मेथा 10
10
कुछाप च्युङङीगी क्षाक्ले
(मारकु ३:१३-१९;६:७-१३; लुका ६:१२-१६;९:२-६)
1येशुगी ङेने च्युङङीला राङचारु भो़री, खुङक्याला ॱनो़पाक्या तो़न्ये धाङ नाजा धाङ ॱनेको़न घीरी सेयेगी आङजा ॱनावालाक।
2कुछाप च्युङङीगी मीङ देक्या लाक, धाङपोगो सीमोन ॱनागीन पेटो धेनी खी़ नो आन्डीरीया, जेबेदीगी भीजा याकोब धाङ खी़ नो योहान्ना, 3फीलीप धाङ बारथोलोमा, थोमा, ठा धुगीन मेथा, आल्फायुगी भीजा याकोब, थाएदेआ, 4ग्याल्चेपा#१०:४ राङगी ग्याखापगी राङजेगी क्षीला दो़पा क्षे धाङ ॱमाक टाप थुप्कीन सीमोन धाङ येशुला स्याम्ला ग्याप्तो़ झ्यीगीन युदा ईस्कारीयोत।
5दे च्युङङीला येशुगी देरे का ॱनारी झावालाक, “याहुदापा मेन्गीन मीरीकक्याई घुङला माडो, धेनी सामारीपाक्याई युक्याला घारुवा माश्युक। 6हीना ईस्राएल मीरीकगी लुक तोरताक्याचारु सोङ। 7धेनी खेक्या डोवाराङ ‘नाम्खे ग्यासी ङ्ये ॱलेप्दुक।’ ॱनेरी सेटाक झ्यी। 8नेपाक्याला चो़गा झ्यी, स्यीम्बुक्याला ॱलोङ, जेनेक्याला चाङमा शो़, डेक्या तो़न। खेक्याला स्यी़दी़ला जोरपालाक धेनी श्येम्मालाः स्यी़दी़ला तेर। 9खेरी केराकक्याला सेर धाङ ॱङु धाङ शाङगी टाङगाक्या ॱमाखेर। 10राङगी ढुला खुमाक ॱमाखेर, घो़ ॱङी, पोल्ले याङमेना भेक्योक ॱमाखुर घीझ्येरी ॱनाना लेगा झ्यीगीनक्याला घो़गीनगो थोप घोगुलाक।
11“धेनी खेक्या ग्याजा याङमेना यु घारु डोना, होदुरु खेक्याला धेदु च्युक्ङी दो़गीनगोला चो धेनी होदेने मेडोगीन थुक्पे होदुरुराङ धो़क। 12खीमगो नाङदु जुली घाङला, छाम्डी श्यी़। 13धेनी होदे नाङगी मीक्याई खेक्याला फेप्सु श्यी़ना, खेरी श्यीदे होदे नाङदु ॱनेलास्योक हीना खुङक्याई फेप्सु मीश्युना, खेक्याई श्यीदे खेलाराङ लोक्ती हुङास्योक। 14धेनी खेक्याला खेमेलेन्गीन धाङ खीकी काक्याला मेङेन्गीनक्याला होदेगी खाङबा याङमेना ग्याजाने थो़न्दी घाङला, खेरी काङबाने थाला ॱरुक। 15ङा खेक्याला धेन्पाराङ ॱनाहीन, ठीम चेगीन ङीमागोला, होदे ग्याजाला सादोम धाङ गोमोरा ग्याजाक्याने ल्हाक ठीम फोक्कीलाक।”
माउपारगी दुक्जोङगी कोरला
(मारकु १३:९-१३; लुका २१:१२-१७)
16“धा ङा खेक्याला चुङगुक्याई खोकला, लुकक्या च्योक्रे झाङाहीन होझ्येरी डुल च्योक्रे डुङपो धाङ फुक्रो़नक्या च्योक्रे झोङा झ्युङ च्यीक। 17मीक्याने शाप-शाप झ्यी घीझ्येरी ॱनाना खुङक्याई खेक्याला ठीम्खाङला ची ग्याप्कीलाक, धेनी खुङक्याई छोक्खाङक्यारु खेक्याला ताजाक श्युरकीलाक। 18धेनी खुङक्या धाङ याहुदापा मेन्गीन मीरीकक्याला पाङपो हुङयेला, ङी दो़न्दु खेक्याला पो़न्पोक्या धाङ ग्यावुक्या चारु ठीक्कीलाक। 19खुङक्याई खेक्याला होझ्येरी ची ग्याई घाङला, घाङ झ्येरी घी ॱनाये ॱनेरी, खेक्या सेम्डा माझ्यी घीझ्येरी ॱनाना खेक्याई घी ॱना घो़गीनगो, होदे धी़लाराङ खेक्याला ॱनाङगीलाक। 20घीझ्येरी ॱनाना सुङगीनगो खेक्या मालाक हीना खीकी थोक्ने, खेरी यापगी थुक्ङीगो लाक।
21“पी़न च्यीकगी राङगी पी़न श्येम्माला सेदु च्युक्कीलाक धेनी आकीगी राङगी टुला धेनी टुवाक्या फामागी ग्यापला लाङगीलाक धेनी खुङक्याला सेदु च्युक्कीलाक। 22धेनी ङी मीङगी छीला, घीरीगी खेक्याला दाङा झ्यीगीलाक। हीना थामा थुक्पे शो़पा घोम्गीनगोला थारपा थोप्कीलाक। 23ग्याजा च्यीकदु खेक्याला दुक्पु तेरना, ग्याजा श्येम्मारु डो़। घीझ्येरी ॱनाना ङा धेन्पाराङ खेक्याला ॱनाहीन, मी-भु फेप्कीन एन्ला, खेक्या ईस्राएलगी ग्याजा घीरीला खोर ॱमेछारकीलाक।
24“ङेने च्यीक राङगी घेगेनने थोवा मेयोङालाक याङ ॱयोक्पो च्यीक राङगी दाक्पोने थोवा मेयोङालाक। 25ङेने च्यीक राङगी घेगेन च्योक्रे धाङ ॱयोक्पो च्यीक राङगी दाक्पो च्योक्रे झ्युङना ढीक्कीलाक। नाङगी दाक्पोला बेएलजेबुल#१०:२५ धी़क (सातान) ॱनेरी, खुङक्याई ॱनेहो़ना, नाङमीक्याला होदेने ल्हाक घाजो़ ॱनी हो़टु?”
