LUK 19
19
Jisu alia Zakhias
1Jisu nou Jerikohi louloua sühinou lou ta-a bue. 2Alia sühisü Zakhias tea kuyu mai ali bue; puhsü kikha khayumai pei hi chayu ea haniyu mai alie. 3Alia puhnou Jisu hai thaohsa touyu zhure donou te-e, ana maikhe mainou khaotsütsüyu vanou ngaolou hore, daiolouzü puhsü sah dzüe. 4Südonou puhnou nghojülo turaikouloua Jisu ye zhure donou boushibe ali vahi taopa loure, daiolouzü puhsü ludu sülo vahi takourehi bue. 5Alia Jisu nou buh sühi takou louyu kisü zhureipae ea puhye ngaoloua puh hi paoe, “Zakhias thala-a takoulouwo; daiolouzü E zhou ve ne kihi chaovu zülai.”
6Südonou Zakhias nou thala-a takouloua puhye sü sashoa sheloure. 7Alia maikhemai hrülainou süsü ngaolouyu kisü mülealealoua, “Puhwo mahmai ali kishe soure donou tare,” tea paoe.
8Alia Zakhias nou lashuloua Mapao hi paoe, “Zhukhaio, Mapao, Avei kina polisü Enou toure hamai hi peilai; alia Enou maitali hinou mada-a hatali poloure toulouzü, Enou sükuyu zha adai koua lukhai peilai.”
9Alia Jisu nou puh hi paoe, “Zhou teithehi ki hainahi khailu louyu sü veloure, daiolouzü puh-a Abraham nahpoutue. 10Daiolouzü Mai Nahpoutu nou hawuyu naye phoure ea khailu peire donou ve-e.”
Sana Ke Kiruo vei Nada
(Mt 25.14-30)
11Maikhe maitao nou chipao sütao keia buyu hinou, Jisu nou puletao hi nada ali paoputa khaire, daiolouzü puhsü Jerusalem hi ngheikoure, alia Ramai Vedei sü thasho-a velou laire tea puletao nou choe. 12Südonou puhnou paoe, “Teile alihi adumai alihai puhye sü panou ve doloua kihi khaidavere donou teidei adoukou alihi tare. 13Alia puhnou tamojü hinou puhvei kilai kirou taoye kuloua puletao hi sana ke chekhei zhihpeiwu-a paoe, ‘E khaivemo koute haitaosü poloua hu soukhaio.’ 14Ana chuo puhvei teidei maitao nou puhye ngaoraloua puh thainou ko sei-atamaiye seiveloua panou ve, ‘Mai hainaye panou Eletao pei hi veo souyu züpa moe,’ tea paoe.
15“Mai sünaye sü veo doloua khaiveyu kisü puhnou pousha peikhai touyu kilai sütaoye puletao nou hu souyu hinou kazhou zhilouresa touyu süloure donou puh hi kuvere kharochi peire. 16Arai nanou puh nghojühi taveloua paoe, ‘Mapao, nevei sana ke sünanou sana ke kirou zhipu loure.’ 17Alia puhnou puh hi paoe, ‘Veishore, avei kilai! Nenou hataili hinou cheche louyu donou, neye panou nuhdu kirou pei hi paopu soulai.’ 18Alia ahai chenanou taveloua paoe, ‘Mapao, nevei sana ke sünanou ke angou zhipu loure.’ 19Alia puhnou puh hi paoe, ‘Alia neye panou nuhdu angou pei hi paopu soulai.’
20“Süthaisü kukhe kilai alinanou taveloua paoe, ‘Mapao, Enou sah kainghou hinou pozükhai touyu nevei sana ke nasü haihi bue; 21daiolouzü Enou neye piwe, süolouzü newo lekha shishoyu mai alie. Newo nenou pothoukhai moyu buh hinou popalou baiwe, alia thoutai vumoyu hinou chilou baiwe!’ 22Puhnou puh hi paoe, ‘Ashi kilai! Nevei chipaonou Enou neye chikulai. Ehai lekha shiyu, Enou pothoukhai moyu buh hinou popalouyu ea thoutai vumoyu buh hinou chilouyu mai alie touyu sü nenou süwe. 23Sübüyu thaisü daidonou nenou Avei pousha nasü shakihi pothou khaipeimoe? Sükulouzü Enou khaiveyu kisü Avei pousha nasü veanoupu koa ngaodalou laimo?’
