Gen 38
38
Amadodana kaJuda
1Kwathi ngalesosikhathi uJuda wasuka kubafowabo, wehla, waya emuntwini othile waseAdulamu, obizo lakhe linguHira. 2UJuda wabona lapho indodakazi yomKanani othile obizo lakhe linguShuwa; wayithatha, walala layo. 3Yathatha isisu, yazala indodana; uJuda wayitha ibizo wathi nguEri. 4Yaphinda yathatha isisu, yazala indodana; yayitha ibizo yathi nguOnani. 5Yazala futhi indodana, yayitha ibizo yathi nguShela; uJuda wayeseKezibi ekuzalweni kwayo. 6UJuda wamthathela uEri izibulo lakhe umfazi obizo lakhe linguTamari. 7UEri izibulo likaJuda wayemubi phambi kweNkosi; iNkosi yambulala. 8UJuda wathi kuOnani: Ngena umkamfowenu, umvusele umfowenu inzalo. 9UOnani wayesazi ukuthi inzalo kayiyikuba ngeyakhe. Kwathi lapho engena kumkafowabo, wachithela emhlabathini ukuba angamniki umfowabo inzalo. 10Lokho akwenzayo kwaba kubi eNkosini; yambulala laye. 11UJuda wasesithi kuTamari umalokazana wakhe: Hlala ungumfelwakazi endlini kayihlo, aze akhule uShela indodana yami; ngoba wathi: Mhlawumbe laye uzakufa njengabafowabo. UTamari wayahlala kwabo.
UJuda loTamari
12Emva kwesikhathi esithile yafa indodakazi kaShuwa, umkaJuda. UJuda eseduduzekile, waya kubagundi bezimvu zakhe eTimina, yena lomngane wakhe uHira waseAdulamu. 13UTamari watshelwa ukuthi uyisezala uya eTimina ukugunda izimvu. 14Wasekhupha ingubo zakhe zobufelwakazi, wazimbomboza, wembatha, wahlala esangweni leEnayima, elisendleleni eya eTimina; ngoba wabona ukuthi uShela esekhulile, engendiswanga kuye. 15Lapho uJuda esembonile, wacabanga ukuba uliwule, ngoba ebembombozile ubuso. 16Esephambukele kuye ngasendleleni wathi: Woza, ake ngilale lawe; ngoba wayengazi ukuthi wayengumalokazana wakhe. Wathi: Uzanginikani ukuba ulale lami na? 17Wathi: Ngizakukuthumela izinyane lembuzi elisemhlambini. Wathi: Uzanginika isibambiso uze ulithumele na? 18Wathi: Ngikunike isibambiso bani na? Wathi: Lokho okulophawu lwakho, lentambo yakhona, lodondolo lwakho oluphetheyo. Wasemnika khona, walala laye; wathatha isisu. 19Wasuka wahamba, wakhumula isimbombozo sakhe, wafaka izingubo zakhe zobufelwakazi. 20UJuda wathumela izinyane lembuzi ngesandla somngane wakhe waseAdulamu ukuba athathe isibambiso kowesifazana; kodwa kamfumananga. 21Wasebuza amadoda endawo yakibo wathi: Lingaphi iwule elaliseEnayima ngasendleleni na? Athi: Kakuzanga kube khona iwule lapha. 22Wabuyela kuJuda wathi: Kangilifumananga, futhi amadoda aleyondawo athi kakuzanga kube khona iwule lapho. 23UJuda wathi: Liyekele lizithathele lezozinto ukuba thina singayangeki; khangela, ngithumele lelizinyane, kodwa kawulifumananga.
24Kwathi emva kwenyanga ezintathu uJuda watshelwa ukuthi uTamari umalokazana wakhe ufebile, lokuthi ulesisu sokufetshwa. UJuda wasesithi: Mletheni lapha atshiswe. 25Eselethiwe wathumela ilizwi kuyisezala, wathi: Ngoniwe yindoda engumnini walezizinto. Wathi futhi: Ake ubone ukuthi ngezikabani lezizinto, isongo lentambo lodondolo. 26UJuda wazivuma wathi: Ulungile kulami, njengoba ngingamnikanga indodana yami uShela. Ngakho kabanga esalala laye futhi.
27Kwathi esikhathini sokubeletha kwakhe amaphahla ayesesiswini sakhe. 28Esabeletha elinye lakhupha isandla; umbelethisi wathatha isandla salo, wasibopha ngentambo ebomvu wathi: Lo uphume kuqala. 29Kodwa lafinyeza isandla salo; kwasekuphuma umfowabo; wathi umbelethisi: Ufohleleni na? Ngalokhu ibizo lakhe lathiwa nguPerezi. 30Emva kwalokhu kwaphuma umfowabo owayelentambo ebomvu esandleni sakhe; ibizo lakhe lathiwa nguZera.
ទើបបានជ្រើសរើសហើយ៖
Gen 38: BE1978
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Zimbabwe 1978