Matius 24
24
Yesus nfalak feti Ratu Ni Das Silai keta namsos
24:1-2
(Mrk. 13:1-2; Luk. 21:5-6)
1Lama Yesus nti a ntate Ratu Ni Das Silai e Ni manglartar rma ma rakmat I ma rfatutu Ratu Ni Das Silai ni ngafele ma gedungar monuk ma ramin dalam a ne. 2Ne Yesus nfalak ber sir feti, kmi msyalan kabain ngafelar monuk a ne lo nre? Nempa Yakw kfwalak ber a kmi, ni botuan e safe-safe monuk ma rangafel ma msyalan ye keta ramsos monuk, ma to bati fen lese nbal ma namtoran ain.
Yesus nfalak na kabanir ma keta rbotin noak ma saryamprene ketla namsos
24:3-14
(Mrk. 13:3-13; Luk. 21:7-19)
3Mpene Yesus nti lenran Zaitun ma namtoran na iano. Noak a ne Yesus koko I, ne Ni manglartar rma ma rakmat I ma renrat, “Tuangguru, no mfwalak ber kam feti bengfir a betno kit tsalan safe ma mfwalak a ne? Ma noak ma mwa mbwali saryamprene ma saryamprene ketla namsos e ni faniak farpe?”
4Yesus nfalak, “Ka mijake kmi fen ngamone, nema tomwatar kete rma ma rfule kmi! 5Fali keta tomwatar yadin ral ngarangw ma rfalak, ‘Yakw ye Ray Silai’ la rfule tomwatar yadin. 6Ma keta mdyengar ibar feti tomwatar ramdiri yayat na nusar sa, nre mdyengar prang na mpenempen a nbal. Ma kete mimtaut fali safe-safe monuk a ne ka rbotin, nempa iane to ni tewat ma saryamprene namsos a fuky. 7Ma keta nusar raale sir ma rayar raale sir a nbal. Ma keta ruku silai ma lafar silai na mpenempen. 8Nempa susar monuk ma mkyoman a ne betno tubun motak nof suse silai ma keta diat saryamprene noak ma to namsos a fuky. Iane farlan suse ma batar sa nkoman maninik noak ma nose ma namtoranbab.
9Na lere ne, keta tomwatar romat a kmi ma ranrenre kmi ber mangfaretar. Ma keta rsiksa ma rfen a kmi. Ma keta nusar monuk na saryamprene rkedan a kmi fali mlyarat Yakw.#Mat. 10:22 10Na lere ne keta tomwatar yadin ratliur Yakw ma to ralele Yakw nbal. Ma keta tomwatar sa nfenri tbwarnir ber mangfaretar, ma keta tomwatar yadin rakedan sir. 11Ma nabi wawatar yadin keta rbotin ma rfule tomwatar yadin ma rfalak feti nir anftutwar a ne nof Ratu. 12Ma fali kabain yatkar na saryamprene ye rtafal ma yadin nwayat ma tomwatar yadin to rakamis sir lo. 13Nempa tomwatar ma ramkoran ma ralele Yakw terik ma saryamprene namsos, keta Ratu nfair sir.#Mat. 10:22 14Ma Ibar Ngamone na Ratu ma neluk Rai ma nfarete tomwatar, ka nsor nusar monuk na saryamprene ma tomwatar rdengar a fuky, betno saryamprene namsos.”
