Gen 45
45
UJosefa uyaziveza kubafowabo
1UJosefa wasesahluleka ukuzibamba phambi kwabo ababelaye. Wamemeza wathi: Khuphani bonke abantu. Kwakungaselamuntu lapho uJosefa eziveza kubafowabo.#Seb 7:13 2Wakhala kakhulu aze ezwa amaGibithe labendlu kaFaro. 3UJosefa wathi kubafowabo: NginguJosefa. Ubaba usekhona na? Abafowabo kabaze bamphendula ngoba bethukile kakhulu phambi kwakhe.
4UJosefa wasesithi kubafowabo: Sondelani kimi. Basondelake. Wathi: Mina nginguJosefa umfowenu elamthengisa eGibithe. 5Lingadabuki, lingazithukutheleli ngokuthi langithengisa lapha, ngoba uNkulunkulu wangithuma ngaphambi kwenu ukuba ngilihlenge. 6Ngoba isimibili iminyaka kukhona indlala elizweni; kusasele iminyaka emihlanu ezayo okungayikulinywa kuvunwe ngayo. 7UNkulunkulu wangithuma ngaphambi kwenu ukulilondoloza, libe lenzalo emhlabeni, alisilise libe banengi. 8Ngakho kakusini elangithumela lapha, kodwa nguNkulunkulu; wangenza ngaba nguyise kuFaro, lenkosi yendlu yakhe yonke, lombusi phezu kwelizwe lonke laseGibithe. 9Phangisani liye kubaba, lithi kuye: Indodana yakho uJosefa ithi: UNkulunkulu ungenzile inkosi yalo lonke iGibithe; suka uze kimi, ungaphuzi;#Seb 7:14 10uzakwakha elizweni laseGosheni, ube seduze lami wena labantwana bakho labazukulu bakho, lezimvu zakho lezinkomo zakho, konke olakho. 11Mina ngizakukondla lapho, lokhu kusasele iminyaka emihlanu yendlala, ukuba ungasweli wena labendlu yakho lakho konke olakho. 12Khangelani, amehlo enu lamehlo omfowethu uBenjamini ayabona ukuthi yiwo umlomo wami okhuluma lani. 13Mtsheleni ubaba ngodumo lwami eGibithe langakho konke elikubonileyo, liphangise limlethe lapha. 14Wasemgona umfowabo uBenjamini, wakhala; laye uBenjamini wakhala emgona. 15Wabanga bonke abafowabo, wakhalela phezu kwabo. Emva kwalokhu abafowabo baxoxa laye.
16Lezizinto zezwakala endlini kaFaro, kwathiwa abafowabo bakaJosefa bafikile; uFaro lenceku zakhe zathokoza ngalokhu. 17UFaro wasesithi kuJosefa: Tshela abafowenu uthi: Yenzani lokhu, yethwesani obabhemi benu, lihambe liye elizweni laseKanani, 18lithathe uyihlo lemizi yenu, libuye kimi; ngizalinika izinto ezinhle eziselizweni laseGibithe, lidle okumnandi kwelizwe. 19Usulayiwe, Josefa, ukuba uthi: Yenzani lokhu, thathelani abantwana benu labomkenu izinqola elizweni laseGibithe, lize lapha loyihlo. 20Futhi lingakhathaleli impahla yenu, ngoba okuhle okuselizweni lonke laseGibithe kungokwenu.
21Enza njalo amadodana kaIsrayeli; uJosefa wawanika izinqola njengokulaya kukaFaro, wabanika umphako. 22Wabanika bonke, kwaba yilowo lalowo ingubo ezintsha; kodwa uBenjamini wamnika inhlamvu zesiliva ezingamakhulu amathathu, lengubo ezinhlanu ezintsha. 23Wathumela kuyise obabhemi abalitshumi bethwele izinto ezinhle ezivela eGibithe, kanye labobabhemikazi abalitshumi bethwele amabele lezinkwa lomphako kayise. 24Wasebayekela behamba abafowabo. Wathi kibo: Qaphelani ukuba lingaxabani endleleni. 25Bakhuphuka eGibithe, bafika kuyise uJakobe elizweni laseKanani. 26Bamtshela bathi: UJosefa usasila, ungumbusi elizweni lonke laseGibithe. Inhliziyo yakhe yasiphela amandla, ngoba wayengabakholwa. 27Basebemtshela wonke amazwi uJosefa ayewatshilo kibo. Kwathi esezibonile izinqola uJosefa ayezithume zokumthwala, watshaphuluka umoya kaJakobe uyise. 28UIsrayeli wathi: Kwanele, uJosefa indodana yami usekhona; ngizahamba ngimbone ngingakafi.
ទើបបានជ្រើសរើសហើយ៖
Gen 45: BE1978
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Zimbabwe 1978