ទង្វើនៃការកែប្រែចិត្ដគំរូ

ព្រះជាម្ចាស់ទ្រង់បានបញ្ជូនព្រះរាជបុត្រារបស់ទ្រង់ នាមព្រះយេស៊ូ មកកាន់ពិភពលោក សម្រាប់គោលបំណងចំបងនេះ៖ ដើម្បីប្រទានជីវិតថ្មីដល់យើងរាល់គ្នា។ នៅក្នុងអត្ថបទគម្ពីរ លូកា ៥៖២៧-៣២ ព្រះយេស៊ូទ្រង់បានថ្លែងនូវបេសកកម្មរបស់ទ្រង់ ក្នុងភាសាដូច្នេះ៖ «មនុស្សមានសុខភាពល្អ មិនត្រូវការគ្រូពេទ្យឡើយ មានតែអ្នកជំងឺប៉ុណ្ណោះដែលត្រូវការ។ ខ្ញុំមិនមែនមករកមនុស្សសុចរិតទេ គឺមករកមនុស្សបាប ដើម្បីឲ្យគេកែប្រែចិត្ដគំនិត»។ ព្រះគ្រិស្ត បានយាងមក ដើម្បីឲ្យមនុស្សមានបាបដូចជារូបបងប្អូនហើយនិងខ្ញុំ អាចមានជីវិតថ្មី តាមរយៈការកែប្រែចិត្ដគំនិត និងការអត់ទោសរបស់ព្រះអង្គ។ ជីវិតរបស់យើងបានទទួលការបំផ្លាស់បំប្រែដ៏អស់កល្បនៅពេលដែលយើងកែប្រែចិត្ដគំនិត និងស្វែងរកនូវការអត់ទោសរបស់ព្រះអង្គ។ បេសកកម្មរបស់ព្រះគ្រិស្ត ក៏ជាបេសកកម្មរបស់យើងនោះដែរ។ ព្រះត្រាស់ហៅយើង មិនមែនឲ្យយើងទៅបម្រើអស់អ្នកដែលសុចរិតនោះទេ ប៉ុន្តែជួសវិញ គឺសម្រាប់អស់អ្នកដែលវង្វេង ហើយត្រូវការ ការអត់ទោសនោះវិញ។ ប្រសិនបើ បងប្អូនពិតកែប្រែចិត្ដគំនិតដោយស្មោះស្ម័គ្រ ចេញពីអំពើបាបរបស់បងប្អូន ហើយព្រះជាម្ចាស់បានអត់ទោសដល់បងប្អូនសម្រាប់អំពើបាបទាំងប៉ុន្មាន នោះបងប្អូន មានទីបន្ទាល់សម្រាប់ប្រាប់អស់អ្នកដែលត្រូវការ ការកែប្រែចិត្ដគំនិត។ ជីវិតបំផ្លាស់បំប្រែរបស់បងប្អូន អាចជួយបង្កើតនូវការផ្លាស់ប្រែនៅក្នុងជីវិតរបស់អ្នកដទៃផ្សេងទៀត។ តើបងប្អូនមានស្គាល់នរណាដែលត្រូវការ ការកែប្រែចិត្ដគំនិត និងត្រូវទទួលការអត់អោនទោសពីព្រះជាម្ចាស់ដែរឬទេ? តើទីបន្ទាល់ជីវិតនៃការអត់អោនទោសដែលព្រះជាម្ចាស់ប្រទានដល់បងប្អូន អាចជួយដល់អ្នកដទៃឲ្យគេអាចគិតដល់ ការកែប្រែចិត្ដគំនិតរបស់គេ បានយ៉ាងដូចម្ដេចដែរ?​