LUK 20
20
Jisu vei Soulousü Zü vanou Chi nouyu
(Mt 21.23-27; Mk 11.27-33)
1Naiteithe kisü puhnou Rathoki hinou maikhe maiye doupeia ea ko avei paodou-a buyu hinou, napao adumaitao ea razhai dou-apeimai taonou tsüme taoye koa taveloua, 2puh hi paoe, “Dai zü bua nenou vah haitaosü souwe Eletao hi paongao peio, moa thaohnou nehi soure zü hainasü peie?”
3Puhnou puletao hi chila pei, “E-a neletao hi chili noulai, alia Ahi chila peikhaio, 4Johan vei dzükhao dayuhai Rakinou veho, mai hinou ve?”
5Alia lah puletao hrohinou veiva-a paoe, “Eletao nou ‘Rakinou ve’ tea paolouzü, puhnou ‘Sükulouzü neletao daidonou puhye louche moe?’ tea paokhailai. 6Ana Eletao nou ‘Mai hinou ve’ tea paokhai louzü, maikhemai hrülainou Eletaoye chuhnou deishulai; daiolouzü puletao nou Johanye nou rachi paolamai ali-e tea powe.” 7Südonou puletao nou chila peie, “Süsü dai kinou vesa touyu Ehnou sümoe.”
8Alia Jisu nou puletao hi paoe, “Sükulouzü E-a neletao hi dai zünou Enou vah haitaosü sousa touyusü paongao laimoe.”
Darkha Kipei Khoyumaitao vanou Kada
(Mt 21.33-46; Mk 12.1-12)
9Süthaisü Jisu nou maikhemai hi nada hainasü paongao peie: “Teile alihi darkha kipei ali khoyu mai ali bue, alia puhnou sünasü panou kipei khomaitaoye souloua phasho donou teidei aku alihi veitare. 10Darkha rashi haire teile veyu kisü, puhnou kilai aliye kipei khomai taohi puletaoye panou puh hi darkha rashi haiyu hinou puhvei zha sü poloure donou seive; ana kipei khomai taonou puhye sü dapeiwu-a panou puh bahsü sakhai-a seikhai tare. 11Alia puhnou kukhe kilai aliye seive; ana puletao nou puhye-a dapeire ea sou ahraosho peiwu-a panou puh bahsü sakhai-a seikhai tare. 12Süthai-a puhnou kilai asü chenaye seive; kipei khomai taonou puhye-a daposhu zhupeiwu-a vakouhi khilai pare. 13Süthaisü kipei paopu sünanou paoe, ‘E dai soulai? Chuo Enou lah Enou leshiyu Anahpoutuye seivelai; veimosoua puletao nou puhye tsükhoupei shulai.’ 14Ana kipei khomai taonou puhye ngaolouyu kisü, lah puletao alinou lihi haibüa paoe, ‘Hainawo kipei paopuwo nahpoutu nasüe; Eletao nou puhye southeawu laikhe, sübülouzü puhvei kaalo taosü Eletao vei khaibailai.’ 15Südonou puletao nou puhye sü kipei vakouhi khilaipawu-a southeare.
“Sübüyu thaisü, darkha kipei paopu nanou kipei khomai taohi dai soulai? 16Puhnou taveloua kipei khomaitaoye sü southeawulai, alia darkha kipei nasü kukhe kipei khomai taohi peiwulai.”
Maikhemai taonou süsü choulouyu kisü paoe, “Sübükhai laimoe!”
17Ana Jisu nou puletao hi zhuloua paoe, “Sübüyu thaisü rüthouyu sü daie?
‘Ki souyu mainou lulaiyu chuh nasü kukhe veishi jünou matsüyu ki kainghou vei chuhna souloure.’
18Chuh süna phaonou kaoduyu mai talisü zhusasawulai; ana chuh sünanou mai tali vahi dukou deiwulouzü sünanou puhye sü reisasawulai.”
Kikha Peiyu vanou Chi nouyu
(Mt 22.15-22; Mk 12.13-17)
19Alia razhai dou-apeimaitao ea napao adumai taonou sübü hinou Jisu ye niloure donou te-e, daiolouzü puhnou nada sünasü puletao pei hi paokhai baie touyu sü puletao nou süe; ana puletao nou maikhe maiye piloure. 20Südonou puletao nou puhye dahpo-a ea puhvei chipao hinou puhye niloua soulousü zü ea khouko buyu teideikhowo bah hi thoupeire donou chechekho soua laiyu maikhao-zhai zhuyu maitaoye seive. 21Südonou mai sütaonou Jisu hi noue, “Dou-apeio, nenou cheche sü paowe ea doupeiwe, alia maitalihia zhai soukumoe, ana Ramai vei ludu nasü chekhaoa doupeie touyu sü Ehnou süe. 22Eletaoye donou Kaisar hi kikha peiyuhai razhai thaifüa ae touho mo touwe?”
