ܠܘܩܐ 22

ܝܗܘܼܕܵܝܹ̈ܐ ܒܸܒܥܵܝܵܐ ܕܩܵܛܠܝܼ ܠܝܼܫܘܿܥ

ܡܬܝ 26‏:1‏‐5، 26‏:14‏‐16؛ ܡܪܩܘܣ 14‏:1‏‐2، 14‏:10‏‐11؛ ܝܘܚܢܢ 11‏:45‏‐53

1ܩܲܪܒܘܼܢܹܐ ܝܗ݇ܘܵܐ ܥܹܐܕܵܐ ܕܦܲܛܝܼܪܹ̈ܐ ܕܟܹܐ ܦܵܐܹܫ ܩܸܪܝܵܐ ܥܹܐܕܵܐ ܕܦܸܨܚܵܐ،#ܡܦܩܢܐ 12‏:1‏‐27 2ܘܒܸܛܥܵܝܵܐ ܝܗ݇ܘܵܘ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܠܚܕܵܐ ܦܸܪܣܲܬ ܕܵܐܟ݂ܝܼ ܩܵܛܠܝܼ ܠܝܼܫܘܿܥ، ܣܵܒܵܒ ܒܸܙܕܵܥܵܐ ܝܗ݇ܘܵܘ ܡ̣ܢ ܥܲܡܵܐ. 3ܘܥܒ݂ܝܼܪܹܗ ܣܵܛܵܢܵܐ ܒܝܼܗܘܼܕܵܐ ܣܟܲܪܝܘܿܛܵܐ ܕܝܼܗ݇ܘܵܐ ܚܲܕ ܡ̣ܢ ܬܪܸܥܣܲܪ. 4ܐ݇ܙܝܼܠ ܠܹܗ ܘܗܘܼܡܙܸܡ ܠܹܗ ܥܲܡ ܓܘܼܪ̈ܵܢܹܐ ܕܟܵܗܢܹ̈ܐ ܘܪܹ̈ܫܵܢܹܐ ܕܢܵܛܘܿܪܹ̈ܐ ܕܗܲܝܟܠܵܐ ܕܵܐܟ݂ܝܼ ܣܲܦܹܐ ܠܹܗ ܐܸܠܲܝܗܝ ܝܼܫܘܿܥ. 5ܘܐܵܢܝܼ ܚܕܹܐ ܠܗܘܿܢ، ܘܥܒ݂ܝܼܕ ܠܗܘܿܢ ܩܵܘܠܵܐ ܕܝܵܗ݇ܒ݂ܝܼ ܠܹܗ ܙܘܼܙܹ̈ܐ. 6ܘܗ̇ܘ ܝܘܼܗ݇ܒܸܠ ܠܹܗ ܩܵܘܠܵܐ ܐܸܠܲܝܗܝ، ܘܒܸܛܥܵܝܵܐ ܝܗ݇ܘܵܐ ܒܵܬ݇ܪ ܦܸܪܣܲܬ ܕܣܲܦܹܐ ܠܹܗ ܕܠܵܐ ܝ݇ܕܲܥܬܵܐ ܕܟܸܢܫܵܐ.

ܗܵܕܲܪܬܵܐ ܕܦܸܨܚܵܐ

ܡܬܝ 26‏:17‏‐25؛ ܡܪܩܘܣ 14‏:12‏‐21؛ ܝܘܚܢܢ 13‏:21‏‐30

7ܡܛܹܐ ܠܹܗ ܝܵܘܡܵܐ ܕܦܲܛܝܼܪܹ̈ܐ ܕܒܝܼܹܗ ܐܝܼܬ ܥܝܵܕܵܐ ܕܟܹܐ ܦܵܐܹܫ ܦܪܝܼܡܵܐ ܦܹܐܪܵܐ ܕܦܸܨܚܵܐ. 8ܘܫܘܼܕܸܪܹܗ ܝܼܫܘܿܥ ܠܫܸܡܥܘܿܢ ܟܹܐܦܵܐ ܘܠܝܘܿܚܲܢܵܢ ܘܐ݇ܡܝܼܪܹܗ ܐܸܠܲܝܗܝ، ”ܙܹܠ݇ܡܘܼܢ ܘܗܲܕܪܘܼܢ ܐܸܠܲܢ ܦܸܨܚܵܐ ܕܐܵܟ݂ܠܲܚ.“ 9ܐܵܢܝܼ ܒܘܼܩܸܪܗܘܿܢ ܡܸܢܹܗ، ”ܐܲܝܟܵܐ ܒܵܣܡܵܐ ܠܘܼܟ݂ ܕܗܲܕܪܲܚ؟“ 10ܐ݇ܡܝܼܪܹܗ ܐܸܠܲܝܗܝ، ”ܐܝܼܡܲܢ ܕܥܵܒ݂ܪܝܼܬܘܿܢ ܓܵܘ ܡܕܝܼܢ݇ܬܵܐ، ܒܸܬ ܬܵܦܹܩ ܒܝܼܵܘܟ݂ܘܿܢ ܚܲܕ ܐ݇ܢܵܫܵܐ ܛܥܝܼܢܵܐ ܬܲܠܡܵܐ ܕܡ̈ܝܼܵܐ. ܙܹܠ݇ܡܘܼܢ ܒܵܬ݇ܪܹܗ ܘܥܒ݂ܘܿܪܘܼܢ ܠܒܲܝܬܵܐ ܕܥܵܒܹܪ. 11”ܘܐ݇ܡܘܿܪܘܼܢ ܠܡܵܪܵܐ ܕܒܲܝܬܵܐ، ’ܪܲܒܝܼܲܢ ܒܹܐܡܵܪܵܐ ܝܠܹܗ، ”ܐܲܝܟܵܐ ܝܠܵܗ̇ ܕܘܼܟܵܐ ܕܐܵܟ݂ܠܹܢ ܦܸܨܚܵܐ ܥܲܡ ܬܲܠܡܝܼܕܝܼ̈؟“‘ 12”ܘܗ̇ܘ ܒܸܬ ܡܲܚܙܹܐ ܠܵܘܟ݂ܘܿܢ ܥܸܠܝܼܬܵܐ ܓܘܼܪܬܵܐ ܘܫܘܼܘܝܼܬܵܐ. ܬܵܡܵܐ ܗܲܕܪܘܼܢ.“ 13ܘܐ݇ܙܝܼܠ ܠܗܘܿܢ ܘܡܘܼܫ݇ܟ̰ܸܚ ܠܗܘܿܢ ܐܲܝܟ݂ ܕܐ݇ܡܝܼܪܹܗ ܐܸܠܲܝܗܝ. ܘܗܘܼܕܸܪܗܘܿܢ ܬܵܡܵܐ ܦܸܨܚܵܐ.

