मेथा 9
9
चाडीप मीला चो़गा
(मारकु २:१-१२; लुका ५:१७-२६)
1येशु डु नाङदु ॱहाकीनला फेप्ती, खोङबाराङ श्युक्जा ग्याजा#९:१ होदे ग्याजागो काफारनाहुम लाक।ला फेप्पालाक। 2धा मी रीङगागी चाडीपगी नाजा हो़गीन मी च्यीकला, ङ्याजेमुलाराङ खोङबाचारु खेरती होवालाक। येशुगी खुङक्याई धेपाला शीक्ती सुवालाक, “भीजाओ, सेम ल्हो़ झ्यी। ख्यी़ धीक्पाक्या सेल्दुक।” 3धा क्षो़ठीमगी ॱलोपो़न रीङगागी, खोराङक्याई नाङदु देरे साम्बालाक, “दे मी दे नी को़न्क्षोकला कुरवा धेबी।”
4हीना येशुगी खुङक्याई साम्लोक्या खेन्दी, सुङा जेपालाक, “खेक्या घीझ्येरी खेरी सेम नाङदु साम्लो ङेन्पाक्या ताङा? 5‘खेरी धीक्पाक्या सेल्जुङ’ याङमेना ‘लोङला घोबा चुक’ ॱनेरी, घीन्गो ॱनाना ॱयो़ल्ले लेल्हा दुओ? 6हीना मी-भुला जीक्तेनदु धीक्पा सेल्येगी आङजा हो़तालाक ॱनेरी, खेक्याई स्येलाझ्यी।” धेनी खोङबागी चाडीप हो़गीन मीगोला सुवालाक, “लोङ, धेनी राङगी ङ्याजे खेरती नाङला सोङ।” 7धेनी खो लारी नाङला सोवालाक। 8धा मीछोकक्या दे थोरी जीक्पालाक धेनी मीला देरे आङजा ॱनाङगीन को़न्क्षोकला तो़पा पुवालाक।
मेथाला भो़वा
(मारकु २:१३-१७; लुका ५:२७-३२)
9धेनी येशु होदेने ॱहाला फेई घाङला, ठा धुजारु धेता मेथा ॱनागीन मी च्यीकला शीक्पालाक धेनी खोला “ङी स्याबाला डोङ” सुरी सुवालाक। धेनी खो लारी खोङबागी स्याम्ला डावालाक।
10धा येशु मेथागी खीम नाङदु श्येलाक श्येयेला श्युई घाङला, ठा धुगीनक्या धाङ धीक्चेनक्या माङा होरी, खोङबा धाङ खोङबागी ङेनेक्यामुला शायेला धेपालाक। 11धेनी फारुसीपाक्याई दे थोरी, खोङबागी ङेनेक्याला ॱनेवालाक, “खेक्याई घेगेन घीझ्येरी ठा धुगीनक्या धाङ धीक्चेन श्येम्माक्यामुला शामा शाले?”
12हीना येशुगी दे सेन्दा जेदी सुवालाक, “आम्ची थाङाक्याला मेन्दा, नेपाक्याला घो़लालाक। 13सोङ धेनी ‘ङा क्षो़पाला मेन्दा, ॱङीङजे घाई हो़क।’#होशे ६:६ ॱनागीनगी दो़न्दाकगो ॱहाघोरा झ्यी, घीझ्येरी ॱनाना ङा ढाङतेनक्याला मेन्दा, धीक्चेनक्याला भो़रु होवाहीन।”
ॱङ्युङनेगी कोरला ढीवा
(मारकु २:१८-२२; लुका ५:३३-३९)
14धा ठी़सो़खेन योहान्नागी ङेनेक्या, खोङबाचारु होरी खोङबाला श्यी़वालाक, “हेक्या धाङ फारुसीपाक्या ॱङ्युङने ॱरुङालाक हीना खेराङगी ङेनेक्या घीझ्येरी ॱमीरुङाले?”
