Maatiyos 8
8
Yeesus wuli saknite tiya yaysiffiye
(Markos 1:40-45; Luukas 5:12-16)
1Amaa koomaako oobe gedda, mango xiyaw kaa katayen. 2Taykinna lel wuli sakniteti alle yemeeteyaako gululluubuweh: “Maddara, fadhdhemko yi taysaffawo dhicta” akko yerhxe. 3Yeesus lel ishi gaba yiyfiddigeyaako: “Yi farhi kinnik imsiffii” arhxuk kaa dhage. Kaa sakna lel akkanih akah timsiffiye. 4Yeesus lel: “Ubul haye, tiyah miwarishin, laakin aduwaaki ishi nabse shekh uybulluu. Tenah shahaada takko lel Moosa yeezeze muttuxuwa bah” akko yerhxe.
Yeesus bool caskartiyah manabottahi garuzzo urusa
(Luukas 7:1-10)
5Yeesus Kafarnaxuumudde orobe gedda, wuli bool caskartiyah manabotti kaa dhaacimak alle yemeeteh: 6“Yi khaddaam kafeyaako caredde umaatih laxuutak yane” akko yerhxe. 7Yeesus lel: “Emeeteyaako kaa uruso kiyo” akko yerhxe. 8Amaa bool caskartiyah mas-uul laakin: “Maddara, atu yi carelle tamiitem akah missil tiya makiyo, atu waanitta erhex kibah, yi khaddaam uro kinni. 9Amayim lel inni geridde liyo caskarlih, anu gantah inneh reezat geridde yane tiya kiyo. Wuli tiyak, ‘Aduu’ akko erhxemko, yadiye, akettok lel, ‘Amo’ akko erhxemko, yamiite, inni khaddaamak, ‘Tayim ab’ akko erhxemko abamhi sabbatah kinni” yerhxeh alle yedebbe. 10Yeesus tayim yoobbe gedda, cibrah rabeyaako kaa kataak yine marak: “Ta gina le imaan Israa-eelille walaa inkettaalih migeyinniyom rummah sinak arhxiyuk ane. 11Mango mari ayrommaaxa kee ayrodhdhumaako yemeetiinih carshi nigsinnadde Abraahim, Isxaaq kee Yacqooblih maaddille defeyoona kinoonim sinak arhxiyuk ane. 12Nigsinnat cindham lel amaa irot ditedde cidditoona kinon. Amalle lel weeca kee ikokti xarqam yakko kinni” akko yerhxe. 13Amaa bool caskartiyah manabottak lel Yeesus: “Akah teemeneh tanitookah koh takkooki, aduu” akko yerhxe. Amaa kaa khaddaam lel amaa geddaako ure.
Yeesus mango mara urusa
(Luukas 7:1-10)
14Yeesus Bithroos caredde orobe gedda, Bithroos ballö lacnat sabbatah laxutteh carhah gaxteh akah sugte. 15Usuk gaba akah dhagandhaage gedda lel amaa lacna akah xabteyaako ugutteh kaa takhdamo erherhishshe. 16Amaa kaso timjinnineh tinemko mango mara alle baaheenih, inki waanittah amaa uma ufayit inkoh akah yeyyeeceyaako amaa laxuuteh yine mari inkoh uren. 17Tayim tekkem lel nabii Isayas: “Ni thurusrus asac noh ishe, ni laxuu lel noh yooqhoce”#Isayas 53:4 yerhxeh yineya takmalo ciloh kinni.
Yeesus kataanamhi limo
(Luukas 9:57-62)
18Kado Yeesus kaa lamma galelle mango xiyaw yuble gedda, igilko amaa carhalle taboona ten yeemere. 19Wuli sercat dhiiceeni yemeeteh lel: “Mudarris, atu alle adiinnanille ku kataw kiyo” akko yerhxe. 20Yeesus lel: “Waker gonnit leyan, caranti kimbir lel sinni care leyan, Xiyawti Barhi laakin amo adde hashshiitakke maleya” akko yerhxe. 21Katattaynitko wuliti: “Maddara, ookomeh inni abba attaacago yi xab” akko yerhxe. 22Yeesus laakin: “Rabontit sinni rabonta yattaacagoonaaki, yi kataa” akko yerhxe.
Yeesus goomadhdhe daw-ishe
(Markos 4:35-41; Luukas 8:22-25)
23Usuk jalbadde kore gedda, kaa katattaynit adde katayen. 24Taykinna lel igilille sirii irhfa ugutteyaako amaa jalba goomadhdheh tamandhaco fadhdhe; usuk laakin dhiineh yine. 25Usun lel yedeyinyaako: “Ni garger, Maddara; alayi nanino” arhxuk kaa ugusen. 26Usuk lel: “Ko imaan dagito, aymih mashshittaana?” akko yerhxe. Sarrah uguteyaako amaa igil kee xaaxatta ten yoskoolofe, sarrah amalle naba hidaaya tekke. 27Amaa xiyaw lel: “Tati aaginale xiyawto! Igil kee xaaxatta gantah kaa yaabbin” arhxuk cibrah raben.
Yeesus yimjinnine lamma xiyawto urusa
(Markos 5:1-20; Luukas 8:26-39)
28Usuk amaa carha Gadaarat marih baarho akko yarhxin dikille tabe gedda, wuli yimjinnine lamma qabaaraako yewciinih akah garayen. Mangum umik yiniinimhi sabbatah lel amaa araxko walaa inketti tillaabo dhiicak miyine. 29Taykinna lel usun: “Ko Yallih Barha, nottaalih ayim lito? Waqhti gufekkah talle ni tacazzabo temeete?” arhxuk zeeren. 30Kado, amakkeeko mirixtalle mango xasama alooluk tine. 31Amaa junuun lel: “Ni tayyaaco tekkemko, too mango xasamadde ni dhirhii” arhxuk kaa dhaacimen. 32Usuk lel: “Aduwa” akko yerhxe. Amaymih usun yewciinih amaa xasamadde oroben. Taykinna lel amaa mango xasama inkoh ullallamutuh igilidde xarhiteenih layedde yumundhucin. 33Amaa loynit lel kudeenih daafo fanah yedeyinyaako ummannim, fertoh lel amaa timjinninemille tekkem warroyshen. 34Taykinna lel umbuka daafo Yeesusuh garayto tewceh, kaa yublin gedda lel ten zoobäako yadaw kaa dhaacimen.
ទើបបានជ្រើសរើសហើយ៖
Maatiyos 8: SCC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2024 Wycliffe Ethiopia
