Luglaa 28
28
1Denii Aizik yir Jekɔb di kissuu, ka ŋɔ u be, “Gilɛɛ waa kpa Keenan hina biihaaŋ maa. 2La Mɛsɔpɔtemia, i naabaal Bɛtuɛl nɛra be, di ga kpa i naara Laban biihaana la bɛl. 3Kɔ́raawiizi Fɔŋŋa Maa Hiŋ la hiinii, di tɛi biikpila, di gil i birgi hɛrkpila hina mɛɛ. 4Kɔ́raawiizi kissi i ni i naanna gunla uŋ kissi Abraham la, di gil ii dɔɔ hɛri naa yaa n duwɛɛ di ɛɛ hɔɔhra, Kɔraawiizi n felee kpau tɛɛ Abraham naa fɔŋŋa.” 5Denii Aizik faa gil Jekɔb kaali Mɛsɔpɔtemia di ga du u naara Laban be. A Laban hiŋ faa ɛɛ Bɛtuɛl n ɛɛ Siiria hinuu la biibaallɛ, di ka ɛɛ Ribɛka ge niubambie. Ribɛka ge ɛɛ Jekɔb ni Ɛsau maa.#Lug 24:29
6Ɛsau nuu lugɔ u mɛɛ kissi Jekɔbuu, di gil u kaali u naara be Mɛsɔpɔtemia ú ga nyiŋŋi haaŋ, di kaa nuu lugɔ u karfi Jekɔbuu lugɔ u gilɛɛ waa kpa Keenan hina biihaaŋ maa, 7di kaa zum lugɔ Jekɔb nuu u maa ni u mɛɛ wiŋɔzii, di kaali Mɛsɔpɔtemia. 8Denii Ɛsau jaa zum lugɔ wibii maa, u mɛɛ waa Keenan hina biihaana nɔŋŋɛɛ.#Lug 26:35 9Awia, u faa la u naara Ismɛl be di ga kpa u biihaaŋ Mahalaf, n ɛɛ Nɛbayɔf niuhambie, di kaa ɛɛ Abraham biibaal Ismɛl ge biihaaŋ, di wa jaa u haana ni.
Jekɔb n deezee Bɛtɛl
10Jekɔb faa lii Bɛɛsiba di ra la Haran. 11Wiizi n waa chol, di u hel yembɛl, u chɔɔ de a hamuŋa hiŋ. Denii u kpa bii di birgi u kaputti di sil, di ra chɔɔ dɔɔ. 12Unna chɔɔ dɔɔ la, u deezi di na keeraa bɛl n chigɛ hɛri di ga chug chiŋ, mɛlikazi ga u ni di ra tinni, di kaa ra tuu. 13Kɔraawiizi chi u kɛrii di ra ŋɔ, “Minuu Kɔraawiizi la i naabaala Abraham ni Aizik n faa ra hum la. Hɛri naa hiŋ chɔɔ u ni naa ɛɛ i hotte. N daŋ kpau tɛɛ i ni i naanna.#Lug 12:2; 13:14-15 14I naanna daŋ wazi werge maa di su hɛri naa maa gunla nyɔɔ n ɔɔ tɔ bɔr maa la. Ba daŋ su di lii wiifurii di wa kaali wiicholii, di kaa lii wiifurii nomɛɛl wiikakag di wa kaali wiifurii nodig wiikakag. Hɛri naa nɛra maa daŋ na hiinaa werge, di lii i naanna be. 15N daŋ ɔɔ du i be saŋa maa di ra hiinii, bɔr la maa hinna la. Ka ŋmɛnɛ bɛl n daŋ kaa gil i bir ba hɛri naa. N daŋ ɔɔ du i be saŋaa saŋa maa, di ra ba saŋa la min niŋ wa tɛi kunla maa miŋ ŋɔ nua u wia la.”#Lug 33:18
16Denii Jekɔb hassi izi di ŋɔ, “Wibii maa, Kɔraawiizi du ɛnnɛ, ka n faa waa zummɛ.” 17Denii ɔnsii lawuu, u ŋɔ, “Bɔnnaa wia dɔɔ ɔnsiirɛ werge. Kɔraawiizi duuribɔttɛ, wibii maa. U ɛɛ Kɔraawiizi bol dominuuzenne.”
18Hɔɔŋ waa pizi chɔɔzimpikke ni, u feli izi di kpa bii la uŋ kpawɛɛ sil la di baŋ, ú ɛɛ daansɛɛ kuŋ. Uŋ wa baŋuu tuŋ, u yiili nuu di waari u ni, 19ka jaa dau de sɔŋ Bɛtɛl, haali baŋ faa ra yir a bolzeŋ Luuz la.
20Denii Jekɔb lɛɛ nua Kɔraawiizi be, di ŋɔ, “Di Kɔraawiizi daŋ hiiniŋ n ŋmɛnɛɛ naa biini, di tɛŋ diwee ni laala, 21di kaa biriŋ di ba n mɛɛ be ani bɔsɔna, guŋwaa, u daŋ ɛɛ Kɔraawiizi la min ninna hum. 22Bii naa miŋ baŋŋɛ naa ge daŋ ɛɛ bɔr la ban ninna jaamuu. Denii ń jaa kpa kuna la miŋ dɔɔwɛ fi bɔkpaŋ di tɛu.”#Lug 14:20
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luglaa 28: vag
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.