मेथा 15
15
चाङा धाङ ॱमेचाङागी कोरला
(मारकु ७:१-१३)
1धा फारुसीपाक्या धाङ क्षो़ठीमगी ॱलोपो़नक्या, येरुसालेमने येशुचारु च्यारती श्यी़वालाक, 2“खेराङगी ङेनेक्या घीझ्येरी धाङपो फामे लुक्सो़ला ॱमीचीला ले? घीझ्येरी ॱनाना खुङक्या शामा शाये एन्ला, लाक्पा ठुगीन ॱरोगो ॱमीरुङा।”
3येशुगी खुङक्याला सुवालाक, “खेक्या राङगी लुक्सो़गी क्षीला, को़न्क्षोकगी काक्या घीझ्येरी ॱमीचीला ले? 4घीझ्येरी ॱनाना को़न्क्षोकगी काला, ‘राङगी फामाला चीकुर झ्यी।’#धेप्थो़न २०:१२; काठीम ५:१६ धेनी ‘राङगी फामाला छीक ङेन्पा ॱनागीनगोला सेराङ घोगुलाक।’#धेप्थो़न २१:१७; लेवी २०:९ ॱनेरी सुङ हो़तालाक। 5हीना मी च्यीकगी राङगी फामाला, ‘खेराङला ङाने थोप घोयेगो, ङी को़न्क्षोकला पुसा हो़क।’ ॱनेरी ॱनाना, 6खी़ खोरी फामाला चीकुर झ्यी मेघोवालाक ॱनेरी, खेक्या ॱनालाक। होझ्येरी खेक्याई राङगी लुक्सो़गी क्षीला, को़न्क्षोकगी कागो दो़न मेगीन शो़दुक। 7खे शोक्पोक्या! खीकी क्षीला यस्यायागी ॱङो़नस्ये दे तायी सुदुक,
8‘दे मीक्या ङाला खाने च्यीका ॱङीङकुर झ्यीदीक,
हीना खुङक्याई सेम ङाने थाक्रीङा दुक।
9खुङक्या ङाला दो़न मेताला क्षाक छाला लाक,
घीझ्येरी ॱनाना खुङगी ॱलापच्याक्या, मीक्याई चोम्चा ठीमक्या च्यीगा लाक।’#यस्याया २९:१३”
10येशुगी मीमाङक्याला राङचारु भो़री सुवालाक, “ङेन धेनी ॱहाघोरा झ्यी, 11मीगी खा नाङदु जुगीनगी, मी देला ॱमेचाङा मेशोवालाक हीना मीगी खाने थो़न्गीनगी, मी देला ॱमेचाङा शोवालाक।”
12धेनी ङेनेक्या होरी खोङबाला श्यी़वालाक, “खेराङगी दे सुङगीनगो फारुसीपाक्याई घोरती, खुङक्याला फोक्कीनगो खेराङगी खेन्दा जेदे?”
13खोङबागी कालेन ॱनावालाक, “नाम्खे श्यीङखामदु श्युक्कीन, ङी यापगी ॱमाचुक्चा चीस्यीङ घीरी चावाने कोक्कीलाक। 14खुङक्याला या माझ्यी, खुङक्या श्यारागी गोठी श्याराक्या लाक। धेनी श्यारा च्यीकगी श्याराला ठीक्ना, ॱङीगारा दोङ-दोङ नाङला ल्हीम्गीलाक।”
15धेनी पेटोगी श्यी़वालाक, “पे देगी दो़न्दाक हेक्याला टोवा जे।”
16धेनी खोङबागी सुवालाक, “खेक्या धोराङा ॱहामेघोराई? 17खा नाङदु डोगीन घीरी फोवा नाङदु जुरी, फीला थो़न्गीनगो खेक्याला क्षा मेताले? 18हीना खाने थो़न्गीन घीरी, सेम नाङने हुङालाक धेनी होदेगी मीला ॱमेचाङा शोवालाक। 19घीझ्येरी ॱनाना सेम नाङने साम्लो ङेन्पाक्या धाङ मी सेये धाङ लोक्येम धाङ दो़लोक धाङ कुमा कुये धाङ पाङपो शोक्पो तेरये धाङ ॱमेबेप झ्यीयेक्या थो़न्दालाक। 20देक्याई राङ मीला ॱमेचाङा शोवालाक। हीना लाक्पा ॱमाठी़वा शाना, मीला ॱमेचाङा मेशोवालाक।”
कानानीपा केमीगी धेपा
(मारकु ७:२४-३०)
21येशु होदे साजा भोरती, ताएर धाङ सीदोन युखाक स्योकला फेप्पालाक। 22होदे साजागी कानानीपा केमी च्यीक खोङबागी डुङदु होरी, केक क्षे ग्याप्ती श्यी़वालाक, “के चोवो ला, दावीदगी से, ङाला ॱङीङजे जेरोनाङ। ङी भोमो डेगी शीम्दी ॱमीच्यीकी दुक्वा झ्युरी धेदुक।”
