ܠܘܩܐ 23

ܝܼܫܘܿܥ ܩܵܕ݇ܡ ܦܝܼܠܵܛܘܿܣ

ܡܬܝ 27‏:1‏‐2، 27‏:11‏‐14؛ ܡܪܩܘܣ 15‏:1‏‐5؛ ܝܘܚܢܢ 18‏:28‏‐38

1ܘܩܝܼܡ ܠܗܘܿܢ ܟܠܹܗ ܟܸܢܫܲܝܗܝ ܘܠܘܼܒܸܠ ܠܗܘܿܢ ܠܝܼܫܘܿܥ ܠܟܸܣ ܦܝܼܠܵܛܘܿܣ. 2ܘܫܘܼܪܹܐ ܠܗܘܿܢ ܗܲܡܙܘܼܡܹܐ ܠܕܲܠܩܘܼܒ݂ܠܹܗ ܘܒܹܐܡܵܪܵܐ، ”ܚܙܹܐ ܠܲܢ ܐܵܗܵܐ ܐ݇ܢܵܫܵܐ ܡܲܚܠܘܼܛܹܐ ܠܛܵܝܸܦܲܢ ܘܡܲܟܠܘܼܝܹܐ ܡ̣ܢ ܠܝܼܵܗ݇ܒ݂ܵܐ ܙܘܼܙܹ̈ܐ ܕܪܹܫܝܼܬܵܐ ܠܩܹܣܲܪ، ܘܒܹܐܡܵܪܵܐ ܒܘܼܬ ܓܵܢܹܗ ܕܗ̇ܘ ܝܼܠܹܗ ܡܫܝܼܚܵܐ، ܡܲܠܟܵܐ.“ 3ܒܘܼܩܸܪܹܗ ܡܸܢܹܗ ܦܝܼܠܵܛܘܿܣ، ”ܐܲܢ݇ܬ ܝܼܘܸܬ ܡܲܠܟܵܐ ܕܝܗܘܼܕܵܝܹ̈ܐ؟“ ܓ̰ܘܼܘܸܒ ܠܹܗ ܝܼܫܘܿܥ، ”ܗܹܐ، ܐܲܝܟ݂ ܕܒܹܐܡܵܪܵܐ ܝܘܸܬ.“ 4ܐ݇ܡܝܼܪܹܗ ܦܝܼܠܵܛܘܿܣ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܟܸܢܫܵܐ، ”ܐܵܢܵܐ ܠܹܐ ܝܘܸܢ ܡܲܫ݇ܟ̰ܘܼܚܹܐ ܥܸܠܬܵܐ ܕܲܠܩܘܼܒ݂ܠ ܕܐܵܗܵܐ ܐ݇ܢܵܫܵܐ.“ 5ܐܝܼܢܵܐ ܐܵܢܝܼ ܡܲܩܘܸܚܝܼ ܗ݇ܘܵܘ، ܒܹܐܡܵܪܵܐ، ”ܡܲܫܓ݂ܘܼܫܹܐ ܝܠܹܗ ܠܥܲܡܲܢ ܒܝܘܼܠܦܵܢܹܗ ܓܵܘ ܟܠܹܗ ܝܼܗܘܼܕ. ܫܘܼܪܹܐ ܠܹܗ ܡ̣ܢ ܓܠܝܼܠܵܐ ܘܗܲܠ ܠܐܲܟ݂ܵܐ.“ 6ܐܝܼܡܲܢ ܕܫܡܝܼܥ ܠܹܗ ܦܝܼܠܵܛܘܿܣ ܫܸܡܵܐ ܕܓܠܝܼܠܵܐ، ܒܘܼܩܸܪܹܗ ܕܐܸܢ ܐܵܗܵܐ ܐ݇ܢܵܫܵܐ ܓܒܸܠܝܵܝܵܐ ܝܗ݇ܘܵܐ. 7ܘܐܝܼܡܲܢ ܕܝ݇ܕܝܼܥ ܠܹܗ ܕܓܒܸܠܝܵܝܵܐ ܝܗ݇ܘܵܐ ܘܬܚܘܿܬ ܫܘܼܠܛܵܢܵܐ ܕܗܹܪܘܿܕܸܣ، ܫܘܼܕܸܪܹܗ ܐܸܠܹܗ ܠܟܸܣ ܗܹܪܘܿܕܸܣ ܣܵܒܵܒ ܗ̇ܘ ܓܵܘ ܐܘܿܪܸܫܠܸܡ ܝܼܗ݇ܘܵܐ ܒܐܵܢܝܼ ܝܵܘܡܵܢܹ̈ܐ.

