Matius 23
23
Ka kete tlarat mangaftutu Musa Ni faretar ma tomwat Farisyar nir wewelmpampanar
23:1-12
(Mrk. 12:38-40; Luk. 11:37-54; 20:45-47)
1Ne Yesus nfalak ber tomwat ngayadin ma Ni manglartar, 2“Mangaftutu Musa ni faretar ma tomwat Farisyar nir kuase ma rfalyole tetetkar ma Ratu nal ber Musa. Iane farlan ma ramtoran Musa ni kadere. 3Mpa ka myose mlyarat safe-safe monuk ma sir raftutu ber a kmi a ne. Ma ka kete myose mlyarat nir wewelmpampane, fali sir raftutu tomwatar nempa koko sir desar e to rose rlarat safe ma raftutu ne.” 4Sir rtak tomwatar ma rose rlarat yayatur mabertar, nempa sir desar e to rtulung tomwatar ma rose rlarat yayatrwar a ne. 5Sir rose kabain ngamonar yadin fali rmpeang lan ma tomwatar rsalan ma rdangin sir. Sir biase rkete kotak#23:5 Na Alkitab Terjemahan Baru nfalak feti tali sembayang. Iane feti kotak angkir sa ma rarengi ayatar ma rnau na. angkir sa na dednir ma tangnir. Nempa sir rose kotak a ne far silai nema tomwatar rsalan feti sir rose rlarat Ratu Ni faretar. Ma ambu-ambu ma ramin nir rabit melawas sunir a ne sir rose ma rtafal ma melawas a nbal.#Bil. 15:38; Ul. 6:8; Mat. 6:1 6Sir rmpeang ma tomwatar ralang sir mpa farlan rti das sampayang nre rti festayar e, rmpeang lan ma ramtoran lury. 7Ma rsenang ma tomwatar ralang sir a na pasar ma rtar sir feti tuangguru. 8Ma kmi e ka kete myinrang ma tomwate fen lese ma ntar a kmi feti tuangguru, fali kmi monuk ye farlan awayar a kmi. Ma mir tuangguru ne lan lese iane Yakw. 9Ma ka kete mtyar tomwate fen lese na saryamprene ye feti, “Amo, fali Amninrar lan lese, iane Amninrar na surga.” 10Ma ka kete myinrang ma tomwatar rtar a kmi feti Mangnrure, fali mir Mangnrure lan lese, iane Yakw, Ray Silai ma Ratu nyoding a ne lo. 11#Mat. 20:26-27; Mrk. 9:35; 10:43-44; Luk. 22:26Nof a kmi e ise ma nmpeang ma silai i, ka i neluk mangkaryae ber a kmi. 12#Luk. 14:11; 18:14Ma ise ma nafdas i, keta Ratu nafufu i, ma ise ma nafufu i, keta Ratu nafdas i.
Yesus ndotar tomwatar ma rose felnir farlan tomwat ngamonar
23:13-36
13Yesus nfalak, “Suse desar ber mangaftutu Musa Ni faretar ma tomwat Farisyar a kmi! Kmi ye ma myose felmir farlan tomwat ngamonar. Kmi myose mtyeri tomwatar nwayat ma to reluk Ratu Ni tomwatar. Ma koko kmi a nbal e to mpyeang ma myeluk Ratu Ni tomwatar.”
14[Suse desar ber mangaftutu Musa ni faretar ma tomwat Farisyar a kmi! Kmi ye ma myose felmir farlan tomwat ngamonar. Kmi mfyule bat somar nema myonri nir dasebabe, ma msyampayang e dodo rut la mtyeri mir adat yatkar. Botuan feti keta Ratu nukun a kmi maberat desar.]
15Suse desar ber mangaftutu Musa ni faretar ma tomwat Farisyar a kmi! Kmi ye ma myose felmir farlan tomwat ngamonar. Kmi miflolwain myof dol ma da ma mlyole nusar monuk ma minriak tomwatar sa ma nlarat mir yayatrwar. Ma noak ma nlarat a kmi e kmi myose ma ni adat nayatak a nlengan nof a kmi, iane nwayat ma ubany ber i ma nti neraka.
16Suse desar ber mangfaret Yahudyar a kmi! Kmi farlan matbole ma nfatutu dalamtene ber tomwat walyetar. Kmi miftutu tomwatar feti: Farlan tomwatar sa nsompe nlang Ratu Ni Das Silai, iane feti sompe ne to nkete i. Nempa farlan i nsompe e nlang kabain masar ma ramin Ratu Ni Das Silai, iane feti keta sompe ne nkete i. 17Hei tomwatar a kmi ma myod ma mibol! Kmi mdyaun feti kabain masar ma ramin Ratu ni Das Silai ne ubany nlengan nof Ratu Ni Das Silai ne e? Tate nre! Fali Ratu Ni Das Silai ne ma naflerap kabain masar a ne. 18Kmi miftutu tomwatar a nbal feti: Farlan tomwatar sa nsompe nlang snyompe ain, iane feti sompe ne to nkete i. Nempa farlan i nsompe e nlang kabanir ma ramin snyompe ain a ne, keta sompe ne nkete i. 19Hei tomwatar a kmi ma mibol! Kmi mdyaun feti kabanir ma ramin snyompe ain a ne ubany nlengan nof snyompe ain a ne e? Tate nre! Fali snyompe ain a ne ma naflerap kabanir ma ramin snyompe ain a ne. 20Mpa farlan tomwatar sa nsompe nlang snyompe ain, iane feti i nsompe nlang snyompe ain ma kabanir ma ramin snyompe ain a ne nbal. 21Ma farlan tomwatar sa nsompe nlang Ratu Ni Das Silai, iane feti i nsompe nlang Ratu Ni Das Silai ma Ratu ma namin das a ne nbal. 22#Yes. 66:1; Mat. 5:34Ma farlan tomwatar sa nsompe nlang Ratu Ni kadere, iane feti i nsompe nlang Ni kadere ma Ratu ma namtoran kadere ne nbal.
