मेथा 13
13
साङा ताप्कीनगी पे
(मारकु ४:१-१२,२५; लुका ८:४-१०;१०:२३-२४)
1होदे ङीमागोलाराङ येशु नाङने फेप्ती, गालील छोगी डामदु श्युक्पालाक। 2मीछोक क्षे च्यीक खोङबागी डामदु जोम्दी, खोङबा डु नाङदु श्युक्घो़ थुक्पालाक। धेनी मीछोक घीरी छोगी डामदु लारी धेपालाक। 3धेनी खोङबागी मीमाङक्याला पेक्याई गोने क्षो़ माङा सुङा जेपालाक।
खोङबागी सुवालाक, “साङा ताप्कीन च्यीक साङा ताप्तु सोवालाक। 4धेनी खी़ साङा तोरी घाङला, रीङगा लाम्गाला थोरपालाक धेनी झ्याक्या होरी होदे शेवालाक। 5धेनी श्येम्मा साङाक्या सा माङा मेगीन, धोरुकगी साङला थोरपालाक। धेनी होदुरु सा तीङ रीङबो मेगीन झ्येरी, होदेक्या लाम्साङ केवालाक। 6हीना ङीमा स्यारी घाङला, होदेक्या छीक्पालाक धेनी चावा तीङ रीङा मेगीन झ्येरी काम्बालाक। 7साङा रीङगा छेम्मागी खोकला थोरपालाक धेनी छेम्माक्या याला छारती होदेक्याला ॱनेम्बालाक। 8हीना साङा रीङगा सा शाङा खाला थोरपालाक धेनी होदेक्या केरी ढेबु छाक्ती रीङगाने ग्या थाम्बा, रीङगाने ढुकच्यु थाम्बा धेनी रीङगाने सुम्चु थाम्बा ढु झ्युवालाक। 9आमच्योक हो़गीनक्याई ङेन्दी ॱहाघोरास्योक।”
10धेनी ङेनेक्या होरी खोङबाला श्यी़वालाक, “खेराङ मीछोकक्याला पेक्याई थोक्ने घीझ्येरी सुङाले?”
11खोङबागी सुवालाक, “नाम्खे ग्यासीगी साङवाक्या स्येयेला, खेक्याला ॱनाङ हो़तालाक हीना खुङक्याला ॱमानाङ हो़तालाक। 12घीझ्येरी ॱनाना हो़गीनला धोराङा ॱनाङगीलाक धेनी मेछो़ली झ्युङगीलाक। हीना मेगीनगोला, खोला हो़गीनगोवा खोने ठोक्कीलाक। 13होझ्येरी ङा खुङक्याला पेक्याई थोक्ने ॱनाहीन। घीझ्येरी ॱनाना खुङक्या तेरीयाः ॱमेथोङालाक धेनी ङेन्दीयाः मेघोरालाक धेनी घो ॱमीछुवालाक। 14धा ॱङो़नस्येखेन यस्यायागी देरे सुङगीनगो खुङक्याला डुप्पालाक,
‘खेक्याई ङेन्ये ङेन्गीलाक हीना ॱहामेघोकीलाक,
धेनी ताये तागीलाक हीना ॱमेथोङगीलाक।
15घीझ्येरी ॱनाना दे मीक्याई सेम ग्योङा झ्युदुक,
धेनी खुङक्याई आमच्योक ॱलेन्दा झ्युदुक,
धेनी खुङक्याई खोरी ॱमीक चुम्दुक।
होरे मेन्ना खुङक्याई ॱमीकगी थोङये हो़तालाक,
धेनी खुङक्याई आमच्योकगी ङेन्दी, खुङक्याई सेमगी ॱहाघोरती ग्युरये हो़तालाक।