ܝܼܫܘܿܥ ܩܵܕ݇ܡ ܗܹܪܘܿܕܸܣ

8ܐܝܼܡܲܢ ܕܗܹܪܘܿܕܸܣ ܚܙܹܐ ܠܹܗ ܠܝܼܫܘܿܥ، ܚܕܹܐ ܠܹܗ ܪܵܒܵܐ، ܣܵܒܵܒ ܡ̣ܢ ܓ̰ܲܠܕܹܐ ܟܹܐ ܒܵܥܹܐ ܗ݇ܘܵܐ ܠܸܚܙܵܝܹܗ، ܣܵܒܵܒ ܫܡܝܼܥܵܐ ܝܗ݇ܘܵܐ ܒܘܼܬ ܕܝܼܹܗ ܪܵܒܵܐ ܡܸܢܕܝܼܵܢܹ̈ܐ، ܘܒܸܣܦܵܪܵܐ ܝܗ݇ܘܵܐ ܕܥܵܒܹܕ ܗ݇ܘܵܐ ܚܲܕ ܢܝܼܫܲܢܩܵܐ. 9ܪܵܒܵܐ ܒܘܼܩܵܪܹ̈ܐ ܒܘܼܩܸܪܹܗ ܗܹܪܘܿܕܸܣ ܡܸܢܹܗ، ܐܝܼܢܵܐ ܝܼܫܘܿܥ ܠܵܐ ܓ̰ܘܼܘܸܒ ܠܹܗ ܐܸܠܹܗ ܐܘܼܦ ܚܲܕ. 10ܘܟܸܠܝܹܐ ܝܗ݇ܘܵܘ ܬܵܡܵܐ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ، ܘܒܩܸܫܝܘܼܬܵܐ ܗܲܡܙܸܡܝܼ ܗ݇ܘܵܘ ܕܲܠܩܘܼܒ݂ܠܹܗ. 11ܘܗܹܪܘܿܕܸܣ ܘܕܲܚܫܘܼ̈ܗܝ ܡܘܼܣܠܹܐ ܠܗܘܿܢ ܐܸܠܹܗ، ܘܡܘܼܣܚܸܪܗܘܿܢ ܒܝܼܹܗ، ܘܡܘܼܠܒܸܫ ܠܗܘܿܢ ܐܸܠܹܗ ܠܒ݂ܝܼܫܬܵܐ ܫܲܦܝܼܪܬܵܐ، ܘܡܘܼܕܸܪܗܘܿܢ ܐܸܠܹܗ ܠܟܸܣ ܦܝܼܠܵܛܘܿܣ. 12ܘܒܗ̇ܘ ܝܵܘܡܵܐ ܦܝܼܠܵܛܘܿܣ ܘܗܹܪܘܿܕܸܣ ܗܘܹܐ ܠܗܘܿܢ ܚܲܒ݂ܪ̈ܵܘܵܬܹܐ ܡܥܘܼܕܵܠܹ̈ܐ، ܣܵܒܵܒ ܕܸܫܡܸܢܵܝܘܼܬܵܐ ܡ̣ܢ ܓ̰ܲܠܕܹܐ ܐܝܼܬ ܗ݇ܘܵܐ ܒܹܝܠܲܝܗܝ.