Yesus nfalak na suse silayar ma keta rbotin na lere ma nma ne
24:15-28
(Mrk. 13:14-23; Luk. 21:20-24)
15Yesus nfalak a nbal, “Luryain e nabi Daniel nafbotin lo feti tomwat mangafyatak sa ma nayatak desar keta nma na lere ma nma ne. Tomwate ne keta namdir ain lelerap na Ratu Ni Das Silai ma nafngeryai ain a ne nor kabain yatkar ma i nose.#Dan. 9:27; 11:31; 12:11 (Ise ma nbaca safe ma nafbotin a ne ka nkaul nal ngrie ne fen ngamone.) 16Na noak a ne tomwatar ma ramin propinsi Yudea ka rafla rbie ain a ne ma rti buburir. 17Tomwatar ma ramin bubungan das, ka kete rtompur ma rti das dalmir ma ral safe-safe. Nempa ka rasnyalik ma rtompur ma rafla rbie ain a ne.#Luk. 17:31 18Ma tomwatar ma ramin letar ka kete rbali sir ma ral nir rabtyar a nbal. 19Na lere ne yore desar ber batar ma rlenr ma rasusw a ne fali keta rkoman suse desar. 20Ka msyampayang ber Ratu nema noak ma mifla e ka kete na lerar ma naudan ma namnaur, ma kete na Yahudyar nir ler Sanari nbal. 21Yakw kfwalak farane fali na are ne keta tomwatar rkoman suse maberat resi. Ntabw nof ma Ratu nose saryamprene terik lere ye to lain sa ma tomwatar rkoman suse ma farane fuky. Ma keta to rkoman a rbali suse ma farane lo.#Dan. 12:1; Why. 7:14 22Nempa Ratu ntetak ma naftukar lerar ma rkoman suse ne. Fali farlan Ratu to naftukar lerar a ne botuan feti keta tomwatar monuk a rmat. Mpa I naftukar lerar a ne fali nlompang Ni tomwatar ma nfil a nkese sir a ne.
23Ma na lerar a ne farlan tomwatar rfalak ber a kmi, ‘Msyalan, Ray Silai namin ye!’ Nre rfalak feti msyalan, ‘I namin iano!’ Ka kete milele sir. 24Fali na lerar a ne keta tomwatar yadin rose felnir farlan rai silai ma nabyar. Ma keta sir rma ma rose fanikar ma rlie rlengan ma kabain mpasalnar la rfule tomwatar. Ma nlengan e sir rareke ma rfule tomwatar ma Ratu nfil sir a ne nbal. 25Mpa, ka mijake kmi fen ngamone, fali Yakw kfwalak kabanir monuk ye ber a kmi lo.
26Mpa farlan tomwatar rfalak ber a kmi feti: Msyalan, Ray Silai namin ain letkape ka kete mtyi a no; nre rfalak: ‘Msyalan, Ray Silai namin das dalam’ ka kete milele.#Luk. 17:23-24 27Fali noak ma Yakw, Tomwate Anaky kmwa, keta tomwatar monuk rafai. Iane farlan fitik ma idak nodir langit nof timur ti nait barat.
28Na ain ma mpusuk bobar a ne ramin, iane ain ma manik akar rabut sir ma rane.”#Luk. 17:37
Yesus nfalak na Ni mamae
24:29-31
(Mrk. 13:24-32; Luk. 21:25-33)
29Ne Yesus nfalak a nbal, “Lama susar monuk na lerar ne omp, keta lere to nbet ma bulan to idak lo, ma ftunar rfufw rof langit. Ma keta kabanir monuk na langit a ne ramyefar.#Yes. 13:10; 34:4; Yeh. 32:7; Yl. 2:10; 2:31; 3:15; Why. 6:12-13 30Noak a ne keta fanikar sa nbotin na langit ma nfatutu feti Yakw, Tomwate Anaky kmwa saryamprene. Ma tomwatar monuk na saryamprene keta rtasing ma ralol ma rsalan ma kmwa kof mutan dalam. Ma keta kmwa kor Ningw kuase ma nlie nlengan ma snyaingw ma idak resi.#Dan. 7:13; Za. 12:10-14; Why. 1:7 31Ma keta Yakw klwuan Ningw malaektar ma roup terompet ma delak silai desar. Ma klwuan a nbal ma rafburat Ningw tomwatar ma kfwil sir a ne rof monuk saryamprene ni kateman. Sir a ne ma rma rof timur terik barat ma rof trangan terik marmar.”
