मेथा 14
14
ठी़सो़खेन योहान्ना ढोवा
(मारकु ६:१४-२९; लुका ९:७-९)
1होदे घाङला गालीलगी पो़न्पो, हेरोदेगी येशुगी ॱङेन्डाकगी कोरला ॱहाघोरपालाक। 2धेनी खी़ खोरी ॱयोक्पोक्याला ॱनेवालाक, “दे नी ठी़सो़खेन योहान्ना लाक। खो स्यीम्बुने सो़न्पो लाङदुक, होझ्येरी देरे ॱहाङसागीन नी़थु खोने झ्युवालाक।”
3धा हेरोदेगी खोरी नो फीलीपगी केमी हेरोदीयासगी क्षीला, योहान्नाला शीम्बालाक धेनी कीक्ती चो़न्खाङला धाक्पालाक। 4घीझ्येरी ॱनाना योहान्नागी खोला, “मोला ख्यी़ केमी शो ॱमीछोवालाक।” ॱनेरी ॱनाच्यीक झ्येवालाक। 5हेरोदेगी योहान्नाला सेङी दो़पालाक हीना खो मीमाङला जीक्पालाक घीझ्येरी ॱनाना मीक्याई योहान्नाला ॱङो़नस्येखेन च्यीक चीलालाक।
6हीना हेरोदे केवे ङीमोगोला डो़न्बोक्याई दोङदु, हेरोदीयासगी भोमोगो घार चेरी, हेरोदेला ङ्यामो घारु च्युक्पालाक। 7होझ्येरी खी़ मोला, मी़ घी श्यी़गीनगो तेरु ॱनेरी, ॱना क्यावालाक। 8मी़ आमागी लाबला क्षा श्याक्ती, मी़ ॱनेवालाक, “ङाला ठी़सो़खेन योहान्नागी गो, दे देरमा नाङदु ॱनाङाजे।” 9धेनी ग्यावुगी़ सेम क्योवालाक हीना खी़ डो़न्बोक्याई दोङदु ॱना क्याक्या झ्येरी, होदेरेराङ झ्यीयेला का तेरपालाक। 10खी़ मी तारी, चो़न्खाङदु योहान्नागी गो चेदु च्युक्पालाक। 11धेनी खी़ गोगो देरमा नाङदु खेरती होरी, भोमोगोला तेरपालाक धेनी मी़ मोरी आमाचारु खेरपालाक। 12धेनी योहान्नागी ङेनेक्या होरी खी़ फुङबु खेरती सोरी, धी़ठोदु चुक्पालाक धेनी खुङक्या सोरी, येशुला लाब दे स्येपालाक।
येशुगी मी ॱङातोङला श्येलाक ॱनाङवा
(मारकु ६:३०-४४; लुका ९:१०-१७; योहान्ना ६:१-१४)
13येशुगी होदे सेन्दा जेदी, खोङबा डु नाङदु श्युक्ती, होदेने साजा एन्दा च्यीकला फेप्पालाक। हीना मीछोकक्याई होदे घोरती ढोङखेरने घोम्बा चुक्ती होरी, खोङबागी स्याबाला डावालाक। 14खोङबा डु नाङने भावा जेदी मीछोक क्षे हो़गीनगो शीक्पालाक धेनी खुङक्याला ॱङीङजे केरी, नेपाक्याला चो़गा जेपालाक।
15धा घोमो छाक्ती ङेनेक्या, खोङबागी दोङदु च्यारती श्यी़वालाक, “साजा दे एन्दा च्यीक लाक धेनी ङीमा येसादुक। मीछोक देक्याला राङ-राङला शामा ङ्योयेला युक्याला झाङरो जे।”
16हीना येशुगी सुवालाक, “खुङक्या डो घोगुमालाक। खेक्याराङ खुङक्याला शायेला च्यीक रे तेर।”
17खुङक्याई खोङबाला श्यी़वालाक, “हेक्याला ग्याङगा ॱङा धाङ ङ्या ॱङी माना मेक।”
18खोङबागी सुवालाक, “होदे ङीचारु खेरती स्योक।”