ܝܼܫܘܿܥ ܝܲܢ ܒܲܪ ܐܲܒܵܐ

ܡܬܝ 27‏:15‏‐26؛ ܡܪܩܘܣ 15‏:6‏‐15؛ ܝܘܚܢܢ 18‏:39‏–19‏:16

13ܩܪܹܐ ܠܹܗ ܦܝܼܠܵܛܘܿܣ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܪܹ̈ܫܵܢܹܐ ܕܝܗܘܼܕܵܝܹ̈ܐ ܘܕܥܲܡܵܐ، 14ܘܐ݇ܡܝܼܪܹܗ ܐܸܠܲܝܗܝ، ”ܡܘܼܐܬܹܐ ܠܵܘܟ݂ܘܿܢ ܐܵܗܵܐ ܐ݇ܢܵܫܵܐ ܠܟܸܣ ܠܝܼ ܐܲܝܟ݂ ܚܲܕ ܚܵܒ݂ܛܵܢܵܐ ܕܥܲܡܵܐ، ܘܐܵܢܵܐ ܨܘܼܚܨܹܐ ܠܝܼ ܐܸܠܹܗ ܩܵܕ݇ܡܵܘܟ݂ܘܿܢ ܘܠܵܐ ܡܘܼܫ݇ܟ̰ܸܚ ܠܝܼ ܒܝܼܹܗ ܥܸܠܬܵܐ ܕܒܘܼܬ ܕܝܼܘܼܗ̇ ܒܸܠܝܵܡܹܗ ܝܬܘܿܢ. 15”ܐܘܼܦ ܗܹܪܘܿܕܸܣ ܠܵܐ ܚܙܹܐ ܠܹܗ ܒܝܼܹܗ ܓܢܵܗܵܐ، ܗܲܕܟ݂ܵܐ ܫܘܼܕܸܪܹܗ ܐܸܠܹܗ ܠܐܲܟ݂ܵܐ. ܠܹܐ ܝܠܹܗ ܥܒ݂ܝܼܕܵܐ ܡܸܢܕܝܼ ܕܚܵܫܹܚ ܠܡܵܘܬܵܐ. 16”ܒܘܼܬ ܐܵܗܵܐ ܒܸܬ ܬܲܥܠܸܡܸܢܹܗ ܘܫܵܪܹܝܢܹܗ.“ 17ܐܝܼܬ ܗ݇ܘܵܐ ܥܝܵܕܵܐ ܕܫܵܪܹܐ ܗ݇ܘܵܐ ܦܝܼܠܵܛܘܿܣ ܐܸܠܲܝܗܝ ܚܲܕ ܐܲܣܝܼܪܵܐ ܒܝܵܘܡܵܐ ܕܥܹܐܕܵܐ. 18ܐܝܼܢܵܐ ܟܠܲܝܗܝ ܡܘܼܩܘܸܚ ܠܗܘܿܢ ܒܚܲܕ ܩܵܠܵܐ ܘܐ݇ܡܝܼܪܗܘܿܢ، ”ܛܲܠܸܩ ܠܐܵܗܵܐ ܐ݇ܢܵܫܵܐ، ܘܫܪܝܼ ܐܸܠܲܢ ܠܒܲܪ ܐܲܒܵܐ!“ 19ܒܲܪ ܐܲܒܵܐ ܦܝܼܫܵܐ ܝܗ݇ܘܵܐ ܕܸܪܝܵܐ ܓܵܘ ܒܹܝܬ ܐܲܣܝܼܪܹ̈ܐ ܒܘܼܬ ܫܓ݂ܘܼܫܝܵܐ ܘܩܸܛܠܵܐ ܕܥܒ݂ܝܼܕܵܐ ܝܗ݇ܘܵܐ ܓܵܘ ܡܕܝܼܢ݇ܬܵܐ. 20ܡܸܢܕܪܸܫ ܗܘܼܡܙܸܡ ܠܹܗ ܥܲܡܲܝܗܝ ܦܝܼܠܵܛܘܿܣ ܟܲܕ ܒܸܒܥܵܝܵܐ ܕܫܵܪܹܐ ܗ݇ܘܵܐ ܠܝܼܫܘܿܥ. 21ܐܝܼܢܵܐ ܐܵܢܝܼ ܡܲܩܘܸܚܝܼ ܗ݇ܘܵܘ، ܒܹܐܡܵܪܵܐ، ”ܙܩܘܿܦ ܠܹܗ، ܙܩܘܿܦ ܠܹܗ!“ 22ܓܵܗܵܐ ܕܬܠܵܬ ܐ݇ܡܝܼܪܹܗ ܐܸܠܲܝܗܝ ܦܝܼܠܵܛܘܿܣ، ”ܡܘܿܕܝܼ ܒܝܼܫܬܵܐ ܥܒ݂ܝܼܕܵܐ ܝܠܹܗ؟ ܥܸܠܬܵܐ ܕܚܵܫܚܵܐ ܠܡܵܘܬܵܐ ܠܹܐ ܝܘܸܢ ܡܲܫ݇ܟ̰ܘܼܚܹܐ ܒܝܼܹܗ. ܒܸܬ ܬܲܥܠܸܡܸܢܹܗ ܘܫܵܪܹܝܢܹܗ.“ 23ܐܝܼܢܵܐ ܐܵܢܝܼ ܡܲܠܝܸܙܝܼ ܗ݇ܘܵܘ ܒܩܵܠܵܐ ܪܵܡܵܐ ܘܛܵܠܒܝܼ ܗ݇ܘܵܘ ܡܸܢܹܗ ܕܦܵܐܹܫ ܡܸܚܝܵܐ ܠܙܩܝܼܦܵܐ. ܘܓ݂ܠܝܼܒ ܠܹܗ ܩܵܠܲܝܗܝ ܘܩܵܠܵܐ ܕܓܘܼܪ̈ܵܢܹܐ ܕܟܵܗܢܹ̈ܐ. 24ܗ̇ܝܓܵܗ ܩܛܝܼܥ ܠܹܗ ܦܝܼܠܵܛܘܿܣ ܕܦܵܝܫܵܐ ܬܘܼܡܸܡܬܵܐ ܒܵܥܘܼܬܲܝܗܝ. 25ܫܪܹܐ ܠܹܗ ܐܸܠܲܝܗܝ ܠܒܲܪ ܐܲܒܵܐ، ܗ̇ܘ ܕܒܘܼܬ ܫܓ݂ܘܼܫܝܵܐ ܘܩܸܛܠܵܐ ܦܝܼܫܵܐ ܝܗ݇ܘܵܐ ܕܸܪܝܵܐ ܓܵܘ ܒܹܝܬ ܐܲܣܝܼܪܹ̈ܐ، ܗ̇ܘ ܕܐܵܢܝܼ ܛܠܝܼܒ ܠܗܘܿܢ. ܘܠܝܼܫܘܿܥ ܣܘܼܦܹܐ ܠܹܗ ܠܨܸܒ݂ܝܵܢܲܝܗܝ.

