Maatiyos 7
7
Garo yafridiinim
(Luukas 6:37-42)
1“Tamfirridinki mafradina. 2Amayim lel toxoyin firdeh tamfarradoona kee tatneefecin qiyaasah sinah tanqaaso kinamhi sabbatah kinni. 3Ku intikke yane gunde tablo akko waytaya, ku sacalhi intik yane askurta aaginah duhta? 4Hido, ku intikke gundi akko yaneya, ishi sacalakke: ‘Ku intiiko askurta koh ayyaaco’ aaginah akko tarhxe? 5Ko munaafiqhto, tookomeh ishi intiiko gunde eyyec, sarrah ishi sacalhi intiiko askurta tayyaaco meceetih tablo kitok.
6Tinqiddisem kaarah maaxayna. Sinni luul xasamat nifidde micidina. Amayim lel xasama ibah adde yacitcitiinimko kee kaara gaxeenih sinadde araanamko kinni.
Sinah tamxawo kinnik esserita
(Luukas 11:9-13)
7Sinah tamxawo kinnik esserita, geytoona kinnik wagiya, sinah fakkitto kinnik lel ukuxkuxa. 8Amayim lel esserinnanti kabbaata, wagiyati geya, yakuxkuxe tiyah lel akah fakkitto kinamhi sabbatah kinni. 9Hido, sinko miyatto kinni, kaa barhi folotta kaa essera gedda dhayitto akah yaxaw leti? 10Hido caasatto kaa essera gedda caroora akah yaxaw leti? 11Amaydo, atin uma mara kitin hanuk, sinni cindhamah mece muttuxuwa yaxaynim taarhegiinih yekkemko, carshelle geytima Abba kaa esserinnan marah amayimko ziyaada mecem yaxaye!
12Amaydo, Sercat kee Nobowa tarhxem tayim kinnik, aki xiyaw sinah aboona farhe dhadhdheenim atin yakkeedo tenah aba.
Xeewin caraf
(Luukas 13:24)
13Xeewin carafko oroba. Amaa liyalle xiyaa beya caraf fidina, amaa arax lel sahiil kinni, amadde oroba mari lel mango mara kinon. 14Aniina fanah beya caraf xeewintiya, arax lel sirii tiya kinni, kayya geya mari lel dago mara kinon.
Xarha kee tee daro
(Luukas 6:43-44)
15Addaako simbaaca suulal kinon hanuk, ciidot saradde sinalle tamiite zirabti nobowaako zeelita. 16Ten daroh ten taysharhaarhagoona kitin. Cinab keenan-le xorhko yakatte, woole indacaari sibsibko? 17Amaydo, mece xarha mece daro bahta, laakin uma xarha uma daro bahta. 18Mece xarha uma daro bahto mirhicta, uma xarha lel mece daro mibahta. 19Inkoh mece daro baahinnixe xorh yaggiriceh giradde cidditta. 20Amaydo, ten daroh ten taysharhaarhagoona kitin.
Caduruh sin maarhige
21Yottakke, ‘Maddara, Maddara’ arhxinnantiya maki carshi nigsinnadde sayo leti, laakin carshelle geytima yi Abbah farhi abatiya kinni. 22Amaa maxadde mango mari, ‘Maddara, Maddara, ku migacalle nabii balih miwaanishino, ku migacalle junuun neyyeeceh, ku migacalle mango xayla-le abittot maabino?’ yok yarhxoona kinon. 23Amaa gedda lel anu, ‘Ko sercat-malitti ciyyo lito, caduruh sin maarhigeeki, mirix yok erhexa’ akko arhxo kiyo.
Sinni care qooqhaxakke siraxa
(Luukas 6:47-49)
24Ta yi waani yaabbeh abittodde ashishinnanti lel ishi care qooqhaxak abe kas-le tiya balih yakko kinni. 25Rob rade, weeci yemeete, xaaxatti xaaxaysheh ta care dufuwe, qooqhaxak dhishshiimeh yinemhi sabbatah laakin mirado. 26Ta yi waani yaabbeh abittodde ashishinnixeti lel ishi care xootsalle abe duuda balih yakko kinni. 27Rob rade, weeci yemeete, xaaxatti xaaxaysheh akko yaatuke gedda rade, kaa radnan lel naba tiya kuuk yine” akko yerhxe.
Yeesus reeza
28Yeesus ta waani abayshek sarrah, amaa mango xiyaw kaa aydarasalle cibrah raben. 29Amayim lel ten sercat dhiiceenit balih akkekkah, reeza le tiya balih yuydurusemhi sabbatah kinni.
ទើបបានជ្រើសរើសហើយ៖
Maatiyos 7: SCC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2024 Wycliffe Ethiopia