15धेनी येशुगी सुवालाक, “माक्पा धाङ माक्पे रोवाक्यामुला हो़ती घाङला, खुङक्या दुक ॱरुङाले? हीना माक्पा खुङक्याने ठीक्ती डुगीन ङीमागो ॱलेप्कीलाक, धेनी होदे घाङला खुङक्या ॱङ्युङने ॱरुङगीलाक।
16“मी सी़या घोलाक ॱङीङबाला ल्हेम्बा साबा मेग्यालाक घीझ्येरी ॱनाना ल्हेम्बागो खुम्दी, होदे घोलाकने रारी ॱयोल्ले ॱमीउ क्षे शोवालाक।
17“याङ पीखु ॱङीङबा नाङदु घुन्डुमगी छ्याङ साबा ॱमीलुवालाक। ॱलुक्ना, पीखुगो रारी छ्याङगो भो़गीलाक धेनी पीखुगो नोगीलाक। हीना छ्याङ साबागो पीखु साबा नाङदु ॱलुक्वालाक धेनी ॱङीगारा मेनोगीलाक।”
भोमो स्यीम्बु च्यीक धाङ केमी नेपा च्यीक
(मारकु ५:२१-४३; लुका ८:४०-५६)
18खोङबागी खुङक्याला होदे लाबक्या सुङी घाङला, याहुदापे पो़न्पो च्यीक होरी, खोङगी दोङदु पी़मु चुक्ती श्यी़वालाक, “ङी भोमो धान्दाका स्यीजुङ हीना खेराङ फेप्ती, खेराङगी क्षाक मी़ खाला श्याजे धेनी मो सो़न्गीलाक।” 19येशु या श्येङदी, खोरी ङेनेक्यामुला खी़ स्याबाला फेप्पालाक।
20होदे घाङलाराङ लो च्युङङी थुक्पे ठाक्जाक नाजागी ङ्याङङ्या, केमी च्यीक ग्याप स्योकने होरी, खोङबागी नाशागी ॱनेमोने जी़वालाक। 21घीझ्येरी ॱनाना मी़ मोराङला, “ङी खोङबागी नाशा च्यीगा जी़ना ङा फेन्गीलाक।” ॱनेरी साम्बालाक।
22येशु ग्याप लोक्ती मोला शीक्पालाक धेनी सुवालाक, “भोमो, सेम ल्हो़ झ्यी, खेरी धेपागी ख्यो़ला फेन्बालाक।” धेनी होदे घाङलाराङ होदे केमीगो ढाक्पालाक।
23येशु पो़न्पोगी नाङला फेप्ती, खोङबागी ॱलीङबु ताङगीनक्या धाङ मीछोकक्या ङुता ग्याप्कीनगो शीक्पालाक। 24धेनी खोङबागी सुवालाक, “देने ॱहाला सोङ। भोमो दे ॱमास्यी हो़तालाक हीना ॱङी लोक्ती धेदुक।” धा देक्या खोङबाला घो़ स्योरती ॱमेज्यु तावालाक। 25धेनी खोङबागी मीछोकक्याला फीला तो़न सारती, खोङबा खीम नाङदु फेप्ती, भोमोगी़ लाक्पाने शीम्बालाक धेनी भोमोगो लावालाक। 26ॱनेछु दे साछोक घीरीला ख्याप्पालाक।
श्यारा मी ॱङी
27धा येशु होदेने फेई घाङला, मी श्यारा ॱङी खोङबागी स्याबाला डारी, केक ग्याप्ती श्यी़वालाक, “दावीदगी से, हेक्याला ॱङीङजे शीक्रोनाङ।”
28येशु खीम नाङदु फेई घाङला, मी श्यारा ॱङीउ खोङबागी डुङदु होवालाक धेनी येशुगी खुङ ॱङीउला सुवालाक, “ङी दे झ्यी थुप्कीलाक ॱनेरी, खे ॱङीउला यीच्चे हो़ते?”
खुङ ॱङीउगी श्यी़वालाक, “झ्यीदीहो़क, चोवो।”
29धेनी खोङबागी खुङ ॱङीउगी ॱमीकला जुरी सुवालाक, “खे ॱङीउगी धेपा हो़गीन च्योक्रे, खे ॱङीउला डुपास्योक।” 30धेनी खुङ ॱङीउगी ॱमीक भेवालाक। धेनी येशुगी खुङ ॱङीउला, “दे लाब दे सुला ॱहामाघोरास्योक।” ॱनेरी, खुङ ॱङीउला का स्युक्क्षे ॱनावालाक। 31हीना खुङ ॱङीउ लोक्ती सोरी, खोङबागी ॱङेन्डाक युछोक घीरीला ख्याप्तु च्युक्पालाक।
डे झ्युजा मी च्यीक
32धा खोङबाक्या होदेने थो़न्दी फेई घाङला, डेगी शीम्दी लाब ताङ ॱमीथुप्कीन मी च्यीक, येशु दोङदु ठीक्ती होवालाक। 33येशुगी डेगो तो़न्दा जेपालाक धेनी मीगो लाब ताङ थुक्पालाक। धेनी मीछोकक्या ॱमीच्यीकी याम्सारी ॱनेवालाक, “ईस्राएलला देरे नामा थोङ माङ्युङ।”
34हीना फारुसीपाक्याई ॱनेवालाक, “धी़कक्याई ग्यावुगी थोक्ने खी़ डेक्या तो़न्दालाक।”
मीलाक ङ्युङागी कोरला
(मारकु ६:३४; लुका १०:२)
35धेनी येशु ग्याजा घीरी धाङ यु घीरीगी छोक्खाङक्याला, क्षो़ तो़न्दी धाङ ग्यासीगी ताम्शाङगो सेटाक जेदी फेप्पालाक। धेनी नाजा घीरी धाङ नेको़न घीरी चो़गा जेदी फेप्पालाक। 36मीछोकक्याला शीक्ती, खोङबा ॱङीङजेगी खावालाक घीझ्येरी ॱनाना खुङक्या झीउ मेगीन लुकक्या च्योक्रे, श्येम्माने दुक्पु फोक्पा धाङ रोवा मेगीन शीक्पालाक। 37धेनी खोङबागी ङेनेक्याला सुवालाक, “तो़न्दोक माङा दुक हीना मीलाकक्या ङ्युङा दुक। 38होझ्येरी लोदोकगी चोवोला, राङगी लोदोक धुयेगी छीला मीलाकक्या ताङरो जे ॱनेरी, ॱमो़लाम श्यी़।”
ទើបបានជ្រើសរើសហើយ៖
मेथा 9: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