ܙܩܵܦܬܵܐ ܕܝܼܫܘܿܥ

ܡܬܝ 27‏:32‏‐44؛ ܡܪܩܘܣ 15‏:21‏‐32؛ ܝܘܚܢܢ 19‏:17‏‐27

26ܟܲܕ ܠܲܒܘܼܠܹܐ ܝܗ݇ܘܵܘ ܠܝܼܫܘܿܥ، ܕܒ݂ܝܼܩ ܠܗܘܿܢ ܠܫܸܡܥܘܿܢ ܩܸܘܪܝܼܢܵܝܵܐ ܕܒܹܐܬܵܝܵܐ ܝܗ݇ܘܵܐ ܡ̣ܢ ܚܲܩܠܵܐ، ܘܡܘܼܬܸܒ݂ ܠܗܘܿܢ ܠܚܲܨܹܗ ܙܩܝܼܦܵܐ ܕܛܵܥܹܢܹܗ ܘܐܵܙܹܠ ܒܵܬ݇ܪܵܐ ܒܵܬ݇ܪ ܝܼܫܘܿܥ. 27ܘܒܹܐܬܵܝܵܐ ܝܗ݇ܘܵܐ ܒܵܬ݇ܪܹܗ ܟܸܢܫܵܐ ܪܵܒܵܐ، ܘܒܲܟ݂ܬܵܬܹ̈ܐ ܒܸܥܒ݂ܵܕܵܐ ܬܵܥܙܝܼ ܘܒܝܼܠܵܝܵܐ ܥܲܠܘܼܗܝ. 28ܘܕܝܼܪܹܗ ܝܼܫܘܿܥ ܠܟܸܣ ܒܲܟ݂ܬܵܬܹ̈ܐ ܘܐ݇ܡܝܼܪܹܗ ܐܸܠܲܝܗܝ، ”ܒܢܵܬܹ̈ܐ ܕܐܘܿܪܸܫܠܸܡ، ܠܵܐ ܒܵܟܹܝܬܘܿܢ ܥܲܠܝܼ، ܐܝܼܢܵܐ ܒܟܹܝܡܘܼܢ ܥܲܠ ܓܵܢܵܘܟ݂ܘܿܢ ܘܥܲܠ ܒܢܘܿܢܵܘ̈ܟ݂ܘܿܢ. 29”ܣܵܒܵܒ ܒܸܬ ܐܵܬܝܼ ܝܵܘܡܵܢܹ̈ܐ ܕܒܸܬ ܐܵܡܪܝܼ، ’ܛܘܼܒ݂ܵܐ ܠܥܲܩܪ̈ܵܬܹܐ ܘܠܟܹܪ̈݇ܣܵܬܹܐ ܕܠܵܐ ܗܘܼܨܸܠ ܠܗܘܿܢ، ܘܠܒܸܙܵܙܹ̈ܐ ܕܠܵܐ ܡܘܼܡܸܨ ܠܗܘܿܢ.‘ 30”ܗ̇ܝܓܵܗ ܒܸܬ ܫܲܪܝܼ ܠܹܐܡܵܪܵܐ ܠܛܘܼܪ̈ܵܢܹܐ، ’ܢܦܘܿܠܘܼܢ ܥܲܠܲܢ، ܘܠܪ̈ܘܼܡܝܵܬܹܐ، ܟܲܣܹܝܡܘܼܢ ܠܲܢ.‘#ܗܘܫܥ 10‏:8 31”ܐܸܢ ܒܐܝܼܠܵܢܵܐ ܬܲܠܝܼܠܵܐ ܐܲܢܹܐ ܒܸܥܒ݂ܵܕܵܐ ܝܢܵܐ، ܡܘܿܕܝܼ ܒܸܬ ܥܵܒ݂ܕܝܼ ܒܐܝܼܠܵܢܵܐ ܒܵܪܘܿܙܵܐ؟“