24“Süthaisü puhnou sühinou la-a buyu maitaohi paoe, ‘Puh hinou sana ke nasü poloua sünasü ke kirou buyu kilai nahi peio.’ 25Ana puletao nou puh hi paoe, ‘Mapao, puh hiwo sana ke kirou bure!’ 26Puhnou chila peie, ‘Enou neletao hi paoe, süolouzü buyu mai tali hisü peipu khailai; ana hayu puh hinou puhvei buyuna koutea pota bailai. 27Ana Eye panou puletao pei hi veo sounü moyu Avei ngaoba maitao donou louzü, puletaoye buh haihi saveloua Anghojü hinou southeawu wo!’ ”
Jisu nou Jerusalem hi Talouyu
(Mt 21.1-11; Mk 11.1-11; Jn 12.12-19)
28Alia Jisu nou süsü paocheyu kisü puletao jünou raia Jerusalem hilo takhere. 29Puhnou Oliv tea kuyu deichi hi buyu Bethphage ea Bethani nuh sühaihi takou ngheiyu kisü, puhvei rozümai ahaiye raia seitawu-a, 30haibüa paopeie: “Nehai nghojübühi buyu nuh sünahi tawo; alia nehai nou talou louzü sühisü maitalinoua pabukhai moyu rheisüh toutu aliye rainou khikhai touyu sü ngaolai; sünasü pheipaloua buh haihi süveo. 31Hakinou maitalinou nehaihi ‘Nehai daidonou sünaye rai pheipawe?’ tea noulouzü nehainou ‘Mapao nou hainaye moshi laiyu bue’ tea paokhaio.”
32Südonou seitawuyu mai sühainou taloua puhaihi Jisu nou paopeiyu sübütoua tave ngaoloure. 33Alia puhai nou rheisüh toutu sünaye rai pheipa-a buyu hinou, sünavei paopu taonou puhai hi paoe, “Nehai dai donou rheisüh toutu naye rai pheipawe?”
34Alia puhai nou chila peie, “Mapao nou hainaye poa vah soure matsü bue.” 35Alia puhai nou sünasü Jisu hi süveloua süna phaohi puletao vei sah khuloua puletao nou panou Jisu ye süna phaohi pabu loure. 36Puhnou sübüa pfüta-a buyu hinou, maikhe mainou puletao sahsü luduhi khupeie.
37Alia puhnou chuo Oliv deichi phihi takou ngheiyu kisü, puh rozümaitao vei maisou teiteinou puletao nou ngaolouyu khupa vah veishi sütao donou pai kushoa ea sasa-a Ramaiye sholoua paoe, 38“Mapaowo zhih hinou tave louyu Veo puhsü rakoveie! Raki hisü kaonayu soulo ea aku kulai hinou Ramaiye sholo!”
39Süthaisü maisou hronou Phariseemai kamainou Jisu hi paoe, “Dou-apeio, ne rozümai taoye züpeio!”
40Jisu nou chila peie, “Enou neletao hi paowe, mai haitaonou ngasoua bulouzü chuh haitao vuzünoua paikua shapalai.”
Jisu nou Jerusalem donou Kra peiyu
41Alia puhnou nuhdu süna ngheikihi takouloua sünaye ngaolouyu kisü, süna donou puhsü kraloua, 42haibüa paoe, “Zhou koutea nenou kaonayu ngaoloure hai dainou matsüsa touyu sü süloure toulouzü veilai monou! Ana chuo sütaosü ne nghojünou pokure. 43Daiolouzü ne pei hi haibüyu teithesü velai, süolouzü nevei ngaobamai taonou neye bokhanou khasühaoloua ea neye sühaoloua kainghou teitei hinou neye huloulai, 44alia ne ea nevei bokha levaihi buyu nahmaitaoye deiphihi dokhao koulai, alia puletao nou sühisü chuh aliye panou ali pei hi shoa khaiwu laimoe, daiolouzü nenou neye khaipeire zhuveayu teilesü süpeibae!”
Jisu nou Rathoki hi Talouyu
(Mt 21.12-17; Mk 11.15-19; Jn 2.13-22)
45Süthaisü Jisu nou Rathoki hi talouloua sühinou na zhoa buyu maitaoye hulai shuloua, 46puletao hi paoe, “Haibüa rüthoure, ‘Akihai veachi paoyu ki soulai;’ ana neletao nou haisü maivei saotoumai tutsübuh soure!”
47Alia puhnou teisanou Rathoki hinou doupei-a bue. Ana napao adumaitao, razhai dou-apeimaitao ea maikhe maiye süthai-apeimai taonou puhye southeare donou phoue; 48sütoukhaia puletao nou kabüa southealai touyu dolia phouhare, daiolouzü maikhemai hrülaisü le loushoa puh chipaotaosü kei-a bue.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUK 19: POUMBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