धेनी ङी खुङक्याला सोये हो़क।’#यस्याया ६:९-१०
16“हीना खेक्याई ॱमीक घीन्गी झ्यीलाप क्षे घीझ्येरी ॱनाना होदेगी थोङालाक धेनी खेक्याई आमच्योक घीन्गी झ्यीलाप क्षे घीझ्येरी ॱनाना होदेगी ङेन्दालाक। 17ङा खेक्याला धेन्पाराङ ॱनाहीन, ॱङो़नस्येखेन धाङ मी ढाङा माङक्षेगी, खेक्याई थोङगीनगो थोङये दो़पालाक हीना ॱमाथोवालाक धेनी खेक्याई घोरकीनगो, ङेन्ङी दो़पालाक हीना ॱहामाघोरपालाक।”
साङागी पेगी दो़न्दाक टोवा
(मारकु ४:१३-२०; लुका ८:११-१५)
18“धा, साङा ताप्कीन पेगी दो़न्दाकगोला ङेन। 19लाम्गाला थोरथोवा साङागो, नाम्खे ग्यासीगी का ङेन्दी ॱहामेघोगीन धाङ धी़क होरी होदेगी सेम नाङदु ताप्ता साङागो, होदेने ठोक्ती डुगीन च्योक्रे लाक। 20धेनी धोरुकगी साला थोरथोवा साङागो, को़न्क्षोकगी काला ङेन्दी लाम्साङ ङ्यामो घेरी, खेलेन्गीन मी च्योक्रे लाक। 21हीना राङला चावा तीङ रीङबो मेगीन झ्येरी, होदे धी़चो़ तीते च्यीक धेगीलाक धेनी कागी दो़न्दु दुक्ङेल धाङ ॱनेक्यो़न झ्युङना लाम्साङ खो धेपाने लोक्कीलाक। 22याङ छेम्मागी खोकला थोरथोवा साङागो, को़न्क्षोकगी कागो ङेन्दी हीना जीक्तेनगी दुङा धाङ ग्युनोरगी ॱली़टेगी का देला ॱनेम्दी, होदे ढेबु ॱमेक्षाक्कीन मी च्योक्रे लाक। 23हीना सा शाङाला थोरथा साङागो का ङेन्दी ॱहाघोरती धेनी ढेबु तेरकीनगो लाक। खोने ढेबु केगीलाक धेनी रीङगाने ग्या थाम्बा, रीङगाने ढुकच्यु धेनी रीङगाने सुमच्यु थाम्बा झ्युङगीलाक।”
युक्पुगी पे
24खोङबागी याङ पे श्येम्मा च्यीक, खुङक्याई दोङदु श्याक्ती सुवालाक, “नाम्खे ग्यासी दे मी च्यीक सोरी, राङगी श्यीङला साङा शाङा ताप्कीन च्योक्रे लाक। 25हीना मीक्या ङ्यारी धेती घाङला, खी़ डा होरी ढोगी साङक्याला युक्पु ताप्ती सोवालाक। 26धा झ्याङबाक्या केरी, डुदोक क्षाई घाङला युक्पुक्या केवालाक।
27“धेनी नाङगी दाक्पोगी़ ॱयोक्पोक्या होरी, खोङबाला श्यी़वालाक, ‘पो़न्पो ला, खेराङगी श्यीङला साङा शाङा ताप्पा माले? होरे हीन्ना चाक्या घाने झ्युवाले?’ 28खोङगी खुङक्याला सुवालाक, ‘डा च्यीकगी झ्येवालाक।’ होझ्येरी ॱयोक्पोक्याई ॱनेवालाक, ‘खेराङगी दो़ना हेक्या सोरी होदे पीगी़?’