19धेनी खोङबागी मीमाङक्याला चा खाला धेये का ॱनावालाक धेनी ग्याङगा ॱङा धाङ ङ्या ॱङीगो क्षाकला ॱनुम्दी, नाम्खा स्योकला शीक्ती को़न्क्षोकला काटीन्क्षे श्यी़वालाक। धेनी खोङबागी ग्याङगागो च्याक्ती, ङेनेक्याला ॱनावालाक धेनी ङेनेक्याई मीछोकक्याला तेरपालाक। 20धेनी घीरीगी शेरी डावालाक। धेनी ङेनेक्याई ल्हाक्मा दुबुक्या बाक्ता च्युङङी गाङ धी़वालाक। 21धा शागीनक्याने केमीक्या धाङ टुवाक्या ॱमाचीवा, केवे-फो ॱङातोङ चो़ हो़तालाक।
येशु छोगी खाला श्याप चाक्ती फेप्पा
(मारकु ६:४५-५६; योहान्ना ६:१५-२१)
22येशुगी मीछोकक्याला घोङपा ॱनाङी घाङला, राङगी ङेनेक्याला डु श्यो़न्दी, खोङबाने एन्ला ॱहाकीनला सोङ सुरी झावालाक। 23मीछोकक्याला झासारती, खोङबाराङ च्यीगा ॱमो़लाम श्यी़येला, री याला फेप्पालाक। ॱरो ॱरुई घाङला होदुरु खोङबा च्यीगा हो़तालाक। 24धेनी होदे धी़चो़ला डुगो काम्साने थाक्रीङाला ॱलेप्सा हो़तालाक। ल्हाक्पा स्युक्क्षे डुगी दोङ स्योकने ग्याप्ती, भालापगी डु टुक्पालाक। 25धेनी ॱङारोक छुची सुम्बा चो़ला, खोङबा छो खाला श्याप चाक्ती, खुङक्याचारु फेप्पालाक। 26ङेनेक्याई खोङबाला छो खाने फेप्कीनगो थोरी, खुङक्या ॱमीच्यीकी जीक्ती, “दे नी दोङडे लाक!” ॱनेरी के स्योरपालाक। 27हीना येशुगी लाम्साङ खुङक्याला सुवालाक, “ल्हो़ झ्यी। ङाराङ हीन। खेक्या माजीक।”
28धेनी पेटोगी खोङबाला श्यी़वालाक, “चोवो, खेराङ हीन्ना, ङा क्षु खाने खेराङ डुङदु हुङयेला ङाला का ॱनाङा जे।”
29खोङबागी सुवालाक, “स्योक।” धा पेटो डु नाङने थो़न्दी, क्षुखाला घोम्बा ग्याप्ती येशु डुङदु सोवालाक। 30हीना ल्हाक्पा स्युक्क्षे ग्याप्कीनगो थोरी, खो जीक्पालाक धेनी क्षु नाङला भीप्कु झ्येरी, खी़ केक ग्याप्ती श्यी़वालाक, “चोवो ङाला क्योपा जे!”
31येशुगी लाम्साङ राङगी क्षाक क्याङा जेदी, खोला शीम्दी सुवालाक, “धेपा च्युङा ख्यो़, घीझ्येरी दोक्पा सा?” 32धेनी खोङबा ॱङीउ डु नाङदु श्युक्यी घाङला, ॱलुङगो जामथीङी छेपालाक। 33धेनी डु नाङदु हो़गीनक्याई खोङबाला क्षाक क्षारी श्यी़वालाक, “खेराङ नी, धेन्पाराङ को़न्क्षोकगी से लाक।”
34धेनी खोङबाक्या छो थारती, ॱहाकीनला गेन्नेसारेतगी साजाला ॱलेप्पालाक। 35धेनी होदे साजागी मीक्याई खोङबाला ङोस्येरी, थाकोरगी यु घीरीला मी तारी नेपा हो़गीन घीरी, खोङबागी डुङदु ठीक्ती होवालाक। 36धेनी नेपाक्याला खोङबागी नाशागी थामा च्यीगा ज्युरु च्युक्येला, खुङक्याई श्यी़वालाक। धेनी जुगीन घीरी ढाक्पालाक।
ទើបបានជ្រើសរើសហើយ៖
मेथा 14: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