32ܘܦܝܼܫ ܠܗܘܿܢ ܠܘܼܒܠܹܐ ܥܲܡܹܗ ܬܪܹܝ ܐ݇ܚܹܪ̈݇ܢܹܐ، ܥܵܒ݂ܕܵܢܹ̈ܐ ܕܒܝܼܫܵܬܹ̈ܐ ܕܦܵܝܫܝܼ ܗ݇ܘܵܘ ܩܛܝܼܠܹܐ. 33ܘܟܲܕ ܡܛܹܐ ܠܗܘܿܢ ܠܚܕܵܐ ܕܘܼܟܵܐ ܕܦܝܵܫܵܐ ܝܠܵܗ̇ ܩܪܝܼܬܵܐ ܩܲܪܩܲܦܬܵܐ، ܙܩܝܼܦ ܠܗܘܿܢ ܐܸܠܹܗ ܬܵܡܵܐ. ܐܘܼܦ ܠܐܵܢܝܼ ܬܪܹܝ ܥܵܒ݂ܕܵܢܹ̈ܐ ܕܒܝܼܫܵܬܹ̈ܐ ܙܩܝܼܦ ܠܗܘܿܢ، ܚܲܕ ܡ̣ܢ ܝܲܡܝܼܢܹܗ ܘܚܲܕ ܡ̣ܢ ܣܸܡܵܠܹܗ. 34ܘܐ݇ܡܝܼܪܹܗ ܝܼܫܘܿܥ، ”ܝܵܐ ܒܵܒܵܐ، ܦܲܚܸܠ ܠܗܘܿܢ ܣܵܒܵܒ ܠܹܐ ܝܢܵܐ ܒܝܼܕܵܥܵܐ ܡܘܿܕܝܼ ܝܢܵܐ ܒܸܥܒ݂ܵܕܵܐ.“ ܘܦܘܼܠܸܥ ܠܗܘܿܢ ܓ̰ܘܼܠܘܼ̈ܗܝ، ܘܕܪܹܐ ܠܗܘܿܢ ܥܲܠܲܝܗܝ ܦܸܫܟܵܐ.#ܡܙܡܘܪ̈ܐ 22‏:18