ܐ݇ܟ݂ܵܠ݇ܪܲܡܫܵܐ ܕܡܵܪܲܢ

ܡܬܝ 26‏:26‏‐30؛ ܡܪܩܘܣ 14‏:22‏‐26؛ ܐ. ܩܘܪ̈ܢܬܝܐ 11‏:23‏‐25

14ܐܝܼܡܲܢ ܕܗܘܹܐ ܠܵܗ̇ ܥܕܵܢܵܐ، ܐ݇ܬܹܐ ܠܹܗ ܝܼܫܘܿܥ ܘܝ݇ܬܝܼܒ݂ ܠܹܗ ܘܬܪܸܥܣܲܪ ܫܠܝܼܚܹ̈ܐ ܥܲܡܹܗ. 15ܘܐ݇ܡܝܼܪܹܗ ܐܸܠܲܝܗܝ، ”ܫܲܗܘܲܬܬܵܐ ܫܘܼܗܘܸܬ ܠܝܼ ܕܐܵܟ݂ܠܹܢܹܗ ܐܵܗܵܐ ܦܸܨܚܵܐ ܥܲܡܵܘܟ݂ܘܿܢ ܡ̣ܢ ܩܵܕ݇ܡ ܕܩܲܒܠܸܢ ܚܲܫܵܐ. 16”ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܡ̣ܢ ܐܵܕܝܼܵܐ ܠܹܐ ܐܵܟ݂ܠܹܢܹܗ ܐ݇ܚܹܪ݇ܢܵܐ ܗܲܠ ܕܦܵܐܹܫ ܬܘܼܡܸܡܵܐ ܒܡܲܠܟܘܼܬܵܐ ܕܐܲܠܵܗܵܐ.“ 17ܘܫܩܝܼܠ ܠܹܗ ܟܵܣܵܐ ܘܫܘܼܟܸܪܹܗ ܘܐ݇ܡܝܼܪܹܗ، ”ܫܩܘܿܠܘܼܢ ܐܵܗܵܐ ܘܦܲܠܸܥܡܘܼܢ ܒܹܝܠܵܘܟ݂ܘܿܢ. 18”ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܕܠܹܐ ܫܵܬܹܝܢ ܡ̣ܢ ܛܥܘܼܢܬܵܐ ܕܓܸܦܬܵܐ ܗܲܠ ܕܐܵܬܝܵܐ ܡܲܠܟܘܼܬܵܐ ܕܐܲܠܵܗܵܐ.“ 19ܘܫܩܝܼܠ ܠܹܗ ܠܲܚܡܵܐ ܘܫܘܼܟܸܪܹܗ ܘܩܨܹܐ ܠܹܗ ܘܝܘܼܗ݇ܒܸܠ ܠܹܗ ܐܸܠܲܝܗܝ ܘܐ݇ܡܝܼܪܹܗ، ”ܐܵܗܵܐ ܝܠܹܗ ܦܲܓ݂ܪܝܼ ܕܒܘܼܬ ܕܝܼܵܘܟ݂ܘܿܢ ܦܝܵܫܵܐ ܝܠܹܗ ܝܘܼܗ݇ܒ݂ܵܐ، ܐܵܗܵܐ ܗܵܘܹܝܬܘܿܢ ܒܸܥܒ݂ܵܕܵܐ ܠܕܟ݂ܵܪܝܼ.“ 20ܗܲܕܟ݂ܵܐ ܐܘܼܦ ܠܟܵܣܵܐ، ܡ̣ܢ ܒܵܬ݇ܪ ܕܐ݇ܟ݂ܝܼܠ ܠܗܘܿܢ ܐ݇ܟ݂ܵܠ݇ܪܲܡܫܵܐ، ܐ݇ܡܝܼܪܹܗ، ”ܐܵܗܵܐ ܟܵܣܵܐ ܝܠܹܗ ܕܘܲܥܕܵܐ ܚܵܕ݇ܬܵܐ ܒܕܸܡܝܼ، ܒܘܼܬ ܕܝܼܵܘܟ݂ܘܿܢ ܦܝܵܫܵܐ ܝܠܹܗ ܫܘܼܦܟ݂ܵܐ.#ܐܪܡܝܐ 31‏:31‏‐34 21”ܐܝܼܢܵܐ ܗܵܐ ܐܝܼܕܵܐ ܕܗ̇ܘ ܕܣܲܦܹܐ ܠܝܼ ܥܲܡ ܐܝܼܕܝܼ ܝܠܵܗ̇ ܥܲܠ ܦܵܬܘܿܪܵܐ.#ܡܙܡܘܪ̈ܐ 41‏:9 22”ܒܪܘܿܢܵܐ ܕܐ݇ܢܵܫܵܐ ܒܹܐܙܵܠܵܐ ܝܠܹܗ ܕܵܐܟ݂ܝܼ ܕܝܼܠܹܗ ܩܛܝܼܥܵܐ ܐܸܠܹܗ ܕܐܵܙܹܠ، ܐܝܼܢܵܐ ܘܵܝ ܠܗ̇ܘ ܐ݇ܢܵܫܵܐ ܕܣܲܦܹܐ ܠܹܗ.“ 23ܘܫܘܼܪܹܐ ܠܗܘܿܢ ܨܲܚܨܘܼܝܹܐ ܓܵܢܲܝܗܝ ܘܒܲܩܘܼܪܹܐ ܐܲܝܢܝܼ ܡܸܢܲܝܗܝ ܒܸܬ ܗܵܘܹܐ ܣܲܦܝܵܢܵܐ.