23Ana puhnou puletao vei do ashi nasü süloua puletao hi paoe, 24“Ahi hushanou ali pongaokhaio. Haihi thaohzhu ea thaohzhih bue?”
Puletao nou chila peie, “Kaisar veie.”
25Südonou Jisu nou puletao hi paoe, “Sübülouzü Kaisar vei taosü Kaisar hi, alia Ramai vei taosü Ramai hi peikhaio.”
26Alia puletao nou maikhemai nghojünou puhye sü puhvei chipao hinou nilou hore; ana puhvei chila hinou khupaloua puletaosü paikhaimo zheire.
Hrishuyu vanou Chi nouyu
(Mt 22.23-33; Mk 12.18-27)
27Süthaisü hrishuyu hae tea paoyu Sadukimai kamainou Jisu hi taveloua, 28puh hinou chili noue, “Dou-apeio, Moses nou Eletao donou haibüa rüthou khaitoue; ‘Maita mailinou tou-dzü alia ha-a puh chapfüye thaowu-a thaita louzü, mai sünavei thaihou nanou puh chapfüye nalai ea sübüa nahmai panou hrüloua sütaoye sü thaitayu mai sünavei tou-dzü tea kulai.’ 29Sübülouzü zhukhaio, teile lihi chinamai anai bue, tsükhana sü nashuloua nahmai alia hrümoa thaire; 30alia thaihou ahai chena 31ea asü chena noua naotupai sünaye nae, alia sükheihao-a chinamai anai taosü nahmailia ha-a thaikhaire. 32Akhai hisü naotupai süna-a thaire. 33Südonou chuo, hrishuyu teithe kisü, naotupai sünasü thaoh chapfü soulai? Daiolouzü puletao anainou puhye hai nakhaire.”
34Alia Jisu nou puletao hi paoe, “Chu deiphao hainahi maitao nou shee-nghiwe; 35ana athai hinou hrishu züe ea vere teilehi ve hrüzüe tea polouyu mai sütao donou louzü sükisü shee-nghi laimoe. 36Alia puletaosü thaipu khailai moe, daiolouzü puletaosü rakivamai kure. Alia hrishu louyu nahmaitao soulouyu donou puletaosü Ramai nahtao souloure. 37Alia Moses koute nou-a rekou ngheipei meitaoyu hinou Mapaoye nou ‘Abraham vei, Isak vei ea Jakob vei Ramai’ tea kuyu hinou thaimai-a hrishuloue touyu zhopaoh peiwe. 38Puh hai thaimai Ramai moe, ana ahrimai veie; daiolouzü puh hisü mai hrülainou hriwe.”
39Süthaisü razhai dou-apeimai kamainou paoe, “Dou-apeio, nenou soutaosoua paopeire!” 40Daiolouzü puletao nou khuvei-a chilia puh hi noupukhai more.
Razhepu vanou Chi nouyu
(Mt 22.41-46; Mk 12.35-37)
41Süthaisü Jisu nou puletao hi noue, “Kabüa puletao nou Khrista hai David nahpoutue tea paowe? 42Daiolouzü David lahnou Lou Larübvü hinou paoe,
‘Mapao nou A Mapao hi paoe,
Enou nevei ngaobamai taoye sü pove nevei phihea soupeimo sasü,
43Avei bahkha zhoulo hinou bulo.’
44Sükua David nou puhye sü ‘Mapao’ tea kuwe; südonou kabüa puhsü David nahpoutu khailai?”
Jisu nou Razhai Dou-apeimaitao vanou Tukha peiyu
(Mt 23.1-36; Mk 12.38-40)
45Alia maikhemai hrülainou kei-a buyu hinou, Jisu nou puh rozümai taohi paoe, 46“Zaocha noua tasühao-a laiyu, alia hupobuh kijü khonou maiye panou khurü nüyu, rathobuhtao hinou avei veilai buh khayu ea nühbuh khonou mainou tsükhouyu buh hinou bunüyu; 47naotu meamaipfütao vei ki-lu saotouyu, alia süthai-a chechekho soua phasho veachi pao-a laiyu razhai dou-apeimaitaoye neletao leikei-a zhutoulo. Puletao nou akou koulai dukayu tudee nasü ngaolai!”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUK 20: POUMBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