29“हीना खोङगी सुवालाक, ‘ॱमापी़ घीझ्येरी ॱनाना खेक्याई युक्पुक्या पीली घाङला ढोक्या होदेमुला बी़ सीगीलाक। 30तो़न धुगीन थुक्पे होदे ॱङीगाराला छारतु च्युक धेनी तो़न दुली घाङला ङा ॱङीमा ॱङागीनक्याला एन्ला युक्पुक्या पीरी, मेला ॱराक्येला कीलीक दोम हीना ढोक्या ङी डुखाङदु धी़ ॱनेरी ॱनायेहीन।’”
छुकगी साङा धाङ क्युरचीगी पे
(मारकु ४:३०-३४; लुका १३:१८-२१)
31खुङक्याई दोङदु पे श्येम्मा च्यीक श्या जेदी, येशुगी सुवालाक, “नाम्खे ग्यासी दे मी च्यीक छुकगी साङा खेरती, खोरी श्यीङला ताप्कीन च्योक्रे लाक। 32दे साङा दे साङा घीरीने च्युङस्योक लाक हीना छारती केली घाङला, दुम्रा नाङदु हो़गीन ॱङोच्छेक्याने क्षेस्योक झ्युरी, दोङबो च्योक्रे झ्युङालाक धेनी ॱनामगी झ्याक्या भाप्ती होरी, होदेगी याकाक्याला छाङ शोवालाक।”
33याङ खोङबागी पे श्येम्मा च्यीक सुवालाक, “नाम्खे ग्यासी दे केमी च्यीकगी क्युरची खेरती, पादी सुम चो़ बाक्पेमुला ॱरेरी बाक्पे घीरीला, क्युरची ॱमालाङगीन थुक्पे ॱङ्यारी श्यालाक।”
34दे घीरी येशुगी मीक्याला पेगी थोक्ने सुवालाक। पेने माना खुङक्याला खोङबागी श्येम्मा घीया ॱमासुवालाक। 35ॱङो़नस्येखेनगी सुङगीन दे डुप्तु च्युक्येला दे झ्युवालाक,
“ङी खा ङा पेगी गोने पेयेहीन,
जीक्तेन को़ली घाङने ॱहाला सारी श्याकश्याक्याई दो़न ङा टोयेहीन।”#सुङगुर ७८:२
युक्पु पेगी दो़न्दाक टोवा
36धेनी मीछोकला भोरती, येशु खाङबा नाङदु फेप्पालाक। खोङबागी ङेनेक्याई खोङबाचारु होरी श्यी़वालाक, “श्यीङगी युक्पुगी पेगी दो़नगो हेक्याला टोरो जे।”
37येशुगी सुवालाक, “साङा शाङपो ताप्कीनगो मी-भु लाक। 38श्यीङगो जीक्तेन लाक। धेनी साङा शाङपोक्या ग्यासी टुवाक्या लाक। युक्पुक्या धी़कगी टुवाक्या लाक। 39धेनी युक्पु ताप्कीन डागो धी़क लाक। लोदोक धुगीन धी़चो़गो थागी धी़चो़ लाक। धेनी ॱङागीनक्या नाम्खे भाङछेनक्या लाक। 40युक्पुक्या धी़री मेला ॱराक्कीन च्योक्रे, थागी धी़ला देरेराङ झ्युङगीलाक। 41मी-भुगी खोरी भाङछेनक्या झाङगीलाक धेनी धीक्पा झ्यीदु च्युक्कीनक्या धाङ ङेन्पा झ्यीगीन घीरीला, खोङबागी ग्यासीने रुक्कीलाक 42धेनी मेगी थाप नाङदु ॱयुक्कीलाक। साजा होदुरु मी घीरी ङुगीन धाङ सो ढीक्कीन हुङगीलाक। 43धेनी ढाङाक्या राङगी यापगी ग्यासी नाङदु, ङीमागी हो़ च्योक्रे स्यारकीलाक। आमच्योक हो़गीनक्याई ङेन्दी ॱहाघोरास्योक।
तेर धाङ मुतीकगी पे