ܡܵܢܝܼ ܝܠܹܗ ܓܘܼܪܵܐ

24ܗܘܹܐ ܠܹܗ ܐܘܼܦ ܕܘܼܪܵܫܵܐ ܒܹܝܠ ܬܲܠܡܝܼܕܘܼ̈ܗܝ، ܕܐܲܝܢܝܼ ܡܸܢܲܝܗܝ ܚܫܝܼܚܵܐ ܝܠܹܗ ܕܗܵܘܹܐ ܒܘܼܫ ܓܘܼܪܵܐ. 25ܐܝܼܢܵܐ ܝܼܫܘܿܥ ܐ݇ܡܝܼܪܹܗ ܐܸܠܲܝܗܝ، ”ܡܲܠܟܹ̈ܐ ܕܐܸܡܘܵܬܹ̈ܐ ܡܵܪ̈ܵܘܵܬܲܝܗܝ ܝܢܵܐ، ܘܐܵܢܝܼ ܕܟܹܐ ܥܵܒ݂ܕܝܼ ܫܘܼܠܛܵܢܵܐ ܟܹܐ ܦܵܝܫܝܼ ܩܸܪܝܹܐ ܥܵܒ݂ܕܵܢܹ̈ܐ ܕܛܵܒ݂ܵܬܹ̈ܐ. 26”ܐܝܼܢܵܐ ܐܲܚܬܘܿܢ ܠܵܐ ܗܵܘܹܝܬܘܿܢ ܗܲܕܟ݂ܵܐ، ܐܸܠܵܐ ܗ̇ܘ ܕܝܼܠܹܗ ܓܘܼܪܵܐ ܓܵܘܵܘܟ݂ܘܿܢ، ܗܵܘܹܐ ܐܲܝܟ݂ ܙܥܘܿܪܵܐ، ܘܗ̇ܘ ܕܝܼܠܹܗ ܩܵܕ݇ܡܵܝܵܐ ܗܵܘܹܐ ܐܲܝܟ݂ ܥܵܒ݂ܕܵܢܵܐ ܕܚܸܠܡܲܬ. 27”ܡܵܢܝܼ ܝܠܹܗ ܒܘܼܫ ܓܘܼܪܵܐ، ܗ̇ܘ ܕܟܹܐ ܝܵܬܹܒ݂ ܠܣܘܼܦܪܵܐ ܝܲܢ ܗ̇ܘ ܕܟܹܐ ܥܵܒܹܕ ܚܸܠܡܲܬ؟ ܠܹܐ ܝܠܹܗ ܗ̇ܘ ܕܝܵܬܹܒ݂ ܠܣܘܼܦܪܵܐ؟ ܐܵܢܵܐ ܐ݇ܬܹܐ ܠܝܼ ܓܵܘܵܘܟ݂ܘܿܢ ܐܲܝܟ݂ ܕܗ̇ܘ ܕܥܵܒܹܕ ܚܸܠܡܲܬ. 28”ܐܲܚܬܘܿܢ ܝܼܬܘܿܢ ܐܵܢܝܼ ܕܟܠܹܐ ܠܵܘܟ݂ܘܿܢ ܥܲܡܝܼ ܒܥܕܵܢܵܐ ܕܓ̰ܘܼܪܵܒܝܼ. 29”ܘܐܵܢܵܐ ܒܸܥܒ݂ܵܕܵܐ ܝܘܸܢ ܩܵܘܠܵܐ ܐܸܠܵܘܟ݂ܘܿܢ ܕܝܵܗ݇ܒܹܢܵܘܟ݂ܘܿܢ ܡܲܠܟܘܼܬܵܐ، ܕܵܐܟ݂ܝܼ ܕܒܵܒܝܼ ܥܒ݂ܝܼܕ ܠܹܗ ܩܵܘܠܵܐ ܐܸܠܝܼ ܘܩܲܡ ܝܲܗ݇ܒܸܠ ܠܝܼ ܡܲܠܟܘܼܬܵܐ، 30”ܕܐܵܟ݂ܠܝܼܬܘܿܢ ܘܫܵܬܹܝܬܘܿܢ ܥܲܠ ܦܵܬܘܿܪܝܼ ܒܡܲܠܟܘܼܬܝܼ، ܘܝܵܬܒ݂ܝܼܬܘܿܢ ܥܲܠ ܬܪ̈ܘܿܢܘܿܣܹܐ ܘܕܵܝܢܝܼܬܘܿܢ ܬܪܸܥܣܲܪ ܫܲܒ݂ܛܹ̈ܐ ܕܝܼܣܪܵܝܹܠ.“