23 #
Im. 27:30
Suse desar ber mangaftutu Musa ni faretar ma tomwat Farisyar a kmi! Kmi ye ma myose felmir farlan tomwat ngamonar. Kmi mngyabo ma myal sepersepuluh nof mir let isnir ber Ratu. Ma kabain angkir farlan selasih, adas manis, ma jintan e kmi myal a nbal. Nempa farete ma ubany na Ratu Ni tetetkar e to mfyaduli desar. Farete ma ubany e iane feti ka myorip e to misalan sou, mlyompang tomwatar, ma myose mlyarat safe ma myoding a ne. Mpa ni botuan e ka myal sepersepuluh myof mir let isnir ber Ratu, nempa ka myose mlyarat Ratu ni faret walyetar ma ubany a ne nbal. 24Hei mangfaret matbolar a kmi! Yayatrwar ma to ubany na tetetkar ma Ratu nal ber Musa ne kmi myose, nempa yayatrwar ma ubany e kmi to myose mlyarat. Iane feleles farlan ma kmi myalin kalin mpompore myof mir krawe, nempa unta ma namin mir krawe dalam a ne mtyelan mikteme i.
25Suse desar ber mangaftutu Musa ni faretar ma tomwat Farisyar a kmi! Kmi ye ma myose felmir farlan tomwat ngamonar, safo dalmir a rfen ber kabain yatkar ma mkyampres tomwatar nir kabanir. Iane farlan ma mbyur mpinan ma gelayas burtir, nempa to mbyur dalmir, mpa lolone rarai. 26Hei tomwat Farisyar a kmi ma mibol! Ka mbyur mpinan ma gelayas dalmir a fuky nema burtir a ranglerap a nbal.
27 #
Kis. 23:3
Suse desar ber mangaftutu Musa ni faretar ma tomwat Farisyar a kmi! Kmi myose felmir farlan tomwat ngamonar. Kmi farlan kubur ma racat burit ror cat mafuti, mpa tomwatar rsalan kubur a ne nangfuty ma nangafel, nempa dalam e nfen ber duryar ma kabain mpuskwar. 28Farlan kmi a nbal, tomwatar rsalan a kmi e mingafel desar fali myose felmir farlan tomwat ngamonar, nempa dalmir e nfen ber kabain yatkar.
29Suse desar ber mangaftutu Musa ni Faretar ma tomwat Farisyar a kmi! Kmi ye ma myose felmir farlan tomwat ngamonar. Kmi myose nabyar nir kubrar, ma tomwatar ma rose rlarat Ratu Ni mpempeang a ne kmi mifyamping nir tuguar a nbal. 30Ma mfyalak, “Farlan kam morip a na are empmyamar nusmyamar e kam to mbalak sir ma rfen nabyar yadin.” 31Nempa kmi mfyalak farane e iane kmi myoding feti kmi ye dasdalam myor tomwatar ma rfen nabyar a ne. 32Mpa ni ngafele e, ka myose msyoru kabain yatkar ma empmir nusmir a rose ne. 33Hei tomwat yatkar a kmi! Kmi miyatak farlan manunu. Ka kete mdyaun feti bise ma mlyiak a kmi mpa keta Ratu to nukun a kmi a na neraka. 34Mdyengar fen ngamone safe ma kfwalak ye! Keta Yakw kswiduk tomwatar ketnir ber a kmi. Sir a ne nabyar, tomwatar ma nir andaun ngamone, ma tuanggurwar ma raftutu Ratu Ni ngribatnir. Nempa keta kmi mfyen ketnir nof sir a ne ma msyangwalu sir, ma ketnir e msyiksa sir na mir das sampangar, ma ketnir a nbal e mifuri sir myof kote sa far kote sa. 35Iane nwayat ma Ratu keta nukun a kmi, fali empnir nusmir a rfen tomwatar ma to nir sal. Ntabw nof ma rfen Habel terik ma rfen Zakharia, Berekhya anaky. Sir rfen i a na Ain Lelerap ma snyompe ain let na Ratu Ni Das Silai. 36Mdyengar fen ngamone safe ma kfwalak ye, “Ni botuan e tomwatar a kmi ma myorip a na are ye ma keta Ratu nukun a kmi nlarat mir adat yatkar ma kmi myose ne.”
Yesus dalamy suse na kote Yerusalem
23:37-39
(Luk. 13:34-35)
37Yesus nfalak, “Hei tomwat Yerusalemar a kmi! Kmi ye ma mfyen nabyar, ma mikjai mfyen tomwatar ma Ratu nsiduk sir ber a kmi. Lain yadin lo ma Yakw kmpweang resi ma kufbwurat a kmi monuk ma mlyosir Yakw, farlan sif ene ma nafburat angkir na slyapan lebabnir, nempa kmi to mlyampir. 38Mpa mdyengar, keta Ratu nti a ntate kmi. 39Yakw kfwalak ber a kmi, ntabw nof lere ye keta to mkyeban Yakw lo, terik ni tewat ma mfyalak:
‘Mya ma tdangin I ma nma nor Ratu ma neluk Mangnrure ne Ni kuase.’”
ទើបបានជ្រើសរើសហើយ៖
Matius 23: YMD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
