Jisas, hi a nomu tangaloi tabanagi gogona ngehi gu veie mo voragi Ratahigi Vurei. 28Ingere hi ram bubuginire ve ran vai na gineu ingere hi doluegi gu leo wahera beno, lo nom huireana ko a tanoi nom domiana ve na eno lune. 29Huqe, gon rongo na leo asi teri ingere ngaha, ram vaivei gamai ginie, ve gon hako mei gamai ira nom tangaloi tabanagi ve gan laqagi na leomu ve a domimiu na huire. 30Gam tiehigo ve gon horagi na limemu, ve gon vagamwasoi re ram sege, ko vage gon bete na nom gigilegi ko a vaigivui teri, ko ve gon vaire ran managi lo henai nom tangaloi tabanagi gogona i Jisas.” 31Lune ingere rau tataro u rovo, a vale hi rau sone bubugi lolona mo rurururugi. A Vui Gogona mo hivo mo vagahorongire ko mo vai siagagi na domire ram tau vuigi ram ngasagi na leoi God.
Ira ladohogo ram wahegi na nora hakogineu
32Ngere hi rau ladohogogi Jisas a nora domiana ko a leora gatagale hogosie. A tangaloi vin he veve tea ve a gineu a nona gahea. Nge ram siregi na nora hakogineu, ram beteginie vatavataha ginire. 33Ko gina huireana lawua ira gai hora ram veve serelue na maraga taligu nona Huqe jisas, ko God mo vaigarea ginire doluegi. 34Ingere talo burigi hi gatagale denire he qilodo tea lo gineu. Ingere hi a nora tano lure sige a valera ram sogaginire ram lai na gai voligi, 35ram bete lawera gai hora siu a gai hora ram bete lawe na tangaloi vatavatahagi nire u tatarise mena gineu hi ram qilodo lune.
36A tangaloi gatagale a henana i Josev, nge a duvi livae, u vora lo vanue Saebras. Ira gaihora rau teu na henana tuegi vage vei Banabas, a iloilogi vena. “A tangaloi vai mwamwavigi na domire tangaloi.” 37Giniehi, u sogagi na mahoi tanona siu u bete na gaivoligi lawera gai hora.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LALAKOGI 4: HNT
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
Bible Society of the South Pacific, 2013