23हीना येशुगी कालेनदु छीक च्यीया ॱमासुवालाक। धेनी खोङबागी ङेनेक्या होरी खोङबाला श्यी़वालाक, “मोला ॱहाला झाङरो जे घीझ्येरी ॱनाना मो केक ग्याप्ती, होरी स्याबाला हुङी।”
24खोङबागी सुवालाक, “ङा नी, ईस्राएल खीमगी लुक तोरतोवाक्याई क्षीला च्यीगा झाजाहीन।”
25हीना मी़ खोङबागी दोङदु पीमु चुक्ती श्यी़वालाक, “चोवोला, ङाला क्षाक्रो ॱनाङ।”
26खोङबागी सुवालाक, “टुवागी ग्याङगा खेरती, कीला ॱयुक्ना मीढीयालाक।”
27मी़ श्यी़वालाक, “लाक चोवो। हीना की क्यागीया, राङगी दाक्पोगी चोक्चेने ल्हीम्लाक्या शालाक।”
28धेनी येशुगी मोला सुवालाक, “भोमो, ख्यी़ धेपा क्षे दुक। ख्यी़ धेपा च्योक्रे ख्यो़ला झ्युङास्योक।” होदे घाङलाराङ मी़ भोमोगो ढाक्पालाक।
नेपा माङाला चो़वा
29धेनी येशु होदेने फेप्ती, गालील छोगी डामला फेप्पालाक। धेनी याला री स्योकला फेप्ती, होदुरु श्युक्वा जेपालाक। 30मीछोक क्षे च्यीक खोङबागी डुङदु च्यारपालाक धेनी श्याक्योक, श्यारा, खोङपो, घोवा-घुमा धाङ श्येम्मा ॱमीच्यीकी माङा ठीक्ती, खोङबागी श्याप डुङदु श्याक्पालाक। धेनी खोङबागी होदेक्याला चो़गा जेपालाक। 31धेनी मीछोकक्याई घोवा-घुमाक्या लाब ताङगीन, खोङपोक्या ढाक्कीन, श्याक्योवाक्या ग्युक्कीन धाङ श्याराक्या थोङगीन थोरी ॱमीच्यीकी याम्सावालाक। धेनी खुङक्याई ईस्राएलगी को़न्क्षोकला तो़पा पुवालाक।
मी श्यीतोङला श्येलाक ॱनावा
(मारकु ८:१-१०)
32धा येशुगी ङेनेक्याला राङचारु भो़री सुवालाक, “मीछोक देक्या ङीमुला धेती, ङीमा सुम डी़ धेनी देक्याला शाये घीया मेता, ङा खुङक्याला ॱङीङ जेली। धेनी खुङक्या तोक्ती लाम्गाला ढीमे थोरती गेटु ॱनेरी, ङा खुङक्याला फोवा तोङबा ॱलोक्ती ताङी मेदो़दा।”
33धेनी ङेनेक्याई खोङबाला श्यी़वालाक, “देरे साजा एन्दा च्यीकला, हुरे मीछोक क्षेगी क्षीला छाङगीन शामा, हेक्याला घाने जोरये?”
34येशुगी खुङक्याला सुवालाक, “खेक्याला ग्याङगा घाजो़ हो़ता?”
खुङक्याई ग्याङगा धी़न धाङ ङ्या च्यीमे रे हो़क ॱनेरी श्यी़वालाक। 35धेनी मीछोकक्याला थाङगारु धेयेला का ॱनारी, 36खोङबागी ग्याङगा धी़न धाङ ङ्यागो क्षाकला ॱनुमा जेदी, को़न्क्षोकला काटीन क्षे श्यी़वालाक। धेनी होदेक्या च्याक्ती, ङेनेक्याला ॱनावालाक धेनी ङेनेक्याई मीछोकक्याला तेरपालाक। 37धेनी खुङ घीरीगी शेरी डावालाक। धेनी ङेनेक्याई ल्हाक्मा दुबुक्या दुरी, बाक्ता धी़न कावालाक। 38धा केमीक्या धाङ टुवाक्या ॱमीचीला, होदुरु शागीनक्याने केवे-फो श्यीतोङ हो़तालाक। 39धेनी मीछोकक्याला झारी, येशु डु नाङदु श्युक्ती मागादान ॱनागीन यु स्योकला फेप्पालाक।
ទើបបានជ្រើសរើសហើយ៖
मेथा 15: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