35ܟܸܠܝܵܐ ܝܗ݇ܘܵܐ ܬܵܡܵܐ ܥܲܡܵܐ ܘܒܸܚܙܵܝܵܐ، ܘܐܘܼܦ ܓܘܼܪ̈ܵܢܹܐ ܡܲܣܚܸܪܝܼ ܗ݇ܘܵܘ ܒܝܼܹܗ ܘܐܵܡܪܝܼ ܗ݇ܘܵܘ، ”ܠܐ݇ܚܹܪ̈݇ܢܹܐ ܦܘܼܪܸܩ ܠܹܗ، ܦܲܪܸܩ ܠܓܵܢܹܗ، ܐܸܢ ܐܵܗܵܐ ܝܠܹܗ ܡܫܝܼܚܵܐ ܓܘܼܒܝܵܐ ܕܐܲܠܵܗܵܐ.“ 36ܐܘܼܦ ܕܲܚܫܹ̈ܐ ܡܲܣܚܸܪܝܼ ܗ݇ܘܵܘ ܒܝܼܹܗ. ܩܲܪܒܸܢܝܼ ܗ݇ܘܵܘ ܠܟܸܣ ܠܹܗ ܘܝܵܗ݇ܒ݂ܝܼ ܗ݇ܘܵܘ ܠܹܗ ܚܲܠܵܐ ܠܸܫܬܵܝܵܐ.#ܡܙܡܘܪ̈ܐ 22‏:7‏‐8 37ܘܐܵܡܪܝܼ ܗ݇ܘܵܘ ܐܸܠܹܗ، ”ܐܸܢ ܐܲܢ݇ܬ ܝܼܘܸܬ ܡܲܠܟܵܐ ܕܝܗܘܼܕܵܝܹ̈ܐ، ܦܲܪܸܩ ܓܵܢܘܼܟ݂.“ 38ܟܬܝܼܒ݂ ܠܗܘܿܢ ܐܘܼܦ ܟܬܝܼܒ݂ܬܵܐ ܠܥܸܠܸܠ ܡ̣ܢ ܪܹܫܹܗ ܒܠܸܫܵܢܵܐ ܝܵܘܢܵܝܵܐ ܘܪܗ݇ܘܿܡܵܝܵܐ ܘܥܸܒ݂ܪܵܝܵܐ، ”ܐܵܗܵܐ ܝܠܹܗ ܡܲܠܟܵܐ ܕܝܗܘܼܕܵܝܹ̈ܐ.“ 39ܚܲܕ ܡ̣ܢ ܐܵܢܝܼ ܬܪܹܝ ܥܵܒ݂ܕܵܢܹ̈ܐ ܕܒܝܼܫܵܬܹ̈ܐ ܕܙܩܝܼܦܵܐ ܝܗ݇ܘܵܐ ܥܲܡܹܗ ܓܵܕܹܦ ܗ݇ܘܵܐ ܥܲܠܘܼܗܝ ܘܐܵܡܹܪ ܗ݇ܘܵܐ، ”ܠܹܐ ܝܘܸܬ ܐܲܢ݇ܬ ܡܫܝܼܚܵܐ؟ ܦܲܪܸܩ ܓܵܢܘܼܟ݂، ܘܐܘܼܦ ܐܸܠܲܢ.“ 40ܐܝܼܢܵܐ ܗ̇ܘ ܐ݇ܚܹܪ݇ܢܵܐ ܡܘܼܢܟܸܣ ܠܹܗ ܐܸܠܹܗ ܘܐ݇ܡܝܼܪܹܗ، ”ܐܘܼܦ ܡ̣ܢ ܐܲܠܵܗܵܐ ܠܹܐ ܝܘܸܬ ܒܸܙܕܵܥܵܐ، ܟܲܕ ܬܚܘܿܬ ܕܗ̇ܝ ܕܝܵܢܬܵܐ ܝܘܸܬ ܐܲܝܟ݂ ܕܝܼܠܹܗ ܗ̇ܘ؟ 41”ܐܲܚܢܲܢ ܒܗܵܩܘܼܬܵܐ ܦܝܵܫܵܐ ܝܘܲܚ ܕܝܼܢܹܐ، ܐܲܝܟ݂ ܕܚܵܫܚܵܐ ܐܸܠܲܢ ܘܐܲܝܟ݂ ܦܘܼܠܚܵܢܲܢ ܦܝܵܫܵܐ ܝܘܲܚ ܦܪܝܼܥܹܐ. ܐܝܼܢܵܐ ܐܵܗܵܐ ܐ݇ܢܵܫܵܐ ܡܸܢܕܝܼ ܚܸܪܒܵܐ ܠܹܐ ܝܠܹܗ ܥܒ݂ܝܼܕܵܐ.“ 42ܗ̇ܝܓܵܗ ܐ݇ܡܝܼܪܹܗ، ”ܝܵܐ ܝܼܫܘܿܥ، ܕܟ݂ܘܿܪܝܼ ܐܝܼܡܲܢ ܕܐܵܬܹܝܬ ܒܡܲܠܟܘܼܬܘܼܟ݂.“ 43ܓ̰ܘܼܘܸܒ ܠܹܗ ܐܸܠܹܗ ܝܼܫܘܿܥ، ”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܘܼܟ݂، ܐܸܕܝܘܿܡ ܒܸܬ ܗܵܘܹܝܬ ܥܲܡܝܼ ܓܵܘ ܦܲܪܕܲܝܣܵܐ.“