26“होझ्येरी खुङक्याने माजीक। घीझ्येरी ॱनाना ॱङो़न्दु मीग्युरकीन घीया माबे हो़तालाक धेनी स्येये मीग्युरकीन घीया, सारी माश्याक हो़तालाक। 27ङी खेक्याला मी़नाक्पाला ॱनागीनगो, हो़ नाङदु स्यो़क धेनी खाबा खीकी आमच्योकला ङेन्गीनगो, खाङबागी थोक्ने सेटाक झ्यी। 28धेनी सेम से ॱमीथुप्कीन हीना ली़ सेगीनक्याला माजीक। हीना ली़ धाङ सेम ॱङीगारा ॱङ्यावादु मेताला जे थुप्कीनगोला जीक। 29घोमो च्यीकला खाङ झीउ ॱङी ॱमेचोङाले? हीना खेरी यापगी थुकोङ मेताला, होदेक्याने च्यीया साला ॱमील्हीमगीलाक। 30ख्यी़ गोवागी ॱरा रे-रे ढाङगा ची हो़तालाक। 31होझ्येरी माजीक, खेक्या खाङ झीउ माङाक्याने रीन्थाङ क्षे लाक।
32“होझ्येरी मी दोङदु ङाला खेलेन्गीनक्याला, ङा नाम्खे श्यीङखामदु श्युक्कीन ङी यापगी दोङदु खेलेन झ्यीयेहीन। 33हीना मीगी दोङदु ङाला खे मेलेन्गीनक्याला, नाम्खे श्यीङखामदु श्युक्कीन ङी यापगी दोङदु ङा खेमेलेन।”
34“ङा जीक्तेनदु श्यीदे क्यारु होवाहीन ॱनेरी, ॱमासाम। ङा श्यीदे क्यारु होवामेन हीना राल्डी क्यारु होवाहीन। 35घीझ्येरी ॱनाना ङा भीजा धाङ आकी धेनी भोमो धाङ आमा धेनी ॱनामा धाङ आमाला च्यीक-च्यीकने ग्याप लोक्तु होवाहीन। 36धेनी मी च्यीकगी डागो राङगी नाङमीक्यानेराङ झ्युङगीलाक। 37ङालाः ल्हाक, राङगी फामाला चेवा झ्यीना, होदेला ङी मी झ्युङयेगी आङजा मेक धेनी ङालाः ल्हाक राङगी भु धाङ भोमोला चेवा झ्यीना, होदेला ङी मी झ्युङयेगी आङजा मेक। 38धेनी राङगी ग्याङस्यीङ खेरती, ङी स्याबाला मेडागीनक्याला ङी ङेने झ्युङयेगी आङजा मेक। 39राङगी सोक क्योप्कीनगी़ होदे स्योरतु च्युक्कीलाक धेनी ङी दो़न्दु राङगी सोक स्योरती च्युक्कीनगी़, होदे क्योप्कीलाक।
40“खेक्याला खेलेन झ्यीगीनक्याई, ङाला खेलेन झ्यीदालाक धेनी ङाला खेलेन झ्यीगीनक्याई, ङाला झाङगीनगोला खेलेन झ्यीदालाक। 41ॱङो़नस्येखेन च्यीकला ॱङो़नस्येखेन च्यीक लाक ॱनेरी चीना, होदेगोला ॱङो़नस्येखेनगी ज्यागा थोप्कीलाक। धेनी ढाङतेनगी मी च्यीकला ढाङतेन मी ॱनेरी चीना, होदेला ढाङतेन मीगी ज्यागा थोप्कीलाक। 42ङी ङेनेक्याने च्युङा च्यीकला, क्षु ढाङमो फोरा घाङ च्यीक हीन्ना तेरकीनगोला, ङा धेन्पाराङ ॱनाहीन खी़ ज्यागागो घानेयाः तोरकी मालाक।”
ទើបបានជ្រើសរើសហើយ៖
मेथा 10: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