Tnyanuk pupule na katutun ara
24:32-35
32“Ka msyalan fen ngamone tnyanuk pupule na katutun ara ye nema neluk contoh ber a kmi. Farlan kmi msyalan katutun ara sangnir a ratrisan lo, iane kmi mifai feti ler metyefu sesedin lo. 33Feleles a farlan ma msyalan fanikar monuk a ne nbal, iane feti ni tewat ma Yakw, Tomwate Anaky kmwa saryamprene sesedin lo. 34Mdyengar fen ngamone safe ma kfwalak ye, ni botuan e tomwatar na are ye keta to rmat monuk a fuky terik ma rsalan kabanir monuk ma kfwalak a ne. 35Langit numur saryamprene keta rlie, nempa Ningw ngribatnir keta rmon titerik ma dedesar.”
Ka tajak dedesar la tdaf Yesus Ni mamae
24:36-44
(Mrk. 13:32-37; Luk. 17:26-30; 17:34-36)
36Yesus nfalak a nbal, “Boloka farane to tomwate fen lese ma nafai feti bengfir e Yakw, kmwa saryamprene. Malaektar ma ramin surga e to rafai, Yakw, Ratu Anaky to nafai nbal, lan Amangw ma nafai. 37Noak ma Yakw, Tomwate Anaky kmwa, keta tomwatar nir momorip feleles farlan na are nabi Nuh.#Kej. 6:5-8 38Fali noak ma to kjaip silai fuky e tomwatar rtame renum, ma rafasawe sir. Lerar monuk e sir rmorip farlan iane motak ti nait na lere ma nabi Nuh nti kabal dalam. 39Sir to rafai safe ma diat sir terik ma kjaip silai nma ma natloram monuk sir. Iane feleles a nbal farlan safe ma keta diat tomwatar, noak ma Yakw, Tomwate Anaky kmwa kbwali saryamprene.#Kej. 7:6-24 40Na lere ne farlan tomwatar du a rkarya na lete, keta Ningw malaekat nor sa ma nau kalin sa. 41Ma farlan batar du a rloli gandum, keta nor sa ma nau kalin sa. 42Mpa ka mijak dedesar, fali to mifai ni tewat ma mir Mangnrur Silai nma.
43Ka minremi tnyanuk pupule ye: Farlan das nruany nafai lo feti keta jam farye mangamnange nma na nronram, botuan feti keta i najake ni das a ne dedesar ma to ninrang ma mangamnange ne nti dalam. 44Iane nwayat ma kmi a nbal e ka mijak dedesar, fali keta metryat motak e Yakw, Tomwate Anaky kmwa saryamprene.”#Luk. 12:39-40
Tnyanuk pupule na mangkaryae ma tomwatar bise ma ralele i ma mangkaryae yatak
24:45-51
(Luk. 12:41-48)
45Yesus nfalak a nbal, “Mangkaryae ma tomwatar bise ma ralele i, ma nafai ma nayatur, keta ni makene nfair i ma neluk ulun ber mangkarya walyetar, ma lerar monuk e i nasaman tnyamar ber sir. 46Ngamone desar ber mangkaryae ne farlan ni makene nbali i e nsalan ma lolone nafmpwane ni karyae. 47Yakw kfwalak ber a kmi: ni botuan e makene ne keta nal kuase ber ni mangkaryae ne ma najake ni kabanir monuk. 48Nempa farlan mangkaryae ne ni andaun yatak e keta nfalak na dalamy: 49‘Keta dodo a betno ningw makene nma.’ Mpa nababal mangkarya walyetar a ne. Ma ntame nenum nor manganabkwar. 50Mangkaryae ne to nafai desar ni tewat ma ni makene ne nma, ma metryat motak e ni makene ne nma lo. 51Mpa keta nukun mangkaryae ne feleles farlan ma nukun tomwatar ma rose lole feti ralarat liry ber Ratu. Iane nwayat ma keta ntasing ma nkoman suse dedesar.”
ទើបបានជ្រើសរើសហើយ៖
Matius 24: YMD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