ܡܵܘܬܵܐ ܕܝܼܫܘܿܥ

ܡܬܝ 27‏:45‏‐56؛ ܡܪܩܘܣ 15‏:33‏‐41؛ ܝܘܚܢܢ 19‏:28‏‐30

44ܐܲܝܟ݂ ܣܵܥܲܬ ܕܬܪܸܥܣܲܪ ܕܟܵܘܸܬܪܵܐ، ܗܘܹܐ ܠܹܗ ܚܸܫܟܵܐ ܥܲܠ ܟܠܵܗ̇ ܐܲܪܥܵܐ ܗܲܠ ܣܵܥܲܬ ܕܬܠܵܬ ܡ̣ܢ ܒܵܬ݇ܪ ܟܵܘܸܬܪܵܐ. 45ܚܒܹܐ ܠܹܗ ܫܸܡܫܵܐ، ܘܦܝܼܫ ܠܹܗ ܦܪܝܼܛܵܐ ܣܸܬܪܵܐ ܕܗܲܝܟܠܵܐ ܡ̣ܢ ܒܹܝܬ݇ ܦܲܠܓܹܗ.#ܡܦܩܢܐ 26‏:31‏‐33 46ܘܡܘܼܩܘܸܚ ܠܹܗ ܝܼܫܘܿܥ ܒܩܵܠܵܐ ܪܵܡܵܐ ܘܐ݇ܡܝܼܪܹܗ، ”ܝܵܐ ܒܵܒܝܼ، ܒܐܝܼܕܵܬܘܼ̈ܟ݂ ܣܲܦܘܼܝܘܼܗ̇ ܝܘܸܢ ܪܘܼܚܝܼ.“ ܐ݇ܡܝܼܪܹܗ ܗܲܕܟ݂ܵܐ ܘܣܘܼܦܝܵܐ ܠܹܗ ܪܘܼܚܹܗ. 47ܐܝܼܡܲܢ ܕܚܙܹܐ ܠܹܗ ܪܲܒ ܐܸܡܵܐܐ ܡܸܢܕܝܼ ܕܗܘܹܐ ܠܹܗ، ܫܘܼܒܸܚ ܠܹܗ ܠܐܲܠܵܗܵܐ ܘܐ݇ܡܝܼܪܹܗ، ”ܫܲܪܝܼܪܵܐܝܼܬ ܐܵܗܵܐ ܐ݇ܢܵܫܵܐ ܙܲܕܝܼܩܵܐ ܝܗ݇ܘܵܐ.“ 48ܘܟܠܲܝܗܝ ܟܸܢܫܹ̈ܐ ܕܓ̰ܡܝܼܥܹܐ ܝܗ݇ܘܵܘ ܠܓܲܫܘܼܩܹܐ، ܐܝܼܡܲܢ ܕܚܙܹܐ ܠܗܘܿܢ ܡܸܢܕܝܼ ܕܗܘܹܐ ܠܹܗ، ܕܝܼܪܗܘܿܢ ܒܸܡܚܵܝܵܐ ܥܲܠ ܨܲܕܪܲܝܗܝ. 49ܘܟܸܠܝܹܐ ܝܗ݇ܘܵܘ ܡ̣ܢ ܪܸܚܩܵܐ ܟܠܲܝܗܝ ܝܵܕܥܵܢܘܼ̈ܗܝ، ܐܘܼܦ ܒܲܟ݂ܬܵܬܹ̈ܐ ܕܝܼܗ݇ܘܵܘ ܐ݇ܬܝܼܹܐ ܥܲܡܹܗ ܡ̣ܢ ܓܠܝܼܠܵܐ، ܘܒܸܚܙܵܝܵܐ ܝܗ݇ܘܵܘ ܐܲܢܹܐ.