ܝܼܫܘܿܥ ܬܲܢܘܼܝܹܐ ܠܫܸܡܥܘܿܢ ܟܹܐܦܵܐ ܒܘܼܬ ܣܪܵܒ݂ܬܹܗ

ܡܬܝ 26‏:31‏‐35؛ ܡܪܩܘܣ 14‏:27‏‐31؛ ܝܘܚܢܢ 13‏:36‏‐38

31ܐ݇ܡܝܼܪܹܗ ܝܼܫܘܿܥ ܠܫܸܡܥܘܿܢ ܟܹܐܦܵܐ، ”ܫܸܡܥܘܿܢ، ܫܸܡܥܘܿܢ، ܗܵܐ ܣܵܛܵܢܵܐ ܒܸܒܥܵܝܵܐ ܝܠܹܗ ܕܣܵܪܹܕ ܠܵܘܟ݂ܘܿܢ ܐܲܝܟ݂ ܚܸܛܹ̈ܐ. 32”ܐܝܼܢܵܐ ܐܵܢܵܐ ܨܘܼܠܹܐ ܠܝܼ ܒܘܼܬ ܕܝܼܘܼܟ݂ ܕܠܵܐ ܒܵܨܪܵܐ ܗܲܝܡܵܢܘܼܬܘܼܟ݂. ܘܐܘܼܦ ܐܲܢ݇ܬ ܐܝܼܡܲܢ ܕܕܵܝܪܹܬ، ܡܲܩܘܹܝܬ ܗܲܝܡܵܢܘܼܬܵܐ ܕܐܲܚܘܿܢܘܵܬܘܼ̈ܟ݂.“ 33ܘܗ̇ܘ ܓ̰ܘܼܘܸܒ ܠܹܗ، ”ܡܵܪܝܼ، ܐܵܢܵܐ ܗܕܝܼܪܵܐ ܝܘܸܢ ܕܐܵܙܹܠ݇ܢ ܥܲܡܘܼܟ݂ ܠܒܹܝܬ ܐܲܣܝܼܪܹ̈ܐ ܘܠܡܵܘܬܵܐ.“ 34ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܒܹܐܡܵܪܵܐ ܝܘܸܢ ܐܸܠܘܼܟ݂ ܫܸܡܥܘܿܢ ܟܹܐܦܵܐ، ܡ̣ܢ ܩܵܕ݇ܡ ܕܩܵܪܹܐ ܩܵܪܘܿܝܵܐ ܐܸܕܝܘܿܡ، ܬܠܵܬ ܓܵܗܹ̈ܐ ܒܸܬ ܣܵܪܒܹܬ ܕܟܹܐ ܝܵܕܥܹܬ ܠܝܼ.