44“नाम्खे ग्यासी दे, श्यीङ च्यीकला बेरी श्याकश्या तेर च्योक्रे लाक। मी च्यीकला होदे ॱङेदी, याङ बेरी श्याक्पालाक धेनी ङ्यामो घेरी सोरी, राङला हो़गीन घीरी चोरी होदे श्यीङगो ङ्यो़वालाक।”
45“याङदा नाम्खे ग्यासी दे, मुतीक पी़मा चारु ग्युक्कीन छोङपा च्यीक च्योक्रे लाक। 46मुतीक घोङ क्षे च्यीक ॱङेदी, खो सोरी राङला हो़गीन घीरी चोरी होदे मुतीकगो ङ्यो़वालाक।
ङ्यारेगी पे
47“याङदा, नाम्खे ग्यासी दे छो नाङदु ॱयुक्ती, ङ्या ॱना घीरी रुक्कीन ङ्यारे च्योक्रे च्यीक लाक। 48ङ्यारेगो गाङ खारी, मीक्याई होदे छोगी डामदु थेन्दी, माला धेती ङ्या शाङा घीरी पेरी, ॱनो़ नाङला श्यालाक धेनी फेन ॱमेथोक्कीन#१३:४८ फेन ॱमेथोक्कीन ङ्या ॱनाना ङ्यासाक मेगीन ङ्याक्या लाक। मोशेगी क्षो़ठीमला याहुदापाक्याई होदे शाये मेगीन चीलालाक। घीरी ॱयुक्वालाक। 49थागी धी़चो़ला देरे झ्युङगीलाक। नाम्खे भाङछेनक्या फेप्ती ङेन्पाक्या ढाङाक्याने ॱयेवा पेगीलाक। 50धेनी हादेक्याला मेगी थापला ॱयुक्कीलाक। होदे साजारु ङुगीन धाङ सो ढीक्कीन झ्युङगीलाक।
51“दे लाब घीरी खेक्याई ॱहाघोरी?” खुङक्याई खोङबाला श्यी़वालाक, “ॱहाघोजुङ।”
52धेनी खोङबागी खुङक्याला सुवालाक, “होझ्येरी नाम्खे ग्यासीगी क्षीला ॱलापच्या राक्कीन, क्षो़ठीमगी ॱलोपो़न घीरी नाङ च्यीकगी पो़न्पो च्योक्रे लाक। खी़ खोरी तेरने साबा धाङ ॱङीङबा नोरक्या तो़न्दालाक।”
येशुला नाजारेत युदु ॱमाचीवा
(मारकु ६:१-६; लुका ४:१६-३०)
53धेनी येशुगी दे पेक्या सुङसारती, खोङबा होदेने फेप्पालाक। 54धेनी राङगी फायु नाजारेतदु फेप्ती, खुङक्याई छोक्खाङदु खुङक्याला क्षो़ सुङा जेपालाक। खुङक्या ॱहालेरी ॱनेवालाक, “दे मी देला देरे स्येराप धाङ ॱहाङसागीन क्षाक्लेक्या जेयेला, नी़थु घाने जोरपा ले? 55खो नी स्यीङजोवागी भीजागो माले? खी़ आमागी मीङ मीरीयाम माले? धेनी खी़ पी़नक्या याकोब, योसेफ, सीमोन धाङ युदा माले? 56धेनी खी़ नुमोक्या होरीमुला धेता माले? हुरे हीन्ना दे मी देला दे घीरी घाने झ्युवाले?” 57धेनी खुङक्याई येशुला ॱमाचीवालाक।
येशुगी खुङक्याला सुवालाक, “ॱङो़नस्येखेन च्यीकला राङगी फायु धाङ राङगी नाङमीक्याई माना, श्येम्मा घीरीदु चीलालाक।” 58धेनी खुङक्याई धेपा मेगीन केनगी, येशुगी होदुरु ॱहाङसागीन क्षाक्ले माङा माजेपालाक।
ទើបបានជ្រើសរើសហើយ៖
मेथा 13: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