ܩܒ݂ܵܪܬܵܐ ܕܝܼܫܘܿܥ

ܡܬܝ 27‏:57‏‐61؛ ܡܪܩܘܣ 15‏:42‏‐47؛ ܝܘܚܢܢ 19‏:38‏‐42

50ܐܝܼܬ ܗ݇ܘܵܐ ܚܲܕ ܐ݇ܢܵܫܵܐ ܫܸܡܹܗ ܝܵܘܣܸܦ ܕܐ݇ܬܹܐ ܠܹܗ ܡ̣ܢ ܪܵܡܬܵܐ ܡܕܝܼܢ݇ܬܵܐ ܕܝܼܗܘܼܕ، ܡܵܠܘܿܟ݂ܵܐ، ܐ݇ܢܵܫܵܐ ܛܵܒ݂ܵܐ ܘܟܹܐܢܵܐ. 51ܐܵܗܵܐ ܠܵܐ ܥܒ݂ܝܼܕ ܠܹܗ ܐܲܝܟ݂ ܨܸܒ݂ܝܵܢܲܝܗܝ ܘܠܵܐ ܐܲܝܟ݂ ܦܘܼܠܚܵܢܲܝܗܝ، ܘܒܸܣܦܵܪܵܐ ܝܗ݇ܘܵܐ ܠܡܲܠܟܘܼܬܵܐ ܕܐܲܠܵܗܵܐ. 52ܐܵܗܵܐ ܐ݇ܬܹܐ ܠܹܗ ܠܟܸܣ ܦܝܼܠܵܛܘܿܣ ܘܛܠܝܼܒ ܠܹܗ ܦܲܓ݂ܪܵܐ ܕܝܼܫܘܿܥ. 53ܘܡܘܼܨܠܹܐ ܠܹܗ ܠܦܲܓ݂ܪܵܐ ܘܟܘܼܪܡܸܟ݂ ܠܹܗ ܒܟܸܬܵܢܵܐ، ܘܡܘܼܬܸܒ݂ ܠܹܗ ܓܵܘ ܒܹܝܬ ܩܒ݂ܘܼܪܵܐ ܢܩܝܼܪܵܐ ܓܵܘ ܟܹܐܦܵܐ، ܕܐܘܼܦ ܚܲܕ ܠܹܐ ܝܗ݇ܘܵܐ ܗܹܫ ܡܘܼܬܒ݂ܵܐ ܓܵܘܹܗ. 54ܝܵܘܡܵܐ ܕܗܵܕܲܪܬܵܐ ܝܗ݇ܘܵܐ، ܘܫܲܒܬܵܐ ܒܸܙܪܵܩܵܐ ܝܗ݇ܘܵܐ. 55ܘܒܲܟ݂ܬܵܬܹ̈ܐ ܕܐ݇ܬܝܼܹܐ ܝܗ݇ܘܵܘ ܥܲܡ ܝܼܫܘܿܥ ܡ̣ܢ ܓܠܝܼܠܵܐ ܚܙܹܐ ܠܗܘܿܢ ܠܩܲܒ݂ܪܵܐ، ܘܕܵܐܟ݂ܝܼ ܝܗ݇ܘܵܐ ܡܘܼܬܒ݂ܵܐ ܓܵܘܹܗ ܦܲܓ݂ܪܵܐ ܕܝܼܫܘܿܥ. 56ܕܝܼܪܗܘܿܢ ܘܗܘܼܕܸܪܗܘܿܢ ܒܸܣܡܹ̈ܐ ܘܗܹܪ̈ܘܿܡܹܐ، ܘܒܫܲܒܬܵܐ ܫܠܹܐ ܠܗܘܿܢ ܐܲܝܟ݂ ܦܘܼܩܕܵܢܵܐ.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

ܠܘܩܐ 23: ABTAB

Highlight

ಶೇರ್

ಕಾಪಿ