ܒܘܼܬ ܓ̰ܘܼܢܓ̰ܵܪܹ̈ܐ ܕܐܵܬܝܼ

35ܘܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܐܝܼܡܲܢ ܕܫܘܼܕܸܪܝܼ ܐܸܠܵܘܟ݂ܘܿܢ ܕܠܵܐ ܟܝܼܣܝܵܬܹ̈ܐ، ܘܕܠܵܐ ܓ̰ܲܢܝܵܬܹ̈ܐ ܘܨܵܘܠܹ̈ܐ، ܒܵܨܘܿܪܵܐ ܝܗ݇ܘܵܐ ܡܸܢܕܝܼ ܐܸܠܵܘܟ݂ܘܿܢ؟“ ܘܐܵܢܝܼ ܓ̰ܘܼܘܸܒ ܠܗܘܿܢ، ”ܠܵܐ. ܐܘܼܦ ܚܲܕ ܡܸܢܕܝܼ ܠܹܐ ܝܗ݇ܘܵܐ ܒܵܨܘܿܪܵܐ ܐܸܠܲܢ.“ 36ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܐܝܼܢܵܐ ܡ̣ܢ ܐܵܕܝܼܵܐ ܡ̇ܢ ܕܐܝܼܬ ܠܹܗ ܟܝܼܣܝܵܬܹ̈ܐ ܫܵܩܹܠ ܠܗܘܿܢ، ܘܗܲܕܟ݂ܵܐ ܐܘܼܦ ܗ̇ܘ ܕܐܝܼܬ ܠܹܗ ܓ̰ܲܢܬܵܐ، ܘܡ̇ܢ ܕܠܲܝܬ ܠܹܗ ܣܲܝܦܵܐ ܙܲܒܸܢ ܠܒ݂ܝܼܫܬܹܗ ܘܙܵܒܹܢ ܣܲܝܦܵܐ، 37”ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܗ̇ܘ ܕܦܝܼܫܵܐ ܝܠܹܗ ܟܬܝܼܒ݂ܵܐ ܒܘܼܬ ܕܝܼܝܼ، ’ܥܲܡ ܥܵܘܵܠܹ̈ܐ ܦܝܼܫ ܠܹܗ ܡܸܢܝܵܐ،‘#ܐܫܥܝܐ 53‏:12 ܘܵܠܹܐ ܝܠܵܗ̇ ܕܦܵܐܹܫ ܬܘܼܡܸܡܵܐ. ܗܹܐ، ܟܠ ܡܸܢܕܝܼ ܕܟܬܝܼܒ݂ܵܐ ܝܠܹܗ ܒܘܼܬ ܕܝܼܝܼ ܒܸܬ ܦܵܐܹܫ ܬܘܼܡܸܡܵܐ.“ 38ܘܐ݇ܡܝܼܪܗܘܿܢ ܐܸܠܹܗ ܬܲܠܡܝܼ̈ܕܹܐ، ”ܡܵܪܲܢ، ܐܝܼܬ ܠܲܢ ܠܐܲܟ݂ܵܐ ܬܪܹܝ ܣܲܝܦܹ̈ܐ.“ ܘܗ̇ܘ ܐ݇ܡܝܼܪܹܗ ܐܸܠܲܝܗܝ، ”ܒܲܣܵܘܟ݂ܘܿܢ.“

ܨܠܘܿܬܵܐ ܥܲܠ ܛܘܼܪܵܐ ܕܙܲܝ̈ܬܹܐ

ܡܬܝ 26‏:36‏‐46؛ ܡܪܩܘܣ 14‏:32‏‐42

39ܦܠܝܼܛ ܠܹܗ ܝܼܫܘܿܥ ܘܐ݇ܙܝܼܠ ܠܹܗ ܠܛܘܼܪܵܐ ܕܙܲܝ̈ܬܹܐ ܐܲܝܟ݂ ܕܐܝܼܬ ܗ݇ܘܵܐ ܠܹܗ ܥܵܕܲܬ، ܘܐ݇ܙܝܼܠ ܠܗܘܿܢ ܒܵܬ݇ܪܹܗ ܐܘܼܦ ܬܲܠܡܝܼܕܘܼ̈ܗܝ. 40ܘܐܝܼܡܲܢ ܕܡܛܹܐ ܠܹܗ ܬܵܡܵܐ، ܐ݇ܡܝܼܪܹܗ ܐܸܠܲܝܗܝ، ”ܨܲܠܹܝܡܘܼܢ ܕܠܵܐ ܥܵܒ݂ܪܝܼܬܘܿܢ ܠܓ̰ܘܼܪܵܒܵܐ.“ 41ܘܗ̇ܘ ܪܚܝܼܩ ܠܹܗ ܡܸܢܲܝܗܝ ܐܲܝܟ݂ ܪܲܦܵܝܬܵܐ ܕܚܲܕ ܟܹܐܦܵܐ ܘܒܪܝܼܟ ܠܹܗ ܘܨܘܼܠܹܐ ܠܹܗ، 42ܘܐ݇ܡܝܼܪܹܗ، ”ܝܵܐ ܒܵܒܵܐ، ܐܸܢ ܒܵܣܡܵܐ ܠܘܼܟ݂ ܡܲܥܒܸܪ ܡܸܢܝܼ ܐܵܗܵܐ ܟܵܣܵܐ. ܐܝܼܢܵܐ ܗܵܘܹܐ ܨܸܒ݂ܝܵܢܘܼܟ݂ ܘܠܵܐ ܨܸܒ݂ܝܵܢܝܼ.“ 43ܘܦܝܼܫ ܠܹܗ ܚܸܙܝܵܐ ܐܸܠܹܗ ܡܲܠܲܐܟ݂ܵܐ ܡ̣ܢ ܫܡܲܝܵܐ ܚܲܠܘܼܢܹܐ ܐܸܠܹܗ. 44ܟܲܕ ܗ̇ܘ ܒܥܵܘܩܵܢܵܐ، ܗܘܹܐ ܠܹܗ ܨܲܠܘܼܝܹܐ ܒܘܼܫ ܚܲܝܠܵܢܵܐ، ܘܗܘܹܐ ܠܵܗ̇ ܕܲܥܬܹܗ ܐܲܝܟ݂ ܢܵܛܘܿܦܝܵܬܹ̈ܐ ܕܕܸܡܵܐ ܒܸܢܦܵܠܵܐ ܥܲܠ ܐܲܪܥܵܐ. 45ܩܝܼܡ ܠܹܗ ܡ̣ܢ ܨܠܘܿܬܵܐ ܘܐ݇ܬܹܐ ܠܹܗ ܠܟܸܣ ܬܲܠܡܝܼܕܘܼ̈ܗܝ ܘܚܸܙܝܲܝ ܠܹܗ ܕܡܝܼܟܹܐ ܣܵܒܵܒ ܦܫܝܼܡܹܐ ܝܗ݇ܘܵܘ، 46ܘܐ݇ܡܝܼܪܹܗ ܐܸܠܲܝܗܝ، ”ܩܵܡܘܿܕܝܼ ܕܡܝܼܟܹܐ ܝܬܘܿܢ؟ ܩܘܼܡܘܼܢ ܘܨܲܠܹܝܡܘܼܢ ܕܠܵܐ ܥܵܒ݂ܪܝܼܬܘܿܢ ܠܓ̰ܘܼܪܵܒܵܐ.“

ܣܲܦܵܝܬܵܐ ܘܕܒ݂ܵܩܬܵܐ ܕܝܼܫܘܿܥ

ܡܬܝ 26‏:47‏‐56؛ ܡܪܩܘܣ 14‏:43‏‐50؛ ܝܘܚܢܢ 18‏:3‏‐11

47ܘܟܲܕ ܝܼܫܘܿܥ ܗܲܡܙܘܼܡܹܐ ܝܗ݇ܘܵܐ، ܐ݇ܬܹܐ ܠܹܗ ܟܸܢܫܵܐ، ܘܝܼܗܘܼܕܵܐ، ܚܲܕ ܡ̣ܢ ܬܪܸܥܣܲܪ، ܒܹܐܙܵܠܵܐ ܩܵܕ݇ܡܲܝܗܝ. ܩܘܼܪܒܸܢܹܗ ܠܟܸܣ ܝܼܫܘܿܥ ܘܢܫܝܼܩ ܠܹܗ. 48ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܒܢܫܘܼܩܬܵܐ ܣܲܦܘܼܝܹܐ ܝܘܸܬ ܠܒܪܘܿܢܵܐ ܕܐ݇ܢܵܫܵܐ؟“ 49ܟܲܕ ܚܙܹܐ ܠܗܘܿܢ ܐܵܢܝܼ ܕܝܼܗ݇ܘܵܘ ܥܲܡ ܝܼܫܘܿܥ ܡܸܢܕܝܼ ܕܗܘܹܐ ܠܹܗ، ܐ݇ܡܝܼܪܗܘܿܢ ܐܸܠܹܗ، ”ܡܵܪܲܢ، ܡܵܚܲܚ ܠܗܘܿܢ ܒܣܲܝܦܵܐ؟“ 50ܘܡܚܹܐ ܠܹܗ ܚܲܕ ܡܸܢܲܝܗܝ ܠܪܹܓܵܐ ܕܓܘܼܪܵܐ ܕܟܵܗܢܹ̈ܐ ܘܦܪܝܼܡܵܐ ܠܹܗ ܢܵܬܹܗ ܕܝܲܡܝܼܢܵܐ. 51ܐܝܼܢܵܐ ܝܼܫܘܿܥ ܐ݇ܡܝܼܪܹܗ، ”ܠܵܐ ܗܲܕܟ݂ܵܐ.“ ܘܕܩܝܼܪܹܗ ܒܢܵܬܵܐ ܕܗ̇ܘ ܐ݇ܢܵܫܵܐ ܘܒܘܼܣܡܵܐ ܠܹܗ.

52ܐ݇ܡܝܼܪܹܗ ܝܼܫܘܿܥ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܚܘܵܪ̈ܕܸܩܢܹܐ ܘܠܪܹ̈ܫܵܢܹܐ ܕܢܵܛܘܿܪܹ̈ܐ ܕܗܲܝܟܠܵܐ ܕܐ݇ܬܹܐ ܠܗܘܿܢ ܠܸܕܒ݂ܵܩܹܗ، ”ܦܠܝܼܛ ܠܵܘܟ݂ܘܿܢ ܥܲܠܝܼ ܒܣܲܝܦܹ̈ܐ ܘܒܚܘܼܛܪܹ̈ܐ ܠܸܕܒ݂ܵܩܝܼ ܐܲܝܟ݂ ܕܐܸܢ ܓܹܢܵܒ݂ܵܐ ܝܘܸܢ. 53”ܟܠ ܝܘܿܡ ܟܹܐ ܗܵܘܹܝܢ ܗ݇ܘܵܐ ܥܲܡܵܘܟ݂ܘܿܢ ܓܵܘ ܗܲܝܟܠܵܐ، ܘܠܵܐ ܕܒ݂ܝܼܩ ܠܵܘܟ݂ܘܿܢ ܐܸܠܝܼ. ܐܝܼܢܵܐ ܐܵܕܝܼܵܐ ܝܠܵܗ̇ ܣܵܥܲܬܵܘܟ݂ܘܿܢ، ܕܫܘܼܠܛܵܢܵܐ ܕܚܸܫܟܵܐ ܒܸܥܡܵܪܵܐ ܝܠܹܗ ܒܝܼܵܘܟ݂ܘܿܢ.“

ܫܸܡܥܘܿܢ ܟܹܐܦܵܐ ܒܸܣܪܵܒ݂ܵܐ ܠܝܼܫܘܿܥ

ܡܬܝ 26‏:57‏‐58، 26‏:69‏‐75؛ ܡܪܩܘܣ 14‏:53‏‐54، 14‏:66‏‐72؛ ܝܘܚܢܢ 18‏:12‏‐18، 18‏:25‏‐27

54ܘܕܒ݂ܝܼܩ ܠܗܘܿܢ ܠܝܼܫܘܿܥ ܘܡܘܼܐܬܹܐ ܠܗܘܿܢ ܐܸܠܹܗ ܠܒܲܝܬܵܐ ܕܓܘܼܪܵܐ ܕܟܵܗܢܹ̈ܐ، ܘܫܸܡܥܘܿܢ ܟܹܐܦܵܐ ܒܹܐܬܵܝܵܐ ܝܗ݇ܘܵܐ ܒܵܬ݇ܪܹܗ ܡ̣ܢ ܪܸܚܩܵܐ. 55ܫܝܼܪܗܘܿܢ ܢܘܼܪܵܐ ܒܹܝܬ݇ ܦܲܠܓܵܐ ܕܕܵܪܬܵܐ ܘܝ݇ܬܝܼܒ݂ ܠܗܘܿܢ ܠܚܵܕܸܪ̈ܘܵܢܘܼܗܝ، ܘܐܘܼܦ ܫܸܡܥܘܿܢ ܟܹܐܦܵܐ ܝ݇ܬܝܼܒ݂ܵܐ ܝܗ݇ܘܵܐ ܥܲܡܲܝܗܝ. 56ܘܚܕܵܐ ܚܵܡܬܵܐ ܚܙܹܐ ܠܵܗ̇ ܐܸܠܹܗ ܝ݇ܬܝܼܒ݂ܵܐ ܠܟܸܣ ܢܘܼܪܵܐ، ܚܝܼܪܵܗ̇ ܒܝܼܹܗ ܘܐ݇ܡܝܼܪܵܗ̇، ”ܐܘܼܦ ܐܵܗܵܐ ܥܲܡܹܗ ܝܗ݇ܘܵܐ.“ 57ܐܝܼܢܵܐ ܗ̇ܘ ܣܪܝܼܒ݂ ܠܹܗ ܘܐ݇ܡܝܼܪܹܗ، ”ܒܲܟ݂ܬܵܐ، ܠܹܐ ܝܵܕܥܹܢܹܗ.“ 58ܘܡ̣ܢ ܒܵܬ݇ܪ ܚܲܕ ܡܸܬܚܵܐ ܟܸܪܝܵܐ، ܚܙܹܐ ܠܹܗ ܐܸܠܹܗ ܚܲܕ ܐ݇ܚܹܪ݇ܢܵܐ ܘܐ݇ܡܝܼܪܹܗ، ”ܐܘܼܦ ܐܲܢ݇ܬ ܡܸܢܲܝܗܝ ܝܘܸܬ.“ ܘܓ̰ܘܼܘܸܒ ܠܹܗ ܫܸܡܥܘܿܢ ܟܹܐܦܵܐ، ”ܝܵܐ ܐ݇ܢܵܫܵܐ، ܐܵܢܵܐ ܠܹܐ ܝܘܸܢ ܡܸܢܲܝܗܝ.“ 59ܘܒܵܬ݇ܪ ܚܕܵܐ ܣܵܥܲܬ، ܚܲܕ ܐ݇ܚܹܪ݇ܢܵܐ ܐ݇ܡܝܼܪܹܗ ܡܩܵܘܝܵܐܝܼܬ، ”ܫܲܪܝܼܪܵܐܝܼܬ ܐܘܼܦ ܐܵܗܵܐ ܥܲܡܹܗ ܝܗ݇ܘܵܐ، ܣܵܒܵܒ ܓܒܸܠܝܵܝܵܐ ܝܠܹܗ.“ 60ܓ̰ܘܼܘܸܒ ܠܹܗ ܫܸܡܥܘܿܢ ܟܹܐܦܵܐ، ”ܝܵܐ ܐ݇ܢܵܫܵܐ، ܠܹܐ ܝܘܸܢ ܒܝܼܕܵܥܵܐ ܡܘܿܕܝܼ ܗܲܡܙܘܼܡܹܐ ܝܘܸܬ.“ ܘܒܗ̇ܝ ܥܕܵܢܵܐ ܟܲܕ ܗ̇ܘ ܗܲܡܙܘܼܡܹܐ، ܩܪܹܐ ܠܹܗ ܩܵܪܘܿܝܵܐ. 61ܕܝܼܪܹܗ ܝܼܫܘܿܥ ܘܚܝܼܪܹܗ ܒܫܸܡܥܘܿܢ ܟܹܐܦܵܐ. ܘܕܟ݂ܝܼܪܹܗ ܫܸܡܥܘܿܢ ܗܹܡܸܙܡܵܢ ܕܡܵܪܲܢ ܕܐ݇ܡܝܼܪܵܐ ܝܗ݇ܘܵܐ ܐܸܠܹܗ، ”ܡ̣ܢ ܩܵܕ݇ܡ ܕܩܵܪܹܐ ܩܵܪܘܿܝܵܐ، ܒܸܬ ܣܵܪܒܹܬ ܠܝܼ ܬܠܵܬ ܓܵܗܹ̈ܐ.“ 62ܘܦܠܝܼܛ ܠܹܗ ܫܸܡܥܘܿܢ ܠܒܲܕܲܪ ܘܒܟܹܐ ܠܹܗ ܒܡܲܪܝܼܪܘܼܬܵܐ.

ܝܼܫܘܿܥ ܩܵܕ݇ܡ ܡܵܘܬܒ݂ܵܐ

ܡܬܝ 26‏:67‏‐68؛ ܡܪܩܘܣ 14‏:65

63ܘܐ݇ܢܵܫܹ̈ܐ ܕܕܒ݂ܝܼܩܹܐ ܝܗ݇ܘܵܘ ܠܝܼܫܘܿܥ ܡܲܣܚܸܪܝܼ ܗ݇ܘܵܘ ܒܝܼܹܗ ܘܡܵܚܝܼ ܗ݇ܘܵܘ ܠܹܗ. 64ܡܲܟܣܝܼ ܗ݇ܘܵܘ ܥܲܝܢܘܼ̈ܗܝ ܘܡܵܚܝܼ ܗ݇ܘܵܘ ܥܲܠ ܦܵܬܹܗ، ܘܐܵܡܪܝܼ ܗ݇ܘܵܘ، ”ܢܲܒܝܼ، ܡܵܢܝܼ ܩܲܡ ܡܵܚܹܐ ܠܘܼܟ݂؟“ 65ܘܪܵܒܵܐ ܡܸܢܕܝܼܵܢܹ̈ܐ ܐ݇ܚܹܪ̈݇ܢܹܐ ܓܵܕܦܝܼ ܗ݇ܘܵܘ ܥܲܠܘܼܗܝ.

ܝܼܫܘܿܥ ܩܵܕ݇ܡ ܟܢܘܼܫܝܵܐ

ܡܬܝ 26‏:59‏‐66؛ ܡܪܩܘܣ 14‏:55‏‐64؛ ܝܘܚܢܢ 18‏:19‏‐24

66ܟܲܕ ܗܘܹܐ ܠܹܗ ܝܵܘܡܵܐ، ܓ̰ܡܝܼܥ ܠܗܘܿܢ ܚܘܵܪ̈ܕܸܩܢܹܐ ܕܥܲܡܵܐ ܘܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ، ܘܠܘܼܒܸܠ ܠܗܘܿܢ ܠܝܼܫܘܿܥ ܩܵܕ݇ܡ ܟܢܘܼܫܝܵܐ. 67ܘܒܘܼܩܸܪܗܘܿܢ ܡܸܢܹܗ، ”ܐܸܢ ܐܲܢ݇ܬ ܝܼܘܸܬ ܡܫܝܼܚܵܐ، ܐ݇ܡܘܿܪ ܐܸܠܲܢ.“ ܘܗ̇ܘ ܓ̰ܘܼܘܸܒ ܠܹܗ، ”ܐܸܢ ܐܵܡܪܹܢܵܘܟ݂ܘܿܢ ܠܹܐ ܗܲܡܸܢܝܼܬܘܿܢ ܐܸܠܝܼ. 68”ܘܐܸܢ ܒܲܩܪܸܢܵܘܟ݂ܘܿܢ ܠܹܐ ܓ̰ܲܘܸܒܝܼܬܘܿܢ ܠܝܼ، ܘܠܹܐ ܫܵܪܹܝܬܘܿܢ ܠܝܼ. 69”ܡ̣ܢ ܐܵܕܝܼܵܐ ܒܸܬ ܝܵܬܹܒ݂ ܒܪܘܿܢܵܐ ܕܐ݇ܢܵܫܵܐ ܡ̣ܢ ܝܲܡܝܼܢܵܐ ܕܐܲܠܵܗܵܐ ܚܲܝܠܬܵܢܵܐ.“ 70ܘܟܠܲܝܗܝ ܒܘܼܩܸܪܗܘܿܢ، ”ܒܲܣ ܗܲܕܟ݂ܵܐ ܐܲܢ݇ܬ ܝܼܘܸܬ ܒܪܘܿܢܵܐ ܕܐܲܠܵܗܵܐ؟“ ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܗܹܐ، ܐܲܝܟ݂ ܕܒܹܐܡܵܪܵܐ ܝܬܘܿܢ، ܐܵܢܵܐ ܝܘܸܢ ܒܪܘܿܢܵܐ ܕܐܲܠܵܗܵܐ.“ 71ܘܐ݇ܡܝܼܪܗܘܿܢ، ”ܩܵܡܘܿܕܝܼ ܐ݇ܚܹܪ݇ܢܵܐ ܣܢܝܼܩܹܐ ܝܘܲܚ ܠܣܵܗܕܹ̈ܐ؟ ܒܓܵܢܲܢ ܫܡܝܼܥ ܠܲܢ ܡ̣ܢ ܦܘܼܡܹܗ.“

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

ܠܘܩܐ 22: ABTAB

Highlight

ಶೇರ್

ಕಾಪಿ